ROMANS 12

1Ikpana anaam, nkkpengewɔyɔng ka kiggwoom a kɔlɔɔk Ɔlɔɔmɔlɔɔm kɛttalanɛ nttɛ: Asamwɔyɔng kɛyɔɔng anaangyɔng bigwugwulu annyiyɔng Ɔlɔɔmɔlɔɔm. Ataayɔng tɛ̀ttɛ̀ ɔggyannɛ ɔttɛ ataanɛyɔng ning baang kɔsaapmɛ. Akkwɛ kulenɛ ɛtɔk ya bbwak ya kitele Ɔlɔɔmɔlɔɔm. 2Tɛ̀ttɛ́ akupyɔng ileme la linaang a vveengodde. Afɔngɔyɔng Ɔlɔɔmɔlɔɔm ufoolowɔyɔng ippyam ɔkkpɛlɛ, nkwaaning akkwoong asanyɔng luttina ammɛ, gwa lɔyyɛɛpnɛ, lɔsaapmɛ, lule bbwak ɔgbaa. 3Ɔlɔɔmɔlɔɔm ka ulenɛnɛ oyyoyyo lɛsɔɔk linnyi, nbwɔɔlɔwɔyɔng nttɛ; Tɛ̀ttɛ́ atɔkwɔyɔng kɛyɔɔng ka buggboggbo asakyɔng. Lutini ’gwɔng attinayɔng kwa kɔyyɛɛpnɛ, ɔlɔɔt la vvɔn uffikmɛ kɛyɔɔng ukup kiyila sa Ɔlɔɔmɔlɔɔm ulemɛnɛ linnyi. 4Iyangayɔng bikkeep ggbadam ka kkwɔɔt ssɔn, ɔzzanga bikkeep ’byɔng baang ɔkkpɛlɛ bɛyanga bɛnaang buubuu. 5Ka kulenɛ ning mung, mkkpa iyipiyɔng tɛ̀ttɛ̀ iyipinɛ mung, iyangayɔng kkwɔɔt ssɔn la Christ. Ɔzzànga itoolobongyɛlɛ kɛyɔɔng ɔkkpɛlɛ tɛ̀ttɛ̀ bɛssanga bikkeep a kkwɔɔt ssɔn. 6Ikɔɔmyɔng bɛssanga ikkɔ́ ayyɔɔt buubuu tɛ̀ttɛ̀ Ɔlɔɔmɔlɔɔm ulenɛyɛlɛ linnyi. Íkkɔ́ ayyɔɔt ulenɛyɛlɛ ya kɛbwɔɔlɔ lɛmmwɔɔl, ibwɔɔlɔzɛ ka kiyila sa iyanganɛ. 7Íkkɔ́ ayyɔɔt ilenɛ ya kittele balɔɔt, ittelebɛ. Ilenɛyɛlɛ ya lukopolo, ikopolobɛ. 8Ilenɛ ya kɛbba balɔɔt bikɔɔm, ibbabɛ bikɔɔm. Ɔlɔɔt duu ɔbɛngɛlɛ bwa ɔyanganɛ la wabbɛ. Ɔbɛngɛlɛbwɛ ka kɛsaap la laggele. Ɔlɔɔt duu wa uzzinɛlɛttɔ, ɔnaang kɛnaang kɛbɛtɛmɛ. Ɔlɔɔt duu wa uggwoomnɛ kɔlɔɔk, uggwoom ning baang la laggele. Ɔyanga lakke ɔnaang kɛnaang ammɛ bbwak. Ɔlɔɔt wa ɔyanganɛ kibbe-lɛttɔ, ɔyangasɛ bbwak. 9Kɛsaap kɛfɔngɔ sa ɛdda kile. Fim kɔlɔɔk kwa kɔbbɔlnɛ. Anaang kwa kɔyyɛɛpnɛ. 10Ɔlɔɔt ɔkkpɛlɛ ɔsaapwɔyɔng ka alenɛyɔng ka bukpana ka Christ. Kɔbɛtɛwɔyɔng ka kitele waanyɔɔng. 11Anaangyɔng kɛnaang kɔbɛtɛwɔyɔng. Tɛ̀ttɛ́ akkpɛlɛyɔng. Assɛɛnyɔng luttina ka kɛnaang Uyini. 12Ittina annyɔɔng ilokowɔyɔng ka laggele. Abbeyɔng luppyam ka lilɔɔk ɔkkpɛlɛ. Azɔɔmyɔng luzɔɔm ɛkɛtɛ ɔkkpɛlɛ. 13Abɛngɛlɛ bwa ayanganɛyɔng la ikpana annyɔɔng ya businɛbɛ lile. Atɔkyɔng ukekeen ɔlɔɔt assɛɛnyɔng ka ssala. 14Akkpengeyɔng Ɔlɔɔmɔlɔɔm ɔnaang balɔɔt ba bayɔɔwɔnɛyɔng akama ppyɛɛ; iii, akkpengemɛyɔng ɔnaangbɛ ppyɛɛ, ɔfɔngɔbɛ nkpat kɛnaang. 15Aggeleyɔng la balɔɔt ba baggelenɛ, akkwayɔng la balɔɔt ba bakkwanɛ. 16Ayɔɔyɔng kɛssanga eleme ssɔn la balɔɔt ɔkkpɛlɛ. Tɛ̀ttɛ́ ayɛnwɔyɔng kɛyɔɔng. Ayilayɔng bukee. Tɛ̀ttɛ́ atɔkwɔyɔng kɛyɔɔng tɛ̀ttɛ̀ basan a kɔlɔɔk. 17Ɔlɔɔt ɔnaangwɔnɛyɔng bubbi, tɛ̀ttɛ́ apipilimɛyɔng. Abum anaangyɔng kwa ɔlɔɔt ɔkkpɛlɛ uttinanɛ ɔttɛ kule bbwak. 18Annyɔɔng abum anaangyɔng bɛfɛɛn ɔkkpɛlɛ bya ale ataayɔng ka bɔkaat la balɔɔt ɔkkpɛlɛ. 19Inngwa anaam, tɛ̀ttɛ́ apipiliyɔng ipipili, lutini ’gwɔng afɔngɔyɔng Ɔlɔɔmɔlɔɔm upipili ɔlɔɔt ’wɔng baang tɛ̀ttɛ̀ Luvva-Ɔlɔɔmɔlɔɔm lɔttɛnɛ, “Ebinukkpaapi ɛttɛ, ‘Anaam vvenɛ npipili, vvenɛ nppyɛlɛ nnyi.’ ” 20Anaangyɔng tɛ̀ttɛ̀ Luvva-Ɔlɔɔmɔlɔɔm lɔlɔɔknɛ. Lɔttɛ: “Buwɔɔng busaapnɛ ɔlɔɔt a kɔfɔk annɔ, annyimɛ kazzi uzzi. Bannyi basaapmɛnɛ, annyimɛ ɔvva. Ka anaangnɛ ning baang addomɛ a lɔkɔɔn ka lɛttɔ.” 21Tɛ̀ttɛ́ afɔngɔyɔng bubbi bubɛtɛwɔyɔng. Lutini ’gwɔng annyɔɔng abɛtɛyɔng bubbi ka kɛnaang a budoddo.

will be added

X\