MATTHEW 5

1Jesus, ɔyɛnnɛ kibbi ’sɔng baang, ufeele umii ka libat ekkpok ka ɛfɛɛn ya ɔtaanɛ lɔtaa. Balɔɔt a kɔssɛ ammɛ baggba bataa bakkpitmɛ. 2Ɔzzanga ukopolobɛ ɔttɛ: 3“Laggele lale za balɔɔt ba basannɛ battɛ abbɛ banaang-a-bubbi; Itutum-Ɔlɔɔmɔlɔɔm ile ya abbɛ. 4“Laggele za balɔɔt ba bataanɛ bukee; Ɔlɔɔmɔlɔɔm vvenɛ ɔnaangbɛ ɔwaabɛ! 5“Laggele lale za bakeebwɔɔn; vvenɛ batɔk bwa Ɔlɔɔmɔlɔɔm usekelenɛbɛ. 6“Laggele lale za balɔɔt ba kɔbɛtɛnɛbɛ ka kɔlɔɔk kwa Ɔlɔɔmɔlɔɔm ɔggyannɛ; Ɔlɔɔmɔlɔɔm vvenɛ ɔnaangbɛ buddoddo bbwak. 7“Laggele lale za balɔɔt ba balɔɔt babbenɛbɛ lɛttɔ; vvenɛ bassɛ babbe Ɔlɔɔmɔlɔɔm lɛttɔ! 8“Laggele lale za balɔɔt ba luppyam abbɛ lɔllaatnɛ; vvenɛ bayɛn Ɔlɔɔmɔlɔɔm! 9“Laggele lale za balɔɔt ba banaangnɛ bɔkaat la ba abbɛ; Ɔlɔɔmɔlɔɔm vvenɛ ɔkkwɔɔbɛ bwaan ammɛ. 10“Laggele lale za balɔɔt ba bayɛnnɛ akama ka banaangnɛ kwa Ɔlɔɔmɔlɔɔm ɔggyannɛ; Itutum-Ɔlɔɔmɔlɔɔm ile ya abbɛ! 11“Laggele lale za annyɔɔng ka ɛkɛtɛ balɔɔt banyɔɔkawɔnɛyɔng; bayɔɔwɔyɔng akama; balɔɔk kɔlɔɔk a kɛkkala lɛlaak ɔkkpɛlɛ batumwɔyɔng, ka alenɛyɔng balɔɔt a kɔssɛ anaam. 12Ɔwaawɔyɔng aggeleyɔng ka lɛsɔɔk za lɛbaang a lɛbaang lilewɔnɛyɔng ka ssala Ɔlɔɔmɔlɔɔm. Bappyee-kutolo Ɔlɔɔmɔlɔɔm ba iyɛddɛ-iyɛddɛ badɔkɔ bayapbɛ akama ning baang. 13“Ataayɔng tɛ̀ttɛ̀ bunɔk ɔssɛbbitbbit ɔkkpɛlɛ. Ulenɛ ka bunɔk businɛ lɛbɛlɛ liggwoom, ɛtɔk ya ale abbalbwɛ lɛnaang buzzanga bunɔk ba ɛbɛlɛ lile, busseke ubbu bɔfɛɛn bwa asamnɛ azzɔɔk balɔɔt basing bukkpɔ. 14“Annyɔɔng alenɛyɔng buppwolo a vveengodde. Killu sa ballunɛ ka libat ekpok, ɔlɔɔt sɛ ba ukkwoong usi lɛyɛn. 15Ɔlɔɔt wa uyengenɛ otinika, ɔsam, ulup ka tɔkɔlɔ ekkpo ba ule. Lutini ’gwɔng utelemɛ ka okkpokkolo wa ɔggbanɛ lissi utele otinika ka ɛfɛɛn a ule uppwolo ɔlɔɔt ɔkkpɛlɛ ɔyɛn buppwolo ka tɔkɔlɔ a ggwoon. 