1 Keem nyɛn Waan-ɛtɔɔn ka ɔlɔmnɛ ɛkpɔkɔlɔ ya ikeeng ɔkkyaa. Ɔ̀zzánga nppyee lɛmmwɔɔl ɛsɛɛn nnyɔn ka kɛkaan isɛɛn inna ’yɔng baang ka lɛlɔɔknɛ lɛgaga tɛ̀ttɛ̀ ɔttanɛ àkkpálá lɛttɛ, “Affu.” 2 Nppyɛɛknɛ, ulata eyim ɔdɔkɔ baang. Ɔlɔɔt wa uttelenɛyɛ ɔdɔkɔ ɔkɔɔm kubɔk, bannyimɛ ododo. Ufeele umii ka vveeng tɛ̀ttɛ̀ ɔlɔɔt wa ullunɛ lɛkɔɔng ɔbɛtɛ. Umii kɛbɛtɛ balɔɔt. 3 Ɔzzánga Waan-ɛtɔɔn ɔbbal ɛkpɔkɔlɔ ya nnyɔn liwongolo. Nbbal ɛsɛɛn ya nnyɔn lippyee ka ɛttɛnɛ, “Affu.” 4 Eyim ya nyyɔn ɛbbal lɛtta effu, ɛdɔkɔ ukolo ukolo. Uttele annyɛ bannyimɛbong lakke za kɛkɔɔm lɛkɔɔng kiffu ka ɛkpansi, nkwaaning balɔɔt bawwɔɔl ba abbɛ. Bannyimɛ ogge wa lɛbaang. 5 Waan-ɛtɔɔn ɔbbal ɛkpɔkɔlɔ ya nnyɔn lɛkkyaa ka bikkpit bɛkkyaat. Ɔzzánga nppyee ɛsɛɛn ɛlɔk ka ɛbbalnɛ lɛttɛ, “Affu.” Ɔ̀zzánga nppyɛɛk nyɛn ubili eyim. Uttele-uttele ɔkɔɔm bɔfɛɛn bwa balɔɔmnɛ kazzi ka kɔbɔɔk. 6 Nppyee bɔfɛɛn ka busanganɛ lɛmmwɔɔl ka bɛzzɔkɔ isɛɛn ya inna ’yɔng baang buttɛ, “Kɔɔp-alaasi vvɔn ka ikipili kɛnaang a kɛtɔm uwɔlɔlɔ. Ikkɔɔp igwugwulu ikkyaat ka ikipili kɛnaang a kɛtɔm uwɔlɔlɔ. Ɔzzànga tɛ̀ttɛ́ abɛpɛyɔng bannɛ la batak.” 7 Waan-ɛtɔɔn ɔbbal ɛkpɔkɔlɔ ya nnyɔn lɛkkyaa ka ikpɔkɔlɔ inna. Nppyee ɛsɛɛn ya ɛnaangnɛ ka isɛɛn inna ka ɛttɛnɛ “Affu.” 8 Nppyɛɛknɛ, eyim ɛdɔkɔ baang ya elenɛ yengeyenge. Ɔlɔɔt wa uttelenɛyɛ bakkwɔɔmɛ “Lubbe”. Ssala-lubbe lidɔkɔ lile baang ka likupnɛgwɛ ka isimi. Bannyibɛ lakke za kɛkɔɔm a lɛkɔɔng la buwɔɔng, la iffaak la isɛɛn a kɛmat, kɛwwɔɔl kufaak ɛkpansi kkwɔn keem ka tɔkɔlɔ lifaak linna. 9 Ɔzzángá Waan-ɛtɔɔn ɔbbal ɛkpɔkɔlɔ ɛlɔk lɛkkyaa, ɔnaang ka ikpɔkɔlɔ kubbwɔɔk. Nppyɛɛknɛ, kuttɔɔk a labun Ɔlɔɔmɔlɔɔm nyɛn ippyam a balɔɔt ba bawwɔɔlnɛbɛ ka babwɔɔlɔnɛ lɛmmwɔɔl Ɔlɔɔmɔlɔɔm, babee ittɛɛsɛ azzɛ bbwak. 10 Babungu bagaga battɛ, “Uyini wa ɔnaangnɛ lakke ɔkkpɛlɛ, ɔlɔɔt wa doddo, ɔlɔɔt a lɔkkwɔɔn a kɔlɔɔk, mung ule ɔmmɛ ɔffɔ nang tɛ́ttɛ́ akaal kɛkaal a balɔɔt ɛkpansi apipilibɛ ka kɛwwɔɔl sa bawwɔɔlnɛyɛlɛ ee?” 11 Bannyi kuyeeng la kkwɔn ulata ewuulu battɛ kɔwɔkɔlɔ. Babwɔɔlɔsɛ battɛ likeele lɛtaa ɔmmɛ ssup ɔddɔkɔ-ddɔkɔ liyeeng a babbɛ ibɔɔyi la ikpana abbɛ ba bawwɔɔlnɛbɛ tɛ̀ttɛ̀ abbɛ liggba. 12 Nyɛn Waan-ɛtɔɔn ka ɔbbalnɛ ɛkpɔkɔlɔ ya nnyɔn lɛkkyaa, ɔnaang ka ikpɔkɔlɔ bwɔlaaning. Ɛkpansi ɛnnyɛkɛ, livve luwee lisikili lɛppyɛɛ libil lubil tɛ̀ttɛ̀ kibili ubba. Ɛttuma esikili ikoot tɛ̀ttɛ̀ linnyi. 13 Bwaanettuma baffaat ka libat a lukkpagbeede baffu battɔ ka ɛkpansi tɛ̀ttɛ̀ lakkpo bɛssɛ za latakanɛ lɛlak lattɔnɛ ka ɔffanɛ kɛffa sa lɛbaang. 14 Lukkpaagbeede lɔkkyaap tɛ̀ttɛ̀ bakkɔtnɛ ewula basam bagbata, lɛttaal la zzɔn la lakkpɔ ɛkpansi ka bannyi bɛgbata ka ɛfɛɛn a baggbanɛ lissi bibee. 15 Babeet ɛkpansi la bakɔɔm ɛkpansi la bazzilɛttɔ isɔgya, balɔɔt ba ɔyyɛɛpnɛbɛ la ba baggbengenɛ la balɔɔt balɔk ɔkkpɛlɛ, babili la ba basinɛ babili lile, bamma bamii baddumu ka ibbe la lihuk ikpana ka libat a lɛttaal. 16 Babungu bakkwɔɔ lattaal la ikpana battɛ, “Attɔ abɛtɛyɔngyɛlɛ tɛ̀ttɛ́ iffu iyɛn lusso ɔlɔɔt wa ɔtaanɛ ka ugbaal a kibeet la kitun a kɔlɔɔk Waan-ɛtɔɔn ’wɔng baang. 17 Kɛtɔm-a-kɔlɔɔk kutunnɛbɛ kitii mung. Nyinɔɔng ule ɔbbɔ ufeele ubee ufimkwɛ?”
