MATTHEW 2

1Jesus badɔkɔ bamaatmɛ ka lɛffