MATTHEW 8

1Jesus usininɛ ka ekpok uffu kuttɔɔk, kɛkaan a balɔɔt ggbadam kikupmɛ. 2Ɔlɔɔt-ɔffaal uffu ukunmɛ laddu ɔttɛ, “Dedde kɔsaapwɔnɛ, anaangnɛ ɔppwanɛ.” 3Jesus utuulu kɔbɔɔk usingimɛ, ɔlɔɔk la ammɛ ɔttɛ, “Ɔppwawɔ.” Eseese ɔffaal ɔsaalmɛ. 4Jesus ɔlɔɔk la ammɛ ɔttɛ, “Gɔpɔlɔ! Tɛ̀ttɛ́ abwɔɔlɔ ɔlɔɔt ɔlɔk tɛ! Amii ssɔng ka ɛfɛɛn a Ɔssɛɛn-a-luzɔɔm, ɔppyɛɛkwɔ, anaang Ɔlɔɔmɔlɔɔm lɛsɔɔk tɛ̀ttɛ̀ lafɔɔ Moses lalɔɔknɛ, usseke ɔlɔɔt ɔkkpɛlɛ ɔsan ɔttɛ ɔppwawɔbong.” 5Jesus ɔffɔnɛ Capernaum, Akkala Rome uffu ukupmɛ ukkpengemɛ ɔttɛ uttelemɛ. 6Ɔlɔɔk ɔttɛ, “Dedde, bɔɔyi anaam ulenɛ ka ssala ka igolo ka umininɛ ka usimɛnɛ lɛppwa, ba ukkwoong ufeele, ɔssɔpmɛ gaang gaang.” 7Jesus ɔppyɛlɛmɛ kamma ɔttɛ, “Vvenɛ nmii nttulamɛ.” 8Akkala ’wɔng baang ɔppyɛlɛmɛ kamma ɔttɛ, “Ning lissi, Dedde, nsi lɛggyan nttɛ annɔ vvenɛ affu ka ssala anaam. Azza lɛmmwɔɔl azzɛ azzɛ, usseke bɔɔyi anaam ɔppwanɛ. 9Anaam mgbaa nssɛ nyanga balɔɔt ba battanɛnɛ anaam liggbenge. Anaam mgbaa nssɛ nyanga isɔdya ya nkɔɔmnɛ. Nlɔɔknɛ la ’wɔng nttɛ umii, umii. Nlɔɔknɛ la ’wɔng nttɛ uffu, uffu. Nlɔɔknɛ la ubili anaam nttɛ ɔnaang bwɔng, ɔnaang bwɛ.” 10Jesus uppyeenɛ ’kwɔng mung, kɔkɛɛlɛmɛ gaang gaang, ɔzzánga ɔlɔɔk la balɔɔt ba bakupmɛnɛ ɔttɛ, “Nbwɔɔlɔwɔyɔng ka lɔkkwɔɔn nttɛ, kɛssanga kiyila ’sɔng ba ntaka nyɛn ka ɔlɔɔt ɔlɔk ɔyanganɛ ka Israel. 11Akkeyɔng attɛyɔng balɔɔt ggbadam vvenɛ bassi ka lusso gwa livve-luwee lɔfɔm baffu, balɔk bassi ka lusso gwa livve-luwee kulele baffu bataa ka okkpokolo ka Itutum-Ɔlɔɔmɔlɔɔm, la Abraham la Isaac la Jacob. 12Balɔɔt ba bulenɛ ba Itutum-Ɔlɔɔmɔlɔɔm vvenɛ bassangbɛ ballɔt ka tɔkɔlɔ kisul ka ɛfɛɛn a bale bataa bakkwa bazzi lasaal.” 13Jesus ɔlɔɔk la akkala ’wɔng baang ɔttɛ, “Amii ka ssala. Kwa alenɛ kiyila lɛyanga atum, vvenɛ kubee la annɔ.” Ubili akkala ’wɔng baang ɔppwamɛ ka ɛkɛtɛ ’yɔng baang eseese. 14Jesus umii ka ssala Peter. Ɔffɔnɛ bakang ɔyɛn abakka wanavva Peter ka kisi lɛppwa ka igolo ka umininɛ; ɔffaakmɛ buyili. 15Jesus usingimɛ ka kɔbɔɔk, eseese buyili busaalmɛ. Ufeele ɔtaa lɔtaa unnyibɛ kazzi. 16Kulele kɔnaangnɛ, balɔɔt bakɔɔm balɔɔt ipiliza bafee Jesus. Jesus ɔkɔɔm lɛmmwɔɔl, ɔggba ipiliza, uttula balɔɔt ba ɔssɔpnɛbɛ. 17Ɔnaang nkwɔng ngkwaaning kɔlɔɔk kwa Isaiah, uppyee-kutolo Ɔlɔɔmɔlɔɔm, ɔlɔɔknɛ kule ka lɔkkwɔɔn ka ɔlɔɔknɛ ɔttɛ, “Ammɛ biini ɔtɔknɛ bukoolo a kkwɔɔt ayyɔɔt ɔsam iffaak ayyɔɔt ɔgbata.” 