MATTHEW 7

1“Tɛ̀ttɛ́ annyi balɔɔt kibbi ggbɔɔgbɔɔ nkwaaning Ɔlɔɔmɔlɔɔm usiwɔ annɔ lɛssɛ unnyi. 2Ɔlɔɔmɔlɔɔm ùlé ɔkaal kɛkaal annɔ tɛ̀ttɛ̀ akaalnɛ kɛkaal a balɔɔt balɔk. Ule ɔkɔɔm kɛssanga kɛkaal sa annɔ akaalnɛ balɔɔt ’bɔng baang, ɔkaal kɛkaal annɔ. 3Mbɔng tɛ́ttɛ́ appyɛɛk kwa ezuku bɔfɛɛn ya tɔkɔlɔ a zzeen etele annɔ, asi kwa lɛffɛ-kɛssɛ za lɛbaang za lilenɛ ka zzeen annɔ biini lɛppyɛɛk? 4Mbɔng tɛ́ttɛ́ akkpenge ɔkpana annɔ attɛ ‘Nsangawɔ ezuku bɔfɛɛn ka zzeen.’ Ka bɔfɛɛn bwa lɛbaang bulewɔnɛ ka zzeen za annɔ biini? 5Annɔ ɔnaang-a-lagban ’wɔng! Akɔɔm ɛtɔk asanga bɔfɛɛn bwa zzeen za annɔ biini, tɛ́ttɛ́ vvenɛ akkwoong appyɛɛk asanga bɔfɛɛn bwa bulenɛ ka zzeen a ɔkpana annɔ. 6“Tɛ̀ttɛ́ asam bɔfɛɛn bwa bulenɛ bwa latele annyi ibbwa, nzang vvenɛ isikili iddopowɔ. Tɛ̀ttɛ́ asam ifɔɔk-akpana atɔɔp ka lusso ikkumma; atɔɔpnɛ ning baang, vvenɛ isusukuyɛ ka bukkpɔ. 7“Abapnɛ, vvenɛ atɔk; aggyannɛ, vvenɛ ayɛn; alipnɛ, vvenɛ lɛmma liwongolowɔ. 8Ɔlɔɔt duu wa ɔbapnɛ, vvenɛ ɔyanga ’bwɛ; ɔlɔɔt wa ɔggyannɛ, vvenɛ ɔyenbwɛ; ɔlɔɔt duu wa ulipnɛ ka lɛmma ggwoon, vvenɛ liwongolomɛ. 9Ɔlɔɔt ɔlɔk ule baang wa waan ammɛ ɔkkwanɛ kazzi, ɔsam lɛttaal unnyimɛ ɔɔ? 10Ɔlɔk vvenɛ ɔsam ɛzzɔkɔ unnyi awan, ka awan ɔkkwanɛ ɛsɛɛnabannyi ɔɔ? 11Ka abbɔlnɛyɔng tɛ̀ttɛ̀ abbɔlnɛyɔng lɔbbɔl baang, asanyɔng lɔsan tɛ̀ttɛ̀ annyinɛyɔng bwaan annyɔɔng bɛfɛɛn bya doddo, la nzang Ssaawo annyɔɔng ka libat, usi balɔɔt ba babapmɛnɛ bɛfɛɛn bwa doddo linnyi ɔɔ! 12“Anaangyɔng linaang la bannyɔɔng tɛ̀ttɛ̀ aggyannɛ attɛ bannyɔɔng banaang la annyɔɔng. Ning baang ulenɛ ifɛɛt a Lafɔɔ-a-Moses la lukopolo bappyee-kutolo Ɔlɔɔmɔlɔɔm. 13“Assɛyɔng ka lɛmma-kikku za ppyep ammiiyɔng ka tɔkɔlɔ. Ɛtɔk ya ɛggbamnɛ, ɛyyɛɛp, emii ka Hell. Balɔɔt bale batta ka annyɛ lɛssɛ. 14Lɛmma-kikku za ppyep za likoolnɛ lɔssɛ, limiinɛ ka ɛfɛɛn a kuddu, bwaan a balɔɔt ssup basannɛ ɛtɔk ’yɔng baang. 