BIYSNT 17

1Uyilabɔtɔɔm Ɔlɔɔmɔlɔɔm vvɔn ka tɔkɔlɔ bayilabɔtɔɔm bannambakkyaat ba bayanganɛ bɛfɔɔm bɛnnambɛkkyaat, uffu ka ɛfɛɛn anaam, ɔttɛ, “Affu nyɔɔwɔ tɛ̀ttɛ̀ bayɔɔnɛ wanavva àkkpàlà akama wa lɛbaang. Wanavva àkkpàlà ’wɔng baang ulenɛ lɛffɛ za lɛbaang ’zɔng baang za babɔɔknɛzɛ bakkɛtɛ iyɔngɔ ggbadam. 2Babeet ɛkpansi bàkúp wanavva àkkpàlà wa lɛbaang ’wɔng baang. Balɔɔt a vveengodde babimi ka bavvanɛ batak a kɛssɛ-kɛzak ammɛ.” 3Kuyeeng-Ɔlɔɔmɔlɔɔm kɔnnaanɛ lakke kɔsamnɛ umii ka kasɛkɛ kɛmat. Nyɛn wanavva ka ɔtaanɛ ka libat ukolo ɛsɛɛn la lakɔɔl ibbyap ka bakkpɔknɛyɛ ka kkwɔɔt ɔkkpɛlɛ. Ɛsɛɛn ’yɔng baang ɛyanga lattɔ lannangakkyaat la iffi zzɔɔp. 4Wanavva ’wɔng baang ɔdɔkɔ ɔwɔkɔlɔ babili la bakolo iwɔkɔlɔ tɛ̀ttɛ̀ ubeet. Bagbɔgbɔmɛ bɛfɛɛn a kitook bya banaangnɛ byɛ la gold, ɔbɛtɛ la ifɔɔk akpana la lattaal za lakkaamnɛ kappya. Ɔkɔɔm ommonggo wa banaangmɛnɛ la gold. Laggbo la bɛfɛɛn bya bɛppwanɛ ɔlɔɔt bya bissimɛnɛ ka kɛssɛ-kɛzak ammɛ biyipibong baang. 5Ka lɛttɔ lusso ammɛ, bakkpɔkmɛ lɛkɔɔl za lɛyanganɛ ifɛɛt a lalup. “Ɔgabwɔ a Babylon, abakka ikkpàlà ɔkkpɛlɛ, ɔfɛɛt-ifɛtɛ a vveengodde.” 6Nyɛn nsan nttɛ wanavva ’wɔng baang linnyi balɔɔt Ɔlɔɔmɔlɔɔm la linnyi balɔɔt ’bɔng baang ba bawwɔɔlnɛbɛ ka batelenɛ Jesus libimimɛnɛ. Ɛkɛtɛ ya nyɛnmɛnɛ, kɔkɛɛlɛnɛ gaang gaang. 7Uyilabɔtɔɔm Ɔlɔɔmɔlɔɔm ɔbapnɛ ɔttɛ, “Kɔkɛɛlɛwɔ ’bɔng? Vvenɛ nbwɔɔlɔwɔ kɔlɔɔk ifɛɛt a wanavva ’wɔng baang la ɛsɛɛn ’yɔng baang ya ɛyanganɛ lattɔ lannangakkyaat la iffi zzɔɔp, ya ɛtɔkɔmɛnɛ. 8Ɛsɛɛn ’yɔng baang ya ayɛnnɛ ɛdɔkɔ ele ka kuddu, ɔzzànga mung ebbebong. Ɛdɔkɔ ɛttɛ ɛtta ka lubbe gwa lɛbaang effu, ɔzzànga mung vvenɛ emii bawwɔɔlyɛ. Balɔɔt ba ballunɛ ka ɛkpansi ba lakɔɔl abbɛ latakanɛ la kɛkkpɔk lile ka luvva balɔɔt a kuddu vvenɛ kɔkɛɛlɛbɛ ka bale bayɛn ɛsɛɛn ’yɔng baang ya ɛdɔkɔnɛ ele ka kuddu, gedegede mung ele libbe. Ɔzzànga vvenɛ ɛppyɛlɛ ɛbbal liffu. 