BIYSNT 14

1Ɔzzánga nppyɛɛknɛ nyɛn Waan-ɛtɔɔn Ɔlɔɔmɔlɔɔm ka ubeenɛ ka lɛttaal a Zion. Ka ɛfɛɛn a ubeenɛ, lalɔp innɔ balɔɔt zzillalakkyaat badɔkɔ baang ba bayanganɛ lakɔɔl ammɛ la za Abassɛ ammɛ ka lɛttɔ-lusso ka bakkpɔknɛ. 2Nppyee lɛmmwɔɔl ka lɛttanɛ ka libat, lɛfɔl tɛ̀ttɛ̀ kɛttɔl a bannyi. Lɛ̀bál lɔsap ìkkpálá. Ɛkɛtɛ ɛlɔk appyeenɛ attɛ bánaang-ibin bakkpanɛ buggɔ. 3Lalɔp innɔ balɔɔt ’bɔng baang zzillalakkyaat babee bappyɛɛk ugbaal a kibeet Ɔlɔɔmɔlɔɔm la isɛɛn ’yɔng baang inna la bagɛlɛnya. Basoom ufaa kisoom sa abbɛ batta-ka-kɔlɔɔk kɛyɔɔng bakkwoongnɛ bakkoop. Ule balɔɔt ’bɔng baang keem ba Ɔlɔɔmɔlɔɔm ɔkkalabɛ. 4Abbɛ balenɛ balɔɔt ba balenɛbɛ kɛyɔɔng doddo liloko ka basinɛ bwanavva likup. Bale tɛ̀ttɛ̀ balɔɔt ba batakanɛ kwa kimini la ɔlɔɔt lɛsan. Abbɛ bakupnɛ Waan-ɛtɔɔn Ɔlɔɔmɔlɔɔm ka ɛfɛɛn ɔkkpɛlɛ ya umiinɛ. Bakkalabongbɛ ka bɛzzɔkɔ ɔssɛbibit ɔkkpɛlɛ. Abbɛ balenɛ ɔkɔɔm ɛtɔk a lakkpele za Ɔlɔɔmɔlɔɔm la Waan-ɛtɔɔn Ɔlɔɔmɔlɔɔm. 5Lɛlaak ba bataka bakkala; kwɛ ba basan. 6Ɔzzánga nyɛn uyilabɔtɔɔm-Ɔlɔɔmɔlɔɔm ɔlɔk ka ukutnɛ fulufulufulu ka libat. Ɔbwɔɔlɔ ikaan ɔkkpɛlɛ la ifɔɔn ɔkkpɛlɛ la isam ɔkkpɛlɛ Kuttu-budoddo Ɔlɔɔmɔlɔɔm kwa kɛfal a kɛfal. 7Ɔgaga ɔttɛ, “Ebinukkpaapi ɛbbwɔpɔwɔyɔng. Abunguyɔng lakke annyɛ. Ɛkɛtɛ ɛffɔmɛbong ya ele ka ɛkaalnɛ kɛkaal ɔssɛbibit ɔkkpɛlɛ. Azɔɔm annyimɛyɔng ammɛ wa ɔnaangnɛ libat la ɛkpansi, la lihu la iggbɔlɔ.” 8Uyilabɔtɔɔm wa ibaala ukup wa ɔkɔɔmnɛ ɛtɔk, ɔlɔɔk ɔttɛ, “Ɛttɔbong! Ɛkpansi a Babylon ya lɛbaang ɛttɔbong. Ennyibong balɔɔt ɔkkpɛlɛ batak a Kɛssɛ-kɛzak annyɛ bavva.” 9Uyilabɔtɔɔm wa ussekenɛ isimi ukup ba baffa ba bakɔɔmnɛ ɛtɔk, ɔgaga ɔttɛ, “Ɔlɔɔt duu wa utelenɛ ɛsɛɛn ya ikeeng la ɛlɔɔp annyɛ, ɔyanga eleme ka lɛttɔ-lusso ɔlɔk ka isimi kɔbɔɔk, 10vvenɛ ɔvva batak a binyanga Ɔlɔɔmɔlɔɔm ba ulenɛ lɛsam ɔssɛɛn la lagabwɔ ka ommonggo batak a binyanga ’wɔng baang. Ɔlɔɔt duu wa utelenɛ ɛsɛɛn ’yɔng baang, vvenɛ ɔyɛn akama ka lɔkɔɔn a ndegeledum ka lusso bayilabɔtɔɔm Ɔlɔɔmɔlɔɔm la Waan-ɛtɔɔn ammɛ. 11Isɔngɔ lɔkɔɔn gwa lɔyɔɔnɛbɛ akama imiibong ka libat kɛfal a kɛfal. Balɔɔt ba batelenɛ ɛsɛɛn ’yɔng baang la ɛlɔɔp annyɛ, bayanga lɛkɔɔl annyɛ ka bakkpɔknɛ, ka akama baala batta kikoon la kɛtɔm. 12Nkwɔng kɔggyan kɛbbɔ akama ka kufoom kwa balɔɔt Ɔlɔɔmɔlɔɔm, ba batelenɛ lafɔɔ Ɔlɔɔmɔlɔɔm, bayanga kiyila batum Jesus. 13Ɔzzánga nppyee lɛmmwɔɔl ka lɛlɔɔknɛ ka libat lɛttɛ, “Akkpɔk ’kwɔng: Laggele lale za balɔɔt ba bale babbe kwa Uyini ka ussinɛ mung umii ka lusso.” Kuyeeng kɔttɛ, “Kule ka lɔkkwɔɔn. Akama kɛnaang abbɛ vvenɛ ɔnaangbɛ bayanga kɛfɛkɛlɛ ka budoddo linaang abbɛ bule ka buppyɛlɛnɛ bukupbɛ.” 14Nppyɛɛknɛ, nyɛn balata ìkkpálá lukkpaaggbeede. Ka ìkkpálá ’yɔng baang, bɔfɛɛn budɔkɔ baang ka butaanɛ la kɛttɔpɔ sa banaangnɛsɛ la gold la ɛggɛ ya ɛlamnɛ ka kɔbɔɔk ka bukɔɔmnɛ 15Ɔzzánga Uyilabɔtɔɔm ɔlɔk ɔgbata ka labun, ubungu ɔgaga unnyi ɔlɔɔt wa ɔtaanɛ ka ìkkpálá lukkpaaggbeede ɔttɛ, “Akɔɔm ɛggɛ annɔ ayaat liyaat. Ɛkɛtɛ liyaat ɛkpansi ɛffɔbong.” 16Ɔzzánga ɔlɔɔt ’wɔng baang wa ɔtaanɛ ka ìkkpálá lukkpaaggbeede, uwung ogge ammɛ ɔfɔngɔ kuttɔɔk, liyaat ɛkpansi lìlé la kɔyaat. 17Nbbal uyilabɔtɔɔm Ɔlɔɔmɔlɔɔm ɔlɔk lɛyɛn ka ɔttanɛ ka libat. Ammɛ ɔgbaa ɔyanga ɛggɛ ya ɛlamnɛ. 18Uyilabɔtɔɔm ɔlɔk wa ɔkatnɛ lɔkɔɔn utuma ka labun a Ggwoon-Ɔlɔɔmɔlɔɔm ka libat ɔtta. Ubungu ɔgaga unnyi uyilabɔtɔɔm wa ɔyanganɛ ɛggɛ ya ɛlamnɛ ɔttɛ, “Akɔɔm ɛggɛ annɔ abbɔk lakkpobɛssɛ ka bɔtɔɔm ɛkpansi, lalakbong.” 19Ɔzzánga uyilabɔtɔɔm ’wɔng baang uwung ɛggɛ ammɛ ɔfɔngɔ ɛkpansi. Ɔbbɔk lakkpobɛssɛ ka bɛbɔɔk ɔsam ɔssɛɛn ka ɛfɛɛn a kɛnaang a batak a binyanga Ɔlɔɔmɔlɔɔm. 20Bakaam lakkpobɛssɛ ’zɔng baang bassɛɛn ka ɛfɛɛn a banaangnɛ batak ka killu a vveeng. Linnyi litta ka ɛfɛɛn a kɛnaang a batak littɔl tɛ̀ttɛ̀ ɛlɔlɔ. Ele lalɔp imal zzɔɔp ka bɔlɔm. Ele bukkpɔ kubbwɔɔk ka bɔddɔng.

will be added

X\