16Kɔssɛ kule ning baang la annyɔɔng. Buppwolo annyɔɔng vvenɛ buppwolo ka lusso balɔɔt nkwaaning bayɛn budoddo lilɔɔk sa anaangnɛyɔng. Usseke babungu Ssaawɔ annyɔɔng ka libat. 17“Tɛ̀ttɛ́ attina attɛyɔng mung nffu kɛbɛpɛ Lafɔɔ a Moses la lukopolo bappyee-kutolo Ɔlɔɔmɔlɔɔm. Kɛbɛpɛ abbyɛ ba nffu. Nffu nnyibɛ ifɛɛt abbyɛ ya bbwak. 18Akkeyɔng nkwɔng tɛ! Tɛ̀ttɛ̀ libat la ɛkpansi bile bittumu bɛffɔ, lifɔɔ zzɔɔn gɔɔ, gɔɔ kufoom a lifɔɔ kwa kule kɔbɛpɛ baala kule tɔttɔt ɔffɔ ka lakpeke bɛfɛɛn ɔkkpɛlɛ. 19Ɔzzànga ɔlɔɔt wa usinɛ lafɔɔ litele nkkpa lassup ning, ukopolo balɔɔt balɔk bassɛ banaang tɛ̀ttɛ̀ ammɛ, ɔlɔɔt ’wɔng baang ule bɔfɛɛn bwa gbɔɔ ka Itutum-Ɔlɔɔmɔlɔm. Ɔzzàngà ɔlɔɔt wa utelenɛ lafɔɔ, ukopolo balɔɔt balɔk bassɛ banaang tɛ̀ttɛ̀ ammɛ; ɔlɔɔt ’wɔng baang ule ɔlɔɔt wa lɛbaang a lɛbaang ka Itutum-Ɔlɔɔmɔlɔɔm. 20Nbwɔɔlɔwɔyɔng nttɛ ka ussinɛ ka ɛkɛtɛ ’yɔng baang baala akkwoong amalyɔng ka Itutum-Ɔlɔɔmɔlɔɔm, kiyila annyɔɔng kisinɛ lɛsak sa bakopolo-Lafɔɔ la balɔɔt a Pharisees ka kɛnaang a bɛnaang bya Ɔlɔɔmɔlɔɔm ɔggyannɛ. 21“Aggbayɔng lippyee ka bakopolonɛ balɔɔt iyɛddɛ-iyɛddɛ battɛ, ‘Tɛ̀ttɛ́ awwɔɔl balɔɔt, ɔlɔɔt duu wa ɔwwɔɔlnɛ ɔlɔɔt, vvenɛ bakɔɔmmɛ baffu ka lusso kɛkaal’. 22Ɔzzànga gedegede mung nbwɔɔlɔwɔyɔng nttɛ, ɔlɔɔt duu wa kɔlɔɔk kutunmɛnɛ la wabbɛ, vvenɛ bakɔɔmmɛ baffu ka lusso kɛkaal! Ɔlɔɔt duu wa ɔlɔɔknɛ la wabbɛ ɔttɛ, ‘Annɔ mung ayyɛɛp gbɔɔ ka bulɔk ba affɔ’, vvenɛ bakɔɔmmɛ baffu ka lusso ikkansulu; ɔlɔɔt duu wa ɔttɛnɛ wabbɛ uzingizingi wa bgɔɔ, usinɛ lɛsan ɔnaang, vvenɛ ule ka ɛtɔk akama ya kimii ka lɔkɔɔn a hell. 23Alenɛ ka annyinɛ Ɔlɔɔmɔlɔɔm lɛsɔɔk annɔ ka labun ammɛ, akkenɛ attɛ wannyɔɔng ɔyanga kɔlɔɔk la annɔ, 24akkyaa lɛsɔɔk annɔ afɔngɔ baang ka lusso labun a Ɔlɔɔmɔlɔɔm, afeele eseese amii anaang bɔkaat la ammɛ tɛ́ttɛ́ appyɛlɛ affu asam lɛsɔɔk annɔ annyi Ɔlɔɔmɔlɔɔm. 