BIYSNT 8

1Waan-ɛtɔɔn ’wɔng baang ɔkkyaa ɛkpɔkɔlɔ ya innammikkyaat, libat lizum kulak ka kufaak ɛkalangka. 2Ɔzzánga nyɛn bayilabɔtɔɔm Ɔlɔɔmɔlɔɔm bannambakkyaat ka babeenɛ ka lusso Ɔlɔɔmɔlɔɔm la iffi innammikkyaat. Ɔlɔɔt ɔlɔɔt la luffi ggwɔn ggwɔn. 3Uyilabɔtɔɔm wa vvɔn ɔkɔɔm ettotto ya banaangnɛyɛ la gold la bannɛ ba bayyɛɛpnɛ kizoom ka tɔkɔlɔ. Uffu ubee ka lusso labun Ɔlɔɔmɔlɔɔm. Bagbaayɛ bannɛ ba bayyɛɛpnɛ kizoom battɛ ɛgbaa ka luzoom a balɔɔt Ɔlɔɔmɔlɔɔm ɔkkpɛlɛ la bigugulu bya banaangnɛ ka labun Ɔlɔɔmɔlɔɔm, za banaagnnɛzɛ la gold labee ka lusso ugbaal a kibeet Ɔlɔɔmɔlɔɔm. 4Isɔngɔ ya issinɛ ka bannɛ ’bɔng baang la luzɔɔm a balɔɔt Ɔlɔɔmɔlɔɔm itukulu ka labɔɔk uyilabɔtɔɔm wa ubeenɛ baang ka lusso Ɔlɔɔmɔlɔɔm. 5Uyilabɔtɔɔm Ɔlɔɔmɔlɔɔm ɔsam ettotto ’yɔng baang ttɔng lɔkɔɔn ka labun Ɔlɔɔmɔlɔɔm baang eseese ɛssɛɛnyɛ ka tɔkɔlɔ ɔsam ɔtɔɔp ka ɛkpansi. Eseese utum, immwalang inaang, àkkpálá ɔtta, ɛkpansi ɛnnyɛkɛ. 6Bayilabɔtɔɔm bannambakkyaat batte kɛwɔl iffi ’yɔng baang innammikkyaat. 7Ɔkɔɔm-ɛtɔk ɔwɔl luffi gwa ammɛ, lattaal la lɔkɔɔn bitoolo la linnyi bissi ka libat bɛllɔt ka ɛkpansi. Kufaak ɛkpansi kkwɔn ka tɔkɔlɔ lifaak likkyaat, kɔkkɔm kɔssal gbaak la bɛssɛ la lifaak ɔkkpɛlɛ. 8Ɔssɛ-ɔttɛlɛ ɔbbal luffi gwa ammɛ lɛwɔl. Bɔfɛɛn bwa bubalnɛ lɛttaal za lɛbaang bussi ka libat la lalaak a lɔkɔɔn ka kkwɔɔt buttɔ ka tɔkɔlɔ lihu. Kufaak a lihu kkwɔn, ka tɔkɔlɔ lifaak likkyaat kusikili kusseke linnyi linnyi. 9Kukup isɛɛn kkwɔn ka tɔkɔlɔ lakup lakkyaat ibbe kwɛɛnɛ kwɛɛnɛ isaal. Kukup ikkpaat kkwɔn ka tɔkɔlɔ lakup lakkyaat ibɛpɛ isaal ka tɔkɔlɔ lihu. 10Úkup-ɔssɛ-ɔttɛlɛ ɔbbal lɛwɔl, waannttuma wa lɛbaang a lɛbaang wa ukutnɛ tɛ̀ttɛ̀ lalaak a lɔkɔɔn mung, ɔffaat ka libat a lukkpaagbeede uffu ɔttɔ ka lafoom iyɔngɔ la bwaan iggbɔlɔ. 11(Lɛkɔɔl a waannttuma ’wɔng baang ulenɛ “Bɔkkpan”.) Kufoom a bannyi ’kwɔng baang kusikili kusseke ka kɔkkpannɛ lɔkkpan. Ɔzzánga balɔɔt ggbadam babbe ka bavvanɛ bannyi ’bɔng baang ba balenɛ lɛkkpan. 12Uyilabɔtɔɔm Ɔlɔɔmɔlɔɔm wa ɔnaangnɛ ka banna ɔbbal luffi gwa ammɛ lɛwɔl. Kufaak a livve-luwee kkwɔn ka tɔkɔlɔ lifaak likkyaat kɔbɛpɛ. Ettuma la bwaannttuma ɔkkpɛlɛ bɛssɛ bɛyanga kɛbɛpɛ. Kwakkwɛ bɛtakanɛ kufoom a buppwolo abbyɛ kkwɔn kɛtɔm, kwa kkwɔn kikoon. 13Nppyɛɛknɛ, nyɛn ekkpolobat ka ekutnɛ ka libat ɛlɔɔk ɛttɛ, “Wololo oo! wololo oo! wololo oo! akama. Balɔɔt ɛkpansi vvenɛ bayɛn akama wa ɔsaknɛ, bayilabɔtɔɔm Ɔlɔɔmɔlɔɔm ba bakkyaat bakeelenɛ iffi ya abbɛ lɛwɔl.”

will be added

X\