BIYSNT 1

1Luvva ’gwɔng mung lutum kɔlɔɔk kwa Jesus Christ ɔyɔɔnɛ, kwa Ɔlɔɔmɔlɔɔm unnyimɛnɛ ɔttɛ ɔyɔɔ ibɔɔyi ammɛ kwa kule kɔnaang gedegede mung. Christ ɔtɔɔm uyilabɔtɔɔm ammɛ umii ɔnaang bɔɔyi ammɛ, John, ɔyɛn lilɔɔk ’sɔng mung ɔkkpɛlɛ. 2John ɔbwɔɔlɔ bɛfɛɛn ’byɔng mung ɔkkpɛlɛ bya ulenɛ lɛyɛn. Uwɔng ulenɛ ibwɔɔlɔ bɔtɔɔm bwa Ɔlɔɔmɔlɔɔm ɔtɔɔmnɛ la lɔkkwɔɔn a kɔlɔɔk kwa Jesus ɔbwɔɔlɔnɛ. 3Laggele lale za balɔɔt ba bakkwɔɔnɛ luvva ’gwɔng. Laggele lale za balɔɔt ba bagɔpɔlɔnɛ lammwɔɔl a bappyee-kutolo Ɔlɔɔmɔlɔɔm, batele bwa bakkpɔknɛ ka luvva ’gwɔng. Ɛkɛtɛ ɛkkɛtɛbong ya bɛfɛɛn ’byɔng ɔkkpɛlɛ bile bɛnaang. 4Kussi ka John ufee izɔɔm ya innaammikkyaat ya ilenɛ ka ɛkpansi Asia. Ppyɛɛ la bɔkaat bwa bussinɛ ka Ɔlɔɔmɔlɔɔm butaa la annyɔɔng. Ammɛ wa ulenɛ gedegede mung, ɔdɔkɔ, wa ule uffu la liyeeng linnangikkyaat ka lusso ugbaal a kibeet ammɛ. 5Ɔbɛtɛ la ppyɛɛ wa ussinɛ ka Jesus Christ, ttɛɛsɛ ammɛ wa doddo. Waan ikeeng wa ufungalanɛ ka lubbe ule uzzilɛttɔ babeet ɛkpansi. Isaapmɛ gaang gaang. Ɔsangayɛlɛ ka bubbi ka lubbe gwa ubbenɛ. 6Ɔnaangyɛlɛ itutum a bassɛɛn-a-luzɔɔm ɔttɛ itele Ɔlɔɔmɔlɔɔm ammɛ la Abassɛ ammɛ. Latele la lakke lale za Jesus Christ kɛfal a kɛfal. Kulening. 7Ppyɛɛkmɛ ka ule ka uffunɛ la ikkpálá. Ɔlɔɔt la vvɔn vvenɛ ɔyɛnmɛ, ngbaa la balɔɔt ba bakɔmmɛnɛ kɛfɔl. Balɔɔt ɛkpansi ɔkkpɛlɛ vvenɛ bataamɛ kullu. Kule ka lɔkkwɔɔn. Kulening. 8“Anaam nlenɛ Alpha nle Omega.” Uyini ɔlɔɔmɔlɔɔm wa ɔyanganɛ lakke ka lɔkkwɔɔn ɔlɔɔknɛ. Ammɛ wa ulenɛ gedegede mung wa ɔdɔkɔnɛ ule, la wa ule ka uffunɛ. 9Anaam nlenɛ John, ɔkpana annyɔɔng wa nlenɛ la Jesus ka kɛyɛn akama, la ka Itutum ammɛ ka kɛbbɔ akama. Badɔkɔ balokonɛ ka likkpɔ ɛkpansi za lɛzzanganɛ Patmos ka tɔkɔlɔ ɛkpansi ya bannyi bakkpitnɛyɛ, ka nbwɔɔlɔnɛ lɛmmwɔɔl Ɔlɔɔmɔlɔɔm la lɔkkwɔɔn a kɔlɔɔk gwa Jesus ɔyɔɔnɛ. 10Ka Kɛtɔm-Uyini, Kuyeeng-Ɔlɔɔmɔlɔɔm kɔtɔknɛ kɔyanga. Nppyee lɛmmwɔɔl ka lɛttanɛ tɛ̀ttɛ̀ luffi, lɛlɔɔk likupnɛ ka isimi. 11Lɛttɛ, “Akkpɔk bwa ayɛnnɛ, atɔɔm luvva ’gwɔng baang afee izɔɔm ’yɔng mung innammikkyaat: Ephesus, Smyrna, Pergamum, Thyatira, Sardis, Philadelphia, la Laodicea. 12Nssang nsikili nttɛ nyɛn ɔlɔɔt wa utolonɛ unnyinɛ. Nppyɛɛknɛ nyɛn ikkandul innammikkyaat ya gold baang ka ibeenɛ. 13Bɔfɛɛn bubee ka bɛzzɔkɔ annyɛ tɛ̀ttɛ̀ ɔlɔɔt la uwɔkɔlɔ ka buwɔkɔlɔnɛ ɔffɔbwɛ ka bukkpɔ, la ɛkkpa ya banaangnɛyɛ la gold ka buggbɔnɛ ka ukwukwulu. 14Kittulu abbwɛ kɛllaat tɛ̀ttɛ̀ uwuu. Zzeen abbwɛ lɛnyanga tɛ̀ttɛ̀ lɔkɔɔn. 15Bukkpɔ abbwɛ bukoot tɛ̀ttɛ̀ lukkpi ka tɔkɔlɔ lɛkam a lɔkɔɔn. Lɛmmwɔɔl abbwɛ lile tɛ̀ttɛ̀ kɛttɔl sa lɛbaang. 16Ɔkɔɔm bwaanttuma bannambakkyaat ka kɔbɔɔk ɛlaabɔɔk, ogge lafoom laffa ɔttabwɛ ka kamma. Lusso abbwɛ luwongolo tɛ̀ttɛ̀ livve luwee lɛnyanyanɛ ka kikoon ɔggbɔggba. 17Nyɛnnɛbwɛ, nttɔ ka lataak ammɛ tɛ̀ttɛ̀ ubbu ɔlɔɔt. Utelenɛ kɔbɔɔk ɛlaabɔɔk ammɛ ɔlɔɔk ɔttɛ, “Tɛ̀ttɛ́ ɔbbwɔpɔwɔ! Anaam nlenɛ lutte la lakpeke. 18Anaam nlemɛnɛ ammɛ wa ulenɛ ka kuddu. Ndɔkɔbong nbbe. Ɔzzanga ppyɛɛk, ntii ka kuddu ka kɛfal a kɛfal. Nyangabong lakke ntta lubbe la ɛkpansi babbu. 19Ɔzzànga akkpɔk bɛfɛɛn bya alenɛ lɛyɛn, bya bilenɛ gedegede mung la bya bile bɛnaang ka lusso. 20Mung ulenɛ ifɛɛt a bwaannttuma ba ayɛnnɛyɔng ka kɔbɔɔk ɛlaabɔɔk anaam, la ikkandul ya innammikkyaat; Bwaannttuma ba bannambakkyaat ulenɛ bayilabɔtɔɔm Ɔlɔɔmɔlɔɔm ka izɔɔm ’yɔng baang innammikkyaat. Ikkandul ’yɔng baang innammikkyaat ilenɛ izɔɔm ’yɔng baang innammikkyaat.

will be added

X\