1 Jesus ule ka kɛgbata ka Ggwoon-Ɔlɔɔmɔlɔɔm, keem balɔɔt a kɔssɛ ammɛ baffu bayɔɔmɛ tɛ̀ttɛ̀ babɔɔknɛ Ggwoon-Ɔlɔɔmɔlɔɔm. 2 Jesus ɔttɛ, “Iii, ayɛnyɔng bɛfɛɛn ’byɔng mung ɔkkpɛlɛ doddo. Ɔzzànga nbwɔɔlɔwɔyɔng nttɛ waan a lɛttaal zzɔn gbɔɔ wa ule usseke ka ggwoon ’gwɔng mung baala ule. Lutini lɛttaal la zzɔn za lilenɛ baang vvenɛ lɛbɔl sukusuku lɛllɔt.” 3 Jesus ule baang ka ɔtaanɛ ka lɛttaal Olives, balɔɔt a kɔssɛ ammɛ baffu babapmɛ ka wɛɛk battɛ, “Abwɔɔlɔyɛlɛ ɛkɛtɛ ya bɛfɛɛn ’byɔng ɔkkpɛlɛ bile bɛnaang. Mung mbɔng bule bunaang buyɔɔyɛlɛ isan ittɛ ɛkɛtɛ kiffu annɔ la lakpeke a vveengodde ɛffɔbong.” 4 Jesus ɔppyɛlɛbɛ kamma ɔttɛ, “Akatyɔng, tɛ̀ttɛ́ balɔɔt balɔk banaangwɔyɔng agbigbiniyɔng. 5 Balɔɔt ggbadam vvenɛ baffu ka lɛkɔɔl anaam, battɛ ‘Anaam nlenɛ Ɔlɔɔt wa Ɔlɔɔmɔlɔɔm ɔsanganɛ’ badɛm balɔɔt ggbadam bagbigbini. 6 Vvenɛ appyeeyɔng lɔsap a lɛkɔɔng kɛtɛkɛtɛ mung, kuttu azzɛ fulu-fulu. Ɔzzànga gɔpɔlɔyɔng: Tɛ̀ttɛ́ kɔbbwɔpɔwɔyɔng. Bɛssanga a lilɔɔk tɛ̀ttɛ̀ abbyɛ baang vvenɛ bɛnaang, ɔzzànga ’kwɔng baang lissi kulenɛ lakpeke a vveeng. 7 Lɔkaan ngwakang vvenɛ ballu gwakang; ellu yakang vvenɛ ballu la yakang. Buwɔɔng vvenɛ buttɔ gaang gaang. Ɛkpansi vvenɛ ɛnnyɛkɛ ebutu la ɛfɛɛn la ɛfɛɛn. 8 Bɛfɛɛn ’byɔng ɔkkpɛlɛ bile bɛtaa tɛ̀ttɛ̀ bɔssɔp ikeeng bwa wanavva uppyeenɛ ka kɛppwɔlɔ imala. 9 “Balɔɔt vvenɛ bakaawɔyɔng, basam bannyi balɔɔt ba bale bayapwɔyɔng akama, bawwɔɔlwɔyɔng. Vvenɛ atunyɔng ɔssɛbibit ’wɔng ɔkkpɛlɛ ka lɛttɔ anaam. 10 Balɔɔt ggbadam vvenɛ bakkyaa kiyila abbɛ bafɔngɔ ka ɛkɛtɛ ’yɔng baang. Vvenɛ bazzi issɛ abbabbɛ, batunbɛ abbɛ-abbɛ kɛyɔɔng. 11 Bakkaalalaak ba battɛnɛ abbɛ bappyee-kutolo Ɔlɔɔmɔlɔɔm vvenɛ batuma ggbadam, banaang balɔɔt ppwap bagbigbini. 