1 Ɔzzánga Kuyeeng-Ɔlɔɔmɔlɔɔm kɔmana Jesus kumii ka kɛmat, Ɔnaang-a-kɛsɛɛm a kuyeeng ubummɛ kɛllɛ. 2 Ulenɛ bakang lɛtaa ka lalɔp a bɛtɔm laffa usi bɔfɛɛn lizzi, buwɔɔng busaapmɛ. 3 Ɔzzánga Ɔnaang-a-kɛsɛɛm a kuyeeng uffu ɔlɔɔkmɛ ɔttɛ, “Alenɛ Waan-Ɔlɔɔmɔlɔɔm, adda lɛttaal ’zɔng mung lasikili brɛɛd ee.” 4 Jesus ɔppyɛlɛmɛ kamma ɔttɛ, “Luvva-Ɔlɔɔmɔlɔɔm lɔttɛ, ‘Ɔlɔɔt kwa brɛɛd kɛyɔɔng lissi ka uddunɛ, uddu kwa lutini lɛmmwɔɔl ɔkkpɛlɛ za Ɔlɔɔmɔlɔɔm ɔlɔɔknɛ.’ ” 5 Ɔzzánga Ɔnaang-a-kɛsɛɛm a kuyeeng ɔsam Jesus umii ka tɔkɔlɔ a ssala kɛyyɛɛp, utdelemɛ ka ɛfɛɛn ya ggologgolo ka Ggwoon-Ɔlɔɔmɔlɔɔm, 6 Ɔlɔɔk la ammɛ ɔttɛ, “Alenɛ Waan-Ɔlɔɔmɔlɔɔm, akut attɔ ka lisse ee, kɔttɛ luvva Ɔlɔɔmɔlɔɔm lɔttɛ, ‘Ɔlɔɔmɔlɔɔm vvenɛ ɔdda bayila-bɔtɔɔm ammɛ bakimiwɔ la labɔɔk abbɛ, nkwaaning kikkpɔ annɔ ssɔn gbɔɔ kisi ka lɛttaal lilip.’ ” 7 Jesus ɔppyɛlɛmɛ kamma ɔttɛ, “Luvva Ɔlɔɔmɔlɔɔm lɔbbal lɛlɔɔk lɔttɛ, ‘Tɛ̀ttɛ́ allɛ Uyini, Ɔlɔɔmɔlɔɔm annɔ.’ ” 8 Ɔzzánga Ɔnaang-a-kɛsɛɛm a kuyeeng ɔsam Jesus umii ka libat ekpok ya ggologgolo, ɔyɔɔmɛ ikaan ɔkkpɛlɛ a vveng-odde la iyyɛɛp annyɛ. 9 Ɔlɔɔk la Jesus ɔttɛ, “Vvenɛ nsam bɛfɛɛn mbyɔng mung ɔkkpɛlɛ nnyiwɔ, akunnɛ laddu azɔɔm annyinɛ.” 10 Ɔzzánga Jesus ɔppyɛlɛmɛ kamma ɔttɛ, “Agbata assekenɛ, Satan, luvva Ɔlɔɔmɔlɔɔm lɔttɛ, ‘Azɔɔm annyi Ebinukpaapi, Ɔlɔɔmɔlɔɔm annɔ keem, annyɛ elenɛ ya atelenɛyɛ!’ ” 11 Ɔzzánga Ɔnaang-a-kɛsɛɛm a kuyeeng ɔgbata ussekemɛ. Bayila bɔtɔɔm Ɔlɔɔmɔlɔɔm baffu bayaam Jesus. 12 Jesus uppyeenɛ ɔttɛ bassɛɛnbong John igbakkɔpɔ, ufeele umii Galilee. 13 Ka Nazareth usi lillu, ɔdɔkɔ ufeele umii ullu ka Capernaum kɛtɛkɛtɛ libbwe a Galilee ka ɛkpansi Zebulun la Naphtali. 14 Nkwɔng baang kɔnaangnɛ basan battɛ kɔlɔɔk kwa uppyee-kutolo Ɔlɔɔmɔlɔɔm wa ɔzzanganɛ Isaiah ɔlɔɔknɛ kule ka lɔkkwɔɔn ka ɔlɔɔknɛ ɔttɛ, 15 “Ɛkpansi a Zebulun la ɛkpansi a Naphtali, ka lusso lihu, ka lufoom a Jordan, Galilee wa ikanakana! 16 Annyɔɔng ba allunɛyɔng ka kisul vvenɛ ayɛnyɔng buppwolo bwa lɛbaang. Balɔɔt ba ballunɛ ka ɛkpansi kisul a ntɛm a lubbe, vvenɛ bayɛn buppwolo bwa lɛbaang.” 17 Ka ussinɛ ka ɛkɛtɛ ’yɔng baang Jesus ɔyaam ibwɔɔlɔ bɔtɔɔm bwa Ɔlɔɔmɔlɔɔm ɔtɔɔmmɛnɛ ɔttɛ, “Akkyaayɔng bubbi annyɔɔng afɔngɔyɔng, Itutum la Likke-Ɔlɔɔmɔlɔɔm itii kɛtɛkɛtɛ.” 18 Jesus ɔdɔkɔ baang ka ɔssɛnɛ ka lufoom a libbwe a Galilee, ɔzzánga ɔyɛn etele la etele, balɔɔt baffa, ba balapnɛ kulap isɛɛnabannyi. Simon (wa bakkwɔɔmɛnɛ Peter) la etele ammɛ, Andrew, balenɛ ka kɛkaa isɛɛnabannyi ka liggbɔ ka libbwe. 19 Jesus ɔlɔɔk la abbɛ ɔttɛ, “Akupnɛyɔng, vvenɛ nkopolowɔyɔng tɛ̀ttɛ̀ ale akkwɔɔyɔng balɔɔt.” 20 Eseese bakkyaa liggbo abbɛ bafɔngɔ, bamii bakup Jesus. 21 Ɔbbal ka lusso limii, ɔyɛn etele la etele, balɔɔt baffa, James la John, bwaan a Zebedee. Badɔkɔ ka tɔkɔlɔ akkpaat abbɛ la abassɛ abbɛ Zebedee. Babamabong liggbɔ abbɛ baloko, Jesus ɔkkwɔɔbɛ. 22 Eseese bagbata bakɔngɔ akkpaat abbɛ la abassɛ abbɛ, bamii bakup Jesus. 23 Jesus ɔssɛ ɔkkpɛlɛ Galilee ududa ukopolobɛ ka idda mitin. Ɔyaam Kuttu-budoddo Itutum-Ɔlɔɔmɔlɔɔm. Uttula balɔɔt ɔkkpɛlɛ ba usinɛbɛ lɛppwa, ɔppwabɛ. 24 Kuttu ammɛ kɔwaala ɔkkpɛlɛ lɔkaan a Syria. Ɔzzánga balɔɔt bakɔɔm balɔɔt ba usinɛbɛ lɛppwa bafeemɛ: ba ɔssɔpnɛbɛ bɛssanga bɛssanga, la balɔɔt ba bayanganɛ ipiliza, la balɔɔt ba battɔnɛ lɔbbaak, la balɔɔt ba bannɔknɛ kikkwu. Jesus uttulabɛ ɔkkpɛlɛ. 25 Balɔɔt ggbadam bakupmɛ ba bassinɛ Galilee la Laffɛ Zzɔɔp, la ba bassinɛ Jerusalem, la Judea, la ɛkpansi ya lufoom a Jordan ’gwɔng kang.
