ROMANS 14

1Atɔkyɔng ɔlɔɔt duu assɛɛnyɔng ka bɛzzɔkɔ mkkpa kiyila ammɛ kisi lɛkkaam. Tɛ̀ttɛ́ akangalayɔng ikangala la ammɛ atumyɔng kwa uttinanɛ. 2Kiyila ɔlɔɔt ɔlɔk kɛfɔngɔmɛ mung uzzi bɛfɛɛn duu, ɔzzanga ɔlɔɔt wa kiyila ammɛ kisinɛ lɛkkaam, uzzi livva keem. 3Ɔlɔɔt wa uzzinɛ bɛfɛɛn ɔkkpɛlɛ, tɛ̀ttɛ́ ɔkpɛn ɔlɔɔt wa usinɛ lizzi. Ɔlɔɔt wa uzzinɛ livva keem, tɛ̀ttɛ́ unnyi ɔlɔɔt wa uzzinɛ bɔfɛɛn duu kibbi, Ɔlɔɔmɔlɔɔm ɔtɔkmɛbong. 4Annɔ alenɛ nyinɔɔng wa annyinɛ bɔɔyi ɔlɔɔt ɔlɔk kibbi? Ule abassɛ ammɛ kɛyɔɔng ka ule utini ɔttɛ, ukumbong, ɔlɔk ɔttɔbong ka kɛkaal. Ɔzzánga vvenɛ ukum ka kɛkaal ka Uyini ukkwoongnɛ ɔnaangmɛ ukum. 5Ɔlɔɔt vvɔn uttina ɔttɛ kɛtɔm kɛlɔk kile baang sa kɛttanɛ bɛtɔm bɛlɔk liggbenge. Ɔlɔɔt ɔlɔk uttina ɔttɛ bɛtɔm bile kɛssanga ssɔn. Ɔlɔɔt la vvɔn ɔnaang luttina gwa lɔkkaamnɛ. 6Ɔlɔɔt wa uttinanɛ gaang gaang kwa kɛtɔm ssɔn, ɔnaang ning baang ka latele Uyini. Ɔlɔɔt wa uzzinɛ bɔfɛɛn duu, uzzibwɛ ka latele Uyini, ka uwomonɛ Ɔlɔɔmɔlɔɔm kɛnaang ka kazzi kwa uzzinɛ. Ɔlɔɔt wa ufimnɛ bɔfɛɛn ’bwɔng baang kizzi, ufim ka latele Uyini, uwomo Ɔlɔɔmɔlɔɔm kɛnaang ɔgbaa. 7Ɔlɔɔt wa uddunɛ unnyimɛ kɛyɔɔng ba ule, ɔlɔɔt wa ubbenɛ kɛyɔɔng ba ule. 8Iddunɛ, iddu kwa Christ. Ibbenɛ, ibbe kwa Christ. Mkkpa itaa ka kuddu ɔlɔk ibbe, ile ba Christ. 9Christ ubbe, ufungala ka lubbe, ɔtaa ka kuddu, nkwaaning ule Uyini bakokolo la babbu. 10Annyɔɔng wa azzinɛyɔng livva keem, mbɔng annyɔɔng annyinɛyɔng wannyɔɔng kibbi? Annyɔɔng wa azzinɛyɔng bɔfɛɛn duu, mbɔng attinanɛ attɛyɔng wannyɔɔng bɔfɛɛn bwa gbɔɔ? Ɔkkpɛlɛ ayyɔɔt vvenɛ ibee ka lusso Ɔlɔɔmɔlɔɔm ɔkaalyɛlɛ kɛkaal. 11Luvva Ɔlɔɔmɔlɔɔm lɔttɛ, “Uyini ɔttɛ, ‘Ka nlenɛ lule mung, ɔlɔɔt la vvɔn vvenɛ ukunnɛ laddu ka lusso, ɔbwɔɔlɔ ɔttɛ anaam nlenɛ Ɔlɔɔmɔlɔɔm.’ ” 12Kwakkwɛ ɔlɔɔt la vvɔn ule ɔbwɔɔlɔ Ɔlɔɔmɔlɔɔm kɔlɔɔk a lɛfal ammɛ biini. 13Ka kulenɛ ning, ikkyaayɔng kinnyi balɔɔt kibbi ifɔngɔ. Lutini ’gwɔng inaang kɔlɔɔk kwa kule kusi waanyɔɔng lɛdɛm ɔnaang bubbi. 14Bɔkaat anaam la Uyini Jesus bunaangnɛnɛ nsan ka lɔkkwɔɔn nttɛ, bɔfɛɛn a kazzi bwa businɛ lɛyyɛɛp kɛyɔɔng abbwɛ ba bule. Ɔzzanga ɔlɔɔt wa uttinanɛ ɔttɛ bɔfɛɛn ’bwɔng baang ba buyyɛɛp, mɛ baala buyyɛɛp. 15Adɛmnɛ wannyɔɔng uddopo ɔssanga kwa bɛfɛɛn bwa azzinɛ, asibongkwɛ ka kɛsaap lɛnaang. Tɛ̀ttɛ́ ayila kazzi kwa azzinɛ kɛnaang ɔlɔɔt wa Christ ubbenɛ ka lɛttɔ ammɛ ɔyɛn akama. 16Tɛ̀ttɛ́ afɔngɔ bwa attinanɛ attɛ buyyɛɛp mung buyanga ubbu lɛkɔɔl. 17Itutum-Ɔlɔɔmɔlɔɔm kazzi la kɛvva lissi. Ile ka kɛsɛlɛ bubbi la kɛyanga bɔkaat, la laggele. Bɛfɛɛn ’byɔng Kuyeeng-Ɔlɔɔmɔlɔɔm kunnyinɛ. 18Ɔlɔɔt duu wa uttelenɛ Christ ka ɛtɔk ’yɔng, ɔtɔk laggele Ɔlɔɔmɔlɔɔm la budoddo balɔɔt. 19Ɔzzánga inaang luttina itum bɛfɛɛn bya bile bɛkɔɔm bɔkaat biffu bittele ɔlɔɔt la vvɔn ɔyanga lakke. 20Tɛ̀ttɛ́ abɛpɛyɔng bwa Ɔlɔɔmɔlɔɔm ulenɛ lɛnaang kwa kazzi. Akkwoong mung azziyɔng lizzi ɔkkpɛlɛ, ɔzzànga ba kɔyyɛɛp ka ale azziyɔng kazzi kwa kale kanaang wannyɔɔng ɔttɔ ka bubbi. 21Kwa kule kɔyyɛɛp ule ka ale asiyɔng ɛsɛɛn lɛbɛlɛ lizzi, asiyɔng batak lɛbɛlɛ lɛvva, asiyɔng kɔlɔɔk duu lɛnaang, ulenɛ ka bɛfɛɛn ’byɔng bile bɛnaang wannyɔɔng ɔttɔ ka bubbi. 22Alokoyɔng kwa ayanganɛ kiyila atumyɔng kɔlɔɔk nkwɔng mung ka bɛzzɔkɔ annyɔɔng la Ɔlɔɔmɔlɔɔm. Laggele lale za ɔlɔɔt wa usinɛ littina ɔttɛ ammɛ ubbu ɔlɔɔt ka ɔnaangnɛ kwa ɔsannɛ ɔttɛ kɔyyɛɛpmɛ mung! 23Ɔzzànga ɔlɔɔt wa udeetanɛ kwa bwa uzzinɛ, Ɔlɔɔmɔlɔɔm vvenɛ ɔwwɔɔlmɛ uzzinɛbwɛ ka ɔsɛlɛnɛ kiyila ka linaang ammɛ. Bɔfɛɛn duu bwa anaangnɛ ka asɛlɛ kiyila, nzang baang bubbi.

will be added

X\