PHILIPPIANS 3

1Ikpana anaam, ntele lɛttɔ nttɛ Uyini unnyiwɔyɔng laggele za lɛbaang. Gɔɔ nɛ ba kukoolo kɛppyɛlɛ kɛlɔɔk kwa nlenɛ lɛkkpɔk kkpal ka kule kɔgbaawɔyɔng kɛkat a kɛyɔɔng. 2Akatyɔng kwa ibbwa ’yɔng baang ya banaangnɛ babbu bɛfɛɛn kɔbɛtɛbɛ kwa kɛmmwang a bilee ka kkwɔɔt tɛ. 3Ayyɔɔt ilenɛ balɔɔt ba batɔknɛ kɛzza lɛtaa sa lɔkkwɔɔn. Kɛzza lɛtaa sa ayyɔɔt ulenɛ kɛzɔɔm kinnyi Ɔlɔɔmɔlɔɔm ka Kuyeeng Ammɛ. Ayyɔɔt ɔwaayɛlɛ kwa lafal ayyɔɔt ka Christ Jesus, abbɛ lissi. Ayyɔɔt kwa lɛtɔm a kɛzza lataa ba ittina itum. Isan kwa kuddu ayyɔɔt ka kiyila kwa Christ Jesus. 4Kukkwoong mung kɔbɛtɛnɛ kwa bɛfɛɛn ’byɔng baang. Ɔlɔɔt ɔlɔk uttina ɔttɛ kukkwoong mung kɔbɛtɛmɛ ammɛ kwa kɛzza lɛtaa, anaam nttanɛ ifɛɛt lɛyanga ya kɔbɛtɛnɛnɛ kwa kɛzza lɛtaa. 5Badɔkɔ bamaatnɛ ka Israel ka kikkwu a Bɛnjamin. Wa Hebrew ɔmaatnɛnɛ unnyi wa Hebrew ɔfɔɔn. Ɔggbanɛnɛ liwaazɛ, babɛkɛnɛ lɛtaa. Ka liloko Lafɔɔ a balɔɔt Jews, ndɔkɔ wa Pharisees. 6Nsaknɛ lafɔɔ Balɔɔt a Jews litele nsseke ka nyɔɔnɛ balɔɔt a luzɔɔm Ɔlɔɔmɔlɔɔm akama. Ka kulenɛ kɔttɛ ɔlɔɔt ɔyyɛɛp ka ɔnaangnɛ kwa Lafɔɔ lalɔɔknɛ, kibbi nsi lizzi. 7Ɔzzànga bɛfɛɛn ’byɔng baang ɔkkpɛlɛ bya ndɔkɔnɛ nttɛ isak anaam ka iyaadɛ, gedegede mung nsanbong ka lɛttɔ a Christ nttɛ isak lissi. 8Bɛfɛɛn ’byɔng keem lissi. Nsumalabong bɛfɛɛn ɔkkpɛlɛ bɛsaal ka kɔlɔɔk kwa kɔttanɛ kwa doddo lile. Ka kɔlɔɔk a Jesus, Uyini, anaam nsambong bɛfɛɛn ɔkkpɛlɛ nzzɔɔk kang. Nfimbong babbu bɛfɛɛn ɔkkpɛlɛ nkwaaning nyanga Christ. 9Nnaang ’kwɔng nttɛ nkwaaning ntaa ka bɔkaat la ammɛ. Kɛtaa bbwak sa anaam biini sa kilenɛnɛ isak ka kitele Lafɔɔ ba nbɛlɛ lɛyanga. Gedegede mung nyanga kɛtaa bbwak sa Ɔlɔɔmɔlɔɔm unnyinɛnɛ ka kɛyanga kiyila ka Christ. Kɛtaa bbwak ’sɔng kissi ka Ɔlɔɔmɔlɔɔm kiffu. Ɔzzànga kile ka kiyila. 