MATTHEW 9

1Jesus ɔmal ka akkpaat ukum libbwe ɔppyɛlɛ isimisimi ufula ka lɛffɛ ammɛ biini. 2Balɔɔt balɔk batɔkɔ ɔlɔɔt ositta baffu ka ewula. Jesus ɔyɛnnɛ ka kiyila balɔɔt ’bɔng baang kɛttalanɛ, ɔlɔɔk la ɔlɔɔt a ositta ’wɔng baang ɔttɛ, ‘Kkaam luppyam, waan anaam, nsɔɔkwɔbong bubbi annɔ.” 3Bakopolo-Lafɔɔ balɔk balɔɔk abbɛ abbɛ battɛ, “Ɔlɔɔt ’wɔng mung ɔkpɛnbong Ebinukkpaapi!” 4Jesus ɔggba ittina abbɛ lɛsan. Ɔzzánga ɔlɔɔk la abbɛ ɔttɛ, “Bɔng tɛ́ttɛ́ attinayɔng babbu lilɔɔk ning? 5Mung kule bbwɛt kɛttɛ ‘Nsɔɔkwɔbong bubbi annɔ’ faa kɛttɛ, ‘Afeele asse’? 6Vvenɛ nbwɔɔlɔwɔng, nyɔɔwɔyɔng ayɛnyɔng ka zzeen nttɛ, Waan-Ɔssɛbibbit-Ɔkkpɛlɛ ɔyanga lakke za kɛsɔɔk a bubbi.” Ɔzzánga ɔlɔɔk la ɔlɔɔt ositta ’wɔng baang ɔttɛ, “Afeele, asam ewula annɔ afula.” 7Ɔlɔɔt ’wɔng baang ufeele ɔsam ewula ammɛ ufula. 8Balɔɔt bayɛnnɛ ning baang, ɔbbwɔpɔbɛ babungu Ɔlɔɔmɔlɔɔm ka ukkwoongnɛ unnyi balɔɔt likke ’zɔng baang. 9Jesus ɔgbatanɛ ka ɛfɛɛn ’yɔng baang, ulenɛ baang ka ɔssɛnɛ, ɔyɛn ɔtɔk-innamba wa ɔzzanganɛ Matthew ka ɔtaanɛ ka ggwoon a kɛnaang ammɛ. Ɔlɔɔk la Matthew ɔttɛ, “Feele akupnɛ.” Ɔzzánga Matthew ufeele ukupmɛ. 10Ka ɛkɛtɛ ya Jesus ɔdɔkɔnɛ ka kizzi kazzi ka ssala Matthew, batɔk-innamba ggbadam la babbyap baffu batoolo baang ɛfɛɛn nnyɔn la balɔɔt a kɔssɛ ammɛ bazzi kazzi ka okkpokkolo. 11Balɔɔt a Pharisees balɔk, bayɛnnɛ ning baang, balɔɔk la balɔɔt-a-kɔssɛ a Jesus battɛ, “Bɔng tɛ́ttɛ́ ukopolo-lukopolo annyɔɔng utul kazzi la batɔk-innamba, la babbyap uzzi?” 12Jesus uppyeenɛbɛ ka balɔɔknɛ ning baang, ɔppyɛlɛbɛ kamma ɔttɛ, “Balɔɔt ba ɔppwanɛbɛ uttula-ittula ba baggyan, ule balɔɔt ba usinɛbɛ lɛppwa ka baggyannɛ uttula-ittula. 13Amii akkoopyɔng bwa luvva Ɔlɔɔmɔlɔɔm lɔlɔɔknɛ lɔttɛ, ‘Luzɔɔm gwa akɔɔmnɛyɔng isɛɛn azɔɔmyɔng ba nggyan, nggyan kɛyyɛɛp a bɛnaang.’ Kɛkkwɔɔ balɔɔt a latele lissi ka nffunɛ, nffu kwa balɔɔt ba banaangnɛ bubbi.” 14Balɔɔt-a-kɔssɛ a John, Ɔnaang-a-baptizim, baffu babap Jesus battɛ, “Mung ’bɔng tɛ́ttɛ́ ayyɔɔt la balɔɔt a Pharisees itaa buwɔɔng kpɛtkpɛt, balɔɔt a kɔssɛ annɔ basi lɛtaa?” 15Jesus ɔppyɛlɛbɛ kamma ɔttɛ, “Attina attɛyɔng bakekeen ba baffunɛ libbeel vvenɛ bataa bukee ka uyini libbeel ulenɛ baang ɔɔ? Ning baang baala kule. Ɔzzànga ɛkɛtɛ vvenɛ ɛffɔ ya bale basam uyini libbeel bagbata bakɔngɔbɛ. Ka ɛkɛtɛ ’yɔng baang vvenɛ bafula buwɔɔng a buwɔɔng. 16“Ɔlɔɔt wa ɔkɔɔmnɛ ufaa ubba ɔsal lemmɛ ɔtɔm ubba ba ule. Akɔɔmnɛ ning baang ufaa vvenɛ ɔyaak ɔtɔm, ɔnaangmɛ lɛmma lɛggbam lɛgbaa. 17Ɔlɔk asam batak asikili assɛɛn ka ɔtɔm ɛssɔ ɛkkpa-ɛsɛɛn. Assɛɛnnɛ ning baang vvenɛ ɛssɔ etuma batak ballɔt ɛssɔ ɛkkpa-ɛsɛɛn ’yɔng baang esseke ubbu bɔfɛɛn. Lutini ’gwɔng ufaa batak bassɛɛn ka ufaa ɛssɔ ɛkkpa-ɛsɛɛn. Ɔssɛɛnnɛ ning baang ɔpkpɛlɛ abbyɛ vvenɛ bɛtaa ka budoddo.” 