MATTHEW 6

1“Tɛ̀ttɛ́ anaangyɔng kɛnaang a luzɔɔm annyɔɔng ka kkpelegede nkwaaning balɔɔt bayɛn kwa anaangnɛyɔng. Anaangnɛyɔng bɛfɛɛn ’byɔng mung ka kkpelegede, lɛsɔɔk baala ayangayɔng ka labɔɔk a Ssaawɔ annyɔɔng ka libat. 2“Annyinɛ ɔlɔɔt bɔfɛɛn bwa ɔggyannɛ, tɛ̀ttɛ́ anaang linaang sa alemɛnɛ bɔfɛɛn linnyi tɛ̀ttɛ̀ balɔɔt ba bayɔɔnɛbɛ kɛyɔɔng ka idda mitin la itɔk battɛ abbɛ balenɛ banaang-a-budoddo. Banaang battɛ nkwaaning balɔɔt babungubɛ. Akke asan attɛyɔng kikkpele abbɛ kɛggba lɛsaal tɛ. 3Ɔzzànga ayaamnɛ ɔlɔɔt wa ɔbbyamɛnɛ, anaangkwɛ ka ɛtɔk ya ɛnngwa?-?luppyam annɔ ele esikwɛ lɛsan. 4Kule kɔlɔɔk a lalup, Ssaawɔ annɔ wa ɔyɛnnɛ kwa anaangnɛ ka lalup vvenɛ ɔnaangwɔ lɛsɔɔk. 5“Ɛkɛtɛ azɔɔmnɛyɔng, tɛ̀ttɛ́ anaangyɔng tɛ̀ttɛ̀ balɔɔt ba bayɛnnɛbɛ kɛyɔɔng, basaap kibee ka idda mitin la lufoom a itɔk bazɔɔm nkwaaning balɔɔt bayɛnbɛ. Akke asan attɛyɔng kikkpele abbɛ kɛggba lɛsaal. 6Ale ka azɔɔmnɛ luzɔɔm, amii ka tɔkɔlɔ lɛnɔk-a-ggwoon, annɔ afɛɛn lɛmma ggwoon, azɔɔm annyi Ssaawɔ annɔ wa asimɛnɛ lɛyɛn. Ssaawɔ annɔ wa ule ɔyɛn kwa anaangnɛ ka lalup, vvenɛ ɔnaangwɔ lɛsɔɔk. 7“Azɔɔmnɛyɔng luzɔɔm, tɛ̀ttɛ́ azɔɔmyɔng tɔkɔtɔkɔtɔkɔ tɛ̀ttɛ̀ balɔɔt a ikaan ilɔk, ba battinanɛ battɛ Ɔlɔɔmɔlɔɔm ule uppyeebɛ ka bazɔɔmnɛ mmɛmmɛ. 8Tɛ̀ttɛ́ anaangyɔng tɛ̀ttɛ̀ abbɛ. Ɔlɔɔmɔlɔɔm, Ssaawɔ annyɔɔng, ɔggba lɛsan bwa aggyannɛyɔng ka labɔɔk ammɛ tɛ́ttɛ́ abapmɛyɔng. 9Uwɔng ulenɛ tɛ̀ttɛ̀ ale azɔɔmnɛyɔng: ‘Dedde ayyɔɔt wa ulenɛ ka libat, Ɔkkpɛlɛ ayyɔɔt ikɔɔm lɛkɔɔl annɔ ka budoddo, itelezɛ. 10Afɔngɔyɛlɛ ifula ka Itutum annɔ. Bɛfɛɛn ’byɔng bya aggyannɛ attɛ inaangbyɛ, anaangyɛlɛ inaangbyɛ ka vveeng ’wɔng tɛ̀ttɛ̀ banaangnɛ ka libat. 11Annyiyɛlɛ bwa kuzzi bwa iggyannɛ mmwɔɔn. 12Asɔɔkyɛlɛ bubbi ayyɔɔt, tɛ̀ttɛ̀ ayyɔɔt isɔɔknɛ balɔɔt ba banaangnɛ bubbi batumyɛlɛ ayyɔɔt. 13Afɔngɔyɛlɛ kɛllɛ gaang gaang, ɔzzànga akatyɛlɛ asseke Ɔnaang-a-kɛsɛɛm.’ 14“Asɔɔknɛ balɔɔt kɔlɔɔk kwa banaangnɛ kɔbbɔl batumwɔ, Ssaawɔ annyɔɔng ka libat vvenɛ ɔssɛ ɔsɔɔkwɔyɔng. 15Ɔzzànga asinɛ balɔɔt balɔk lɛsɔɔk, Ssaawɔ annɔ ka libat baala ɔssɛ ɔsɔɔkwɔ annɔ ka kɔlɔɔk kwa anaangnɛ kɔbbɔl. 16“Ɛkɛtɛ ya ale ka ataanɛ buwɔɔng, tɛ̀ttɛ́ abbɔl lusso tɛ̀ttɛ̀ balɔɔt ba bayɛnnɛbɛ kɛyɔɔng. Bassɛ baang bakkpit la lɛppyɛɛk a buwɔɔng nkwaaning balɔɔt ɔkkpɛlɛ basan battɛ bale ka kɛtaa buwɔɔng. Akke attɛyɔng kikkpele abbɛ kɛggba lɛsaal tɛ. 17Ayilayɔng lusso, assakayɔng bittulu ka ɛkɛtɛ ataanɛyɔng buwɔɔng 18nkwaaning balɔɔt balɔk basi lɛsan battɛ aleyɔng ka kɛtaa buwɔɔng. Ssaawɔ annyɔɔng kɛyɔɔng wa asimɛnɛyɔng lɛyɛn ule ɔsan. Ammɛ wa ɔsannɛ bwa anaangnɛyɔng ka lalup vvenɛ ɔnaangwɔyɔng lɛsɔɔk. 