BIYSNT 21

1Nyɛn ufaa libat la ufaa ɛkpansi. Ɛkpansi ya ikeeng la libat za ikeeng bɛtaak, iyɔngɔ ikkyaap. 2Nyɛn Killu sa Doddo, Ufaa-Jerusalem, ka ussinɛ ka libat ka ɛfɛɛn Ɔlɔɔmɔlɔɔm uffu. Ɔbamabong bbwak ɔkat tɛ̀ttɛ̀ wanavva killu ɔnaangnɛ ilɔngɔlɔ ukup ulam. 3Nppyee lɛmmwɔɔl ka lɛlɔɔknɛ lɛgaga ka ugbaal a kibeet lɛttɛ, “Ssala Ɔlɔɔmɔlɔɔm lile ka balɔɔt! Vvenɛ ɔtaa la abbɛ, abbɛ bàzzánga balɔɔt ammɛ. Ɔlɔɔmɔlɔɔm biini ule ule baang la abbɛ, vvenɛ ule Ɔlɔɔmɔlɔɔm abbɛ. 4Vvenɛ ɔkkpɔlɔbɛ liyeen. Lubbe ba lɔbɛlɛ lile gɔɔ akama. Gɔɔ kullu la bɔssɔp. Batɔm a bɛfɛɛn bɛtaakbong.” 5Ɔzzanga ɔlɔɔt wa ɔtaanɛ ka ugbaal a kibeet ɔlɔɔk ɔttɛ, “Gɔɔ gedegede mung nppyɛlɛbong nnaang bɛfɛɛn ɔkkpɛlɛ bɛzzanga bɛfaa.” Ɔlɔɔk unnyinɛ ɔgbaa ɔttɛ, “Akkpɔk ’kwɔng, lammwɔɔl ’zɔng lale lɔkkwɔɔn, lale ka kiyila.” 6Ɔzzanga ɔttɛ, “Kɔsaalbong. Anaam nlenɛ Alpha, nle Omega, lutte la lakpeke. Ɔlɔɔt duu wa bannyi basaapmɛnɛ, vvenɛ nnyimɛ bannyi ba bassinɛ ka bannyi kuddu. 7Ɔlɔɔt duu wa ɔbɛtɛnɛ, vvenɛ ɔtɔk ’kwɔng ka anaam: vvenɛ anaam nle Ɔlɔɔmɔlɔɔm ammɛ, ammɛ ule ɔlɔɔt anaam. 8Ɔzzanga ssala babbwɔp a bazzi-issɛ, la banaang a bubbi, la bawwɔɔl a balɔɔt, la banaang a babbu lilɔɔk, la banaang a bɛmaanga, la batele ilɔɔp, la bakkala lalaak, ɛfɛɛn ya abbɛ elenɛ lɛkkɔm a lɔkɔɔn ’zɔng baang za likutnɛ la ndegeledum ka tɔkɔlɔ, baang ulenɛ lubbe gwa ibaala. 9Uyilabɔtɔɔm vvɔn, ka tɔkɔlɔ bayilabɔtɔɔm bannambakkyaat ba bayanganɛ bɛfɔɔm bɛnnambɛkkyaat, ya ikama ya lakpeke innammikkyaat ilenɛ ka tɔkɔlɔ, uffu ka ɛfɛɛn anaam ɔttɛ, “Affu vvenɛ nyɔɔwɔ wanavva libbeel ’wɔng wa Waan-ɛtɔɔn Ɔlɔɔmɔlɔɔm.” 10Kuyeeng kɔnnaanɛ lakke, uyilabɔtɔɔm Ɔlɔɔmɔlɔɔm ’wɔng baang ɔsamnɛ umii utele ka libat a lɛttaal. Ɔyɔɔnɛ Jerusalem, killu sa doddo ka kisininɛ ka libat ɛfɛɛn Ɔlɔɔmɔlɔɔm kiffu kuttɔɔk. 11Kippwolo tɛ̀ttɛ̀ lakke Ɔlɔɔmɔlɔɔm. Lɛffɛ ’zɔng baang lippwolo tɛ̀ttɛ̀ Jasper, ulata lɛttaal. 12Lɛyanga kɛbat sa kiggolonɛ la bikkwu zzɔɔppabɛffa, la bayilabɔtɔɔm Ɔlɔɔmɔlɔɔm zzɔɔppabaffa ba bakatnɛyɛ. Ka bikkwu ’byɔng baang bakkpɔk lakɔɔl a ifɔɔn ’yɔng baang zzɔɔppiffa ya balɔɔt a Israel. 13Ɔdɔkɔ bikkwu bɛkkyaat ka kufoom kkwɔn. Bɛkkyaat ka lusso livve luwee lɔfɔm, bɛkkyaat ka libat a lɔfɔɔn, bɛkkyaat ka kuttɔɔk a lɔfɔɔn. 14Kɛbat a lɛffɛ ’zɔng baang badɔkɔ babɔɔksɛ ka lattaal zɔɔppalaffa za bakkpɔknɛ lakɔɔl a bayilabɔtɔɔm a Waanɛtɔɔn Ɔlɔɔmɔlɔɔm ba zzɔɔppabaffa. 