12 Uwɔng ulenɛ tɛ̀ttɛ̀ bubbi bule buwaala, kɛsaap a balɔɔt ggbadam kɛkkpɛɛm. 13 Ɔzzànga ɔlɔɔt wa ɔyanganɛ kɛsaap ’sɔng baang ɔffɔ ka lakpeke vvenɛ ɔtaa ka kuddu. 14 Ɔzzánga Kuttu-budoddo Itutum-Ɔlɔɔmɔlɔɔm vvenɛ kule la kikopolo ka vveengodde ka kulenɛ itɛɛsɛ ɔssɛbibit; tɛ́ttɛ́ bɔk lakpeke laffu. 15 “Vvenɛ ayɛnyɔng ‘Lakkpi-za-labbɔlnɛ’, za uppyee-kutolo Ɔlɔɔmɔlɔɔm wa ɔzzanganɛ Daniel ɔlɔɔknɛ ka labeenɛ ka labun-Ɔlɔɔmɔlɔɔm.” (Ɔkkwɔɔkwɔɔ, akke tɛ!) 16 “Ka ɛkɛtɛ ’yɔng baang balɔɔt ba balenɛ ka Judea vvenɛ bamma babbulu ikpok. 17 Ɔlɔɔt wa ulenɛ ka libat a ggwoon ammɛ, baala usini umii ɔsam bɛfɛɛn ka tɔkɔlɔ a ggwoon. 18 Ɔlɔɔt duu wa ulenɛ ka bɔtɔɔm ammɛ, isimisimi ba ɔbɛlɛ lɛppyɛlɛ umii ɔsan iwɔkɔlɔ ammɛ. 19 Bwanavva-zzɛɛm la ibakka bwɔɔn ba sɛkɛsɛkɛ vvenɛ bayɛn akama. 20 Azɔɔm akkwɔɔyɔng Ɔlɔɔmɔlɔɔm nkwaaning asiyɔng lɛtta ammayɔng akɔngɔyɔng ssala ka ɛkɛtɛ a lukook ɔlɔk ka Kɛtɔm-a-Kɛfɛkɛlɛ. 21 Kɔlɔɔk kwa ɛkɛtɛ ’yɔngbaang vvenɛ kɔbbɔl gaang gaang kɔtta lilɔɔk za lissinɛ linaang ka ussinɛ ka lutte ɛkpansi uffu udum ka kɛtɔm-a-mmwɔɔn; kɔlɔɔk kɔlɔk baala kɔnaang tɛ̀ttɛ̀ akkwɛ baang. 22 Ɔzzanga Ɔlɔɔmɔlɔɔm ɔggba bɛtɔm ’byɔng baang lɛzza: usinɛ ning baang lɛnaang, ɔlɔɔt wa ule uddu ba ule. Ka lɛttɔ balɔɔt ba Ɔlɔɔmɔlɔɔm ɔsanganɛ nkkpa kɔnaang, Ɔlɔɔmɔlɔɔm vvenɛ ɔzza bɛtɔm. 23 “Ka ɛkɛtɛ yɔng bang ɔlɔɔt ɔlɔɔkwɔnɛyɔng ɔttɛ, ‘Ppyɛɛk Ɔlɔɔt wa Ɔlɔɔmɔlɔɔm ɔsanganɛ’ ɔlɔk ɔttɛ, ‘Ppyɛɛkmɛ kang’, tɛ̀ttɛ́ ayilamɛyɔngkwɛ. 24 Bakkala-lalaak ba battɛnɛ abbɛ balɔɔt ba Ɔlɔɔmɔlɔɔm ɔsanganɛ ɔlɔk abbɛ bappyee-kutolo Ɔlɔɔmɔlɔɔm; bakkwoongnɛ, vvenɛ banaang bɛfɛɛn ggbadam bya bɛkɛɛlɛnɛ balɔɔt nkwaaning balɔɔt ba Ɔlɔɔmɔlɔɔm ɔsanganɛ bayila kwa abbɛ. 25 Gɔpɔlɔyɔng! Nkka wɔyɔngbong lɛbwɔɔlɔ tɛ́ttɛ́ ɛkɛtɛ ɛffɔ tɛ. 26 “Ɔlɔk, ulenɛ ka balɔɔt bale babwɔɔlɔwɔyɔng battɛ, ‘Ppyɛɛk, utii ka kasɛkɛ atingating’ tɛ̀ttɛ́ amiiyɔng baang, ɔlɔk balɔɔk battɛ ‘Pyɛɛk ule mung ka uddumunɛ’ tɛ̀ttɛ́ ayilayɔngbɛkwɛ. 