25“Ɔlɔɔt ɔkkwɔɔwɔnɛ kɛkaal ka attɔmɛnɛ ka lafɔɔ, akkpengemɛ ka atakanɛ ka ɔdda ɔdda-kɛkaal lɛffɔ. Alenɛ bakang lɛffɔ vvenɛ ɔsamwɔ unnyi ɔkaal-a-kɛkaal. Ɔkaal-a-kɛkaal vvenɛ ɔsamwɔ unnyi ippoloosi, bassɛɛnwɔ igbakkɔpɔ. 26Nbwɔɔlɔwɔ nttɛ vvenɛ ataa baang ka igbakkɔpɔ ɔddɔkɔddɔkɔ avve ikkpoko ya bazzawɔnɛ linnyi. 27“Aggbayɔng lippyee ka battɛnɛ, ‘Tɛ̀ttɛ́ akup wanavva ɔlɔɔt. Wanavva tɛ̀ttɛ́ akup walam ɔlɔɔt.’ 28Ɔzzànga gedegede mung nbwɔɔlɔwɔyɔng nttɛ, ɔlɔɔt duu wa ɔppyɛɛknɛ wanavva ɔggyan ɔttɛ ɔnaang budoddo la ammɛ, ɔlɔɔt ’wɔng baang ɔnaangbong bubbi ka luppyam ammɛ biini. 29Zzeen annɔ za kɔbɔɔk-ɛlaabɔɔk lɛnaangwɔnɛ attɔ ka bubbi, kɔyyɛɛp ka asanganɛzɛ azzɔɔk kang. Kɔtta lɛyyɛɛp ka atakanɛ kikkeep a kkwɔɔt annɔ, ssɔn, lutini ayanganɛ bikkeep a kkwɔɔt annɔ ɔkkpɛlɛ amii ka lɔkɔɔn. 30Kɔbɔɔk annɔ kwa ɛlaabɔɔk kɔnaangwɔnɛ attɔ ka bubbi, azzakwɛ azzɔɔk. Kɔtta lɛyyɛɛp ka abɛpɛnɛ kikkeep a kkwɔɔt annɔ ssɔn lutini ayanganɛ bikkeep a kkwɔɔt annɔ ɔkkpɛlɛ amii ka lɔkɔɔn. 31“Balɔɔk ngbaa battɛ, ‘Ɔlɔɔt duu wa oggbanɛ wanavva ammɛ, ɔkkpɔk luvva luteele unnyimɛ.’ 32Ɔzzànga gedegede mung nbwɔɔlɔwɔyɔng nttɛ, ɔlɔɔt wa ɔggbanɛ wanavva ammɛ ka ɔtakanɛ la walam ɔlɔk limini, ɔlɔɔt ’wɔng baang ɔnaangbong bubbi utum wanavva ammɛ. Wanavva ’wɔng baang ɔbbalnɛ walam ɔlɔk lillu, ɔtɔm a walam ammɛ ɔnaangmɛbong ɔnaang bubbi. Walam ’wɔng baang wa ɔtɔkmɛnɛ ɔssɛbong ɔnaang bubbi ɔgbaa. 33“Aggbayɔng lippyee ka baggbanɛ balɔɔt lɛbwɔɔlɔ battɛ, ‘Tɛ̀ttɛ́ abɛpɛyɔng nsekele; ɔzzànga anaangyɔng kwa alenɛyɔng liyim ka lusso Ebinukkpaapi attɛ vvenɛ anaangyɔng.’ 34Ɔzzànga gedegede mung nbwɔɔlɔwɔyɔng nttɛ tɛ̀ttɛ́ ayimyɔng ka ɛkɛtɛ anaangnɛyɔng nsekele. Tɛ̀ttɛ́ ayimyɔng libat. Libat lilenɛ ugbaal a kibeet, Ɔlɔɔmɔlɔɔm. 35Tɛ̀ttɛ́ ayimyɔng ɛkpansi, ɛkpansi elenɛ ɛfɛɛn a Ɔlɔɔmɔlɔɔm usingnɛ bukkpɔ ammɛ, ɔlɔk ayimyɔng Jerusalem. Akkenɛ attɛ Jerusalem ulenɛ killu Ubeet wa lɛbaang. 