ROMANS 15

1Ayyɔɔt ba kiyila ayyɔɔt kɛkkaamnɛ ilenɛ ba buttelenɛ balɔɔt ba kiyila abbɛ kisinɛ lɛkkaam batɔkɔ latɔkɔ abbɛ. Ifɔngɔyɛlɛ ayyɔɔt biini kɛnaang ɔwaayɛlɛ. 2Lutini ’gwɔng ɔlɔɔt la vvɔn ɔnaang wabbɛ ɔwaamɛ ka budoddo ammɛ biini nkwaaning ɔnaangmɛ ɔkkaam ka kiyila. 3Christ usi lɛnaang ɔwaamɛ ammɛ biini. Lutini ’gwɔng ɔdɔkɔ ɔnaang tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Bɛnɔk bya balɔɔt banɔkwɔnɛyɔng bivvoongnɛbong anaam.” 4Kɔlɔɔk ɔkkpɛlɛ kwa bakkpɔknɛ ka luvva-Ɔlɔɔmɔlɔɔm badɔkɔ bakkpɔk battɛ bakopoloyɛlɛ, nkwaaning kussi ka kibbe-luppyam la bikɔɔm pya luvva-Ɔlɔɔmɔlɔɔm lunnyinɛyɛlɛ, iyanga luttina. 5Numa Ɔlɔɔmɔlɔɔm wa unnyinɛ kibbe-luppyam la kɛbba-bikɔɔm ɔnaangwɔyɔng ayangayɔng luttina ggwɔn ka kikup a linaang a Jesus Christ, 6nkwaaning ayangayɔng lɛmmwɔɔl zzɔn, abunguyɔng Ɔlɔɔmɔlɔɔm, Abassɛ Uyini ayyɔɔt, Jesus Christ. 7Atɔkyɔng ɔlɔɔt la vvɔn ka latele Ɔlɔɔmɔlɔɔm tɛ̀ttɛ̀ Christ ɔtɔkwɔnɛyɔng annyɔɔng. 8Nbwɔɔlɔwɔyɔng nttɛ Christ ɔdɔkɔ bɔɔyi balɔɔt a Jews nkwaaning basan battɛ, Ɔlɔɔmɔlɔɔm bubbi ba ɔnaang, ɔlɔk ɔnaang nsekele wa Ɔlɔɔmɔlɔɔm ɔnaangnɛ la balɔɔt ayyɔɔt ba iyɛddɛ-iyɛddɛ ule ka lɔkkwɔɔn. 9Ɔgbaa nkwaaning ɔnaang balɔɔt Ikanakana bakkwoong babungu Ɔlɔɔmɔlɔɔm ka kibbe lɛttɔ ammɛ. Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ɔzzanga vvenɛ nwomo Ɔlɔɔmɔlɔɔm kɛnaang ɛfɛɛn a Ikanakana ilɔk, Vvenɛ nsoom kisoom nbungu lɛkɔɔl ammɛ.” 10Lɔbbal lɛttɛ, “Ikanakana aggeleyɔng la balɔɔt ba Ɔlɔɔmɔlɔɔm ɔsanganɛ!” 11Lɔbbal lɛttɛ, “Ikanakana ɔkkpɛlɛ abunguyɔng Ebinukkpaapi; Balɔɔt ikaan ɔkkpɛlɛ abungumɛyɔng!” 12Isaiah ɔbbal lɛlɔɔk ɔttɛ, “Ɔlɔɔt a kikkwu a Jesse vvenɛ uffu; vvenɛ banaangmɛ uzzilɛttɔ Ikanakana, vvenɛ baloko ittina abbɛ ka ammɛ.” 13Numa Ɔlɔɔmɔlɔɔm wa lɔnngwa lussinɛ ka ammɛ unnyiwɔyɔng laggele la bɔkaat ka kiyila sa ayanganɛ atummɛyɔng, nkwaaning ittina annyɔɔng immala ka lakke Kuyeeng-Ɔlɔɔmɔlɔɔm. 14Ikpana anaam, anaam biini nttina nttɛ luttina kɛnaang a budoddo lɔttalawɔyɔng lɔttala ka tɔkɔlɔ. Nttina nttɛ asanyɔngbong lilɔɔk ɔkkpɛlɛ sa ale akɔɔm akopoloyɔng ɔlɔɔt la vvɔn. 15Ɔzzànga ka lɛmmwɔɔl ’zɔng mung, nkkaambong luppyam nkkpɔk ntum lilɔɔk sa nttinanɛ. Nkkaam luppyam ka budoddo bwa Ɔlɔɔmɔlɔɔm ulenɛnɛ linnyi, 16ka nlenɛ bɔɔyi a Jesus Christ ka nnaangnɛ kɛnaang ka Ikanakana. Nnaang kɛnaang tɛ̀ttɛ̀ ɔssɛɛn-a-luzɔɔm ka nkopolonɛ Kuttu-Budoddo kwa kussinɛ ka Ɔlɔɔmɔlɔɔm, nkwaaning Ikanakana bale lɛsɔɔk za Ɔlɔɔmɔlɔɔm ɔtɔknɛ, za Kuyeeng-Ɔlɔɔmɔlɔɔm kɔnaangnɛ kunnyimɛ. 