BIYSNT 12

1Bɛmaanga bya lɛbaang bituma ka lukkpaaggbeede. Wanavva ɔdɔkɔ baang wa uwɔkɔlɔ ammɛ ɔdɔkɔnɛ livve-luwee. Bukkpɔ utele ka ettuma, la kɛttɔpɔ bwaannttuma zzɔɔppabaffa ka lɛttɔ. 2Ɔdɔkɔ ka kɛppwɔlɔ imala. Bɔssɔp la akama lɛmaat bɛnaangmɛ ɔkkwa. 3Bɛmaanga bɛlɔk bya bɛkɛɛlɛnɛ gaang gaang bɛnaang ka lukkpaaggbeede. Uggboggbo ukolo ɛsɛɛn ya ɛ̀zzànganɛ “Dragon” ɛdɔkɔ baang. Ɛyanga lattɔ lannangakkyaat la iffi zzɔɔp la ododo ka lɛttɔ la zzɔn. 4Ɛsɛɛn ’yɔng baang ɛkɔɔm lɛsɛɛl annyɛ ɛkpakala kukup a bwaannttuma ka tɔkɔlɔ lakup lakkyaat ɛzzɔɔk ka ɛkpansi. Emii ebee ka lusso wanavva wa ɔppwɔlɔnɛ imala ’wɔng baang nkwaaning ɔmaatnɛ ɛmaat ɛmaat, ɛsam waan ammɛ ezzi. 5Wanavva ’wɔng baang ɔmaat waanawalam, wa ule ɔkɔɔm ɛkpansi ka lakke. Bannaa waan ’wɔng baang bakɔɔm bafee Ɔlɔɔmɔlɔɔm ka ugbaal a kibeet ammɛ. 6Wanavva ’wɔng baang ɔmma ɔssɛɛn ka tɔkɔlɔ kɛmat ka ɛfɛɛn Ɔlɔɔmɔlɔɔm ulenɛ lɛlɔngɔ ulokomɛ. Ɛfɛɛn ’yɔng baang elenɛ ya Ɔlɔɔmɔlɔɔm ule ɔppyɛɛkmɛ ka lavve 1,260 (Likkpa likkyaat la ittuma bwɔlaaning). 7Ɔzzánga lɛkɔɔng lɛttɔ ka libat. Michael la bayilabɔtɔɔm ammɛ ballu kullu la ɔbbyap-ɛsɛɛn ’yɔng baang. Ɛsɛɛn ’yɔng baang la bayilabɔtɔɔm annyɛ esikili ebee bbwak ellubɛ kullu. 8Ɔzzánga babɛtɛ ɛsɛɛn ’yɔng baang. Basiyɛ lɛfɔngɔ ɛtaa ka libat. 9Basamyɛ bazzɔɔk ka vveeng. Annyɛ elenɛ Ɔgɛlɛnya ɛzzɔkɔ ya ikkwɔɔnɛyɛ Ubbu ɔlɔk Satan, ya ɛfɛɛtnɛ ɛkpansi ɔkkpɛlɛ. Basamyɛ bazzɔɔk ka ɛkpansi la bayilabɔtɔɔm annyi ɔkkpɛlɛ. 10Ɔzzánga nppyee lɛmmwɔɔl ka lɛgaganɛ ka libat lɛttɛ, “Gedegede mung ikkala Ɔlɔɔmɔlɔɔm iffubong! Ɔlɔɔmɔlɔɔm ɔyɔɔbong lakke ammɛ tɛ̀ttɛ̀ Ubeet. Ɔlɔɔt wa ɔsanganɛ ɔyɔɔbong kizzi lɛttɔ ammɛ. Ɔlɔɔt wa ɔkatanɛ ikpana ayyɔɔt kɔlɔɔk, wa ubeenɛ ka lusso Ɔlɔɔmɔlɔɔm ɔkatabɛ kɔlɔɔk kikoon la kɛtɔm basangamɛbong ka libat bazzɔɔk. 11Ikpana ayyɔɔt ikɔɔm linnyi Waan-ɛtɔɔn la lɔkkwɔɔn a kɔlɔɔk kwa bakopolonɛ battamɛ likke. Badɔkɔ bayila lubbe. 12Ɔkkpɛlɛ annyɔɔng ba alenɛyɔng ka libat, killu kilewɔyɔng bakang, aggeleyɔng. Akama vvenɛ ɔttala ka ɛkpansi la lihu. Ubbu usinibong uffu ukupwɔyɔng la kitun a kɔlɔɔk ka luppyam, ka ɔsannɛ ɔttɛ ɛkɛtɛ essekemɛ ssup.” 13Ɛsɛɛn ’yɔng baang elenɛ lɛsan ɛttɛ basangabongyɛ bazzɔɔk ka ɛkpansi, esikili ɛggba wanavva wa ɔmaatnɛ waanawalam ’wɔng baang. 14Ɔzzánga bannyi wanavva ’wɔng baang bifekele ekkpolubat ya lɛbaang a lɛbaang, ɔkkɔɔnɛ ukut umii ka ɛfɛɛn a ɔtaanɛ ka kɛmat bakatmɛ ka likkpa likkyaat la kufaak, ɛsɛɛn ’yɔng baang esimɛ lɛkaa. 15Ɔzzánga ɛsɛɛn ’yɔng baang ɛkkwɔɔk ɛlɔlɔ ɛttɛ ezzi wanavva ’wɔng baang. 16Ɛkpansi ettele wanavva ’wɔng baang. Ewongolo kamma ɛwɔpɔlɔ ɛlɔlɔ ’yɔng baang ya ɛsɛɛn ’yɔng baang ɛkkwɔɔknɛ. 17Ɛsɛɛn ’yɔng baang kutunyɛ la wanavva ’wɔng baang ɛgbata emii ellu kullu la balɔɔt a kikkwu a wanavva ’wɔng baang, la balɔɔt ba batelenɛ lafɔɔ Ɔlɔɔmɔlɔɔm bayanga kiyila batum lɔkkwɔɔn a kɔlɔɔk kwa Jesus ɔbwɔɔlɔnɛ. 18Ɛsɛɛn ’yɔng baang ɛkɔɔng ka likum a lihu ebee.

will be added

X\