ROMANS 13

1Ɔlɔɔt la vvɔn utele bazzi-lɛttɔ ɛkpansi. Lakke ɔkkpɛlɛ lassi ka Ɔlɔɔmɔlɔɔm. Ɔlɔɔmɔlɔɔm ulokonɛ bazzi-lɛttɔ ɛkpansi ba iyɛnnɛ mung. 2Ɔlɔɔt wa ufimnɛ kwa bazzilɛttɔ, ufimbong kwa Ɔlɔɔmɔlɔɔm ulenɛ litini. Ɔlɔɔt wa ufimnɛ ɔggyanbong kɛkaal unnyimɛ kɛyɔɔng. 3Balɔɔt ba banaangnɛ budoddo, bazzi-lɛttɔ ɛkpansi bɛ ba babbwɔpɔ. Bazzi-lɛttɔ babbwɔpɔ balɔɔt ba banaangnɛ bubbi. Kɔsaapwɔyɔng mung ka uzzilɛttɔ ɔbbwɔpɔnɛyɔng ɔɔ? Kusiwɔnɛyɔng lɛsaap, anaangyɔng budoddo usseke ubunguwɔyɔng. 4Ammɛ ulenɛ bɔɔyi Ɔlɔɔmɔlɔɔm wa ɔnaangnɛ kɛnaang ka budoddo annyɔɔng. Ɔzzànga anaangnɛyɔng bubbi, ɔbbwɔpɔwɔyɔng, lakke ammɛ za kɛyɔɔ ɔlɔɔt akama lale ka lɔkkwɔɔn. Ammɛ ulenɛ bɔɔyi Ɔlɔɔmɔlɔɔm wa ɔsamnɛ kitun a kɔlɔɔk Ɔlɔɔmɔlɔɔm ufee balɔɔt ’bɔng baang ba banaangnɛ bubbi. 5Kwakkwɛ ale ateleyɔng bazzilɛttɔ ɛkpansi, ka kwa kitun kɔlɔɔk Ɔlɔɔmɔlɔɔm lissi, ɔzzànga tɛ̀ttɛ̀ lɔtan annyɔɔng lɔttɛnɛ ateleyɔngbɛ. 6Bazzilɛttɔ ɛkpansi banaang kɛnaang bannyi Ɔlɔɔmɔlɔɔm, kwakkwɛ baang annyinɛyɔng innamba. 7Atakbɛ bwa alenɛbɛ la ippwoot. Akkpɛɛyɔng innamba ya annyɔɔng la ya bɛfɛɛn annyɔɔng. Ɔzzànga annyiyɔngbɛ latele ɔkkpɛlɛ. 8Tɛ̀ttɛ́ azziyɔng wannyɔɔng ippwoot. Ippwoot ya ayanganɛyɔng ulenɛ kɛyanga kɛsaap la wannyɔɔng. Ɔlɔɔt duu wa wabbɛ ɔsaapmɛnɛ, ɔlɔɔt ’wɔng baang ulokobong Lafɔɔ. 9Lafɔɔ za lattɛnɛ, “Tɛ̀ttɛ́ akup wanavva ɔlɔɔt; tɛ̀ttɛ́ awwɔɔl balɔɔt; tɛ̀ttɛ́ ayip ssip; tɛ̀ttɛ́ akkɔlɔ bɔfɛɛn a wannyɔɔng.” Ɔkkpɛlɛ azzɛ mung la lalɔk za latiinɛ bakang, lale ka lifɔɔ zzɔn za lɛttɛnɛ, “Wannyɔɔng ɔsaapwɔ tɛ̀ttɛ̀ asaapwɔnɛ kɛyɔɔng.” 10Ɔlɔɔt duu wabbɛ ɔsaapmɛnɛ, bubbi mɛ baala ɔnaang. Kɛyanga kɛsaap la wannyɔɔng ulenɛ kiloko Lafɔɔ ɔkkpɛlɛ. 11Anaangyɔng ’kwɔng mung ka asannɛyɔng liggbili. Liggbili lɛffɔbong za afungalanɛyɔng ka bulaa. Ka ɛkɛtɛ ya bale ka bakkalanɛyɛlɛ elenɛ lɛtta lɛkkɛtɛ ɛtta ɛkɛtɛ ya iggɔnɔggɔ iyanga kiyila. 12Kisul kile ka kɛsaalnɛ. Kikoon kitii kɛtɛkɛtɛ mung. Ikkyaayɔng kɛnaang a bɛfɛɛn a kisul ifɔngɔyɔng, isam bɛfɛɛn a kullu illu ka buppwolo. 13Ikɔɔmyɛlɛ kɛyɔɔng bbwak. Kikup a bwanavva kɛfɔngɔ kile, ɔlɔk kibimi. Ibbyap ifɔngɔ kile la kɛnaang a kɔlɔɔk kitum ɔlɔɔt. Kullu kɔfɔngɔ kile, gɔɔ luleep. 14Akkimyɔng bɛfɛɛn a lɛkɔɔng a Uyini Jesus Christ afɔngɔyɔng kɛnaang a bubbi tɛ̀ttɛ̀ lafal annyɔɔng laggyannɛ.

will be added

X\