BIYSNT 20

1Nyɛn Uyilabɔtɔɔm ka ussinɛ ka libat usini uffu kuttɔɔk la ɛkpɔkɔlɔ lúbbé ’gwɔng baang gwa lɔddɔngnɛ ka kɔbɔɔk ka ɔkɔɔmnɛ la iyɛɛgba ya ilɔɔpnɛ. 2Ɔkaa ɛsɛɛn ’yɔng baang ya elenɛ utumalɔɔt ɛzzɔkɔ ya elenɛ Ɔnaang-a-kɛsɛɛm-a-kuyeeng ɔlɔk Satan ɔssɛɛnmɛ nggbakkɔpɔ ka innɔ likkpa iffa la kufaak. 3Uyilabɔtɔɔm ɔsammɛ ɔssɛɛn ka tɔkɔlɔ lúbbé ’gwɔng baang ɔssɛɛn ɛkpɔkɔlɔ ɔkakamɛ nkwaaning usi lɛbɛlɛ likkwoong ɔtta uffu ɔfɛɛt vveeng ’wɔng mung ɔssɛɛn ka kɔlɔɔk ɔddɔkɔddɔkɔ innɔ likkpa iffa la kufaak ’yɔng baang liggba. Nkwɔng kulenɛ lɛsak vvenɛ bakkyaamɛ bafɔngɔ ka waan ɛkɛtɛ ssup. 4Nyɛn igbaal a kibeet. Balɔɔt ’bɔng baang ba bataanɛ ka annyɛ, bannyibongbɛ lakke za kɛkaal a kɛkaal. Ɔgbaa, nyɛn liyeeng a balɔɔt ’bɔng baang ba bawwɔɔlnɛbɛ ka babwɔɔlɔnɛ lɔkkwɔɔn a kɔlɔɔk gwa Jesus ɔlɔɔknɛ la kwa lɛmmwɔɔl Ɔlɔɔmɔlɔɔm. Ɛsɛɛn ’yɔng baang la ɛlɔɔp annyɛ ba bataka batele. Gɔɔ eleme ɛsɛɛn ’yɔng baang ba bataka banaang ka lɛttɔ-lusso la labɔɔk abbɛ. Baffubong bataa ka kuddu bakɔɔm ɛfɛɛn tɛ̀ttɛ̀ babeet la Christ ka innɔ likkpa iffa la kufaak. 5Babbu balɔk basi lifungala ka lubbe bappyɛlɛ bataa ka kuddu tɔttɔt innɔ likkpa iffa la kufaak ’yɔng baang isak. Uwɔng ulenɛ ɔkɔɔm-ɛtɔk a kifungala babbu ka lubbe. 6Laggele la ppyɛɛ wa lɛbaang a lɛbaang ule wa balɔɔt ’bɔng baang ba batoolonɛbɛ la babbu ba bakɔɔmnɛ ɛtɔk bafungalabɛ ka lubbe. Lùbbe gwa lule ka lɔbbalnɛ liffu lakke ka kwɔɔt abbɛ ba lɔbɛlɛ lɛyanga. Bale basseke bassɛɛn-a-luzɔɔm Ɔlɔɔmɔlɔɔm la Christ. Vvenɛ bakɔɔm ɛfɛɛn la Christ ka innɔ likkpa iffa la kufaak. 7Innɔ likkpa ’sɔng iffa la kufaak lilenɛ lɛsaal, vvenɛ basanga Satan ka igbakkɔpɔ. 8Vvenɛ umii ɔfɛɛt balɔɔt ba ballunɛ ifɛɛn ifɛɛn ka ɛkpansi. Uwɔng ulenɛ Gog la Magog. Satan vvenɛ ɔkɔɔmbɛ ɔkkpɛlɛ uffu lɛkɔɔng, bayipi tɛ̀ttɛ̀ kususuk ka tɔkɔlɔ lɔyɔngɔ. 9Bawaala ɔkkpɛlɛ ɛkpansi bakkpit laffɛ balɔɔt Ɔlɔɔmɔlɔɔm la laffɛ za lasaapmɛnɛ. Keem lɔkɔɔn lussi ka libat luffu luzzibɛ ɔkkpɛlɛ. 10Bakaa Ɔnaang-a-kɛsɛɛm-a-kuyeeng wa ɔfɛɛtnɛbɛ bassɛɛn ka tɔkɔlɔ lɛkam a lɔkɔɔn za lɛbaang la ndegeledum ka ɛfɛɛn a baggbanɛ ɛsɛɛn ’yɔng baang la ɔkkala-lɛlaak wa ɔttɛnɛ ammɛ uppyee-kutolo Ɔlɔɔmɔlɔɔm lɛkaa bamii bassɛɛn. Bale bataa baang bayɛn akama bappyee bɔssɔp kikoon la kɛtɔm kɛfal a kɛfal. 11Nyɛn ulata ugbaal a kibeet wa lɛbaang la ɔlɔɔt wa ataanɛ ka ammɛ. Ɛkpansi la libat bɛmma bimii ka libat ka ɛfɛɛn ammɛ ulenɛ, la kɛyɛn bisi lɛbɛlɛ lile. 12Keem nyɛn babbu ba labaang la ba utiti ɔkkpɛlɛ ka babeenɛ ka lusso ugbaal a kibeet Ɔlɔɔmɔlɔɔm. Bawongolo livva. Bawongolo luvva gwa lulenɛ luvva kuddu. Kɛkaal a babbu badɔkɔ bakaal bakup kwa balenɛ lɛnaang bale lɛkkpɔk bassɛɛn ka livva ’sɔng baang. 13Lihu lɛsanga babbu ba tɔkɔlɔ azzɛ linnyi. Lubbe lɔsanga babbu ba aggwɛ lɔtta ka vveeng. Badɔkɔ bakaal kɛkaal abbɛ bakup kwa balenɛ lɛnaang. 14Basam lùbbé la ɛkpansi aggwɛ bassɛɛn ka lɛkam a lɔkɔɔn gwa lɛbaang. (Lɛkam a lɔkɔɔn ’zɔng baang lilenɛ lùbbé gwa ibaala). 15Ɔlɔɔt duu wa basimɛnɛ lɛkɔɔl ammɛ lɛkkpɔk ka luvva kuddu badɔkɔ basammɛ bassɛɛn ka tɔkɔlɔ lɛkam a lɔkɔɔn gwa lɛbaang.

will be added

X\