18Jesus ɔyɛnnɛ kibbi sa kikkpitmɛnɛ, ɔdda balɔɔt a kɔssɛ ammɛ ɔttɛ bafeele bamii ka kukupa libbwe kwa kkwɔn. 19Ukopolo-Lafɔɔ uffu ukup Jesus, ɔlɔɔk la ammɛ ɔttɛ, “Ukopolo-lukopolo, nyilabong kɛssɛ la annɔ kimii ka ɛfɛɛn duu ya amiinɛ.” 20Jesus ɔppyɛlɛmɛ kamma ɔttɛ, “Lifat liyanga ibbe ya lillunɛ, bunɔɔn buyanga lakɔt za bukkwununɛ, ɔzzànga Waan-Ɔssɛbibbit-Ɔkkpɛlɛ ɛfɛɛn ya umininɛ ɔfɛkɛlɛ ba ɔyanga.” 21Ɔlɔɔt wa vvɔn wa ɔdɔkɔnɛ ɔlɔɔt a kɔssɛ ammɛ, ɔlɔɔk la ammɛ ɔttɛ, “Dedde, afɔngɔnɛbong nmii nlli dedde anaam.” 22Jesus ɔppyɛlɛmɛ kamma ɔttɛ, “Akupnɛ, afɔngɔ babbu balli ba abbɛ babbu.” 23Jesus ɔmal ka akkpaat; balɔɔt a kɔssɛ ammɛ bakupmɛ. 24Kitipili kitipili, kɛffa-bannyi sa lɛbaang kɛffa ka libbwe ’zɔng baang. Ɔzzánga bannyi bakupa bassɛɛn ka akkpaat ka Jesus ulenɛ ka bilaa. 25Balɔɔt-a-kɔssɛ ammɛ bamii bafungalamɛ, battɛ “Mung ile ka ɛtɔk a lubbe tɛ.” 26Jesus ɔppyɛlɛbɛ kamma ɔttɛ, “Bɔng abbwɔpɔnɛyɔng ning? Bɔka kiyila kissupwɔnɛyɔng ning!” Ufeele ubee ubee, ɔkkpa kɛffa la labba-bannyi kiwele. Kɛffa kizum eseese. 27Balɔɔt ɔkkpɛlɛ kɔkɛɛlɛbɛ balɔɔk battɛ, “Mung bɔka kɛssanga ɔlɔɔt wa kɛffa la labba-bannyi bitelemɛnɛ?” 28Jesus uffunɛ ka ɛkpansi a Gadarenes, ka lufoom a libbwe gwa ggwɔn, ududa balɔɔt baffa ba battanɛ ka ulupu. Balɔɔt ’bɔng baang bayanga ipiliza, babbwɔpɔ kɛppyɛɛk. Ɔlɔɔt wa ɔbbɔnɛ ɔbbal ka ɛtɔk ’yɔng baang lɛssɛ ba ule. 29Eseese bazzɔɔk kibungu batte, “Waan-Ɔlɔɔmɔlɔɔm aggyan bɔng la ayyɔɔt? Affubongyɛlɛ kɛyɔɔ akama tɛ́ttɛ́ ɛkɛtɛ ya bbwak ɛffɔ ɔɔ?” 30Ɛfɛɛn ikkumma idɔkɔnɛ ka kazzi ba efulu. 31Ipiliza ’yɔng baang ikkpenge Jesus ittɛ, “Ale ka aggbanɛyɛlɛ itta isseke ɔlɔɔt ’wɔng mung, atɔɔmyɛlɛ imii ka kibbi ikkumma ’sɔng baang.” 32Jesus ɔlɔɔk la ipiliza ’yɔng baang ɔttɛ, “Ammiiyɔng.” Ɔzzánga annyɛ igbata imii ikup ikkumma. Kibbi ikkumma ’sɔng baang ɔkkpɛlɛ kɛmma kisini kuttɔɔk a lɛttaal kimii kɛttɔ ka bannyi kɛtaak. 33Balɔɔt ba bakatnɛ ikkumma ’yɔng baang bamma bamii ka tɔkɔlɔ a ssala babwɔɔlɔbɛ lilɔɔk ’sɔng baang ɔkkpɛlɛ batum balɔɔt baffa ba bayanganɛ ipiliza. 34Ɔzzánga ɔlɔɔt ɔkkpɛlɛ wa ussinɛ ka lɛffɛ ’zɔng baang ufeele umii kɛyɛn a Jesus. Bayɛnmɛnɛ bakkpengemɛ battɛ ɔgbata usseke lɛffɛ abbɛ.

will be added

X\