ROMANS 2

1Inngwa anaam, annyɔɔng annyiyɔng mung balɔɔt balɔk kibbi ɔɔ? Lakkpenge ba ayangayɔng ffet a ffet mkkpa ale ɔlɔɔt wa ale wa ale. Bɔfɛɛn bwa annyinɛyɔng balɔɔt balɔk kibbi, annyɔɔng assɛ anaangyɔng kɛssanga kɔlɔɔk ’kwɔng baang kkwɔn ka abbɛ banaangnɛ, awwɔɔlwɔyɔng kɛyɔɔng. 2Isan lɔsan ittɛ Ɔlɔɔmɔlɔɔm ule bbwak ka unnyinɛ balɔɔt ba banaangnɛ kɛssanga lilɔɔk ’sɔng mung kibbi. 3Inngwa anaam, annyɔɔng biini anaangyɔng bɛfɛɛn ’byɔng mung bya annyinɛyɔng balɔɔt kibbi ka abbyɛ. Attina attɛ vvenɛ attayɔng ka kɛkaal Ɔlɔɔmɔlɔɔm ɔɔ? 4Vvenɛ baang afimyɔng kiggwoom a kɔlɔɔk ammɛ la kɛbbwa ifim sa ɔbbwanɛ ɔppyɛɛkwɔyɔng ka kibbe luppyam nsan. Asanyɔng lɔsan ka lɔkkwɔɔn attɛyɔng Ɔlɔɔmɔlɔɔm uggwoom kɔlɔɔk ka ubumnɛ ɔttɛ ɔnaangwɔyɔng anaangyɔng busannɛ ka bubbi bwa anaangnɛyɔng. 5Keem ayangayɔng kɛkkaam a luppyam sa asinɛyɔng kɔlɔɔk lippyee. Anaangyɔngbong akama wa annyɔɔng vvenɛ ɔtta liggbenge ka kɛtɔm ’sɔng baang sa binyanga Ɔlɔɔmɔlɔɔm la kɛkaal ammɛ sa bbwak kile kissolo. 6Ɔlɔɔmɔlɔɔm ule unnyi lutini ɔlɔɔt la vvɔn lɛsɔɔk ɔssanga bwa ɔlɔɔt ɔlɔɔt ulenɛ lɛnaang. 7Balɔɔt balɔk banaang budoddo ɛkɛtɛ ɔkkpɛlɛ baggyan budoddo Ɔlɔɔmɔlɔɔm la latele la kuddu kwa kusinɛ likpeke. Ɔlɔɔmɔlɔɔm ule unnyi balɔɔt ’bɔng baang kuddu kwa kɛfal a kɛfal. 8Balɔɔt balɔk bassɔp bɔfɛɛn. Bafim kwa kulenɛ bbwak, bakup kwa kɔbbɔlnɛ. Kwa abbɛ, Ɔlɔɔmɔlɔɔm vvenɛ ɔnyanga gaang gaang la abbɛ. 9Balɔɔt ɔkkpɛlɛ ba banaangnɛ bubbi, vvenɛ bayɛn akama bappyee bɔssɔp. Balɔɔt a Jews vvenɛ bakɔɔm ɛtɔk bayɛn akama ’wɔng baang tɛ́ttɛ́ kɛbap kɛffɛlɛ Ikanakana. 10Ɔzzànga Ɔlɔɔmɔlɔɔm vvenɛ unnyi balɔɔt ɔkkpɛlɛ ba banaangnɛ lilɔɔk sa liyyɛɛpnɛ budoddo ammɛ, la latele la bɔkaat. Ule ɔkɔɔm ɛtɔk unnyi balɔɔt a Jews tɛ́ttɛ́ unnyi Ikanakana. 11Ɔlɔɔmɔlɔɔm ule ɔkaal kɛkaal a balɔɔt ɔkkpɛlɛ bbwak bbwak. Kilup a libbu ba kile. 12Ikanakana Lafɔɔ a Moses ba bayanga, banaang bubbi bassɛ la abbwɛ, ɔzzànga kwa basinɛ Lafɔɔ a Moses liloko lissi. Balɔɔt a Jews bayanga Lafɔɔ a Moses, ka banaangnɛ bubbi bakɔɔm Lafɔɔ ’zɔng baang bakaal kɛkaal abbɛ. 13Kippyee Lafɔɔ lissi kɛnaangnɛ balɔɔt bataa bbwak la Ɔlɔɔmɔlɔɔm. Ule kɛnaang kwa Lafɔɔ lalɔɔknɛ. 14Ikanakana Lafɔɔ ba bayanga, ɔzzànga ɛkɛtɛ ya kɔsaapnɛ luppyam abbɛ, banaang kwa Lafɔɔ lalɔɔknɛ. Abbɛ biini balenɛ lifɔɔ abbɛ mkkpa basi Lafɔɔ lɛyanga. 