1 Uyilabɔtɔɔm Ɔlɔɔmɔlɔɔm ɔyɔɔnɛ lɔyɔngɔ bannyi kuddu mgbaa. Lɔttɔɔl tɛ̀ttɛ̀ bɔfɛɛn bwa kkpaladada. Bannyi bassi ka ugbaal a kibeet, Ɔlɔɔmɔlɔɔm, la Waan-ɛtɔɔn baffu. 2 Battɔl basak ka kasɛkɛ lɛffɛ. Lasan a bɛssɛ kuddu ladɔkɔ baang ka labeenɛ ka lafoom a lɔssa azzɛ laffa laffa, bɛwɔm lakkpo bikkpit zzɔɔppabɛffa ka kukkpa, kikkpit ssɔn ka ettuma. Ɔzzànga livva assɛ bakɔɔm battula ɛkpansi. 3 Bɔfɛɛn bwa bulenɛ ka lifɔk Ɔlɔɔmɔlɔɔm bwɛ baala ayɛn ka lɛffɛ ’zɔng baang. Ugbaal a kibeet Ɔlɔɔmɔlɔɔm la wa Waan-ɛtɔɔn Ɔlɔɔmɔlɔɔm bile baang ka tɔkɔlɔ lɛffɛ ’zɔng baang. Ibbɔɔyi ammɛ vvenɛ bazɔɔm, bannyimɛ latele. 4 Vvenɛ bayɛn lusso ammɛ. Lɛkɔɔl ammɛ bale bakkpɔkzɛ ka lɛttɔ lusso abbɛ. 5 Kisul kɛlɔk vvenɛ ba kɛbɛlɛ lile. Itinika vvenɛ ba babɛlɛ lɛggyan ka Uyini ule usseke buppwolo abbɛ. Vvenɛ bataa tɛ̀ttɛ̀ babeet ba bayanganɛ lakke za kɛfal a kɛfal. 6 Uyilabɔtɔɔm Ɔlɔɔmɔlɔɔm ɔlɔɔk la anaam ɔttɛ, “Lammwɔɔl ’zɔng mung lale ka lɔkkwɔɔn, lale za kɛtɔk kɛssɛɛn ka luppyam. Uyini, Ɔlɔɔmɔlɔɔm wa ɔsamnɛ Kuyeeng ammɛ unnyi bappyee-kutolo Ɔlɔɔmɔlɔɔm ɔsanga uyilabɔtɔɔm ammɛ ɔtɔɔm ɔttɛ ɔyɔɔ ibbɔɔyi ammɛ kwa kule kɔkka lɛnaang.” 7 Jesus ɔlɔɔk ɔttɛ, “Gɔpɔlɔyɔng! Nle ka nffunɛ gedegede mung, laggele lale za balɔɔt ba batelenɛ lammwɔɔl za babwɔɔlɔnɛbɛ kwa kule kɔnaang ka tɔkɔlɔ luvva ’gwɔng mung.” 8 Anaam John nppyeebong bɛfɛɛn ’byɔng, nyɛnbyɛ ɔkkpɛlɛ. Ka nppyeenɛ, nyɛnbyɛ nvve, nkun laddu ka lataak Uyilabɔtɔɔm wa ulenɛnɛ bɛfɛɛn ’byɔng baang lɛyɔɔ, nzɔɔm nnyimɛ. 9 Ɔzzánga ɔlɔɔk la anaam ɔttɛ, “Ning kanaang, anaam nssɛ nle bɔɔyi tɛ̀ttɛ̀ annɔ la ikpana annɔ bappyee-kutolo Ɔlɔɔmɔlɔɔm, la balɔɔt ɔkkpɛlɛ ba batelenɛ lammwɔɔl za luvva ’gwɔng mung. Azɔɔm annyiyɔng Ɔlɔɔmɔlɔɔm.” 10 Ɔlɔɔk la anaam ɔttɛ, “Tɛ̀ttɛ́ asam lammwɔɔl a bappyee-kutolo Ɔlɔɔmɔlɔɔm ka luvva ’gwɔng mung aloko tɛ̀ttɛ̀ kɔlɔɔk a lalup. Liggbili lɛkkɛtɛbong za bɛfɛɛn ’byɔng ɔkkpɛlɛ bile ka bɛnaangnɛ. 