19“Tɛ̀ttɛ́ abɔngɔlɔyɔng iyyɛɛp annyɔɔng ka ɛkpansi ’yɔng mung, ka ɛfɛɛn itilikɔɔt la bisili bile bɛbɛpɛyɛ, bassip vvenɛ babwɔɔt bamal bamii bayip. 20Lutini ’gwɔng, abɔngɔlɔyɔng iyyɛɛp annyɔɔng ka libat, ka ɛfɛɛn a itilikɔɔt la bisili bile bisi likkwoong bɛbɛpɛyɛ, bassip basi likkwoong babwɔɔt bamal bayipyɛ. 21Ɛfɛɛn a kibeet annɔ kilenɛ, luppyam annɔ lɔssɛ lule baang ɔgbaa. 22“Zzeen lale tɛ̀ttɛ̀ otinika ka kkwɔɔt ɔlɔɔt. Zzeen annɔ lalenɛ kkpaladada, kkwɔɔt annɔ ɔkkpɛlɛ liyanga buppwolo. 23Ɔzzànga zzeen annɔ labbɔlnɛ, kkwɔɔt annɔ lile ka tɔkɔlɔ kisul. Buppwolo bwa ayanganɛ bulenɛ kisul, nzang kisul kɛttalawɔ gaang gaang ka tɔkɔlɔ. 24“Ɔlɔɔt wa ule ukkwoong ɔtaa bubili ibassɛ ammɛ iffa ba ule; vvenɛ vvɔn utunwɔ, wa vvɔn ɔsaapwɔ. Vvenɛ annyi vvɔn latele, wa vvɔn utunwɔ. Ba akkwoong atele Ɔlɔɔmɔlɔɔm la ikkpoko ɛkɛtɛ kkwɔn. 25“Akkwɛ kɔnaangnɛ nbwɔɔlɔwɔyɔng nttɛ: tɛ̀ttɛ́ attinayɔng gaang gaang kwa kazzi la bannyi ba avvanɛ adduyɔng, ɔlɔk attinayɔng kwa iwɔkɔlɔ ya kɛwɔkɔlɔ ka kkwɔɔt. Kkpɔɔ mung kuddu lissi kɔttanɛ kazzi ɔɔ? Faa kuddu lissi kɔttanɛ iwɔkɔlɔ? 26Ppyɛɛkyɔng bunɔɔn bwa bukutnɛ bukkpitwɔyɔng mung. Iwopowo ba buwoop, ɔlɔk buyaat liyaat buloko ka ikunu. Ssaawɔ annyɔɔng ka libat ɔkɔɔmnɛbwɛ. Kkpɔɔ annyɔɔng lissi attanɛyɔng bunɔɔn ɔɔ? 27Ɔkkpɛlɛ annyɔɔng baang nnyinɔɔng uttinanɛ ɔttɛ vvenɛ ɔtaa likkpa ggbadam tɛ̀ttɛ̀ uffiknɛ? 28“Ngkka bɔng tɛ́ttɛ́ luppyam lɔzzawɔyɔng kwa ibba? Ppyɛɛkyɔng tɛ̀ttɛ̀ idodo kɛmat immalanɛ. Kɛnaang ba inaang ɔlɔk vvenɛ ikaang iwɔkɔlɔ issɛɛnyɛ kɛyɔɔng. 29Ɔzzànga nbwɔɔlɔwɔyɔng nttɛ, gɔɔ Solomon ka iyyɛɛp ammɛ ka utiinɛ ikokolo, iwɔkɔlɔ usi lɛyanga ya iyyɛɛpnɛ ikkɛtɛ la idodo ’yɔng mung. 30Ɔlɔɔmɔlɔɔm ukulanɛ lifaat sa lilenɛ mung mmwɔɔn ibba, vvenɛ likkɔm lɔkɔɔn lufat, ba attina attɛ annyɔɔng vvenɛ ɔppyɛɛkwɔyɔng ɔsak ɔɔ? ’Bɔng kiyila kissupwɔnɛyɔng ning! 31Afɔngɔyɔng kɛbɛlɛ littina attɛyɔng, mung bwa kuzzi nle nyɛn yang nzzi ee? ɔlɔk bannyi mung nle nyɛn yang nvva ee? 32(Mbyɔng bilenɛ kɛssanga bɛfɛɛn bya balɔɔt a ikaan a vveengodde baggyannɛ.) Ssaawɔ annyɔɔng ka libat, ɔsan lɔsan ɔttɛ bɛfɛɛn mbyɔng mung ɔkkpɛlɛ bɛsaapwɔyɔng lɔsaap. 33Lutini ’gwɔng, akɔɔm ɛtɔk assɛɛnyɔng Itutum-Ɔlɔɔmɔlɔɔm ka luppyam la bɛfɛɛn bya aggyannɛ ka ibɔɔk annyɔɔng, vvenɛ unnyiwɔyɔng bɛfɛɛn ’byɔng mung ɔkkpɛlɛ bya aggyannɛyɔng. 34Afɔngɔyɔng kittina kwa lufat, tɛ̀ttɛ́ ittina iffu iyipiwɔyɔng ka kɛtɔm ’sɔng baang. Akama wa kɛtɔm ’sɔng baang ɔyyɛɛpbong ka kɛtɔm ’sɔng baang.”

will be added

X\