36Gɔɔ tɛ̀ttɛ́ ayimyɔng lɛttɔ annyɔɔng ka asinɛ kikkwoong anaang ulata eggbe kittulu nnyɔn gbɔɔ ɔlɔk ubili. 37Alɔɔk gbɔɔ bwɛt attɛ, ‘Iii’ ɔlɔk ‘Maaye!’ Kɔlɔɔk kɔlɔk kulenɛ bakang kwa attinanɛ kɛlɔɔk agbaa kussi ka Ɔnaang-a-kɛsɛɛm. 38“Appyeeyɔngbong ka badɔkɔnɛ balɔɔk battɛ, ‘Ɔlɔɔt wa ɔbwɔɔtwɔnɛ zzeen, assɛ abwɔɔtmɛ za ammɛ. Ɔlɔɔt wa ɔkkpɛɛwɔnɛ lɛsaal assɛ akkpɛɛmɛ za ammɛ.’ 39Ɔzzànga gedegede mung nbwɔɔlɔwɔyɔng nttɛ tɛ̀ttɛ́ apipiliyɔng ɔlɔɔt duu wa ɔnaangwɔnɛyɔng kwa kɔbbɔlnɛ. Ɔlɔɔt duu wa utupwɔnɛ kabut ka kugga kwa kɔbɔɔk ɛlaabɔɔk asikili kwa ɛbyakɔm, alokomɛ ɔbbal litup ɔgbaa. 40Ɔlɔɔt duu wa ɔkaawɔnɛ umii ka ɔdda kɛkaal ɔttɛ ɔsam uwɔkɔlɔ annɔ, afɔngɔmɛ ɔbbal wa vvɔn lɛsam ɔgbaa. 41Ullu-lɛkɔɔng ɔttɛnɛ atɔkɔmɛ bɛfɛɛn ka maal vvɔn, abbal wa vvɔn lɛtɔkɔ agbaa. 42Ɔlɔɔt ɔlɔk ɔbapwɔnɛ bɔfɛɛn bwa ayanganɛ, annyimɛbwɛ, ɔlɔɔt ɔlɔk uffuwɔnɛ kifolo bɔfɛɛn, annyimɛbwɛ ufolo. 43“Appyeeyɔngbong kkpal ka balɔɔknɛ battɛ inngwa annyɔɔng isaapwɔyɔng, balɔɔt a kɔfɔk annyɔɔng batunwɔyɔng! 44Ɔzzànga gedegede mung nbwɔɔlɔwɔyɔng nttɛ balɔɔt a kɔfok annyɔɔng basaapwɔyɔng. Azɔɔm annyiyɔng balɔɔt ba bayɔɔwɔnɛyɔng akama, 45nkwaaning azzangayɔng bwaan a Ssaawɔ annyɔɔng ka libat. Ammɛ ɔnaangnɛ livve-luwee ammɛ lippwolo lɛllɔt babbyap la balɔɔt ba bayyɛɛpnɛ. Uteep ɔllɔt balɔɔt ba banaangnɛ kwa bbwak la balɔɔt ba banaangnɛ kwa kɔbbolnɛ. 46Anaang nang tɛ́ttɛ́ aggyanyɔng lɛsɔɔk Ɔlɔɔmɔlɔɔm ka atelenɛyɔng balɔɔt ba batelewɔnɛyɔng annyɔɔng keem. Nlɔɔk ka batɔk-innamba bassɛnɛ banaang ning baang. 47Atolonɛyɔng kutolo la inngwa annyɔɔng keem, attina attɛyɔng baang anaangyɔngbong kɔlɔɔk kwa ssɔng ɔɔ? Nlɔɔk ka balɔɔt ba batakanɛ baptizim lɛnaang bassɛnɛ banaang ning baang. 48Anaangyɔng bbwak bbwak tɛ̀ttɛ̀ Ssaawɔ annyɔɔng wa ulenɛ ka libat ɔnaangnɛ.”

will be added

X\