BIYSNT 4

1Ka ɛkɛtɛ ’yɔng nbbal biyɛnɛ bilɔk lɛyɛn ka lɛmma ggwoon liwongolonɛ ka libat. Lɛmmwɔɔl za nlenɛzɛ kkpal lippyee lɛtta tɛ̀ttɛ̀ luffi, lɛlɔɔk la anaam lɛttɛ, “Affu kaang ning, vvenɛ nyɔɔwɔ kwa kule kɔnaang ’kwɔng kulenɛ lɛsaal.” 2Eseese, Kuyeeng kɔtɔknɛ kɔyanga. Ugbaal a kibeet ule bakang ka libat la ɔlɔɔt baang ka ɔtaanɛ ka ammɛ. 3Lusso ammɛ luwongolo tɛ̀ttɛ̀ lɛttaal za lɛzzanganɛ Jasper la Carnelian. Egwugwulu ɛtta ekkpit ugbaal a kibeet la ubili buppwolo bwa ititiban-ititiban. 4Lɔlɔp la igbaal a kibeet inna itaa ligbolo ikkpit ugbaal a kibeet ’wɔng baang. Lɔlɔp la bagɛlɛnya banna bale baang la balata iwɔkɔlɔ ka bawɔkɔlɔnɛ la bɛttɔpɔ a gold ka bataanɛ. 5Ìkkpálá la immwalang la latumu bɛtta baang ka ɛfɛɛn a kibeet ’sɔng baang. Ikɔɔn innammikkyaat ile baang ka ikutnɛ ka lusso kibeet ’sɔng baang. Ikɔɔn ’yɔng baang ilenɛ liyeeng Ɔlɔɔmɔlɔɔm sa linnaangikkyaat. 6Bɔfɛɛn budɔkɔ baang ka lusso kibeet bwa bubalnɛ kibboko kiyenge sa kitiinɛ bannyi bannyi, kɛllaat gaang gaang. Isɛɛn inna ibee ikkpit ugbaal a kibeet la zzeen ka lusso la zzeen ka isimi. 7Ɛsɛɛn ya ikeeng ɛbal lɛnngwing. Ya nnyɔn ɛbal ɔgɔdɔ, ka ikkyaat lusso annyɛ lɔbal gwa ɔlɔɔt. ka inna ɛbal ekkpo-lubat. 8Ɔkkpɛlɛ annyɛ inna iyanga bifekele bwɔlaaning bwɔlaaning. Bifekele ɔkkpɛlɛ abbyɛ bile zzeen a zzeen ɔgbaa la tɔkɔlɔ. Ba ifɛkɛlɛ kisoom, kikoon la kɛtɔm. Ibungu Ɔlɔɔmɔlɔɔm ittɛ, “Ɔlɔɔt a doddo, ɔlɔɔt a doddo, ɔlɔɔt a doddo, ulenɛ Uyini, Ɔlɔɔmɔlɔɔm wa ɔyanganɛ lakke ɔkkpɛlɛ, wa ɔdɔkɔnɛ, wa ulenɛ lule, wa ule uffu.” 9Isɛɛn ’yɔng baang inna isoom kisoom a latele la laggele la liwomo ɔlɔɔt wa ɔtaanɛ ka kibeet kɛnaang. Ammɛ wa uddunɛ ka kɛfal a kɛfal. Inaangnɛ ning baang, 10lɔlɔp la bagɛlɛnya banna ba bataanɛ baang bakpɔkɔ banaang ɔlɔɔt wa ɔtaanɛ baang ka ugbaal a kibeet mgbeede. Ammɛ wa uddunɛ kɛfal a kɛfal. Bakkpɛɛ bɛttɔpɔ abbɛ bazzɔɔk ka lusso ugbaal a kibeet battɛ, 11“Uyini,Ɔlɔɔmɔlɔɔm ayyɔɔt annɔ akkɔnɔnɛ wa atɔknɛ budoddo, la lakke ka ulewɔnɛ annɔ alɔɔmnɛ bɛfɛɛn ɔkkpɛlɛ. Kɔsaapwɔ annɔ annyibyɛ kuddu.”

will be added

X\