27 Waan-Ɔssɛbibbit-Ɔkkpɛlɛ ule uffu tɛ̀ttɛ̀ immwalang ya ifakanɛ libat ka ussinɛ ka lusso gwa livve-lɛttanɛ umii ɔffɔ ka lusso gwa livve-luwee lipitinɛ. 28 “Lutini ɛfɛɛn ɔkkpɛlɛ ya ubbu-ɛsɛɛn ubbenɛ umini, idɛlɛ iggba lattɔ baang.” 29 “Lilɔɔk sa bɛtɔm byɔng baang lisaalnɛ ɛsaal ɛsaal, livve-luwee vvenɛ lizum, ettuma vvenɛ ba ɛbɛlɛ lɛllaat, bwaanittuma vvenɛ baffaat ka libat baffu battɔ ka lisse. Lakke za libat vvenɛ lannyɛkɛ ɛfɛɛn ɛfɛɛn ɔkkpɛlɛ. 30 Eleme ya ɛnaangnɛ isan ittɛ Waan-Ɔssɛbibbit-Ɔkkpɛlɛ ule ka uffunɛ vvenɛ ɛtta ka libat. Ifɔɔn ɔkkpɛlɛ ya ilenɛ ka ɛkpansi vvenɛ ikkwa. Vvenɛ bayɛn Waan-Ɔssɛbibbit-Ɔkkpɛlɛ ka ule ussi ka libat la ikkpálá lukpaaggbeede uffu la lakke la buppwolo bwa lɛbaang. 31 Iffi ya lɛbaang vvenɛ iwɔl. Vvenɛ ɔtɔɔm bayilabɔtɔɔm ammɛ ba bassinɛ ka lagook ɛkpansi azzɛ lanna, bamii bakkwɔɔ balɔɔt ba ulenɛbɛ lɛsanga ka ussinɛ ka lɛttɔ ɛkpansi za zzɔn umii ɔffɔ ka za zzɔn baffu baggba ɛfɛɛn kkwɔn. 32 “Afɔngɔ lɛsan a kɛssɛ likopolowɔyɔng kukele. Bɛbɔɔk a kɛssɛ bɛppwɔtnɛ, livva libil, kittenɛ kɛkkwɔlɔ a livva, asanbong attɛ usɔngɔ ɔkkɛtɛbong. 33 Kule ning baang. Ɛkɛtɛ ayɛnnɛ bɛfɛɛn mbyɔng mung ɔkkpɛlɛ, asan attɛ ɛkɛtɛ ɛffɔbong Uyini utii kɛtɛkɛtɛ. 34 Akkeyɔng tɛ! Bɛfɛɛn byɔng ɔkkpɛlɛ vvenɛ bɛnaang bong tɛ́ttɛ́ balɔɔt ba balenɛ ikokolo gedegede mung babbe ɔkkpɛlɛ. 35 Libat la ɛkpansi vvenɛ bɛsak bimii, ɔzzànga lɛmmwɔɔl anaam baala lɛsak. 36 “Nkkpa kɔnaang, ɔlɔɔt wa ɔsannɛ livve ’zɔng baang la ɛkɛtɛ yɔng baang ba ule. Gɔɔ bayilabɔtɔɔm Ɔlɔɔmɔlɔɔm ka libat, gɔɔ Awaan: Abassɛ kɛyɔɔng ɔsannɛ. 