15“Akatyɔng kwa bakkaalalaak ba battɛnɛ abbɛ bappyee-kutolo Ɔlɔɔmɔlɔɔm. Bale baffu tɛ̀ttɛ̀ itɔɔn ka appyɛɛknɛyɔngbɛ ka zzeen. Ɔzzànga ka tɔkɔlɔ bale tɛ̀ttɛ̀ igɔɔt. 16Vvenɛ akɔɔlɔyɔngbɛ ka eleme abbɛ. Lalaak-ɛkkpɛ la lifaat, lakkpo mangolo ba bɛwɔm. 17Kɛssɛ sa doddo kɛwɔmnɛ lakkpo za layyɛɛpnɛ. Kɛssɛ sa kisinɛ lɛyyɛɛp kɛwɔm babbu lakkpo. 18Kɛssɛ sa doddo lakkpo za lasinɛ lɛyyɛɛp ba kɛwɔm. Kɛssɛ sa kisinɛ lɛyyɛɛp lakkpo za layyɛɛpnɛ ba kɛwɔm. 19Lɛsan-a-kɛssɛ za lisinɛ lakkpo za doddo lɛwɔm, vvenɛ bazzasɛ bazzɔɔk babbɔk bassɛɛn ka lɔkɔɔn. 20Ka ussinɛ baang vvenɛ akɔɔlɔyɔng bakkaalalaak ba battɛnɛ abbɛ bappyee-kutolo Ɔlɔɔmɔlɔɔm. 21“Ɔlɔɔt ɔkkpɛlɛ wa ɔkkwɔɔnɛnɛ ‘Uyini’, ‘Uyini’ lissi ule ɔmal ka Itutum-Ɔlɔɔmɔlɔɔm. Ɔzzànga ule balɔɔt ba banaangnɛ kwa Dedde anaam ka libat ɔggyannɛ ɔttɛ banaang ka bale bamal ka Itutum-Ɔlɔɔmɔlɔɔm. 22Ɛkɛtɛ ya kɛtɔm ’sɔng baang kile kiffu, balɔɔt ggbadam vvenɛ bakkwɔɔnɛ ‘Uyini, Uyini’, balɔɔk battɛ, ‘Ibwɔɔlɔ ibwɔɔlɔ bɔtɔɔm bwa Ɔlɔɔmɔlɔɔm ɔtɔɔmnɛ ka lɛkɔɔl annɔ. Iggbabong ipiliza ggbadam ka lɛkɔɔl annɔ, inaang bɛmaanga ggbadam igbaa.’ 23Ɛkɛtɛ ’yɔng baang vvenɛ nlɔɔk la abbɛ nttɛ, ‘Wɔyɔng ba ntaka nsan, agbata assekenɛyɔng, annyɔɔng banaang-a-bubbi.’ 24“Ka ussinɛ mung, ɔlɔɔt ɔkkpɛlɛ wa uppyeenɛ lɛmmwɔɔl anaam utelezɛ, ɔtaa tɛ̀ttɛ̀ ɔsan-a-kɔlɔɔk ɔlɔɔt wa ɔbɔɔknɛ ggwoon ammɛ ka libat akpana. 25Usini bannyi uteep, iyɔngɔ iyipi, ɛlɔlɔ etuma, kɛffa kɛffa gaang gaang kibum kitut a ggwoon kɛzzɔɔk. Ɔzzànga ggwoon lusi lɛttɔ, ka babɔɔknɛ gwɛ ka libat akpana. 26Ɔlɔɔt ɔkkpɛlɛ wa uppyeenɛ lɛmmwɔɔl anaam usizɛ litele, ule tɛ̀ttɛ̀ uzingizingi ɔlɔɔt wa ɔbɔɔknɛ ggwoon ka libat a kususuk. 27Usini bannyi uteep, iyɔngɔ iyipi, kɛffa kɛffa gaang gaang kitut ggwoon lɔttɔ, kɛttɔ kɛbbɔl.” 28Jesus uvvenɛ lilɔɔk ’sɔng lɛlɔɔk, kibbi ’sɔng baang kɔkɛɛlɛbɛ gaang gaang ka lukopolo gwa ukopolonɛ. 29Ba ule tɛ̀ttɛ̀ bakopolo-Lafɔɔ abbɛ. Ammɛ ukopolo la lakke.

will be added

X\