9“Akɔɔm bikɔɔm asan ’kwɔng. Lattɔ lanngakkyaat lalenɛ ikpok innammikkyaat, ya wanavva ’wɔng baang ɔtaanɛ. Babeet bassɛ bale bannambakkaat. 10Ba kubbwɔɔk battɔbong. Vvɔn utii baang ka kizzi-lɛttɔ. Ɔzzànga wa vvɔn ba ɔtaka uffu. Ɛkɛtɛ ya ule uffu baala uttumu ka kibeet. 11Ɛsɛɛn ya ɛdɔkɔnɛ etii ikokolo ɔ̀zzánga mung esi ka kuddu lɛbɛlɛ lile, ulenɛ ubeet wa ɔnaangnɛ ka babeet bannambanna wa ɔdɔkɔnɛ ka ɔkɔɔm-ɛtɔk a kɛkaan a babeet ba bannambakkyaat wa ufeelenɛ umii bawwɔɔlmɛ. 12“Iffi ’yɔng baag zzɔɔp ya ayɛnnɛ ilenɛ babeet zzɔɔp ba batakanɛ litte kɛkɔɔm ɛfɛɛn. Abbɛ balenɛ ba bale bannyibɛ lakke kɛkɔɔm ɛfɛɛn tɛ̀ttɛ̀ babeet ka waan ɛkɛtɛ ssup la ɛsɛɛn ’yɔng baang. 13Babeet ’bɔng baang ɔkkpɛlɛ abbɛ ba zzɔɔp bayanga luttina ggwɔn, basam lakke abbɛ bannyi ɛsɛɛn ’yɔng baang. 14Vvenɛ ballu Waan-ɛtɔɔn ’wɔng baang kullu; ɔzzànga Waan-ɛtɔɔn ’wɔng la balɔɔt a kɔssɛ ammɛ ba ɔsanganɛ, bayila kwa ammɛ, vvenɛ ballu kullu babɛpɛ babeet ’bɔng baang ka ulenɛ Uyini Bayini, ule Ubeet a Babeet.” 15Uyilabɔtɔɔm ɔlɔɔmɔlɔɔm ’wɔng baang ɔlɔɔk la anaam ɔttɛ, “Bannyi ba ayɛnnɛ baang ba wanavva àkkpàlà ’wɔng baang ɔtaanɛ, balenɛ ifɔɔn, balɔɔt a kikkwu ɔkkpɛlɛ la ikaan. 16Iffi ’yɔng baang zzɔɔp ya ayɛnnɛ la ɛsɛɛn ’yɔng baang vvenɛ bayanga kɔlɔɔk la wanavva àkkpàlà ’wɔng baang. Vvenɛ batɔkmɛ bɛfɛɛn bya ɔyanganɛ, bakkyaamɛ bafɔngɔ umii kɛkɔɔ. Vvenɛ bazzimɛ ɛsɛɛn a kkwɔɔt basammɛ bassɛɛn ka lɔkɔɔn ɔkkɔm. 17Ɔlɔɔmɔlɔɔm ɔssɛɛnnɛbɛ lɔnngwa gwa kɛnaang kwa kulemɛnɛ ka luppyam ɔttɛ bayanga luttina ggwɔn, basam lakke abbɛ za kɛkɔɔm ɛfɛɛn bannyi ɛsɛɛn ’yɔng baang ɔddɔkɔddɔkɔ lɛmmwɔɔl Ɔlɔɔmɔlɔɔm lɛnaang ka lɔkkwɔɔn. 18“Wanavva ’wɔng baang wa ayɛnnɛ ulenɛ lɛffɛ za lɛbaang za lɛkɔɔmnɛ babeet ɔkkpɛlɛ ka ɛkpansi.”

will be added

X\