BIYSNT 11

1Unnyinɛ bissɛ pya lɔlɔɔm tɛ̀ttɛ̀ lukut, ɔbwɔɔlɔnɛ ɔttɛ, “Afeele amii alɔɔm ggwoon-Ɔlɔɔmɔlɔɔm la labun-Ɔlɔɔmɔlɔɔm. Akkwoon balɔɔt ba balenɛ baang ka luzɔɔm ka tɔkɔlɔ ggwoon-Ɔlɔɔmɔlɔɔm. 2Afɔngɔ kɛsana ssala a ggwoon-Ɔlɔɔmɔlɔɔm kɛlɔɔm. Basambongsɛ bannyi balɔɔt ba bafimnɛ kwa Jesus, ba bale basing ubeet-a-lɛffɛ ’zɔng baang bukkpɔ ka likkpa likkyaat la ittuma bwɔlaaning. 3Vvenɛ ntɔɔm ittɛɛsɛ anaam iffa la bissaka iwɔkɔlɔ ka bawɔkɔlɔnɛ. Vvenɛ bayaam babwɔɔlɔ kuttu Ɔlɔɔmɔlɔɔm ka likkpa ’sɔng baang likkyaat la ittuma bwɔlaaning.” 4Ittɛɛsɛ ’yɔng baang iffa ilenɛ lasan-a-olive laffa la itinika iffa ya ibeenɛ ka lusso Uyini ɛkpansi. 5Ɔlɔɔt wa ubumnɛ ɔttɛ ɔbɛpɛyɛ, lɔkɔɔn lɔttayɛ ka kamma luffu lɔbɛpɛ balɔɔt a kɔfɔk abbɛ ning baang. Ɔlɔɔt duu wa ubumnɛbyɛ kɛbɛpɛ, vvenɛ bɛwwɔɔlmɛ. 6Ittɛɛsɛ ’yɔng mung iyanga lakke za itununɛ lukpaggbeede kiteep a bannyi, ka ɛkɛtɛ ya ilenɛ ka kɛ̀yaam a kuttu bɔtɔɔm Ɔlɔɔmɔlɔɔm. Iyanga lakke ka iggbɔlɔ bannyi ɔgbaa, lakke kisikili bannyi ka iggbɔlɔ basseke linnyi. Iyanga lakke za inaangnɛ ɛkpansi esseke iffaak iffaak tɛ̀ttɛ̀ kɔsaapnɛyɛ. 7Ivvenɛ bɔtɔɔm Ɔlɔɔmɔlɔɔm lɛyaam ibwɔɔlɔ, ɛsɛɛn ya essinɛ ka lubbe gwa ddɔng ’gwɔng baang vvenɛ ɛtta effu elluyɛ kullu. Vvenɛ ɛbɛtɛbɛ, ɛwwɔɔlbɛ. 8Babbu ittɛɛsɛ ’yɔng baang vvenɛ limini ka ɛtɔk a laffɛ za lɛbaang a lɛbaang ka ɛfɛɛn a bakamanɛ Uyini abbɛ bakaka ka Cross. Ifɛɛt a lɛkɔɔl a lɛffɛ ’zɔng baang ulenɛ Sodom ɔlɔk Egypt. 9Balɔɔt ifɔɔn la ikaan ɔkkpɛlɛ ka ɛkpansi vvenɛ bappyɛɛk babbu ’bɔng baang ka bɛtɔm bɛkkyaat la kufaak. Baala bayila basambɛ bamii balli. 10Balɔɔt ɛkpansi vvenɛ baggele gaang gaang ka lubbe balɔɔt ’bɔng mung baffa. Vvenɛ banaang lawaa, batɔɔm lasɔɔk bafee ɔlɔɔt la vvɔn ka ulenɛ bappyee-kutolo Ɔlɔɔmɔlɔɔm ’bɔng baang baffa bakɔɔmnɛ akama bafee balɔɔt ɛkpansi. 