PHILIPPIANS 4

1Ikpana anaam, alenɛyɔng ka luppyam gaang gaang. Nɛ ba kɔsaap ka ngbatanɛ nssekewɔyɔng. Anaangnɛyɔng nggele gaang gaang, ɔkkyaanɛ kwa annyɔɔng. Ikpana anaam ka luppyam. Uwɔng ulenɛ tɛ̀ttɛ̀ ale abeeyɔng kkpɔk ka lafal annyɔɔng ka Uyini. 2Nkkpenge Euodia la Syntyche nttɛ, ellee, babum bataa ka bɔkaat ka balenɛ ba Uyini. 3Annɔ ɔgbaa, ɔlɔɔt a kɔssɛ anaam, nggyan nttɛ ayaamyɔng bwanavva ’bɔng baang. Banaangbong kɛnaang gaang gaang la anaam battɛ bakɔɔm lɛmmwɔɔl Ɔlɔɔmɔlɔɔm bawaala ɔbɛtɛ la Clement la balɔɔt a kɔssɛ anaam ba lakɔɔl abbɛ lalenɛ ka luvva kuddu lile. 4Aggeleyɔng ka alenɛyɔng ka bɔkaat la Jesus. Nbbal lɛlɔɔk: aggeleyɔng! 5Aggeleyɔng! Ayyɛɛpyɔng linaang la balɔɔt ɔkkpɛlɛ, Uyini ule ɔkka liffu. 6Tɛ̀ttɛ́ attinayɔng kwa bɔfɛɛn bulɔk, ɔzzànga ɛkɛtɛ duu ya azɔɔmnɛ abapyɔng Ɔlɔɔmɔlɔɔm bwa aggyannɛyɔng, abapmɛyɔng la luppyam gwa doddo ɛkɛtɛ ɔkkpɛlɛ. 7Bɔkaat Ɔlɔɔmɔlɔɔm bwa buttanɛ lilɔɔk ɔkkpɛlɛ, ɔssɛbibit usibwɛ lɛsan, bulokowɔyɔng ippyam la ittina bbɛɛm ka Christ Jesus. 8Ka kitele lɛttɔ, ikpana anaam, assɛɛnyɔng bɛfɛɛn bya bɛyyɛɛpnɛ bya balɔɔt bale babunguwɔyɔng ka ittina. Abbyɛ bilenɛ bɛfɛɛn bya lɔkkwɔɔn, bɛyyɛɛp bile bbwak, bɛyyɛɛp lɛppyɛɛk bɛyanga latele. 9Anaangyɔng kwa alenɛyɔng lippyee ka nlɔɔknɛ, alenɛyɔng lɛyɛn ka zzeen kwa nnaangnɛ. Ɔlɔɔmɔlɔɔm wa unnyinɛyɛlɛ bɔkaat vvenɛ ubee la annyɔɔng. 10Nggele gaang gaang ka kuddu kwa nyanganɛ ka Uyini. Ɔmmɛbong ka appyɛɛknɛnɛyɔng. Mung abbalyɔngbong kufuk lɛyanga kwa kɛppyɛɛknɛ. Ba nlɔɔk nttɛ nɛ yɔng ba abɛlɛyɔng lɛppyɛɛk, ɔ̀zzànga adɔkɔ asiyɔng kufuk lɛyanga kwa kɛppyɛɛknɛ. 11Ning ba nlɔɔk ka nttinanɛ nttɛ asumalanɛyɔngbong. Anaam ɔgbɔnɔnɛbong. Bwa nyanganɛ, abbwɛ baang buyyɛɛpnɛbong. 12Nsan mung kwa kulenɛ ka ɛkɛtɛ aggyannɛ bɔfɛɛn, la kwa kulenɛ ka ɛkɛtɛ ayanganɛ bɔfɛɛn asak. Nkkoopbong kɔlɔɔk a lalup ’kwɔng nkwaaning nle la liwukala ɛfɛɛn duu, ɛkɛtɛ ɔkkpɛlɛ, ɔlɔk nppyɛɛ nle la buwɔɔng, ɔlɔk nyanga bɛfɛɛn ggbadam ɔlɔk nsi bulɔk lɛyanga, kulenɛ ppyɔk. 13Nyanga lakke za Christ unnyinɛnɛ, za kibee kkpɔk ka lilɔɔk ɔkkpɛlɛ. 14Ɔzzànga ayyɛɛpyɔng bɛnaang asakyɔng ka atelenɛnɛyɔng ka lilɔɔk. 15Annyɔɔng balɔɔt a Philippi biini asanyɔng lɔsan attɛyɔng ka ngbatanɛ ka Macedonia, ka ɛkɛtɛ nttenɛ kikopolo Kuttu-Budoddo, annyɔɔng alenɛyɔng luzɔɔm gwa attelenɛnɛyɔng. Annyɔɔng alenɛyɔng balɔɔt ba itulnɛ isak anaam la ibbɔl anaam izziyɔng. 16Bikkpit ning bɛffa ka nggyannɛ kɛyaam ka Thessalonica, ayaamnɛyɔng. 17Kɛttɛ nggyan kɛtɔk a lɛsɔɔk gbɔɔ lissi, lutini ’gwɔng, iggyan ittɛ iyɛn isak ka igbaanɛ ka luffik a lɛfal annyɔɔng. 18Uwɔng ulenɛ kɛbwɔɔlɔ kɛttɛ nyɛnbong bɛfɛɛn ɔkkpɛlɛ bya annyinɛnɛyɔng ka Epaphroditus ulenɛ lɛtɔɔm ufeenɛ bɛttalabong bɛsak. Nyangabong bwa nggyannɛ ɔkkpɛlɛ. Bɛfɛɛn ’byɔng mung bɛtaa tɛ̀ttɛ̀ bɛfɛɛn bya bɛyyɛɛpnɛ kizoom bya bannyinɛ Ɔlɔɔmɔlɔɔm ɔtɔk ka lɛtɔm za lɛsaapmɛnɛ. 19Ɔlɔɔmɔlɔɔm anaam la iyyɛɛp ammɛ ya lɛbaang ka Christ Jesus, vvenɛ ɔssɛ unnyiwɔyɔng bwa aggyannɛyɔng ɔkkpɛlɛ. 20Latele lale za Ɔlɔɔmɔlɔɔm, Dedde ayyɔɔt, ka kɛfal a kɛfal kulening. 21Nwomobong balɔɔt Ɔlɔɔmɔlɔɔm ɔkkpɛlɛ ba balenɛ ba Christ Jesus. Ikpana ayyɔɔt ya balenɛ mung la anaam battɛ nwomowɔyɔng. 22Balɔɔt Ɔlɔɔmɔlɔɔm ba balenɛ mung ɔkkpɛlɛ, gaang gaang balɔɔt ba balenɛ ssala Ubeet battɛ nwomowɔyɔng. 23Numa Uyini ayyɔɔt, Jesus Christ, ɔnaangwɔyɔng ppyɛɛ ɔkkpɛlɛ.

will be added

X\