PHILIPPIANS 2

1Mung kuddu annyɔɔng ka Christ kɔnaangwɔyɔng mung akkaamyɔng ɔɔ? Kɛsaap ammɛ kɛyaamwɔyɔng mung ɔɔ? Atulyɔng mung kɔssɛ la Kuyeeng-Ɔlɔɔmɔlɔɔm ɔɔ? Attinayɔng mung kwa kiggwoom a kɔlɔɔk la kibbe lɛttɔ la wannyɔɔng ɔɔ? 2Ɔzzànga ntutwɔyɔng nttɛ anaangnɛyɔng nggele gaang gaang ka ale ayangayɔng luttina ’ggwɔn, ayangayɔng kɛsaap ssɔn, aleyɔng bɔfɛɛn bbwɔn ka luppyam la lɔnngwa. 3Tɛ̀ttɛ́ anaangyɔng bɔfɛɛn bulɔk ka kɛssɔp-a-bɔfɛɛn, ɔlɔk anaangyɔng kwa kusinɛ likoolo kwa kɛnaang a kamma; ɔzzànga ayangayɔng kibbe lɛttɔ la wannyɔɔng, afɔngɔ kittina attɛyɔng annyɔɔng attanɛyɔng bannyɔɔng balɔk. 4Attinayɔng kwa bannyɔɔng ɔgbaa. Tɛ̀ttɛ́ akekeyɔng kwa annyɔɔng biini keem. 5Eleme annyɔɔng ɔkkpɛlɛ ele tɛ̀ttɛ̀ ya Christ ɔyanganɛ. 6Ɛkɛtɛ ɔkkpɛlɛ, Christ ɔyanga eleme Ɔlɔɔmɔlɔɔm ɔzzànga usi littina ɔttɛ vvenɛ ɔkɔɔm lagabwɔ bataa ikɛlɛ la Ɔlɔɔmɔlɔɔm. 7Lutini ’gwɔng ɔkkyaa bɛfɛɛn ’byɔng ɔkkpɛlɛ bya ɔyanganɛ ɔfɔngɔ ɔppyɛɛ ɔsam eleme ubili usseke tɛ̀ttɛ̀ ɔlɔɔt, uffu ka vveeng ’wɔng. 8Ɔdɔkɔ ɔtɔkmɛ kɛyɔɔng tɛ̀ttɛ̀ ukee-waan. Ɔssɛ ka ɛtɔk a latele tɔttɔt ubbe ka Cross. 9Kwakkwɛ baang Ɔlɔɔmɔlɔɔm unnyimɛnɛ latele gaang gaang. Ɔkɔlɔmɛ lɛkɔɔl za lɛttanɛ lakɔɔl ɔkkpɛlɛ. 10Bɛfɛɛn ɔkkpɛlɛ bya bilenɛ ka libat la ɛkpansi la bya bilenɛ ka vveng wa kuttɔɔk, vvenɛ bikun Jesus laddu. 11Lɛlaak la zzɔn ɔkkpɛlɛ vvenɛ lɛlɔɔk ppwool ppwool lɛbwɔɔlɔ lɛttɛ Jesus Christ ulenɛ Uyini ka latele Abassɛ, Ebinukkpaapi. 12Inngwa anaam, kɔyyɛɛp mung ka assɛnɛ atelenɛyɔng gedede mung ka nsinɛ la annyɔɔng lile tɛ̀ttɛ̀ atelenɛnɛyɔng ka ndɔkɔnɛ la annyɔɔng. Ɔkkaamwɔyɔng anaangyɔng kɛnaang ikkala annyɔɔng gaang gaang la kiffula la bwɔp. 13Ɔlɔɔmɔlɔɔm ule baang ka ɔnaangwɔnɛyɔng ɛkɛtɛ ɔkkpɛlɛ ayilayɔng ɔgbaa akkwoong ateleyɔng bwa ɔggyannɛ. 14Anaangyɔng bɛfɛɛn ɔkkpɛlɛ, afɔngɔyɔng lɔzzɔ la ikangala, 15nkwaaning asiyɔngkwɛ lɛsan aleyɔng kpaladada tɛ̀ttɛ̀ bwaan-Ɔlɔɔmɔlɔɔm ba doddo ba balenɛ ka ɛkpansi ibbyap la balɔɔt a bubbi. Appwoloyɔng ka bɛzzɔkɔ abbɛ tɛ̀ttɛ̀ bwaan-ettuma bappwolonɛ ka lukpaaggbeede, 16ka abwɔɔlɔnɛyɔngbɛ bɔtɔɔm a kuddu. Anaangnɛyɔng ning baang vvenɛ iyanga kitele lɛttɔ ka nle nggele kwa annyɔɔng ka Kɛtɔm-a-Christ kile kɛyɔɔ kɛttɛ lubum anaam ɔkkpɛlɛ la kɛnaang anaam kisibong lɛttɔ kɛtaak. 