BIYSNT 7

1Nkwɔng kulenɛ lɛsak. Nyɛn bayilabɔtɔɔm Ɔlɔɔmɔlɔɔm banna ka babeenɛ ka laggook a ɛkpansi lanna babwɔɔp bɛssanga bɛffa bɛnna baloko nkwaaning bisi ɛkpansi la lihu ɔlɔk kɛssɛ lɛbɛlɛ lɛffa. 2Nyɛn uyilabɔtɔɔm ɔlɔk ka ussinɛ ka lusso gwa livve luwee lɔfɔm la bɔfɛɛn a kuddu ka ɔkɔɔmnɛ ɔnaang eleme ka bɔfɛɛn. Ɔkkwɔɔ bayilabɔtɔɔm Ɔlɔɔmɔlɔɔm ba banna ba Ɔlɔɔmɔlɔɔm ulenɛbɛ lakke za kɛbɛpɛ ɛkpansi la lihu linnyi ɔgaga. 3Uyilabɔtɔɔm Ɔlɔɔmɔlɔɔm ɔttɛ, “Tɛ̀ttɛ́ abɛpɛ ɛkpansi gɔɔ lihu, gɔɔ kɛssɛ kɛlɔk ɔddɔkɔddɔkɔ inaang ibbɔɔyi Ɔlɔɔmɔlɔɔm eleme ka lɛttɔ lusso.” 4Babwɔɔlɔnɛ buyipi balɔɔt ba banaangnɛbɛ eleme Ɔlɔɔmɔlɔɔm ka lɛttɔ lusso. Badɔkɔ lalɔp innɔ zzillalakkyaat. Abbɛ badɔkɔnɛ isam Ɔlɔɔmɔlɔɔm ya Israel, ya zzɔɔppiffa. 5Balɔɔt ba bassinɛ ka kikkwu a Judah badɔkɔ lɔlɔp la innɔ zzɔɔp. Ba bassinɛ ka kikkwu a Reuben badɔkɔ lɔlɔp la innɔ zzɔɔp. Ba Gad badɔkɔ lɔlɔp ka ubbɔ zzɔɔp. 6Balɔɔt ba bassinɛ ka kikkwu a Asher badɔkɔ lɔlɔp la innɔ zzɔɔp. Ba bassinɛ ka kikkwu a Naphtali badɔkɔ lɔlɔp la innɔ zzɔɔp. Ba bassinɛ ka kikkwu a Manasseh badɔkɔ lɔlɔp la innɔ zzɔɔp. 7Balɔɔt ba bassinɛ ka kikkwu a Simeon badɔkɔ lɔlɔp la innɔ zzɔɔp. Ba bassinɛ ka kikkwu a Levi badɔkɔ lɔlɔp la innɔ zzɔɔp. Ba bassinɛ ka kikkwu a Issachar badɔkɔ lɔlɔp la innɔ zzɔɔp. 8Balɔɔt ba bassinɛ ka kikkwu a Zebulun badɔkɔ lɔlɔp la innɔ zzɔɔp. Ba bassinɛ ka kikkwu a Joseph badɔkɔ lɔlɔp la innɔ zzɔɔp. Ba bassinɛ ka kikkwu a Benjamin badɔkɔ lɔlɔp la innɔ zzɔɔp. 9Nkwɔng kɔsaknɛ, nyɛn kibbi sa lɛbaang. Ɔlɔɔt wa ukkwoongnɛ ukkwoon balɔɔt ’bɔng baang ɔkkpɛlɛ ba ule. Badɔkɔ bassi ka kikkwu la ssɔn ka ɛkpansi. Ɔzzánga babee ka lusso ugbaal a kibeet ’sɔng baang la balata iwuulu ka bawɔkɔlɔnɛ, bakɔɔm litteet ka labɔɔk. 10Bakkwɔɔ bagaga battɛ, “Kuddu ayyɔɔt kussi ka Ɔlɔɔmɔlɔɔm ayyɔɔt, la Waan-ɛtɔɔn ammɛ, wa ɔtaanɛ ka ugbaal a kibeet.” 11Bayilabɔtɔɔm Ɔlɔɔmɔlɔɔm ɔkkpɛlɛ babee bakkpit ugbaal a kibeet la bagɛlɛnya la isɛɛn ’yɔng baang inna. Battɔ ka lisse bakun lusso bazɔɔm bannyi Ɔlɔɔmɔlɔɔm battɛ, 12“Kulening! Kibungu, lakke, bisana, kiwomo kɛnaang, latele, lagabwɔ la lakke ɔkkpɛlɛ lale za Ɔlɔɔmɔlɔɔm ayyɔɔt kɛfal a kɛfal, kulening.” 13Ɔgɛlɛnya vvɔn ɔbapnɛ ɔttɛ, “Balɔɔt ’bɔng baang ba bawɔkɔlɔnɛ balata iwuulu babang? Bassi yang baffu?” 14Nppyɛlɛmɛ kamma nttɛ, “Ba nsan nttɛ, Dedde. Annɔ asannɛ.” Ɔlɔɔk la anaam ɔttɛ, “Uwɔng ulenɛ balɔɔt ba battanɛ ka akama kɔlɔɔk a Christ. Bakɔɔmbong linnyi Waan-ɛtɔɔn ’wɔng baang bazzaa iwɔkɔlɔ abbɛ. Kwakkwɛ illaatnɛ ning baang. 15Kwakkwɛ babeenɛ ka lusso Ugbaal a kibeet Ɔlɔɔmɔlɔɔm kikoon la kɛtɔm batelemɛ ka labun ammɛ. Ammɛ wa ɔtaanɛ ka kibeet vvenɛ ɔkatbɛ ɛkɛtɛ ɔkkpɛlɛ. 16Buwɔɔng gɔɔ bannyi baala busaapbɛ. Luwee gɔɔ lɔkɔɔn baala lutupbɛ. 17Ka Waan-ɛtɔɔn wa ulenɛ ka kasɛkɛ kibeet ule usseke ɔlɔɔt wa ɔkatnɛbɛ, vvenɛ ɔkɔɔmbɛ umii ka ɛggbɔlɔ kuddu. Ɔlɔɔmɔlɔɔm vvenɛ ɔkkpɔlɔbɛ liyyeen.”

will be added

X\