1 Nyɛn ɛsɛɛn a likum ka tɔkɔlɔ lihu. Ɛyanga iffi zzɔɔp la lattɔ lannangakkyaat, la kɛttɔpɔ ododo ka luffi la ggwɔn. Lɛkɔɔl ibbyap lileyɛ baang ka bakkpɔknɛyɛ ka lɛttɔ. 2 Ɛsɛɛn ya nyɛnnɛ ɛbal ɛgɔɔt, la bukkpɔ tɛ̀ttɛ̀ bwa bikkwɛɛ; la kamma tɛ̀ttɛ̀ kamma lenngwing. Dragon ’wɔng baang unnyi ɛsɛɛn a kɛmat ’yɔng baang lakke ammɛ biini, la kibeet ammɛ, la kizzilɛttɔ ammɛ sa lɛbaang. 3 Lɛttɔ ɛsɛɛn zzɔn ɔbal tɛ̀ttɛ̀ lilenɛ la kiddopo sa lɛbaang. Ɔzzànga bɔssɔp ’bwɔng baang busaalbong. Ɛkpansi ɔkkpɛlɛ kɔkɛɛlɛyɛ bakup ɛsɛɛn ’yɔng baang. 4 Balɔɔt ɔkkpɛlɛ batele ɛsɛɛn ya bakkwɔɔnɛyɛ ‘dragon’ ka elenɛ lakke annyɛ lɛsam ennyi ɛsɛɛn a kɛmat. Batele ɛsɛɛn a kɛmat ’yɔng baang balɔɔk battɛ, “Nnyinɛ ulenɛ tɛ̀ttɛ̀ ɛsɛɛn a kɛmat ’yɔng? Nnyinɛ ukkwoongnɛ ulluyɛ kullu?” 5 Bafɔngɔ ɛsɛɛn ’yɔng baang ɛlɔɔk babbu lilɔɔk, ɛyanga lakke ka likkpa likkyaat la ittuma iffa. 6 Ɛbbaat Ɔlɔɔmɔlɔɔm. Ɛbbaat lɛkɔɔl ammɛ la ɛfɛɛn ya ullunɛ, la balɔɔt ɔkkpɛlɛ ba balenɛ la ammɛ. 7 Bafɔngɔyɛ ellu balɔɔt-Ɔlɔɔmɔlɔɔm kullu ɛttabɛ lakke. Bannyiyɛ kizzilɛttɔ la ɛsam la ɛsam, lɔfɔɔn la duu la ikaan, la kɛkkpa la duu. 8 Balɔɔt ɔkkpɛlɛ ba balenɛ ka ɛkpansi vvenɛ bateleyɛ, balɔɔt ba Ɔlɔɔmɔlɔɔm ba ɔtakanɛ lakɔɔl abbɛ lɛkkpɔk ɔssɛɛn ka luvva-kuddu tɛ́ttɛ́ ɔlɔɔmnɛ vveeng ’wɔng mung. Luvva ’gwɔng lule gwa Waan-ɛtɔɔn Ɔlɔɔmɔlɔɔm wa balemɛnɛ lɛwwɔɔl. 9 “Gɔpɔlɔyɔng! ayanganɛyɔng latɔɔk za kippyee kɔlɔɔk. 10 Ɔlɔɔt duu wa ulenɛ wa kɛkaa, vvenɛ bakaamɛ. Ɔlɔɔt wa ulenɛ wa kɛwwɔɔl la ogge, vvenɛ bakɔɔm ogge bawwɔɔlmɛ. Nkwɔng kɔggyan kɛbbɔ akama la kɛyanga kiyila ka lufoom a balɔɔt Ɔlɔɔmɔlɔɔm.” 11 Ɔzzánga nyɛn ɛsɛɛn ɛlɔk ka ɛttanɛ ka ɛkpansi. Ɛyanga iffi iffa tɛ̀ttɛ̀ ya waan-ɛtɔɔn. Ɛlɔɔk tɛ̀ttɛ̀ ɔbbyap ɛsɛɛn ’yɔng baang. 12 Ɛkɔɔm lakke za ɔkɔɔm ɛtɔk ɛsɛɛn a kɛmat ka lusso annyɛ. Ɛbɛtɛ ɛkpansi la balɔɔt ba ballunɛ ka annyɛ ɛttɛ batele ɛsɛɛn ya ikeeng, ya kiddopo annyɛ sa lubbe kilenɛ libbe. 13 Ɛsɛɛn ’yɔng baang ya ibaala ɛnaáng bɛmaanga bya lɛbaang. Ɛnaang lɔkɔɔn lussi ka libat lɔttɔ ka ɛkpansi ka lusso balɔɔt ɔkkpɛlɛ. 14 Ɛkɔɔm bɛmaanga bya bayilanɛyɛ battɛ ɛnaang ka lusso ɛsɛɛn ya ikeeng, ɛfɛɛt balɔɔt ɔkkpɛlɛ ba balenɛ ka ɛkpansi. Ɛbwɔɔlɔ balɔɔt ɛkpansi ɔkkpɛlɛ ɛttɛ babɔɔk ɛlɔɔp ka latele ɛsɛɛn ya ɛddoponɛ ka ɔgge etii ka kuddu. 15 Bafɔngɔ ɛsɛɛn ya ibaala ɛfɛkɛlɛ kuddu ɛssɛɛn ɛlɔɔp ’yɔng baang, nkwaaning ɛlɔɔp ’yɔng baang ɛlɔɔk kɛlɔɔk ɛwwɔɔl balɔɔt ba bale basiyɛ litele. 16 Ɛsɛɛn ’yɔng baang etut balɔɔt ɔkkpɛlɛ ba lɛbaang la ba utiti, ba ɔyyɛɛpnɛbɛ la ba ɔbbɔlnɛbɛ, babili la ba basinɛ babili lile, Ɛttɛ banaang eleme kɛyɔɔng ka kɔbɔɔk ɛlaabɔɔk la lɛttɔ-lusso. 17 Ɔlɔɔt wa ule ɔbbal bɔfɛɛn lɛtaan ɔlɔk ɔlɛɛp ba ɔbɛlɛ lile, usinɛ eleme ’yɔng baang ya ɛtaanɛ tɛ̀ttɛ̀ lɛkɔɔl ɛsɛɛn ’yɔng baang lɛyanga ka ɔkkpɔknɛ. 18 Akɔɔm bikɔɔm ka ’kwɔng. Ɔlɔɔt duu wa ɔsannɛ kɔlɔɔk, ukkwoong mung ɔbwɔɔlɔ bwa eleme ɛsɛɛn ’yɔng baang elenɛ. Annyɛ ebeenɛ ka etini ya ɔlɔɔt ’wɔng baang. Eleme lɛkɔɔl annyɛ ele 666.
