BIYSNT 2

1“Akkpɔk afee uyilabɔtɔɔm Ɔlɔɔmɔlɔɔm wa ulenɛ ka Ephesus: “Bɔtɔɔm ’bwɔng bulenɛ bwa bussinɛ ka ɔlɔɔt vvɔn wa ɔkɔɔmnɛ bwaannttuma bannambakkyaat ka kɔbɔɔk ɛlaabɔɔk ammɛ, wa ɔssɛnɛ ka bɛzzɔkɔ ikkandul ’yɔng baang innammikkyaat ya gold. 2Nsan lɔsan bwa alenɛyɔng lɛnaang. Nsan lɔsan tɛ̀ttɛ̀ alenɛyɔng kɛnaang gaang lɛnaang la kibbe luppyam sa alenɛyɔng libbe. Nsan lɔsan nttɛ kwa banaang-a-bubbi baala ayilayɔng. Nttina nttɛ, allɛyɔngbong balɔɔt ’bɔng baang ba battɛnɛ abbɛ bayilabɔtɔɔm a Jesus Christ, ɔzzànga usibɛ abbɛ lile. Asanyɔngbong attɛyɔng balɔɔt ’bɔng baang bakkala-lalaak. 3Abbeyɔngbong luppyam ayɛnyɔng akama ka lɛttɔ anaam, ɔzzànga ba ataka akkyaa afɔngɔyɔng. 4Ɔzzànga ’kwɔng kulenɛ kwa nfimwɔnɛyɔng kwɛ: Nɛ yɔng ba abɛlɛyɔng litele tɛ̀ttɛ̀ adɔkɔnɛ atelenɛyɔng ka ikeeng. 5Akkeyɔng bufulu bwa alenɛyɔng lɛttɔ. Akkyaa bubbi annyɔɔng afɔngɔyɔng, appyɛlɛ anaangyɔng kwa agbanɛyɔng lissi anaangyɔng ka kɛkɔɔm ɛtɔk. Asinɛyɔng bubbi annyɔɔng lɛkkyaa afɔngɔyɔng, vvenɛ nffu nsam ikkandul ’yɔng ka kibee annyɛ ngbata ka ɛfɛɛn annyɔɔng. 6Ɔzzànga mung ulenɛ bwa bubeenɛ la annyɔɔng: Lilɔɔk sa balɔɔt a Nicolaitan banaangnɛ litunwɔyɔng tɛ̀ttɛ̀ litunnɛnɛ anaam. 7“Ayanganɛyɔng latɔɔk, agɔpɔlɔyɔng kwa Kuyeeng-Ɔlɔɔmɔlɔɔm kɔlɔɔknɛ la izɔɔm. “Vvenɛ nnyi balɔɔt bɔng baang ba balenɛ lɛbɛtɛ lakke za kizzi likkpo lɛsan a kɛssɛ kuddu za libeenɛ ka tɔkɔlɔ bɔtɔɔm Ɔlɔɔmɔlɔɔm.” 8“Akkpɔk afee uyilabɔtɔɔm wa ulenɛ ka luzɔɔm ka Smyrna attɛ: “Uwɔng ulenɛ bɔtɔɔm bwa bussinɛ ka ɔlɔɔt vvɔn wa ulenɛ ɔkɔɔm-ɛtɔk la lakpeke, wa ubbenɛ, ɔppyɛlɛ ufungala ɔtaa ka kuddu. 9Nsan lilɔɔk annyɔɔng lɔsan. Nsan lɔsan nttɛ annyɔɔng ɔbbɔlwɔyɔng lɔbbɔl; ɔzzànga ka lɔkkwɔɔn ɔyyɛɛpwɔyɔng lɔyyɛɛp. Nsan babbu lilɔɔk sa balɔɔt ba babbwanɛ battɛ abbɛ balɔɔt a Jews balɔɔknɛ batumwɔyɔng. Abbɛ balenɛ kukup a balɔɔt ba balenɛ ba Satan. 