15Uyilabɔtɔɔm Ɔlɔɔmɔlɔɔm wa ɔlɔɔknɛ la anaam ɔyanga bissɛ-lɔlɔɔm pya banaangnɛpyɛ la gold pya ɔlɔɔmnɛ lɛffɛ ’zɔng baang, la bikkwu la kɛbat. 16Lɛffɛ ’zɔng baang ka bɔggbam lile tɛ̀ttɛ̀ bɔlɔm, lɛyanga lagook lanna. Uyilabɔtɔɔm ɔlɔɔm lɛffɛ ’zɔng baang la bissɛ-lɔlɔɔm ammɛ. Lɛdɔkɔ innɔ mile ikkyaat la lalɔp lakkyaat la mile kubbwɔɔk ka bɔlɔm la bɔggbam la buggolo. 17Uyilabɔtɔɔm ɔlɔɔm kɛbat ɔgbaa. Kɛdɔkɔ lalɔp zzɔɔp la bukkpɔ zzillavvɔn ka buggolo ka bɔfɛɛn bwa ɔkɔɔmnɛ ɔlɔɔm. 18Kɛbat a ggwoon ’sɔng baag bakɔɔm lattaal a Jasper banaangnɛ. Killu biini banaangsɛ la gold wa uyekelenɛ tɛ̀ttɛ̀ biyenge. 19Lutte kɛbat a lɛffɛ ’zɔng baang badɔkɔ banaangsɛ la lattaal za doddo, Lɛttaal za ikeeng sa bakɔɔmnɛ batte lutte lɛ̀zzànga ‘Jasper’ lɛttaal za ibaala lɛ̀zzànga ‘Sapphire’ za lakkyaat lɛ̀zzànga ‘Agate’ ka lanna lɛ̀zzànga ‘Emerald’. 20Ka kubbwɔɔk, ‘Onyx’, ka bwɔlaaning, lɛ̀zzànga ‘Carnelian’, za lannangakkyaat lɛ̀zzànga ‘Quartz’ wa lɛgɔk a lɛgɔk, za lannanganna lɛ̀zzànga ‘Beryl’, za ɔsɛlɛzzɔɔp lɛ̀zzànga ‘Topaz’, za zzɔɔp lɛ̀zzànga ‘Chalcedony’, za zzɔɔppavvon lɛ̀zzànga ‘Turquoise’, za zzɔɔppiffa lɛzzanga ‘Amethyst’. 21Bikkwu ’byɔng baang zzɔɔppabɛffa bɛdɔkɔnɛ ifɔɔk akpana. Kikkwu la ssɔn bakɔɔm ɛfɔɔk akpana banaagnsɛ. Itɔk ɔkkpɛlɛ ka lɛffɛ ’zɔng baang banaangyɛ la gold. Appyɛɛknɛ ayɛnwɔ kɛyɔɔng tɛ̀ttɛ̀ kiyenge. 22Ggwoon-Ɔlɔɔmɔlɔɔm nsi lɛyɛn ka lɛffɛ ’zɔng baang, ka ggwoon ammɛ ulenɛ Uyini, Ɔlɔɔmɔlɔɔm wa ɔyanganɛ lakke ɔkkpɛlɛ, la Waan-ɛtɔɔn Ɔlɔɔmɔlɔɔm. 23Lɛffɛ ’zɔng baang kwa livve-luwee gɔɔ kwa ettuma ba battina battɛ bippwolo bivvoongbɛ, ka buppwolo lakke Ɔlɔɔmɔlɔɔm bulenɛ baang ka buppwolonɛ bullɔtbɛ. Waan-ɛtɔɔn Ɔlɔɔmɔlɔɔm ɛtaanɛbɛ tɛ̀ttɛ̀ otinika. 24Balɔɔt ɛkpansi vvenɛ bakɔɔm buppwolo ammɛ bassɛ. Babeet ɛkpansi vvenɛ bakɔɔm iyyɛɛp abbɛ baffu bassɛɛn ka abbwɛ. 25Bikkwu lɛffɛ ’zɔng baang bile bɛtaa ppwool ɛkɛtɛ ɔkkpɛlɛ. La kɛfɛɛn baala bile ka kisul kisinɛ lile. 26Vvenɛ bakɔɔm lakke la iyyɛɛp ɛkpansi baffu ka lɛffɛ ’zɔng baang. 27Ɔzzànga bwa businɛ lɛyyɛɛp bulɔk baala bumal ka lɛffɛ ’zɔng baang. Gɔɔ ɔlɔɔt wa ɔnaangnɛ bɛfɛɛn izzit ɔlɔk ɔkkala lɛlaak baala ɔmalzɛ. Ule balɔɔt ba lakɔɔl abbɛ lalenɛ ka luvva Waan-ɛtɔɔn a kuddu keem ka bale bamal ka lɛffɛ ’zɔng baang.

will be added

X\