10Kwa nggyannɛ ɔkkpɛlɛ ule kɛsan a Christ, la lakke kifungala ammɛ ka lubbe, ɔkkɔɔnɛ nssɛ nyɛn akama tɛ̀ttɛ̀ ammɛ usseke nbbe lubbe ammɛ. 11Uwɔng ulenɛ ɛtɔk ya nttinanɛ nttɛ vvenɛ nkkwoong nfungala ka lubbe nppyɛlɛ ntaa ka kuddu. 12Ba ntaka nttina nttɛ anaam nbɛtɛbong ɔlɔk nttina nttɛ anaam nttabong doddo lɛnaang. Nle baang ka nbumnɛ nttɛ nzang anaam nbɛtɛ nyanga lɛsɔɔk ka kɛbɛtɛ sa Christ Jesus ulenɛ lɛggba lɛbɛtɛ ɔyanganɛ. 13Ikpana anaam, kule kule ba ntaka nttina ka lɔkkwɔɔn nttɛ, nbɛtɛbong. Ɔzzànga bɔfɛɛn bbwɔn bwa nnaangnɛ, ule kisumala bɛfɛɛn ɔkkpɛlɛ bya bilenɛnɛ ka isimi. Nbum gaang gaang nttɛ nffɔ ka bya bilenɛ ka lusso. 14Kwakkwɛ baang nmmanɛ ssɔng nmii ka lakpeke nkwaaning ntɔk lɛsɔɔk Ɔlɔɔmɔlɔɔm za lilenɛ kɛkkwɔɔ sa Ɔlɔɔmɔlɔɔm ɔkɔɔmnɛ Jesus ɔkkwɔɔnɛ unnyinɛ lɛfal za libat. 15Ɔkkpɛlɛ ayyɔɔt ba ilenɛ bagɛlɛnya ka kɛyanga kiyila, lile iyangayɔng kɛssanga linaang ssɔn. Annyɔɔng balɔk ayanganɛyɔng linaang buu buu, Ɔlɔɔmɔlɔɔm vvenɛ ɔnaangwɔyɔng asanyɔng ’kwɔng ppwool. 16Mkkpa kɔnaang, kule kule ning baang. Afɔngɔ ikupyɔng ɛtɔk ’yɔng baang ya iggbanɛ lissi ikupyɔng tɔttɔt uffu ɔffɔ ka mmwɔɔn mung. 17Akeetnɛyɔng anaam tɔttɔt, ikpana anaam. Ɔzzànga appyeeyɔng kwa balɔɔt ba bakupnɛ eleme ’yɔng baang ya iyɔɔnɛbɛ. 18Nbwɔɔlɔwɔyɔngbong ’kwɔng kkpal bikkpit ggbadam, ɔzzànga gedegede mung nbbalwɔyɔngbong lɛbwɔɔlɔ la liyyeen ka zzeen nttɛ: Balɔɔt bale ggbadam ba linaang abbɛ linaangnɛbɛ bale balɔɔt a kɔfɔk a lubbe a Christ. 19Lafal abbɛ lale lakpeke ka lɔkɔɔn, ka ebinukkpaapi abbɛ elenɛ bɛfɛɛn bya bɛsaapnɛbɛ. Bakɔɔm babbu linaang battele kippe. Battina kwa bɛfɛɛn bya bilenɛ ka vveeng ’wɔng keem. 20Ayyɔɔt ilenɛyɔng balɔɔt Itutum-Ɔlɔɔmɔlɔɔm. Mung itaa ikatyɔng kiffu ɔkkala-ikkala wa ussinɛ ka Itutum-Ɔlɔɔmɔlɔɔm. Ammɛ ulenɛ Uyini ayyɔɔt, Jesus Christ. 21Vvenɛ ufooloyɛlɛ kkwɔɔt sa lilenɛ libbe ɔnaangyɛlɛsɛ tɛ̀ttɛ̀ sa ammɛ. Ule ɔkɔɔm likke ’zɔng baang za ɔbɛtɛnɛ bɛfɛɛn ɔkkpɛlɛ ɔ̀zzánga uzzilɛttɔ ɛkpansi.

will be added

X\