BIYSNT 16

1Nppyee lɛmmwɔɔl ka lissinɛ ka labun Ɔlɔɔmɔlɔɔm lɛlɔɔk la bayilabɔtɔɔm wa bannammikkyaat lɛttɛ, “Amii asikiliyɔng binyanga Ɔlɔɔmɔlɔɔm allɔtyɔng ka ɛkpansi.” 2Uyilabɔtɔɔm wa ikeeng umii usikili binyanga Ɔlɔɔmɔlɔɔm ka ulɔlɔ wa ammɛ ɔllɔt ka lisse. Lassɔp la akama wa lɛbaang bɛtta bikup balɔɔt ba bayanganɛ eleme ɛsɛɛn ’yɔng baang ka kkwɔɔt, la balɔɔt ba balenɛ lɛzɔɔm bannyi ɛlɔɔp annyɛ. 3Uyilabɔtɔɔm wa ibaala usikili kɛfɔɔm sa ammɛ ɔssɛɛn ka lihu. Bannyi basikili basseke tɛ̀ttɛ̀ linnyi ubbu ɔlɔɔt. Bɔfɛɛn ɔkkpɛlɛ bwa bulenɛ ka lihu bwa buyanganɛ kuddu, bubbe. 4Wa ikkyaat usikili kɛfɔɔm sa ammɛ ɔssɛɛn ka issa la iggbɔlɔ. Ɔzzánga bannyi basikili linnyi. 5Nppyee uyilabɔtɔɔm wa ɔkatnɛ bannyi ka ɔlɔɔknɛ ɔttɛ, “Ale bbwak ka kɛkaal sa akaalnɛ, annɔ ɔlɔɔt wa doddo, wa ulenɛ lule mung la wa ɔdɔkɔnɛ. 6Abbɛ banaangnɛ balɔɔt Ɔlɔɔmɔlɔɔm la bappyee-kutolo Ɔlɔɔmɔlɔɔm linnyi lissibɛ. Kwakkwɛ bannyinɛbɛ linnyi bavva. Bayɛnbong bwa baggyannɛ.” 7Nppyee lɛmmwɔɔl ka lɛlɔɔknɛ ka labun lɛttɛ, “Uyini, Ɔlɔɔmɔlɔɔm wa ɔyanganɛ lakke ɔkkpɛlɛ, kɛkaal annɔ kile ka lɔkkwɔɔn bbwak.” 8Uyilabɔtɔɔm wa inna ’wɔng baang usikili kɛfɔɔm sa ammɛ ɔllɔt ka livve-luwee. Bafɔngɔ kɛfɔɔp azzɛ sa lɛbaang kitup balɔɔt. 9Ɔzzánga balɔɔt bakkɔm ka kɛfɔɔp a livve-luwee, babbaat Ɔlɔɔmɔlɔɔm wa ɔyanganɛ lakke ɔtta ikama ’yɔng baang. Basi bubbi abbɛ lɛkkyaa bafɔngɔ babungu lakke ammɛ. 10Uyilabɔtɔɔm Ɔlɔɔmɔlɔɔm wa kubbwɔɔk usikili kɛfɔɔm sa ammɛ ɔllɔt ka kɛtaa kibeet ɛsɛɛn ’yɔng baang. Kisul kɛttɔ ka itutum annyɛ, balɔɔt bazzi lasaal ka ɔssɔpnɛbɛ. 11Babbaat Ɔlɔɔmɔlɔɔm ka libat ka akama wa bayɛnnɛ la bɔssɔp bwa bappyeenɛ. Ɔzzànga kɛnaang a bubbi basi lɛkkyaa bafɔngɔ. 12Uyilabɔtɔɔm Ɔlɔɔmɔlɔɔm wa bwɔlaaning usikili kɛfɔɔm sa ammɛ ɔllɔt ka lɔyɔngɔ Euphrates. Lɔyɔngɔ lɔkkaam luloko babeet ɛtɔk ba bassinɛ ka lusso gwa livve-luwee lɔfɔm ɛtɔk bassɛ. 13Ɔzzánga nyɛn liyeeng sa lisinɛ lɛyyɛɛp likkyaat, lile tɛ̀ttɛ̀ ibubwaak ka littanɛ ka kamma ɛzzɔkɔ la ɛsɛɛn ’yɔng baang la ɔkkala-lɛlaak wa ɔttɛnɛ ammɛ uppyee-kutolo Ɔlɔɔmɔlɔɔm. 14Assɛ lilenɛ liyeeng a banaang-a-kɛsɛɛm sa linaangnɛ bɛmaanga. Liyeeng ’sɔng mung limiinɛ likup babeet ka ɛkpansi ɔkkpɛlɛ likkwɔɔbɛ baffu lɛkɔɔng ka kɛtɔm sa lɛbaang sa Ɔlɔɔmɔlɔɔm, wa ɔttanɛ lakke ɔkkpɛlɛ. 15“Gɔpɔlɔyɔng, nle nffu tɛ̀ttɛ̀ ussip. Laggele lale za balɔɔt ba bataanɛ kwet kwet bakat iwɔkɔlɔ abbɛ, nkwaaning basi kɛkɔɔ lɛssɛ bakkpit izzit inaangbɛ, ka kpelegedee.” 16Liyeeng ’sɔng baang likɔɔm babeet baffu babbi ɛfɛɛn nnyɔn, ka ɛfɛɛn a bakkwɔɔnɛ Armageddon ka kukaan a Hebrew. 17Uyilabɔtɔɔm Ɔlɔɔmɔlɔɔm wa innammikkyaat usikili ulɔlɔ wa ammɛ ɔllɔt ka kɛffa. Agagaga lɛmmwɔɔl lɛtta ka ugbaal a kibeet lɛttɛ, “Kɔsaalbong.” 18Immwalang inaang, àkkpálá ɔtta, ɛkpansi ɛnnyɛkɛ. Ka ɔlɔɔt ussinɛ ɔfal, ɛkpansi ning baang ba ɛtaka ɛnnyɛkɛ. Uwɔng baang ɔdɔkɔnɛ kɛnnyɛkɛ ɛkpansi sa kɛttanɛ lɛbbɔl. 19Lɛffɛ ’zɔng baang lɛfaka bɛfaak bɛkkyaat. Billu ka ikaan ɔkkpɛlɛ bɛbɛpɛ. Ɔlɔɔmɔlɔɔm ukke Babylon killu sa lɛbaang, ɔnaangsɛ kɛvva batak ommonggo ammɛ. Batak ’bɔng baang, batak a binyanga ammɛ. 20Lakkpɔ ɛkpansi ɔkkpɛlɛ lataak ka bannyi. Ikpok ɔkkpɛlɛ ikkyaap. 21Uteep lattaal za lalɔɔpnɛ gaang gaang uvvoong balɔɔt. Balɔɔt babbaat Ɔlɔɔmɔlɔɔm kwa lattaal ’zɔng baang. Ɔdɔkɔ akama wa lɛbaang.

will be added

X\