BIYSNT 9

1Uyilabɔtɔɔm Ɔlɔɔmɔlɔɔm wa ɔnaangnɛ ka kubbwɔɔk ɔwɔl luffi ammɛ. Nyɛn waannttuma wa ussinɛ ka libat ule lɛttɔ ka ɛkpansi. Bannyimɛ waanɛkpɔkɔlɔ wa kiwongolo lubbe gwa lɔddɔngnɛ. 2Waannttuma ’wɔng baang uwongolo lubbe ’gwɔng baang isɔngɔ itta tɛ̀ttɛ̀ ittanɛ ka lɛkam a lɔkɔɔn. Isɔngɔ ya ittanɛ ka lubbe ’gwɔng baang inaang luwee la kɛffa bibil. 3Ogelese ussi ka isɔngɔ ’yɔng baang usini uffu ka ɛkpansi. Bannyimɛ lakke ’zɔng baang tɛ̀ttɛ̀ za ɛlaang. 4Babwɔɔlɔ ogelese battɛ tɛ̀ttɛ́ ɔbɛpɛ lifaat, gɔɔ kɛssɛ, gɔɔ lɛsan a kɛssɛ kɛlɔk. Ɔzzànga ɔwwɔɔl balɔɔt ba basinɛ eleme Ɔlɔɔmɔlɔɔm lɛyanga ka lɛttɔ lusso. 5Basi liyila ogelese ɔwwɔɔl balɔɔt ’bɔng baang, ɔzzànga ɔdɔkɔ ɔyɔɔbɛ akama ka ittuma kubbwɔɔk. Bɔssɔp bwa bappyeenɛ ka akama ’wɔng baang bule tɛ̀ttɛ̀ bɔssɔp bwa ɔlɔɔt uppyeenɛ ka ɛlaang ɛtɔɔpmɛnɛ. 6Ka ittuma ’yɔng baang kubbwɔɔk, balɔɔt ’bɔng baang vvenɛ baggyan lubbe, ɔzzànga baala babbe. Vvenɛ baggyan battɛ lubbe lɔtɔkbɛ ɔzzànga vvenɛ lufimbɛ. 7Ogelese ’wɔng baang ɔbal iyim ya ikatnɛ killu lɛkɔɔng. Ɔyanga bɔfɛɛn bwa bubalnɛ kɛttɔpɔ a gold ka lɛttɔ ammɛ. Lusso ammɛ lɔbal lusso balɔɔt. 8Bittulu ammɛ bɛbal bittulu a bwanavva. Lasaal ammɛ lale tɛ̀ttɛ̀ lasaal a lenngwing. 9Ogelese ’wɔng baang ugupu bɔfɛɛn bwa bubalnɛ ɛllɛlla ka ukukulu. Lɔsap gwa bifekele ammɛ bɛnaangnɛ, lɔtaa tɛ̀ttɛ̀ lɔsap gwa iyim inaangnɛ ka ilenɛ ka lɔkkwɔɔn a kimii lɛkɔɔng la lakulu ka ittulunɛ ka lisse. 10Ɔyanga busɛɛl la bugɔmɔ tɛ̀ttɛ̀ ɛlaang, bwa ɔkɔɔmnɛ ɔtɔɔp balɔɔt ka ittuma kubbwɔɔk. 11Ogelese ’wɔng bang ɔyanga ubeet wa ɔkɔɔmnɛbɛ. Ammɛ ulenɛ uyilabɔtɔɔm Ɔlɔɔmɔlɔɔm wa ɔkatnɛ lúbbé ’gwɔng baang. Lɛkɔɔl ammɛ ka Hebrew ɔ̀zzànga Abaddon, ka Greek ɔ̀zzànga Appolyon (ifɛɛt ilenɛ “Ɔbɛpɛ-ɔbɛpɛ”). 12Akama wa ikeeng ikeeng ɔsaalbong. Usseke ikama iffa ka ’kwɔng kulenɛ lɛsaal. 13Uyilabɔtɔɔm wa ɔnaangnɛ ka bwɔlaaning, ɔwɔl luffi gwa ammɛ. Nppyee lɛmmwɔɔl ka lɛttanɛ ka lusso a gold a labun Ɔlɔɔmɔlɔɔm. 14Lɛmmwɔɔl lɛlɔɔk la Uyilabɔtɔɔm ’wɔng baang wa bwɔlaaning lɛttɛ, “Akkyaayɔng bayilabɔtɔɔm Ɔlɔɔmɔlɔɔm ba banna ba bakɔnnɛ ka lɔyɔngɔ Euphrates afɔngɔyɔng.” 15Bakkyaa bayilabɔtɔɔm ba banna ’bɔng baang bafɔngɔ. Baggbabɛ lɛbama baloko ka kɛtɔm ’sɔng mung la ettuma ’yɔng mung la kukkpa ’kwɔng mung battɛ bawwɔɔl kukup a balɔɔt kkwɔn ka lakup ɔssɛbibit ɔkkpɛlɛ lakkyaat. 16Babwɔɔlɔnɛ battɛ kɛkaan a ballu kullu ’kwɔng baang kɛdɔkɔ 200,000,000. 17Ka biyɛnɛ anaam, nyɛn iyim ’yɔng baang la battele-uttele, bayanga bɛfaak a bɛkkpala bya bagupunɛ ka luppyam, bya bikootnɛ tɛ̀ttɛ̀ lɔkɔɔn. Bibil tɛ̀ttɛ̀ akpana, bikoot lɛgɔk a lɛgɔk. Lattɔ iyim ’zɔng baang lale tɛ̀ttɛ̀ lattɔ lannwing, lɔkɔɔn lɔ̀ttáyɛ ka kamma, la isɔngɔ la bɛggbansukulu. 18Bawwɔɔl kukup a balɔɔt ka tɔkɔlɔ lakup za lakkyaat ba bakɔɔmnɛ ɛtɔk ka lɛmaat abbɛ, ka ɛkɛtɛ lilɔɔk ’sɔng baang sa likkyaat, lɔkɔɔn, la isɔngɔ, la bɛggbansukulu bɛttanɛ ka kamma iyim. 19Lakke iyim lale ka kamma la lasɛɛl. Lasɛɛl annyɛ lale tɛ̀ttɛ̀ izzɔkɔ la lattɔ, bakɔɔmbyɛ abbyɛ baddopo balɔɔt. 20Ɔssɛbibit ɔkkpɛlɛ wa ɔtakanɛ libbe ka lilɔɔk ’sɔng mung, basi lɛkkyaa kɛnaang a bɛfɛɛn bya abbɛ biini banaangnɛ bafɔngɔ. Basi kɛzɔɔm a babbu la ilat lɛkkyaa bafɔngɔ, gɔɔ bwaanilɔɔp a gold la bronze la lattaal la bumele bya bisinɛ likkwoong bɛyɛn, bippyee, bɛssɛ. 21Gɔɔ balɔɔt ’bɔng baang akama usibɛ lɛnaang ka kɛwwɔɔl sa bawwɔɔlnɛ ba abbɛ, gɔɔ ilat gɔɔ babbu linaang abbɛ, gɔɔ ssip abbɛ.

will be added

X\