11 Ɔlɔɔt duu wa ulenɛ ɔnaang-a-bubbi, ɔtaa baang la kɛnaang a bubbi ammɛ. Ɔlɔɔt duu wa eleme ammɛ esinɛ lɛyyɛɛp, ɔtaa baang la ubbu eleme ammɛ. Ɔlɔɔt wa ulenɛ ka ɔnaangnɛ budoddo, ɔkkaammɛ ɔnaang ning baang. Ɔlɔɔt wa ɔppyɛɛnɛ ɔsammɛ kɛyɔɔng unnyi Ɔlɔɔmɔlɔɔm, vvenɛ ɔkkaammɛ ɔnaang ning baang.” 12 Jesus ɔlɔɔk ɔttɛ, “Gɔpɔlɔyɔng! Nle nkka liffu. Vvenɛ nkɔɔm lɛsɔɔk anaam nffu nnyi ɔlɔɔt la vvɔn tɛ̀ttɛ̀ ɔnaagnnɛ ɔffɔ. 13 Anaam nlenɛ Alpha la Omega–Ɔkɔɔm-ɛtɔk la Usseke-isimi. Anaam nlenɛ lutte la lakpeke. 14 Laggele lale za balɔɔt ba bazzaanɛ iwɔkɔlɔ abbɛ illaat. Ning baang bayangabong lakke za kizzi lakkpo bɛssɛ za lawɔmnɛ ka lɛsan a kɛssɛ-kuddu, la lakke za kɛssɛ́ ssɔng ka lɛmma kikkwu kɛmal ka tɔkɔlɔ a ssala. 15 Ɔzzànga balɔɔt ba basinɛ ka tɔkɔlɔ lɛffɛ ’zɔng baang lile, balenɛ ba bamininɛ abbɛ-abbɛ. Bwaanbwalam bamini la babbɛ bwaanbwalam. Bwanavva bamini la babbɛ bwanavva. Bakkoop kɛnaang a ilat la kɛnaang babbu lilɔɔk, la kɛwwɔɔl a balɔɔt. Mbɔng baang bazɔɔm ilɔɔp, bakkala lɛlaak ka lammwɔɔl ɔgbaa la linaang. 16 “Anaam Jesus, ntɔɔmbong uyilabɔtɔɔm Ɔlɔɔmɔlɔɔm nttɛ uffu ɔbwɔɔlɔwɔyɔng bɛfɛɛn ’byɔng mung ɔkkpɛlɛ ka idda luzɔɔm. Anaam nssi ka kikkwu a David. Anaam nlenɛ annyannyannya waanettuma lɔfɔm.” 17 Kuyeeng-Ɔlɔɔmɔlɔɔm la Wanavva killu battɛ, “Affu!” Ɔlɔɔt la vvɔn wa uppyeenɛ ’kwɔng vvenɛ ɔlɔɔk ɔttɛ, “Affuyɔng!” Ɔlɔɔt duu wa bannyi basaapmɛnɛ uffu ɔtɔk bannyi kuddu ɔvva ka lɛsɔɔk. 18 Anaam, John, nttama ɔlɔɔt la vvɔn wa uppyeenɛ lammwɔɔl a uppyee-kutolo Ɔlɔɔmɔlɔɔm ka luvva ’gwɔng. Ɔlɔɔt ɔlɔk ɔgbaanɛ bɔfɛɛn bulɔk ka azzɛ, Ɔlɔɔmɔlɔɔm vvenɛ ɔgbaamɛ akama wa balenɛ lɛlɔɔk ka luvva ’gwɔng mung. 19 Ɔlɔɔt ɔlɔk ɔsanganɛ bɔfɛɛn bulɔk ɔzzɔɔk ka lammwɔɔl za uppyee-kutolo Ɔlɔɔmɔlɔɔm ulenɛ lɛlɔɔk ɔssɛɛn ka luvva ’gwɔng mung, Ɔlɔɔmɔlɔɔm vvenɛ ɔtɔk etini likkpo kɛssɛ kuddu ya ammɛ la etini ammɛ ya lɛffɛ Ɔlɔɔmɔlɔɔm ya balenɛ lɛlɔɔk ka luvva ’gwɔng mung. 20 Ammɛ wa ubeenɛ ttɛɛsɛ lilɔɔk ’sɔng mung ɔkkpɛlɛ ɔttɛ, “Kule ka lɔkkwɔɔn, nle nkka lɛppyɛlɛ nffu.” Kule ning baang. Affu, Uyini, Jesus. 21 Numa ppyɛɛ a Jesus, Uyini, ɔtaa la annyɔɔng ɔkkpɛlɛ!