15Linaang abbɛ liyɔɔnɛ isan ittɛ bakkpɔkbong bwa Lafɔɔ lalɔɔknɛ bassɛnbɛ ka ippyam. Ippyam abbɛ ɔgbaa iyɔɔyɛlɛ isan ittɛ nkwɔng kule ka lɔkkwɔɔn ka ittina abbɛ innyinɛbɛ kibbi ɛkɛtɛ ɛlɔk, ɛkɛtɛ ɛlɔk ibee la abbɛ. 16Ka kulenɛ tɛ̀ttɛ̀ Kuttu-Budoddo kwa nbwɔɔlɔnɛ, kùlé kúlè ning baang ka kɛtɔm ’sɔng baang sa Ɔlɔɔmɔlɔɔm ule ɔkɔɔm Jesus Christ ɔkaal kɛkaal ittina lalup a balɔɔt. 17Annɔ bɛɛ? Akkwɔɔwɔ kɛyɔɔng attɛ annɔ ɔlɔɔt a Jew; kɔbɛtɛwɔ kwa Lafɔɔ, anaang kamma kwa Ɔlɔɔmɔlɔɔm; 18asan lɔsan bwa Ɔlɔɔmɔlɔɔm ɔggyannɛ ɔttɛ anaang. Ɔgbaa, akkoopbong Lafɔɔ asan kwa kulenɛ bbwak. 19Asan lɔsan kkpelegedee attɛ annɔ alenɛ ɔlɔɔt wa ɔkɔɔmnɛ bassi-ifim ɛtɔk. Annɔ alenɛ buppwolo balɔɔt ba batiinɛ ka kisul. 20Annɔ alenɛ ɔlɔɔt wa ɔbbanɛ bazingizingi bikɔɔm, ale ɔlɔɔt wa ukopolonɛ bwɔɔntiti kɔlɔɔk. Ka ɛtɔk ya Lafɔɔ, luttina lulewɔ bɛlɛng attɛ asanbong ɔkkpɛlɛ azzɛ affata ɔbɛtɛ la lɔkkwɔɔn a kɔlɔɔk. 21Akopolo balɔɔt balɔk, bɔng asiwɔnɛ kɛyɔɔng likopolo? Ka akopolonɛ lɛmmwɔɔl Ɔlɔɔmɔlɔɔm attɛ, “Tɛ̀ttɛ́ ayip.” Annɔ biini ayip mung ɔɔ? 22Attɛ, “Tɛ̀ttɛ́ akup wanavva ɔlɔɔt.” Annɔ akup mung wanavva ɔlɔɔt ɔɔ? Attɛ bwaan-ilɔɔp ɛlat ba bayɛɛp, ngkka alup bɔng alɛɛpbyɛ. 23Anaang kamma ka ayanganɛ Lafɔɔ-Ɔlɔɔmɔlɔɔm. Ngkka assɛɛn mung Ɔlɔɔmɔlɔɔm ka izzit ka abɛpɛnɛ Lafɔɔ ammɛ ɔɔ? 24Luvva-Ɔlɔɔmɔlɔɔm lɔlɔɔk lɔttɛ, “Kussi ka annyɔɔng balɔɔt a Jews, Ikanakana balɔɔk bubbi batum lɛkɔɔl Ɔlɔɔmɔlɔɔm.” 25Alokonɛ Lafɔɔ, kɛzza lɛtaa annɔ kɛyanga isak. Asinɛ Lafɔɔ liloko mkkpa ale lɛtaa lɛzza, atii tɛ̀ttɛ̀ atakanɛ lɛtaa lɛzza. 26Ulenɛ bɔfɛɛn Ikanakana ba basinɛ lɛtaa lɛzza batelenɛ kwa Lafɔɔ lalɔɔknɛ, attina attɛ Ɔlɔɔmɔlɔɔm baala ɔtɔkbɛ tɛ̀ttɛ̀ balenɛ lɛtaa lɛzza ɔɔ? 27Ikanakana bassɛɛnwɔyɔngbong annyɔɔng balɔɔt a Jews ka kɔlɔɔk ka balokonɛ Lafɔɔ mkkpa basi lataa lɛzza; annyɔɔng abɛpɛnɛyɔng Lafɔɔ mkkpa ndɔk aleyɔngzɛ lɛkkpɔk, aleyɔng lataa lɛzza. 28Kkpɔɔ wa Jew ’wɔwɔng ulenɛ lɛtaa lɛzza ka lɔkkwɔɔn? Ɔlɔɔt wa ulenɛ wa Jew ka zzeen lɛtaa ammɛ kile linaang a balɔɔt lissi ulenɛ wa Jew bbwak. 29Ɔlɔɔt wa Jew bbwak ulenɛ ɔlɔɔt wa ulenɛ wa Jew ka luppyam. Ammɛ ulenɛ ɔlɔɔt wa luppyam ammɛ lulenɛ lɛtaa lɛzza. Uwɔng kɛnaang a Kuyeeng Ɔlɔɔmɔlɔɔm. Kɛnaang a lafɔɔ za balenɛ lɛkkpɔk lissi. Ammɛ ’wɔng baang ulenɛ ɔlɔɔt wa ɔtɔknɛ ppyɛɛ ka Ɔlɔɔmɔlɔɔm, ka balɔɔt lissi.

will be added

X\