BIYSNT 3

1“Akkpɔk afee uyilabɔtɔɔm Ɔlɔɔmɔlɔɔm a luzɔɔm a Sardis attɛ: “Uwɔng ulenɛ bɔtɔɔm bwa bussinɛ ka ɔlɔɔt wa ɔyanganɛ liyeeng Ɔlɔɔmɔlɔɔm linnangkkyaat, la bwaannttuma bannambakkyaat. Nsan mung bwa anaangnɛ. Nsan mung nttɛ balɔɔt battɛ ale ka kuddu mkkpa ale libbe. 2Afeele kkpalap, alɔm bwa ayanganɛ kkpɔk, tɛ̀ttɛ́ bubbe busal ɔkkpɛlɛ. Nsanbong nttɛ bwa anaangnɛyɔng ba butaka buyyɛɛp buffata ka lusso Ɔlɔɔmɔlɔɔm anaam. 3Akke kwa appyeenɛyɔng la kwa bakopolowɔnɛyɔng, ateleyɔngkwɛ; afɔngɔyɔng kɛnaang a bubbi. Asinɛyɔng lɛkkyaa afɔngɔyɔng, vvenɛ nffu ka ɛfɛɛn annyɔɔng tɛ̀ttɛ̀ ussip. Gɔɔ ligbɛkɛ baala asanyɔng za nle nffu. 4Ɔzzànga annyɔɔng balɔk ka Sardis alokoyɔngbong iwɔkɔlɔ annyɔɔng kpaladada. Vvenɛ assɛyɔng la anaam la balata iwɔkɔlɔ ka akkɔnɔnɛyɔng. 5Balɔɔt ba babɛtɛnɛ bale bayanga balata iwɔkɔlɔ ning mung ka kkwɔɔt. Baala nkkpɔlɔ lakɔɔl abbɛ ka kɛkpaka luvva balɔɔt a kuddu. Vvenɛ nbwɔɔlɔ kpelegedee ka lusso a Dedde la bayilabɔtɔɔm ammɛ nttɛ abbɛ balɔɔt anaam bbwak. 6“Ayanganɛyɔng latɔɔk za kippyee kɔlɔɔk, agɔpɔlɔ appyeeyɔng kwa Kuyeeng kɔlɔɔknɛ kunnyi izɔɔm ɔkkpɛlɛ!” 7“Akkpɔk afee uyilabɔtɔɔm Ɔlɔɔmɔlɔɔm wa luzɔɔm a Philadelphia attɛ: “Uwɔng ulenɛ bɔtɔɔm bwa bussinɛ ka ɔlɔɔt wa doddo, ammɛ ulenɛ lɔkkwɔɔn a kɔlɔɔk, wa ɔkɔɔmnɛ ɛkpɔkɔlɔ a David, wa uwongolonɛ, ɔlɔɔt usi likkwoong ɔfɛɛn; wa ɔfɛɛnnɛ, ɔlɔɔt usi likkwoong uwongolo. 8Nsan mung bwa anaangnɛyɔng. Nsan mung nttɛ likke lilewɔyɔng ssup. Akupyɔngbong lukopolo anaam, anaangyɔng bwa nggyannɛ. Nwongolobong lɛmma nlokowɔyɔng, za ɔlɔɔt ɔlɔk ule usi likkwoong ɔfɛɛn. 9Agɔpɔlɔyɔng! Tɛ̀ttɛ̀ kwa likup a balɔɔt a Satan, bakkala-lalaak ’bɔng baang ba battɛnɛ abbɛ balɔɔt a Jews ka basinɛ ba Jews lile, vvenɛ nnaangbɛ baffu bakunwɔyɔng laddu ka lataak. Vvenɛ basan battɛ asaapnɛyɔng lɔsaap. 10Ka alenɛyɔng lɔttama anaam liloko ka kibbe luppyam, vvenɛ nkkalawɔyɔng ka kɔlɔɔk kwa kule kuffu ka vveengodde ɔkkpɛlɛ kɔllɛ balɔɔt ɛkpansi. 