BIYSNT 15

1Nbbal kɔlɔɔk a bikɛɛlɛ kɔlɔk lɛyɛn ka libat a lukkpaaggbeedde kuggbenge-uggbenge kɔkɛɛlɛ kɔgbaa. Bayilabɔtɔɔm Ɔlɔɔmɔlɔɔm badɔkɔ bannambakkyaat la lilɔɔk akama sa linnangikkyaat, sa lilenɛ sa lakpeke. Assɛ lilenɛ lakuma ìyɔ́ɔ kitun a kɔlɔɔk Ɔlɔɔmɔlɔɔm. 2Ɔzzánga nppyɛɛk, nyɛn bɔfɛɛn tɛ̀ttɛ̀ libbwe kiyenge ka utoolonɛ la lɔkɔɔn. Nssɛ nyɛn balɔɔt ’bɔng baang ba babɛtɛnɛ ɛsɛɛn ’yɔng baang la ɛlɔɔp. Ɔbɛtɛ la ɔlɔɔt wa bannyimɛnɛ lɛkɔɔl ka lukkwoon. Badɔkɔ bale ka kibee ka libbwe kiyenge, bakɔɔm buggɔ bwa Ɔlɔɔmɔlɔɔm unnyinɛbɛ. 3Badɔkɔ basoom kisoom a Moses, bɔɔyi Ɔlɔɔmɔlɔɔm la kisoom a Waan-ɛtɔɔn Ɔlɔɔmɔlɔɔm battɛ, “Uyini, Ɔlɔɔmɔlɔɔm wa ɔyanganɛ lakke ɔkkpɛlɛ, linaang annɔ liggbenge, likɛɛlɛ. Ubeet a vveengodde ɔkkpɛlɛ, itɔk annɔ ile ya bbwak ka lɔkkwɔɔn. 4Uyini, nyinɔɔng ulenɛ wa annɔ ale asimɛ lɛbbwɔpɔ? Nnyinɔɔng ule usi lɛbwɔɔlɔ tɛ̀ttɛ̀ aggbengenɛ affɔ? Annɔ keem appyɛɛnɛ asɛlɛ bubbi. Vveengodde ɔkkpɛlɛ vvenɛ baffu babee ka lusso annɔ bazɔɔm bannyiwɔ ka linaang annɔ lilenɛ sa bbwak, balésɛ lɛyɛn ɔkkpɛlɛ.” 5Nkwɔng kulenɛ lɛsaal, nyɛn ggwoon-Ɔlɔɔmɔlɔɔm ka libat ka luwongolonɛ la Ugala Ɔlɔɔmɔlɔɔm ka tɔkɔlɔ aggwɛ. 6Bayilabɔtɔɔm bannambakkyaat ba bayanganɛ ikama innammikkyaat batta ka tɔkɔlɔ a Ggwoon-Ɔlɔɔmɔlɔɔm baffu. Badɔkɔ bawɔkɔlɔ iwɔkɔlɔ ya illaatnɛ inyanya. Bayanga gold ka baggbɔnɛ bakkpit ka ikukulu. 7Ɛsɛɛn nnyɔn ɛfakala ka isɛɛn a kuddu ya inna ennyi bayilabɔtɔɔm ba bannambakkyaat bɛfɔɔm bɛnnammbɛkkyaat bya banaangnɛbyɛ la gold la kitun a kɔlɔɔk Ɔlɔɔmɔlɔɔm wa ɔtaanɛ ka kuddu kɛfal a kɛfal ffit ka tɔkɔlɔ annyɛ. 8Ggwoon-Ɔlɔɔmɔlɔɔm lɔdɔkɔ lusseke isɔngɔ isɔngɔ ka tɔkɔlɔ ya issinɛ ka latele Ɔlɔɔmɔlɔɔm la lakke ammɛ. Ɔlɔɔt wa ule umii ka tɔkɔlɔ a ggwoon-Ɔlɔɔmɔlɔɔm baala ule ɔddɔkɔddɔkɔ ikama lilɔɔk sa linnaangikkyaat sa bayilabɔtɔɔm bannambakkyaat bakɔɔmnɛ baffu lisaal.

will be added

X\