ROMANS 1

1Lɛmmwɔɔl ’zɔng lissi ka anaam Paul, bɔɔyi a Christ Jesus, Uyilabɔtɔɔm a Jesus, wa Ɔlɔɔmɔlɔɔm ɔkkwɔɔnɛnɛ ɔsanganɛ ɔttɛ nbwɔɔlɔ Kuttu-Budoddo ammɛ. 2Ɔlɔɔmɔlɔɔm ɔggba balɔɔt ɔkkpɛlɛ Kuttu-Budoddo ’kwɔng mung lisekele ɔttɛ bappyee-kutolo ammɛ bakkpɔk kwɛ ka Luvva ammɛ. 3Kuttu ’kwɔng mung kutum Waan ammɛ, Uyini ayyɔɔt Jesus Christ: ka kɛfal ammɛ tɛ̀ttɛ̀ ɔlɔɔt, badɔkɔ bamaatmɛ ka kikkwu a David. 4Ka ulenɛ Ebinukkpaapi ɔsɛlɛ bubbi, ɔtta la lakke za lɛbaang ɔzzánga Waan-Ɔlɔɔmɔlɔɔm ka kifungala sa Ɔlɔɔmɔlɔɔm ufungalamɛnɛ ka lubbe. 5Kussi ka lɛttɔ a Christ, Ɔlɔɔmɔlɔɔm unnyinɛ lakke za kɛzzanga uyilabɔtɔɔm ammɛ, nkwaaning nnaang Ikanakana ɔkkpɛlɛ bayila kwa Ɔlɔɔmɔlɔɔm batelemɛ. 6Nkwɔng mung ɔgbaa kɔssɛ kule kwa annyɔɔng balɔɔt ba alenɛyɔng ka Rome, ba Ɔlɔɔmɔlɔɔm ulenɛ lɛssang ɔttɛ aleyɔng balɔɔt a Jesus Christ. 7Kwakkwɛ mung nkkpɔknɛ nbwɔɔlɔwɔyɔng ɔkkpɛlɛ annyɔɔng ba alenɛyɔng ka Rome ba asaapnɛyɔng Ɔlɔɔmɔlɔɔm ulewɔyɔng lɛkkwɔɔ ɔttɛ annyɔɔng balɔɔt ammɛ: Numa Dedde ayyɔɔt, Ebinukkpaapi, la Uyini ayyɔɔt, Jesus Christ, banaangwɔyɔng ppyɛɛ; bannyiwɔyɔng bɔkaat. 8Ka kɛkɔɔm ɛtɔk, nssɛbong ka labɔɔk a Jesus Christ nwomo Ɔlɔɔmɔlɔɔm kɛnaang nnyiwɔyɔng ɔkkpɛlɛ, ka ɛkpansi ɔkkpɛlɛ elenɛ kiyila annyɔɔng lippyee. 9Ɔlɔɔmɔlɔɔm ukkwoong mung ɔyɔɔwɔyɔng asan attɛyɔng kwa nlɔɔknɛ kule ka lɔkkwɔɔn. Ammɛ ulenɛ Ɔlɔɔmɔlɔɔm wa ntelenɛ la luppyam anaam ɔkkpɛlɛ nbwɔɔlɔ Kuttu-Budoddo Waan Ammɛ. Ɔlɔɔmɔlɔɔm ɔsan lɔsan ɔttɛ nkkewɔyɔng mung ɛkɛtɛ ɔkkpɛlɛ ya nssɛɛnnɛ luzɔɔm. 10Nbap Ɔlɔɔmɔlɔɔm nttɛ ka kiggwoom a kɔlɔɔk ammɛ, ɔnaangnɛ vvenɛ nffu nkoolowɔyɔng gedegede mung. 11Nggyan nttɛ nyɛnwɔyɔng nkwaaning nnaangwɔyɔng assɛ ayangayɔng ppyɛɛ wa ussinɛ ka Kuyeeng-Ɔlɔɔmɔlɔɔm wa ule ɔnaangwɔyɔng akkaamyɔng. 12Nlɔɔk nttɛ anaam la annyɔɔng ɔkkpɛlɛ vvenɛ itteleyɛlɛ kɛyɔɔng ɛkɛtɛ nnyɔn, kiyila annyɔɔng vvenɛ kittelenɛ anaam, sa anaam kittelewɔyɔng annyɔɔng. 