10Tɛ̀ttɛ́ akama wa ale ayɛnyɔng ɔbbwɔpɔwɔyɔng. Gɔpɔlɔyɔng! Satan vvenɛ ɔllɛwɔyɔng ka ule ɔssang balɔɔt balɔk ɔssɛɛn igbakkɔpɔ. Lilɔɔk annyɔɔng litaa littumu ka bɛtɔm zzɔɔp. Ayangayɔng kiyila ka anaam, gɔɔ mkkpa ule lubbe, vvenɛ nnyiwɔyɔng ododo-kuddu. 11“Ayanganɛyɔng latɔɔk, agɔpɔlɔyɔng kwa Kuyeeng-Ɔlɔɔmɔlɔɔm kɔlɔɔknɛ kunnyi izɔɔm. Balɔɔt ba babɛtɛnɛ baala bayɛn akama ka lubbe gwa lule lɔbbal liffu.” 12“Akkpɔk afee uyilabɔtɔɔm Ɔlɔɔmɔlɔɔm ka luzɔɔm a Pergamum attɛ: “Bɔtɔɔm ’bwɔng mung bussi ka ɔlɔɔt vvɔn wa ɔyanganɛ ogge wa ɔlamnɛ lafoom laffa laffa. 13Nsan lɔsan ka ɛfɛɛn allunɛyɔng. Alluyɔng ka ɛfɛɛn a Satan ayanganɛ ugbaal a kibeet ammɛ. Alenɛyɔng balɔɔt anaam ba lɔkkwɔɔn. Luppyam annyɔɔng asiyɔng lɛsam ka kkwɔɔt anaam gɔɔ gbaak ka ɛkɛtɛ ya badɔkɔnɛ bawwɔɔl Antipas, ttɛɛsɛ anaam ka ɛfɛɛn a Satan ullunɛ. 14Ɔzzànga bwaan a lilɔɔk lile mung sa nlɔɔknɛ ntumwɔyɔng. Balɔɔt balɔk bale baang ka ɛfɛɛn annyɔɔng ba bakupnɛ lukopolo a Balaam. Ammɛ ukopolonɛ Balak tɛ̀ttɛ̀ ule ɔnaang balɔɔt a Israel banaang bubbi ka bazzinɛ kazzi kwa balenɛ ilat likkpele, la kikup a bwanavva. 15Ɔgbaa assɛ ayangayɔng balɔɔt ba ning baang ka bɛzzɔkɔ annyɔɔng ba bakupnɛ lukopolo balɔɔt a Nicolaitan. 16Akkyaa bubbi annyɔɔng afɔngɔyɔng. Nzang asinɛyɔng lɛkkyaa afɔngɔyɔng, nle ka nkɔɔmnɛ ogge wa ɔttanɛnɛ ka kamma gedegede mung nffu ka ɛfɛɛn annyɔɔng nllu kullu la balɔɔt ’bɔng baang. 17“Ayanganɛyɔng latɔɔk, agɔpɔlɔyɔng kwa Kuyeeng-Ɔlɔɔmɔlɔɔm kɔlɔɔknɛ kunnyi izɔɔm ɔkkpɛlɛ! “Vvenɛ balɔɔt ’bɔng baang ba balenɛ lɛbɛtɛ bazzi kazzi lalup kwa kazzanganɛ manna. Vvenɛ nnyi ɔlɔɔt la vvɔn ulata lɛttaal za balenɛ ufaa lɛkɔɔl lɛkkpɔk; za balɔɔt balɔk bale basi lɛsan, ukpeke ɔlɔɔt ’wɔng baang keem wa ɔyanganɛzɛ ka ule ɔsan.” 18“Akkpɔk afee Uyilabɔtɔɔm Ɔlɔɔmɔlɔɔm wa ulenɛ ka luzɔɔm ka Thyatira attɛ: “Uwɔng ulenɛ bɔtɔɔm bwa bussinɛ ka Waan-Ɔlɔɔmɔlɔɔm, wa zzeen ammɛ lappwolonɛ tɛ̀ttɛ̀ lalaak a lɔkɔɔn, bukkpɔ ammɛ bullaat tɛ̀ttɛ̀ lukkpi gwa balenɛ gwɛ lɛkkpɔlɔ. 