1 Paul la Timothy, babili a Christ Jesus, bakkpɔknɛ lɛmmwɔɔl ’zɔng bafee balɔɔt Ɔlɔɔmɔlɔɔm ba ballunɛ ka Philippi, ba balenɛ ka bɔkaat la Christ Jesus, la bazzilɛttɔ luzɔɔm, la balɔɔt ba battelenɛbɛ. 2 Dedde ayyɔɔt, Ɔlɔɔmɔlɔɔm, la Jesus Christ, Uyini ayyɔɔt, bannyiwɔyɔng lakke la bɔkaat. 3 Nwomo Ɔlɔɔmɔlɔɔm anaam kɛnaang kwa annyɔɔng, ɛkɛtɛ ɔkkpɛlɛ ya nttinanɛ ntumwɔyɔng. 4 Ɛkɛtɛ ɔkkpɛlɛ ya nzɔɔmnɛ nnyiwɔyɔng, nzɔɔm la laggele, 5 ka attelenɛnɛyɔng ka kɛnaang a kuttu-budoddo Ɔlɔɔmɔlɔɔm ka ussinɛ kɛtɔm ikeeng uffu ɔffɔ gedegede mung. 6 Nsanbong nttɛ Ɔlɔɔmɔlɔɔm wa uttenɛ oyyoyyo kɛnaang ’sɔng la annyɔɔng vvenɛ ɔkɔɔm ning baang tɔttɔt kɛsaal ka Kɛtɔm-a-Christ Jesus. 7 Alenɛyɔng ka luppyam ɛkɛtɛ ɔkkpɛlɛ. Kule bbwak ka nttinanɛ ntumwɔyɔng, ka ɔkkpɛlɛ annyɔɔng alenɛyɔng etini la anaam lɛyanga ka kufuk ’kwɔng mung kwa Ɔlɔɔmɔlɔɔm ulenɛnɛ linnyi. Attelenɛyɔngbong gbaak ka gedegede mung ka nlenɛ ka igbakkɔpɔ, la ɛkɛtɛ ya ntakanɛ ka igbakkɔpɔ lile nkkala Kuttu-Budoddo Ɔlɔɔmɔlɔɔm nmatkwɛ lɛsan kɔkkaam. 8 Ɔlɔɔmɔlɔɔm ɔsan lɔsan ɔttɛ nlɔɔk lɔkkwɔɔn a kɔlɔɔk ka nttɛnɛ luttina anaam gwa nttinanɛ ntumwɔyɔng ɔkkpɛlɛ lussinɛ ka luppyam a Christ Jesus biini. 9 Nzɔɔm nttɛ kɛsaap annyɔɔng kɛmmala kɛgbaa ɔbɛtɛ la kɛsan a kɔlɔɔk a lɔkkwɔɔn, 10 nkwaaning asanyɔng bwa bulenɛ bwa bbwak. Ɔlɔk attayɔng ka babbu lilɔɔk asiyɔng kibbi lizzi ka kɛtɔm-a-Christ. 11 Lafal annyɔɔng vvenɛ layanga kuddu kwa doddo kwa Jesus Christ kɛyɔng ukkwoongnɛ ɔnaang nkwaaning balɔɔt bayɔɔ lakke Ɔlɔɔmɔlɔɔm, babungumɛ ɔgbaa. 12 Ikpana anaam, nggyan nttɛ asan attɛyɔng bɛfɛɛn bya bilenɛnɛ lɛnaang bittelebong kuttu-budoddo Ɔlɔɔmɔlɔɔm kɔmmala. 13 Bakat-a-ssala Ubeet la balɔɔt balɔk ɔkkpɛlɛ ba balenɛ mung basan lɔsan battɛ nle ka igbakkɔpɔ ka nlenɛ bɔɔyi a Christ. 14 Ɔzzànga kile sa nlenɛ ka igbakkɔpɔ kinnyibong ikpana ayyɔɔt ilɔk kɛkkaam a luppyam ka Uyini. Bammala la kɛkkaam a luppyam ɛkɛtɛ ɔkkpɛlɛ, bakopolonɛ bɔtɔɔm Ɔlɔɔmɔlɔɔm basɛlɛ bbwɔp ka luppyam. 15 Kule baning, balɔɔt balɔk bakopolo kuttu-budoddo Ɔlɔɔmɔlɔɔm ka bayanganɛ luleep, bakkwoong kɔwɔlɔ. Ɔzzànga balɔɔt balɔk bakopolo lɛmmwɔɔl ammɛ la luppyam gwa doddo. 