13Ikpana anaam nggyan nttɛ akkeyɔng nkwɔng tɛ: Bikkpit biyipibong bya nnaangnɛ luttina nttɛ nffu nkoolowɔyɔng. Ɔzzànga bɔfɛɛn bule baang bwa butununɛ kiffu. Nggyan nttɛ nyanga balɔɔt ba bayanganɛ kiyila ggbadam ka annyɔɔng ɔgbaa tɛ̀ttɛ̀ nyanganɛ ka Ikanakana. 14Kɔbɛtɛnɛ kwa balɔɔt ɔkkpɛlɛ. Kwa balɔɔt ba bawongolonɛ zzeen la balɔɔt ba basinɛ kɔlɔɔk lɛsan. Kɔbɛtɛnɛ kwa balɔɔt ba basannɛ luvva la ba basinɛ luvva lɛsan. 15Kwakkwɛ kɔbɛtɛnɛnɛ nttɛ nssɛ nbwɔɔlɔwɔyɔng balɔɔt ba alenɛyɔng ka Rome Kuttu-Budoddo Ɔlɔɔmɔlɔɔm. 16Nyanga kɛkkaam a luppyam sa lɛbaang ntum Kuttu-Budoddo a Jesus Christ. Akkwɛ kulenɛ lakke Ɔlɔɔmɔlɔɔm za lakkalanɛ balɔɔt ɔkkpɛlɛ ba bayanganɛ kiyila. Ka kɛkɔɔm ɛtɔk, lakkala balɔɔt a Jews la Ikanakana ɔgbaa. 17Kuttu-Budoddo kɔbwɔɔlɔ tɛ̀ttɛ̀ Ɔlɔɔmɔlɔɔm ɔlɔngɔlɔnɛ balɔɔt bataa bbwak la ammɛ. Ule kɛkɔɔm a kiyila keem ka ussinɛ ka lutte umii ɔffɔ ka lakpeke. Luvva-Ɔlɔɔmɔlɔɔm lɔttɛ, “Ɔlɔɔt wa ɔyanganɛ kiyila Ɔlɔɔmɔlɔɔm ɔnaangmɛ bbwak la ammɛ, vvenɛ uddu.” 18Ɔlɔɔmɔlɔɔm ɔyɔɔbong binyanga ammɛ. Bissi ka libat biffu bivvoong balɔɔt ɔkkpɛlɛ ba banaangnɛ bubbi, ba babbu linaang abbɛ livvoongnɛ lɔkkwɔɔn a kɔlɔɔk, balɔɔt basikwɛ lɛyɛn. 19Ɔlɔɔmɔlɔɔm ɔyɔɔbongbɛ akama ka kɔlɔɔk ammɛ kwa balɔɔt busannɛ kulebɛ kpelegedee. Ɔlɔɔmɔlɔɔm biini ɔnaangnɛkwɛ ɔyɔɔbɛ kkpelegedee. 20Ka ussinɛ ka Ɔlɔɔmɔlɔɔm ɔlɔɔmnɛ ɛkpansi, iggba ilemɛ ammɛ kkpelegedee lɛyɛn ya nzang businɛ likkwoong iyɛn, la lakke ammɛ za kɛfal a kɛfal ka ulenɛ Ɔlɔɔmɔlɔɔm. Balɔɔt bakkwoong mung bakɔɔlɔyɛ ka bɛfɛɛn bya ulenɛ lɛnaang. Lakkpenge lalɔk ba bayanga ffet a ffet. 21Basan Ɔlɔɔmɔlɔɔm lɔsan, ɔzzànga latele za bulenɛ za ammɛ, mɛ ba bannyi, gɔɔ vvenɛ bawomomɛ kɛnaang. Lutini ’gwɔng ittina abbɛ isseke bɔfɛɛn bwa gbɔɔ, kifoloko ippyam abbɛ isseke kisul a kisul. 