BIYSNT 5

1Nyɛn luvva-Ɔlɔɔmɔlɔɔm ka kɔbɔɔk ɛlaabɔɔk ɔlɔɔt wa ɔtaanɛ ka ugbaal a kibeet, lɔdɔkɔ la likkpɔk lafoom azzɛ laffa laffa. Bassɛɛngwɛ ikpɔkɔlɔ innaammikkyaat. 2Nyɛn uyilabɔtɔɔm Ɔlɔɔmɔlɔɔm wa lɛbaang ka ɔzɔɔmnɛ ɔttɛ, “Nnyinɛ ɔkkɔnɔnɛ wa ule uwongolo ikpɔkɔlɔ luvva-Ɔlɔɔmɔlɔɔm?” 3Gɔɔ ɔlɔɔt ɔlɔk usi lile ka libat, gɔɔ ka ɛkpansi, gɔɔ ka ɛkpansi ya kuttɔɔk, wa ukkwoongnɛ uwongolo luvva-Ɔlɔɔmɔlɔɔm ɔppyɛɛk ka tɔkɔlɔ. 4Nkkwa gaang gaang ka ɔlɔɔt ɔkkɔnɔnɛ usinɛ lile wa ukkwoongnɛ uwongolo luvva-Ɔlɔɔmɔlɔɔm ɔppyɛɛk ka tɔkɔlɔ. 5Ɔgɛlɛnya vvɔn ɔlɔɔk la anaam ɔttɛ, “Tɛ̀ttɛ́ akkwa, ppyɛɛk Lenngwing za lissinɛ ka lɔkaan a Judah, ɔlɔɔt a kikkwu a David wa lɛbaang ɔbɛtɛbong. Ukkwoong mung ɔkkyaa ikpɔkɔlɔ ’yɔng banng innammikkyaat ka luvva-Ɔlɔɔmɔlɔɔm.” 6Nyɛn Waan-ɛtɔɔn Ɔlɔɔmɔlɔɔm ka ubeenɛ ka kasɛkɛ ugbaal a kibeet, isɛɛn ya inna la bagɛlɛnya babee bakkpitmɛ. Waan-ɛtɔɔn Ɔlɔɔmɔlɔɔm ɔppyɛɛk tɛ̀ttɛ̀ balemɛnɛ lɛwwɔɔl. Ɔyanga iffi innammikkyaat la zzeen lannangakkyaat za lalenɛ liyeeng Ɔlɔɔmɔlɔɔm sa linnangikkyaat sa balenɛsɛ lɛtɔɔm liffu ka ɛkpansi ɔkkpɛlɛ. 7Waan-ɛtɔɔn Ɔlɔɔmɔlɔɔm ufeele umii ɔsam luvva ka kɔbɔɔk ɛlaabɔɔk ɔlɔɔt wa ɔtaanɛ ka ugbaal a kibeet. 8Ɔsamnɛgwɛ ning baang, isɛɛn ya inna ’yɔng baang la bagɛlɛnya lɔlɔp la balɔɔt banna ba bataanɛ baang ka kibeet, battɔ ka lusso Waan-ɛtɔɔn Ɔlɔɔmɔlɔɔm. Ɔlɔɔt la vvɔn ɔyanga biggɔ la kɛkkpala sa ɔssɛɛnnɛ bɛfɛɛn bya bɛyyɛɛpnɛ kizoom, bya bilenɛ luzɔɔm a balɔɔt Ɔlɔɔmɔlɔɔm. 9Basoom ufaa lɔssa battɛ, “Akkɔnɔ-lɔkkɔnɔ kɛsam luvva-Ɔlɔɔmɔlɔɔm akkyaa ikpɔkɔlɔ aggwɛ. Badɔkɔ bawwɔɔlwɔ. Lubbe annɔ lɔkɔɔmbong balɔɔt a kikkwu, lɔkaan duu, lɔfɔɔn duu la kɛkkpa duu lufee Ɔlɔɔmɔlɔɔm. 10Anaangbongbɛ bazzanga itutum a bassɛɛn-a-luzɔɔm ya ile itele Ɔlɔɔmɔlɔɔm ayyɔɔt, vvenɛ bayanga lakke ka ɛkpansi.” 11Nbbal lɛppyɛɛk, nyɛn bayilabɔtɔɔm Ɔlɔɔmɔlɔɔm innɔ npuku ka babeenɛ bakkpit ugbaal a kibeet, la isɛɛn ya inna la bagɛlɛnya. 12Nppyeebɛ ka basoomnɛ bagaga battɛ, “Waan-ɛtɔɔn Ɔlɔɔmɔlɔɔm wa bawwɔɔlnɛ ɔkkɔnɔnɛ ka ɔyanganɛ lakke, la iyyɛɛp, la bisana, la lɛgabwɔ, la latele, la bɔkaat la kɛsaap.” 13Nppyee isɛɛn ɔkkpɛlɛ ka libat la ɛkpansi, la ɛkpansi ya kuttɔɔk la isɛɛn ɔkkpɛlɛ ka bannyi. Isɛɛn ɔkkpɛlɛ ka vveengodde idɔkɔ ka kisoom. “Itelemɛ ammɛ wa ɔtaanɛ ka kibeet la Waan-ɛtɔɔn Ɔlɔɔmɔlɔɔm. Ibungumɛ ammɛ wa ɔyanganɛ lakke la lɛgabwɔ za kɛfal a kɛfal!” 14Isɛɛn ’yɔng baang inna iyila ittɛ, “Kulening.” Bagɛlɛnya battɔ ka lisse bazɔɔm bannyimɛ.

will be added

X\