16 Balɔɔt ’bɔng baang banaang ning baang ka kɛsaap ka basannɛ battɛ Ɔlɔɔmɔlɔɔm unnyinɛbɛ kɛnaang sa kɛkkala kuttu-budoddo ammɛ. 17 Balɔɔt balɔk ba bakopolonɛ kuttu-budoddo Ɔlɔɔmɔlɔɔm kɔyyɛɛp ɔssanga luleep battina, battɛ bagbaanɛ akama ka igbakkɔpɔ. 18 Ɔzzànga kɔlɔɔk duu kwa babbu ittina abbɛ inaangnɛbɛ banaangkwɛ, mkkpa kɔyyɛɛp kɔbbɔl, nggele ka balenɛ kuttu-budoddo a Christ likopolo. 19 Nsan lɔsan nttɛ luzɔɔm annyɔɔng la kittele sa kissinɛ ka Kuyeeng a Jesus Christ kiffu vvenɛ kɛsanganɛ ka kɔlɔɔk. 20 Ka luttina anaam, nttina nttɛ kɛnaang anaam baala nfɔngɔ kɛbɛpɛ. Ɛkɛtɛ ɔkkpɛlɛ, gɔɔ gaang gaang gedegede mung, vvenɛ nyanga kɛkkaam a luppyam, nkwaaning nkɔɔm latele nfee Christ ka lɛfal anaam ɔkkpɛlɛ mkkpa nbbe ɔlɔk nppyɛɛ ntaa ka kuddu. 21 Kuddu kulenɛ ’bɔng? Anaam kuddu kulenɛnɛ Christ, lubbe lulenɛ isak. 22 Ɔzzànga ulenɛ ka nkkwoongnɛ nnang kɛnaang sa doddo ngbaa ka ntiinɛ ka kuddu, ba nsan bwa nle nsanga. 23 Ɔlɛlɛkɛnɛbong: nbum gaang gaang nttɛ ngbata nsseke vveeng ’wɔng mung, nmii ntaa la Christ ka akkwɛ kɔttanɛ lɛyyɛɛp kɔsak. 24 Ɔzzànga kaang ning, kɔbbal lɔbbal lɛyyɛɛp ka ntaanɛ ka kuddu nzzenge luzzi annyɔɔng. 25 Nsan lɔsan nttɛ vvenɛ ntaa ka kuddu, ntaa la annyɔɔng ɔkkpɛlɛ nttelewɔyɔng ka lubum annyɔɔng ngbaawɔyɔng laggele ka kiyila. 26 Ɛkɛtɛ ya nle nbbal la annyɔɔng lɛtaa, vvenɛ ayangayɔng ifɛɛt ya ule ɔkkyaawɔyɔng ɔgbaa kwa anaam ka lɛfal annyɔɔng ka Christ Jesus. 27 Gedegede mung kɔlɔɔk kwa kɔttanɛ liggbenge ulenɛ eleme. Eleme annyɔɔng ele ya Kuttu-Budoddo a Christ kɔggyannɛ nkwaaning mkkpa usinɛ anaam lile nle nffu nyɛnwɔyɔng, vvenɛ nppyee ka battɛnɛ abeeyɔng kkpɔk la luttina ggwɔn, alluyɔng kullu ka kɔlɔɔk a kiyila kwa Kuttu-Budoddo Ɔlɔɔmɔlɔɔm. 28 Tɛ̀ttɛ́ balɔɔt a kɔfɔk annyɔɔng babbwɔpɔwɔyng. Akkaamyɔng luppyam ɛkɛtɛ ɔkkpɛlɛ. Nkwɔng kule kɔyɔɔbɛ basan battɛ baala babɛtɛwɔyɔng. Annyɔɔng ale abɛtɛyɔngbɛ abbɛ ka ulenɛ Ɔlɔɔmɔlɔɔm unnyiwɔnɛyɔng lakke za kɛbɛtɛ. 29 Ɔlɔɔmɔlɔɔm unnyiwɔyɔngbong kufuk kwa kɛnaang a kɛnaang a Christ. Ka kiyila kwa ammɛ ka kamma keem lissi, kule ka kɛyɛn akama ka lɛttɔ ammɛ agbaa. 30 Gedegede mung akkwoong mung affu attelenɛyɔng nllu kullu. Utii kullu ’kwɔng baang kkwɔn kwa ayɛnnɛnɛyɔng ka nllunɛ, utii kwɛ akkwɛ ’kwɔng baang ka ntiinɛ ka nllunɛ tɛ̀ttɛ̀ appyeenɛyɔng.