22Battɛ abbɛ basan kɔlɔɔk, nsakalakang bazingizingi. 23Lutini gwa bazɔɔmnɛ bannyi Ɔlɔɔmɔlɔɔm wa usinɛ libbe, bappyɛɛ bazɔɔm bwaan ilɔɔp bya banaangnɛbyɛ bɛbal ɔlɔɔt wa ule ubbe, ɔlɔk bunɔɔn, ɔlɔk isɛɛn a kɛmat ɔlɔk izzɔkɔ. 24Balɔɔt ka balenɛ bazingizingi, Ɔlɔɔmɔlɔɔm unnyibongbɛ babbu bɛfɛɛn bya ippyam abbɛ iggyannɛ ittɛ inaang. Basseke ka banaangnɛ bɛfɛɛn izzit abbɛ abbɛ. 25Bafoolobong lɔkkwɔɔn a kɔlɔɔk Ɔlɔɔmɔlɔɔm kusseke lɛlaak. Bappyɛɛ bazɔɔm bɛfɛɛn bya Ɔlɔɔmɔlɔɔm ɔlɔɔmnɛ lutini buzɔɔmnɛ Ɔlɔɔmɔlɔɔm biini wa ulenɛ wa kibungu kɛfal a kɛfal! Kulening. 26Ɔlɔɔmɔlɔɔm ɔsambong balɔɔt ba banaangnɛ ’kwɔng mung ɔssɛɛn ka akama wa izzit. Gɔɔ bwanavva basikilibong eleme kimini la bwalam, bappyɛɛ bamini abbɛ abbɛ. 27Kule kɛssanga ssɔn. Bwaanbwalam bakkyaa kikup a bwanavva bafɔngɔ, bappyɛɛ bakup abbɛ abbɛ. Balɔɔt basseke ka banaangnɛ bɛfɛɛn izzit la ba abbɛ. Vvenɛ bayɛn akama wa baggyannɛ ka babbu linaang sa banaangnɛ baang. 28Balɔɔt ka balenɛ lifim kɛssɛɛn a kɛsan a kɔlɔɔk Ɔlɔɔmɔlɔɔm sa bbwak ka luppyam, Ɔlɔɔmɔlɔɔm ɔsambong babbu ittina ɔssɛɛnbɛ ka ippyam nkwaaning banaang bɛfɛɛn bya businɛ lɛnaang. 29Ussekebɛ ibbyap ibbyap ka ippyam ɔkkpɛlɛ. Kɛnaang a bubbi, kuwɔnɔk, izzit, basseke luleep a luleep. Bawwɔɔl balɔɔt, ballu kullu, bafɛɛt ifɛtɛ la latun, balɔɔk babbɛ ka isimi. 30Balɔɔk kɔlɔɔk a bubbi batum balɔɔt. Ɔlɔɔmɔlɔɔm bɛ ba ɔsaap. Bassɛɛn balɔɔt ka izzit, ɔkkyaabɛ banaang kamma. Battina itɔk ggbadam ya kɛnaang a bubbi. Ibassɛ abbɛ ba batele. 31Luppyam lɔbbɔlbɛ, nsekele ba baloko. Kɔlɔɔk ba baggwoom la babbɛ. Ɔlɔɔt lɛttɔ bɛ ba ubbe. 32Basan lɔsan battɛ Lafɔɔ Ɔlɔɔmɔlɔɔm lattɛ ɔlɔɔt wa ɔnaangnɛ lilɔɔk ’sɔng vvenɛ ubbe. Ɔzzànga basi lɛttɛ ɔkɔɔngbɛ kɛnaang a bɛfɛɛn ’byɔng baang, babbal balɔɔt balɔk ba banaangnɛbyɛ libungu.

will be added

X\