MATTHEW 28

1Kɛtɔm-a-Kɛfɛkɛlɛ kilenɛ lɛsak, uffu ɔffɔ lɔfɔm a lɔfɔm a livve luzɔɔm, Mary Magdalene la Mary ɔlɔk, bafeele bamii kikoolo lilli. 2Kitipili kitipili, ɛkpansi ɛnnyɛkɛ, uyilabɔtɔɔm-Ebinukkpaapi ussi ka libat uffu, utut lɛttaal, uloko kang. Kyɛk ɔtaa-ɔtaa ka libat azzɛ. 3Ɔkkpɛlɛ ammɛ ule tɛ̀ttɛ̀ immwalang. Iwɔkɔlɔ ammɛ ilaat tɛ̀ttɛ̀ uwuu. 4Bakat-ɛfɛɛn ɔbbwɔpɔbɛ gaang gaang, baffula, basseke tɛ̀ttɛ̀ babbu. 5Uyilabɔtɔɔm ɔlɔɔk la bwanavva ’bɔng baang ɔttɛ, “Tɛ̀ttɛ́ ɔbbwɔpɔwɔyɔng! Nsan lɔsan nttɛ aleyɔng ka kɛggyan a Jesus wa bawwɔɔlnɛ ka Cross. 6Mung ba ule; Ɔlɔɔmɔlɔɔm ufungalamɛbong tɛ̀ttɛ̀ ammɛ ɔlɔɔknɛ. Affu ayɛnyɔng ka ɛfɛɛn a umininɛ. 7Azzuma amii abwɔɔlɔyɔng balɔɔt a kɔssɛ ammɛ attɛyɔng; ‘Ufungalabong ka lubbe ɔzzànga gedegede mung ule ka ɔkɔɔmnɛ ɛtɔk ɔssɛ umii Galilee. Ɔffɔnɛ bakang, vvenɛ ayɛnmɛyɔng!’ Akke kwa nlewɔnɛyɔng lɛbwɔɔlɔ tɛ.” 8Ɔzzánga bagbata la lazzuma la lazzuma la bbwɔp la laggele, bamma bamii babwɔɔlɔ balɔɔt a kɔssɛ a Jesus. 9Kitipili kitipili Jesus ududabɛ ɔttɛ, “Bɔkaat butaa la annyɔɔng!” Ɔzzánga baffu ka ɛfɛɛn ammɛ bakunmɛ laddu, balɔmmɛ ka bukkpɔ, banaangmɛ latele. 10Jesus ɔlɔɔk la abbɛ ɔttɛ, “Tɛ̀ttɛ́ ɔbbwɔpɔwɔyɔng. Amii abwɔɔlɔyɔng ikpana anaam attɛyɔng; bamii Galilee, vvenɛ bayɛnnɛ bakang.” 11Ka ɛkɛtɛ ya bwanavva ’bɔng baang bagbatanɛ bamii kufoom kwa abbɛ, bakat-ɛfɛɛn ba bakatnɛ lilli bappyɛlɛ isimisimi, bamii tɔkɔlɔ a ssala, babwɔɔlɔ bazzilɛttɔ bassɛɛn-a-Luzɔɔm lilɔɔk ɔkkpɛlɛ sa lilenɛ lɛnaang. 12Bazzilɛttɔ-luzɔɔm baduda la bagɛlɛnya, banaang likup, bannyi isodya ikkpoko ggbadam. 13Battɛ, “Alɔɔk attɛyɔng balɔɔt a kɔssɛ ammɛ baffubong ka kasɛkɛ kɛtɔm, bayipmɛ ka ilenɛ ka bilaa.” 14Ɔzzànga Uzzilɛttɔ-lusse uppyeenɛ ’kwɔng vvenɛ ilɔɔk ibutmɛ luttina. Kɔlɔɔk kɔlɔk kwa kule kɔnaangwɔyɔng, baala kule.” 15Abbɛ bakat-ɛfɛɛn basam ikkpoko ’yɔng baang, bamii banaang tɛ̀ttɛ̀ babwɔɔlɔnɛbɛ battɛ banaang. Balɔɔt a Jews batii ka balɔɔknɛ ning baang gbaak ka mmwɔɔn mung. 16Balɔɔt a kɔssɛ ammɛ ba zzɔɔppavvɔn bamii ka libat ekpok ka Galilee ka ɛfɛɛn a Jesus ulenɛbɛ lɛbwɔɔlɔ ɔttɛ vvenɛ bamii. 17Bayɛnnɛ Jesus bakunmɛ laddu bannyimɛ latele, ɔzzànga balɔk badɔkɔ la ndeeta. 18Jesus ɔttɔm ɔkkɛtɛ ɔlɔɔk la abbɛ ɔttɛ, “Ɔlɔɔmɔlɔɔm unnyinɛbong lakke ɔkkpɛlɛ ka libat la ɛkpansi. 19Amiiyɔng ka balɔɔt ɔkkpɛlɛ la ifɛɛn la ifɛɛn, anaangyɔngbɛ basseke balɔɔt a kɔssɛ anaam; anaangyɔngbɛ baptizim ka lɛkɔɔl a Dedde la Waan la Kuyeeng Ɔlɔɔmɔlɔɔm. 20Akopoloyɔngbɛ, batele bɛfɛɛn ɔkkpɛlɛ bya nbwɔɔlɔwɔnɛyɔng. Akkeyɔng nle nle baang la annyɔɔng tɔttɔt ɛkpansi ekpeke.”

will be added

X\