11Bɛtɔm bɛkkyaat la kufaak bɛ́saknɛ, lɛfɛkɛlɛ kuddu lissi ka Ɔlɔɔmɔlɔɔm liffu lɛmalbɛ ka tɔkɔlɔ, ɔzzánga bafeele babee ubee. Balɔɔt ɔkkpɛlɛ ba bayɛnnɛbɛ ɔbbwɔpɔbɛ gaang gaang. 12Bappyee-kutolo Ɔlɔɔmɔlɔɔm ’bɔng baang baffa bappyee lɛmmwɔɔl ka lissinɛ ka libat lɛlɔɔk la abbɛ lɛttɛ, “Affuyɔng mung.” Tɛ̀ttɛ̀ balɔɔt a kɔfɔk abbɛ balenɛ baang ka babeenɛ bappyɛɛkbɛ, bamii ka libat ka ikkpala lukkpaaggbeede. 13Ka ɛkɛtɛ ’yɔng baang bbwak ɛkpansi ɛnnyɛkɛ. Kufaak a lɛffɛ kkwɔn ka tɔkɔlɔ lifaak zzɔɔp sa linaangnɛ lɛffɛ ’zɔng baang kɔbɛpɛ. Innɔ balɔɔt zilliffa la kufaak babbe ɔssanga kɛnnyɛkɛ ɛkpansi ’sɔng baang. Balɔɔt ba bassekenɛ ɔbbwɔpɔbɛ gaang gaang, babungu bakkpenge Ɔlɔɔmɔlɔɔm ka libat. 14Akama wa ibaala ɔsakbong, ɔzzànga ppyɛɛk! wa ukupnɛ wa ibaala ba ɔbɛlɛ lɛmmɛ uffu. 15Uyilabɔtɔɔm Ɔlɔɔmɔlɔɔm wa ɔnaangnɛ ka bannambakkyaat ɔwɔlnɛ luffi gwa ammɛ, lammwɔɔl lagaga ka libat lattɛ, “Lakke za kɛkɔɔm a vveeng ’wɔng mung ɔkkpɛlɛ lasseke za Uyini ayyɔɔt gedegede mung la Ɔlɔɔt wa Ammɛ biini ɔsanganɛ. Vvenɛ ɔkɔɔm vveeng ’wɔng kɛfal a kɛfal.” 16Lɔlɔp la bagɛlɛnya banna ba bataanɛ ka igbaal a kibeet abbɛ ka lusso Ɔlɔɔmɔlɔɔm balli lattɔ, bazɔɔm bannyi Ɔlɔɔmɔlɔɔm. 17Battɛ, “Uyini, Ɔlɔɔmɔlɔɔm, wa ɔyanganɛ lakke ɔkkpɛlɛ, wa ulenɛ lule mung, ɔ́ggba lissi ule. Iwomowɔ kɛnaang ka alenɛ lakke annɔ za lɛbaang a lɛbaang lɛkɔɔm atte kɛkɔɔm a vveeng ɔkkpɛlɛ. 18Balɔɔt ba basinɛ kwa Ɔlɔɔmɔlɔɔm lɛsan banyanga gaang gaang ka ɛkɛtɛ kitun a kɔlɔɔk annɔ elenɛ lɛffɔ, kɛkaal a babbu kile la kɔzza. Ɛkɛtɛ ɛffɔbong ya kikipili ibɔɔyi annɔ, bappyee-kutolo Ɔlɔɔmɔlɔɔm, la balɔɔt annɔ ɔkkpɛlɛ ba batelewɔnɛ, ba baggbengenɛ la ba bassupnɛ. Ɛkɛtɛ ɛffɔbong ya ale ka awwɔɔlnɛ balɔɔt ba babɛpɛnɛ Ɛkpansi!” 19Ggwoon-Ɔlɔɔmɔlɔɔm ka libat luwongolo. Iyɛn Likulu a nsekele ka tɔkɔlɔ immwalang, utum, ɔtta ikkpálá, ɛkpansi ɛnnyɛkɛ, ɔffa kɛffa sa lɛbaang.

will be added

X\