18Ka Jesus ulenɛbɛ ka kɛbwɔɔlɔ kɔlɔɔk nkwɔng baang, Akkala wa Jew uffu ukupmɛ, ukunmɛ laddu ɔlɔɔk ɔttɛ, “Waan anaam wa wanavva ussuma libbe gedegede mung. Affu atelemɛ labɔɔk nkwaaning uddu.” 19Ɔzzánga Jesus ufeele ukupmɛ. Balɔɔt-a-kɔssɛ ammɛ batɔɔmɛ. 20Wanavva vvɔn ɔdɔkɔ baang wa linnyi lissimɛnɛ ka likkpa zzɔɔppaliffa, uffu ka ɛfɛɛn a Jesus, usingi Jesus ka ewuula. 21Ɔlɔɔk kɛyɔɔng ɔttɛ, “Nsinginɛ ewuulu ammɛ mung, vvenɛ ɔppwanɛ.” 22Jesus usikili ɔyɛnmɛ, ɔlɔɔk la ammɛ ɔttɛ, “Akkaam luppyam waan anaam! Kiyila annɔ kɛnaangwɔbong ɔppwawɔ.” Wanavva ’wɔng baang ɔppwamɛ eseese. 23Ɔzzánga Jesus ufeele umii ka ssala akkala ’wɔng baang ɔyɛn bakkpa ibin ka kɛnaang a ibin ka kullu ’kwɔng baang, la balɔɔt ɔkkpɛlɛ ka bassɛnɛ yɔngɔlɔ-yɔngɔlɔ-yɔngɔlɔ. 24Ammɛ ɔttɛ, “Ɔlɔɔt ɔkkpɛlɛ ɔtta ka vveeng; waan a wanavva ’wɔng baang kubbe lissi ka ubbenɛ, ule ka bilaa.” Balɔɔt ’bɔng baang ɔkkpɛlɛ basseke ka banyɔɔkamɛnɛ, basɛɛk. 25Baggbanɛ balɔɔt basaal, Jesus ɔmal ka lɛnɔk a waanawanavva ’wɔng baang, ɔlɔm waantiti ka kɔbɔɔk, ufeele, ɔppyɛlɛ ɔtaa ka kuddu. 26Kuttu kɔlɔɔk ’kwɔng kɔwaala ɔkkpɛlɛ lɔkaan ’gwɔng baang. 27Jesus ɔgbatanɛ ka ɛfɛɛn ’kwɔng baang, bassi-ifim baffa bakupmɛ la kibungu la kibungu battɛ, “Waan a David ibbewɔ lɛttɔ.” 28Jesus ulenɛ ka tɔkɔlɔ a ggwoon lɛmal, bassi-ifim ’bɔng baang baffu ka ɛfɛɛn ammɛ. Ɔzzánga ɔbapbɛ ɔttɛ, “Ayila mung attɛyɔng nkkwoong mung nnaang ’kwɔng ɔɔ?” Bappyɛlɛmɛ kamma battɛ, “Iii tɛ Dedde;” 29Jesus usingibɛ ka zzeen, ɔttɛ, “Buttɛ kɔnaang ning baang tɛ̀ttɛ̀ ayilanɛyɔng.” 30Ɔzzánga ifim abbɛ isaalbɛ. Jesus ɔttamabɛ kɔkɔlɔm ɔttɛ, “Tɛ̀ttɛ́ abwɔɔlɔyɔng ɔlɔɔt ɔlɔk tɛ!” 31Bagbatanɛ, bamii babwɔɔlɔ kuttu budoddo bwa Jesus ɔnaangnɛ la abbɛ bakkpit lufoom ɛkpansi ’yɔng baang ɔkkpɛlɛ. 32Balɔɔt ’bɔng baang bagbatanɛ, balɔɔt balɔk bakɔɔm ɔlɔɔt wa ipiliza inaangmɛnɛ usi kɛlɔɔk lɛbɛlɛ likkwoong, baffu ka ɛfɛɛn a Jesus. 33Ɔggbanɛ ipiliza ’yɔng baang ussekemɛ, utte kɛlɔɔk eseese. Ɔlɔɔt ɔkkpɛlɛ kɔkɛɛlɛmɛ. Battɛ, “Kɛssanga kɔlɔɔk ’kwɔng ba itaka iyɛn ka ɛkpansi a Israel.” 34Ɔzzánga balɔɔt a Pharisees balɔɔk battɛ, “Ubeet ubbukanggbe unnyimɛnɛ lakke za kɛggba ipiliza itta isseke balɔɔt.” 35Ɔzzánga Jesus ɔssɛ ukkpit laffɛ la igyila ɔkkpɛlɛ. Ukopolobɛ ka idda mitin. Ɔyaam Kuttu?-?budoddo Itutum-Ɔlɔɔmɔlɔɔm. Uttula balɔɔt bɛssanga iffaak duu ya ɔffaaknɛbɛ. 36Ɔyɛnnɛ kibbi ’sɔng baang, babbemɛ lɛttɔ gaang gaang, ka balenɛ ggbɔɔ ka bassɛnɛ bawɔngɔ bakkpit, uttele uttele ba bayanga. Bale tɛ̀ttɛ̀ itɔɔn ya isɛlɛnɛ ɔkat-ɔkat. 37Ɔzzánga ɔlɔɔk la balɔɔt a kɔssɛ ammɛ ɔttɛ, “Liyaat sa lɛbaang a lɛbaang lissolobong. Ɔzzànga bayaat-ɔyaat bale ssup. 38Azɔɔm annyiyɔng Uyini-liyaat nkwaaning ɔtɔɔm balɔɔt ggbadam bamiinɛ liyaat.”

will be added

X\