1 Ka ɛkɛtɛ ’yɔng baang, John, Ɔnaang-a-baptizim, uffunɛ, utte kɛyaam ka kasɛkɛ kɛmat a Judea. 2 Ɔlɔɔk ɔttɛ, “Afooloyɔng lafal annyɔɔng, akkyaayɔng bubbi afɔngɔyɔng, Itutum la Likke-Ɔlɔɔmɔlɔɔm itii kɛtɛkɛtɛ.” 3 John ulenɛ ɔlɔɔt wa Isaiah, uppyee-kutolo Ɔlɔɔmɔlɔɔm, ɔlɔɔknɛ utummɛ ɔttɛ, “Ɔlɔɔt ɔlɔk ule akang ning ka ubungunɛ ka kɛmat ɔttɛ, ‘Alɔngɔlɔyɔng ɛtɔk ya Uyini, alokomɛyɔng; anaangyɔngyɛ bbit, alokomɛyɔng ɔssɛ!’ ” 4 Iwɔkɔlɔ a John badɔkɔ battayɛ la issɔp-ɛsɛɛn. Ukwula ɛkkpa-ɛsɛɛn ka kɛsan, uzzi ogelese, uggyeel itɔngɔtɔngɔ. 5 Balɔɔt ba bassinɛ Jerusalem, la ba bassinɛ ka ɛkpansi a Judea la ikaan ɔkkpɛlɛ ya illunɛ ikkpit lɔyɔngɔ a Jordan, baffu ka ɛfɛɛn ammɛ. 6 Bayila kamma bubbi abbɛ, ɔnaangbɛ baptizim ka lɔyɔngɔ a Jordan. 7 John, ɔyɛnnɛ balɔɔt a Pharisees la Sadducees ka baffunɛ ggbadam ka ɛfɛɛn ammɛ battɛ ɔnaangbɛ baptizim, ɔlɔɔk la abbɛ ɔttɛ, “Annyɔɔng bwɔɔn igbazim mbɔng, nnyinɔɔng ɔbwɔɔlɔwɔnɛyɔng ɔttɛ akkwoong mung amma akɔngɔyɔng binyanga Ɔlɔɔmɔlɔɔm pya bile ka biffunɛ? 8 “Anaangyɔng linaang sa ayɔɔnɛyɔng kifoolo lafal annyɔɔng. 9 Tɛ̀ttɛ́ attina attɛ vvenɛ attayɔng ka akkwɛ ka ale alɔɔk attɛyɔng, ‘Abraham ulenɛ uyini kikku ayyɔɔt.’ Nbwɔɔlɔwɔyɔng nttɛ Ɔlɔɔmɔlɔɔm ukkwoong mung ɔsam lattaal ’zɔng mung ɔnaangzɛ lasikili bwɔɔn unnyi Abraham. 10 Ɛbwɔt etii ka kɛfɔk a bɛssɛ. Lɛsan a kɛssɛ duu za lisinɛ lakkpo za doddo lɛwɔm, vvenɛ babbɔkzɛ bazzɔɔk, battɔng bassɛɛn ka lɔkɔɔn. 11 Anaam nnaangwɔyɔng baptizim la bannyi, ning baang ulenɛ kɛyɔɔ kɛttɛ akkyaayɔngbong bubbi afɔngɔyɔng. Ɔzzànga ɔlɔɔt wa ule uffunɛ ukupnɛ anaam, ule ɔnaangwɔyɔng baptizim la Kuyeeng-Ɔlɔɔmɔlɔɔm la lɔkɔɔn. Ammɛ ule ɔttanɛ anaam liggbenge, anaam gɔɔ ba nkkɔnɔ wa nkɔɔmnɛ ikkpa-bukkpa ammɛ. 12 Ɔyanga uggwul a bɛfɛɛn ammɛ wa uggwulnɛ ifɔɔk a bɛfɛɛn uggumu ya doddo uloko ka ukunu, ɔttɔng lɔkɔɔn ɔssɛɛn bippwo bɛkkɔm lɔkɔɔn lusi lɛbɛlɛ lizum.” 13 Ka ɛkɛtɛ ’yɔng baang Jesus ussi ka Galilee umii Jordan, uffu ka ɛfɛɛn a John ɔttɛ ɔnaangmɛ baptizim. 14 Ɔzzánga John ubum ɔttɛ usikilimɛ luppyam. Ɔlɔɔk ɔttɛ, “Anaam nlenɛ ɔlɔɔt wa buffunɛ ka ɛfɛɛn annɔ anaangnɛ baptizim, annɔ appyɛɛnɛ affu ka ɛfɛɛn anaam ɔɔ?” 15 Ɔzzánga Jesus ɔppyɛlɛmɛ kamma ɔttɛ, “Kɔkɔɔm kɔtaa ning baang gedegede mung. Inaangnɛ ning mung, vvenɛ inaang bɛfɛɛn ɔkkpɛlɛ bya Ɔlɔɔmɔlɔɔm ɔggyannɛ.” Ɔzzánga John uyila. 16 Uvvenɛ Jesus baptizim lɛnaang, Jesus ɔtta ka tɔkɔlɔ bannyi, kikku a ssala Ɔlɔɔmɔlɔɔm kiwongolo kinnyimɛ. Ɔzzanga ɔyɛn Kuyeeng-Ɔlɔɔmɔlɔɔm ka kusininɛ tɛ̀ttɛ̀ lekkpelekete kuffu kuttelemɛ. 17 Lɛmmwɔɔl lissi ka libat lɛlɔɔk lɛttɛ, “Uwɔng ulenɛ Waan a luppyam anaam wa ɔwaanɛnɛ kwa ammɛ.”