19Nsan lɔsan bwa anaangnɛyɔng. Nsan mung kɛsaap annyɔɔng, la kiyila annyɔɔng, la kinnyi latele annyɔɔng la kibbe-lɛttɔ. Nsan lɔsan nttɛ anaangyɔngbong gaang gaang gedegede mung attayɔng tɛ̀ttɛ̀ ɛlɔmɛlɔm. 20Ɔzzànga mung ulenɛ kɔlɔɔk kwa nyanganɛ ntumwɔyɔng: Ayilayɔngbong kwa wanavva ’wɔng baang wa ɔzzanganɛ Jezebel, wa ɔkkwɔɔmɛnɛ kɛyɔɔng Uyilabɔtɔɔm-Ɔlɔɔmɔlɔɔm. Ukopolo ɔdɛm ibɔɔyi anaam ippyɛlɛ ifula ka kɛnaang a babbu lilɔɔk, bazzi lizzi sa bazɔɔmnɛ bannyi ilat. 21Nnyimɛbong ɛkɛtɛ nttɛ ɔkkyaa kɛnaang a bubbi ɔfɔngɔ, ɔzzànga ba ɔggyan ɔttɛ ɔkkyaa kɛssɛ kɛzak ɔfɔngɔ. 22Ɔzzànga vvenɛ nsammɛ nwulu ka igolo, ka ɛfɛɛn ammɛ la balɔɔt ba bamininɛ la ammɛ bale bayɛn akama wa lɛbaang. Vvenɛ nkka ’kwɔng lɛnaang, ɔzzànga bakkyaanɛ kɛnaang a bɛfɛɛn izzit bafɔngɔ, vvenɛ nkkyaa nfongo. 23Vvenɛ nwwɔɔl balɔɔt a kɔssɛ ammɛ ɔgbaa, nkwaaning izɔɔm ɔkkpɛlɛ isan ittɛ anaam nlenɛ ɔlɔɔt wa nsannɛ ippyam a balɔɔt la ittina abbɛ. Vvenɛ nkipili ɔlɔɔt la vvɔn nssanga tɛ̀ttɛ̀ ulenɛ lɛnaang ɔffɔ. 24“Ɔzzànga annyɔɔng balɔɔt balɔk ba alenɛyɔng ka Thyatira ba ataka akupyɔng ubbu lukopolo ’wɔng. Ba ataka akkoopyɔng kwa balɔɔt balɔk bakkwɔɔnɛ, ’kɔlɔɔk a lalup a Satan kwa ddɔng’. Nbwɔɔlɔwɔyɔng, baala ngbaawɔyɔng akama ɔlɔk. 25Ɔzzànga akɔɔmyɔng bwa bulewɔnɛyɔng ka eddu kkpɔk tɔttɔt nppyɛlɛ nffu. 26- 28Kwa balɔɔt ’bɔng baang ba babɛtɛnɛ, batiinɛ baang ka banaangnɛ kwa nggyannɛ nttɛ banaang tɔttɔt ɔffɔ ka lakpeke, vvenɛ nnyibɛ kɛssanga lakke za ntɔknɛ ka Dedde anaam. Vvenɛ nnyibɛ lakke za kɛkɔɔm ɛkpansi ɔkkpɛlɛ la lɛgabwɔ. Babɔlbɛ sukusuku tɛ̀ttɛ̀ bɛfaak ikkpo. Vvenɛ nnyibɛ ubbele-ettuma wa ɔttanɛ lɔfɔm. 29“Ayanganɛyɔng latɔɔk, agɔpɔlɔyɔng kwa Ɔlɔɔmɔlɔɔm ɔlɔɔknɛ la izɔɔm ɔkkpɛlɛ!”

will be added

X\