37 Kiffu a Waan-Ɔssɛbibbit-Ɔkkpɛlɛ kile kɛtaa tɛ̀ttɛ̀ kɔlɔɔk kwa kɔdɔkɔnɛ kɔnaang ka ɛkɛtɛ a Noah. 38 Kule kɔtaa tɛ̀ttɛ̀ bɛtɔm mbyɔng bakang bya isimi ka ɛlɔlɔ ɛtakanɛ liffu; balɔɔt bazzinɛ lizzi, bavva kɛvva, bwaanbwalam batɔk la bwanavva tɔttɔt uffu ɔffɔ ka kɛtɔm sa Noah ɔmalnɛ ka akkpaat. 39 Basi lɛsan kwa kɔnaangnɛ ɔddɔkɔddɔkɔ ɛlɔlɔ effu ɛmɛɛlbɛ. Kule kɔtaa ning baang ka kɛtɔm sa Waan-Ɔssɛbibbit-Ɔkkpɛlɛ ule uffu. 40 Ka ɛkɛtɛ ’yɔng baang, balɔɔt baffa balenɛ ka kɛnaang ka bɔtɔɔm, vvenɛ basam vvɔn bagbata, usseke vvɔn ɔtaa baang kɛyɔɔng. 41 Bwanavva baffa bale bale ka kikook a bɛfɛɛn. Vvenɛ basam vvɔn bagbata, usseke vvɔn. 42 Akatwɔyɔng kɛyɔɔng ka ale asiyɔng lɛsan kɛtɔm sa Uyini annyɔɔng ule uffu. 43 Akkeyɔng tɛ! Bulenɛ ka uyini a ssala ɔsannɛ ɛkɛtɛ ya bassip bale baffu, nzang ɔtaa kkwetkkwet, baala uyila bassip babwɔɔtmɛ ggwoon bamal ka tɔkɔlɔ. 44 Kwakkwɛ baang annyɔɔng ɔgbaa ale abama akatyɔng ɛkɛtɛ ɔkkpɛlɛ. Waan-Ɔssɛbibbit-Ɔkkpɛlɛ ule uffu ka ɛkɛtɛ ya asinɛyɔng zzeen litele. 45 “Uwɔwɔng ulenɛ ɔsan-a-kɔlɔɔk a bɔɔyi ɔlɔɔt wa utelenɛ abbassɛ? Ammɛ ulenɛ wa abassɛ unnyimɛnɛ kizzi-lɛttɔ ibɔɔyi, ɔttɛ unnyibɛ kazzi ka ɛkɛtɛ ya bbwak. 46 Bɔɔyi ’wɔng baang vvenɛ uggele gaang gaang ka abassɛ ule ɔppyɛlɛ ɔyenmɛ ka ɔnaangnɛ kwa ɔttɛnɛ ɔnaang. 47 Nbwɔɔlɔwɔyɔng ka lɔkkwɔɔn nttɛ abassɛ ammɛ vvenɛ ɔsam bɛfɛɛn ɔkkpɛlɛ bya ɔyanganɛ unnyimɛ kɛppyɛɛk. 48 Ɔzzànga ulenɛ bɔɔyi wa ɔbbɔlnɛ eleme vvenɛ uttina kɛyɔɔng ɔttɛ, ‘Dedde anaam baala ɔkka lɛppyɛlɛ’. 49 Vvenɛ ubee kitup a babbɛ. Uzzi kazzi, ɔvva batak la bavva-batak. 50 Abassɛ bɔɔyi ’wɔng baang ule ɔppyɛlɛ ka kɛtɔm sa usinɛ zzeen litele, usi littina utum. 51 Abassɛ vvenɛ ɔmmwangmɛ ikaal ka kkwɔɔt zɛkɛzɛkɛzɛkɛ ɔnaangmɛ tɛ̀ttɛ̀ banaangnɛ babbɔl a bɛnaang. Ka ɛkɛtɛ ’yɔng baang vvenɛ ɔkkwa, uzzi lasaal.