11Nle nkka liffu. Akɔɔmyɔng bwa ayanganɛyɔng kkpɔk. Tɛ̀ttɛ́ ɔlɔɔt ɔlɔk uffu ɔnnaawɔyɔng lɛsɔɔk ’zɔng baang za basɔɔkwɔnɛyɔng. 12Vvenɛ nnaang ɔlɔɔt wa ɔbɛtɛnɛ ɔtaa tɛ̀ttɛ̀ likoop a ggwoon-Ɔlɔɔmɔlɔɔm anaam. Bwa bule bunaang ɔbbal lɛgbata ussekegwɛ ba bule. Vvenɛ nkkpɔk lɛkɔɔl Ɔlɔɔmɔlɔɔm anaam ka kkwɔɔt ammɛ la lɛkɔɔl a killu Ɔlɔɔmɔlɔɔm anaam sa kɛzzanganɛ ufaa Jerusalem, sa kile kɛtta ka libat ka ɛfɛɛn Ɔlɔɔmɔlɔɔm anaam kiffu. Vvenɛ nkkpɔkmɛ ufaa lɛkɔɔl anaam ka kkwɔɔt ɔgbaa. 13“Ayanganɛyɔng latɔɔk, agɔpɔlɔyɔng kwa Kuyeeng kɔlɔɔknɛ kunnyi izɔɔm ɔkkpɛlɛ!” 14“Akkpɔk afee uyilabɔtɔɔm Ɔlɔɔmɔlɔɔm wa luzɔɔm a Laodicea attɛ: “Uwɔng bɔtɔɔm bwa bussinɛ ka ammɛ wa ɔzzanganɛ ‘Kulening’, wa ɔyanganɛ kiyila la buttɛɛsɛ bwa lɔkkwɔɔn, ulenɛ lutte bɛfɛɛn ɔkkpɛlɛ bya Ɔlɔɔmɔlɔɔm ɔlɔɔmnɛ. 15Nsan mung bwa alenɛyɔng lɛnaang. Nsan lɔsan nttɛ ttuttu ba aleyɔng gɔɔ bɛmɛbɛmɛ ba aleyɔng. Buttɛnɛ adɔkɔyɔng ’bwɔng ɔlɔk bbwakang nzang kɔyyɛɛp! 16Ɔzzànga mung ka alenɛyɔng bekebeke, asiyɔng ttuttu ɔlɔk bɛmɛbɛmɛ lile, vvenɛ nkkwɔɔkwɔyɔng nzzɔɔk. 17Attɛyɔng, ‘Ɔyyɛɛpnɛ lɔyyɛɛp, nyanga bɔfɛɛn ɔkkpɛlɛ bwa nggyannɛ,’ ɔzzànga ba asan attɛyɔng aleyɔng ba akama gaang la kibbe-lɛttɔ. Ɔbbɔlwɔyɔng lɔbbɔl ɔkkpɛlɛ. Aleyɔng kɛkɔɔ, assiyɔng afim agbaayɔng. 18Nbbawɔyɔng bikɔɔm nttɛ alɛɛpyɔng gold biini, nkwaaning ɔyyɛɛpwɔyɔng. Alɛɛpyɔng balata ibba akulayɔng, kɛkɔɔ kɛnaang izzit. Alɛɛpyɔng kɛssɛ ɔgbaa assɛɛnyɔng ka zzeen, nkwaaning ayɛnyɔng. 19Nwɔlɔ balɔɔt ɔkkpɛlɛ ba basaapnɛnɛ, nyɔɔbɛ akama. Kɔbɛtɛwɔyɔng, akkyaayɔng kɛnaang a bubbi afɔngɔyɔng. 20Gɔpɔlɔyɔng! Nbee ka lɛmma ggwoon nlip nttɛ ɔlɔɔt wa uppyeenɛ lɛmmwɔɔl anaam uwongolonɛ lɛmma, vvenɛ nmal ka ggwoon ammɛ itul kazzi izzi. 21Vvenɛ nnyi balɔɔt ba babɛtɛnɛ lakke za bataanɛnɛ ka lufoom ka ugbaal a kibeet anaam, tɛ̀ttɛ̀ anaam nlenɛ lɛbɛtɛ nle ka lufoom a Dedde ka ugbaal a kibeet ammɛ ka ntaanɛ. 22“Ayanganɛyɔng latɔɔk, agɔpɔlɔ kwa kuyeeng kɔlɔɔknɛ kunnyi izɔɔm ɔkkpɛlɛ.!”

will be added

X\