17Ka ntaanɛ ka bɔkaat la Jesus Christ, nkkwoong mung nyanga bɔwaa ka kkwɔɔt ka nlenɛ ka kɛnaang a Ɔlɔɔmɔlɔɔm. 18Vvenɛ nkkaam luppyam nlɔɔk kɔlɔɔk kwa Christ ɔtɔɔmnɛnɛ ɔttɛ nnaang Ikanakana batele Ɔlɔɔmɔlɔɔm. Christ ɔnaang kɔlɔɔk ’kwɔng ka lɛmmwɔɔl a kamma la linaang, 19ka lakke kɛyɔɔ linaang la bɛmaanga, ka lakke Kuyeeng-Ɔlɔɔmɔlɔɔm. Ɔzzánga ka kɔssɛ kwa nssɛnɛ ɔkkpɛlɛ ka ussinɛ Jerusalem umii Illyrium, nbwɔɔlɔ ufaa Kuttu-Budoddo kwa Christ pwool pwool. 20Luttina anaam lulenɛ ka kɛbwɔɔlɔ Kuttu-Budoddo a Christ ka ifɛɛn ya batakanɛkwɛ lippyee, tɛ̀ttɛ́ nffu nkeele bwa ɔlɔɔt ɔlɔk ulenɛ litte. 21Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Balɔɔt ba batakanɛbɛ kɔlɔɔk ammɛ lɛbwɔɔlɔ, vvenɛ bayɛn ka zzeen. Balɔɔt ba batakanɛkwɛ lippyee, vvenɛ basankwɛ.” 22Kwakkwɛ mung kiffu ka ɛfɛɛn annyɔɔng kilenɛnɛ littun bikkpit ggbadam. 23Ɔzzànga gedegede mung nvvebong kɛnaang anaam ka ifɛɛn ’yɔng mung, nle libum ka likkpa ggbadam nttɛ nffu nyɛnwɔyɔng, 24nttinabong kiffu gedegede mung. Vvenɛ nbɛnɛ nnyɛnwɔyɔng ka nle ka nmiinɛ Spain, ɔlɔk ayaammɛyɔng nmii nlewɔnɛyɔng livve likoolo. 25Gedegede mung nle ka nmiinɛ Jerusalem nnaang kɛnaang a balɔɔt Ɔlɔɔmɔlɔɔm bakang. 26Izɔɔm ya Macedonia la Greece inaangbong luttina gwa kittele balɔɔt Ɔlɔɔmɔlɔɔm ba ɔbbɔlnɛbɛ ka Jerusalem. 27Abbɛ biini banaangnɛ luttina gwa kɛnaangkwɛ ka ulenɛ kɔlɔɔk kwa lɔkkwɔɔn, kule bbwak ka battelenɛ balɔɔt ’bɔng mung ba ɔbbɔlnɛbɛ. Balɔɔt a Jews batul ppyɛɛ Kuyeeng-Ɔlɔɔmɔlɔɔm abbɛ la Ikanakana. Ikanakana bassɛ battele balɔɔt a Jews la bɛfɛɛn bya Ɔlɔɔmɔlɔɔm ulenɛbɛ ppyɛɛ ka abbyɛ lɛnaang. 28Nlenɛ kɛnaang ’sɔng livve, nnyibɛ ikkpoko ’yɔng ɔkkpɛlɛ ya bannyinɛbɛ, vvenɛ ngbata nmii Spain. Vvenɛ nkoolowɔyɔng ɔkkpɛlɛ ka ɛtɔk a kimii bakang. 29Ɛkɛtɛ ya nle nffu ka ɛfɛɛn annyɔɔng, nsan lɔsan nttɛ vvenɛ nffu la ppyɛɛ a Christ wa lɛbaang. 30Ikpana anaam, nkɔɔmbong Uyini ayyɔɔt, Jesus Christ, la kɛsaap sa Kuyeeng-Ɔlɔɔmɔlɔɔm kunnyinɛnɛ nkkpengewɔyɔng nttɛ affu itoolo izɔɔmyɔng ɛkɛtɛ ɔkkpɛlɛ innyiyɔng Ɔlɔɔmɔlɔɔm ka lɛttɔ anaam. 31Azɔɔmyɔng nkwaaning bulɔk businɛ lɛnaang ka ɛfɛɛn a balɔɔt ba basɛlɛnɛ kiyila ka Judea, nkwaaning balɔɔt Ɔlɔɔmɔlɔɔm bayila kɔlɔɔk a kɛnaang anaam bakang ka Jerusalem. 32Ɔzzànga vvenɛ nffu ka ɛfɛɛn annyɔɔng nkoolowɔyɔng la laggele, kɔsaapnɛ Ɔlɔɔmɔlɔɔm. 33Numa Ɔlɔɔmɔlɔɔm wa bɔkaat bussinɛ ka ammɛ, ɔtaa la annyɔɔng ɔkkpɛlɛ. Kule ning.

will be added

X\