17Usinɛkkyam linnyi kuddu anaam lilenɛ luzzi gwa kiyila annyɔɔng kɛsanganɛ ka lɛtɔm za anaangnɛ annyiyɔng Ɔlɔɔmɔlɔɔm. Kulenɛ ning, anaam nggele uggele ntul laggele anaam la annyɔɔng ɔkkpɛlɛ. 18Annyɔɔng ɔgbaa vvenɛ assɛ atul aggeleyɔng la anaam. 19Nttina nttɛ ka lakke Jesus Uyini, vvenɛ nkkwoong ntɔɔm Timothy like-like nfeewɔyɔng nkwaaning nkama luppyam ka nle nppyee kuttu annyɔɔng. 20Ammɛ keem ulenɛ la luttina tɛ̀ttɛ̀ gwa anaam, kɔbɛtɛmɛ kwa annyɔɔng ka lɔkkwɔɔn. 21Ɔlɔɔt la vvɔn kɔppyɛɛ kɔbɛtɛmɛ kwa kɔlɔɔk ammɛ biini, kwa kɛnaang a Jesus Christ lissi. 22Annyɔɔng biini asanyɔng lɔsan tɛ̀ttɛ̀ ulenɛ lɛyɔɔ budoddo ammɛ. Ayyɔɔt la ammɛ inaangbong kɛnaang ɛfɛɛn nnyɔn tɛ̀ttɛ̀ waan la abassɛ ka kɔlɔɔk a Kuttu-Budoddo Ɔlɔɔmɔlɔɔm. 23Vvenɛ ntɔɔmmɛ nfeewɔyɔng nlenɛ lɛsan tɛ̀ttɛ̀ lilɔɔk lilé lile. 24Ka lakke Uyini nttina nttɛ vvenɛ nffu ka ɛfɛɛn annyɔɔng ssuma ssuma mung. 25Nttinabong nttɛ kɔyyɛɛp mung kɛtɔɔm ɔkpana ayyɔɔt Epaphroditus kɛppyɛlɛ kifeewɔyɔng. Ɔnaang kɛnaang, ullu kullu ka kufoom kwa anaam. Uttelenɛbong nnaang kɛnaang tɛ̀ttɛ̀ uyilabɔtɔɔm annyɔɔng wa annyinɛnɛyɔng ka ɛkɛtɛ nggyannɛ kɛyaam. 26Uggele gaang gaang ɔttɛ ɔyɛnwɔyɔng ɔkkpɛlɛ. Ɔgbaa luppyam lusimɛ lɛyyɛɛp ka uppyeenɛ ɔttɛ appyeeyɔngbong iffaak ammɛ. 27Ka lɔkkwɔɔn ɔffaakmɛ naanga ubbe. Ɔzzànga Ɔlɔɔmɔlɔɔm ɔyɔɔmɛ kibbe-lɛttɔ. Kibbe-lɛttɔ la ammɛ keem lissi ka ɔyɔɔnɛ, ɔyɔɔ gbaak la anaam ka ɔsanganɛnɛ ka kɛbbɔl a lavve sa nzang bulenɛ. 28Nyanga luttina gaang gaang nttɛ ntɔɔmmɛ nfeewɔyɔng, nkwaaning aggeleyɔng ka ale abalmɛyɔng lɛyɛn, ɔlɔk kɛbbɔl a lavve sa anaam kɛsaal. 29Atɔkmɛyɔng ka laggele, tɛ̀ttɛ̀ ɔkpana annyɔɔng ka itutum Uyini. Annyiyɔng kɛssanga balɔɔt tɛ̀ttɛ̀ ammɛ baang latele. 30Ɔsam kuddu ammɛ unnyi lubbe, usseke ssup nzang ubbe ka lɛttɔ kɛnaang a Christ ɔttɛ nkwaaning ɔyaamnɛ kɛyaam sa annyɔɔng ale asinɛyɔng likkwoong ayaamyɔng.

will be added

X\