1 Lɛmmwɔɔl ’zɔng lissi ka anaam Paul, ɔlɔɔt igbakkɔpɔ ka lɛttɔ a Christ Jesus la za lissinɛ ka Timothy ɔkpana ayyɔɔt, nkkpɔk nfee Philemon, ɔlɔɔt a kɛnaang ayyɔɔt, ɛnngwa ayyɔɔt wa luppyam ɔgbaa, 2 la luzɔɔm gwa idudanɛ ka ssala annɔ, la ɔkpana ayyɔɔt wa wanavva wa ɔzzanganɛ Apphia la wa ayyɔɔt a sɔgya Archippus; 3 Numa Dedde Ebinukkpaapi ayyɔɔt la Christ Jesus, banaangwɔ ppyɛɛ bannyiwɔ bɔkaat. 4 Ɔkpana anaam Philemon, ɛkɛtɛ duu ya nzɔɔmnɛ ntalawɔ annɔ, nwomo Ɔlɔɔmɔlɔɔm kɛnaang. 5 Nppyeebong kɛsaap sa ayanganɛ la balɔɔt Ɔlɔɔmɔlɔɔm ɔkkpɛlɛ la kiyila sa ayanganɛ ka Christ Jesus. 6 Luzɔɔm anaam lùlè lɔttɛ ɛnngwa ayyɔɔt la annɔ ka ilenɛ balɔɔt a kiyila, vvenɛ ɛkɔɔmyɛlɛ emii ka bɔddɔng a kɛsan kɔlɔɔk a ppyɛɛ wa iyanganɛ ka kuddu ayyɔɔt ka bɔkaat la Christ. 7 Ɔkpana anaam wa luppyam, kɛsaap annɔ kɛkɔɔmbong laggele za lɛbaang kifeenɛ, ɔbɛtɛ la kɛkkaam a luppyam sa lɛbaang a lɛbaang! Afeelebong ippyam a balɔɔt Ɔlɔɔmɔlɔɔm ɔkkpɛlɛ itaa ka lawaa. 8 Ka kulenɛ ning, vvenɛ nkkaam luppyam kkpɔk nlɔɔk kɔkkɔlɔm ka bukpana ayyɔɔt la annɔ ka Christ Jesus nttɛ, anaang duu kwa kulenɛ bbwak a kɛnaang. 9 Ɔzzànga ka asaapnɛnɛ gaang vvenɛ nppyɛɛ nbapwɔ kɔlɔɔk, nkkpa ulenɛ anaam Paul nlenɛ Uyilabɔtɔɔm a Christ, gedegede mung nbbal lile ka igbakkɔpɔ ka lɛttɔ ammɛ. 10 Nbapwɔ kɔlɔɔk nnyi Onesimus, wa ulenɛ waan anaam biini ka Christ; ka ɛkɛtɛ nlenɛ ka igbakkɔpɔ nsikili dedde ammɛ ka kuyeeng. 11 Ɛkɛtɛ nnyɔn ɔdɔkɔ usiwɔ ka kukkam lile. Ɔzzanga gedegede mung utiiyɛlɛ ka kukkam. 12 Nle ka ntɔɔmmɛnɛ ɔppyɛlɛ isimisimi uffu ka ɛfɛɛn annɔ. Luppyam anaam lule lumii la ammɛ la ammɛ. 13 Kɔdɔkɔ kɔsaapnɛ ka ɔtaanɛ mung la anaam ka nlenɛ ka igbakkɔpɔ ka kɔlɔɔk a kuttu budoddo a Christ, nkwaaning uttelenɛ ɔkkalawɔ. 14 Ɔzzànga nkkpa kɔnaang, ba nggyan nttɛ ntutwɔ attelenɛ. Lutini ’gwɔng kule kɔsaapnɛ ka anaangnɛ kwɛ ka kɔsaapwɔnɛ. Kɔlɔɔk kɔlɔk baala nnaang kusiwɔnɛ lɛsaap. 15 Baang kɛgbata sa Onesimus ɔgbatanɛ ussekewɔ ka waan ɛkɛtɛ ssup kɛdɔkɔ ning baang nkwaaning ɔppyɛlɛ atɔkmɛ ɔtaa la annɔ ɛkɛtɛ ɔkkpɛlɛ. 16 Gedegede mung tɛ̀ttɛ̀ ubili keem ba ɔbɛlɛ lile. Ɔttanɛbong ubili liggbenge! Ule ɔkpana ayyɔɔt wa lɔkkwɔɔn ka Christ. Ɔsaapnɛ gaang gaang. Ule ɔttawɔ annɔ ka luppyam lile ɔgbaa ka ulenɛ ubili, ibbal ka bukpana lile ka Uyini. 17 Attinanɛ kwa anaam tɛ̀ttɛ̀ ɔlɔɔt a kɔssɛ annɔ, atɔkmɛ assɛɛn ka kkwɔɔt tɛ̀ttɛ̀ ale atɔknɛ anaam. 18 Ulenɛ kɔlɔɔk kɔlɔk lɛnaang kwa kɔbbɔlnɛ, ɔlɔk ulewɔ la ippwoot, affikbyɛ assɛɛn kwa ippwoot ya anaam. 19 Vvenɛ nkkpɔk ’kwɔng ka kɔbɔɔk kwa anaam biini. Anaam Paul vvenɛ ntakwɔ ippwoot ’yɔng baang. (Ba nggyan nttɛ nkkewɔ asan attɛ kuddu annɔ ɔkkpɛlɛ kulenɛ ippwoot anaam.) 20 Mkkpee ɔkpana anaam, anaangnɛ budoddo ’bwɔng ka lɛttɔ Uyini. Anaangnɛ nggele ka nlenɛ ɔkpana annɔ ka Christ. 21 Nsan lɔsan nttɛ ka nkkpɔknɛ lɛmmwɔɔl ’zɔng mung vvenɛ anaang bwa nbapwɔnɛ nttɛ anaang. Nsan lɔsan nttɛ gɔɔ vvenɛ anaang asak ning baang. 22 Ɔgbaa, aggyan lɛnɔk a ggwoon abamazɛ alokonɛ. Nttina nttɛ Ɔlɔɔmɔlɔɔm vvenɛ uppyee luzɔɔm annyɔɔng ɔkkpɛlɛ ɔsamnɛ ɔppyɛlɛ unnyiwɔyɔng. 23 Epaphras, wa ulenɛ ka igbakkɔpɔ mung la anaam ka lɛttɔ a Christ ɔttɛ nwomowɔyɔng. 24 Mark, Aristarcus, la Demas la Luke ba inaangnɛ kɛnaang la abbɛ, battɛ nwomowɔyɔng. 25 Ppyɛɛ Uyini, Jesus Christ, ubee la annyɔɔng ɔkkpɛlɛ.
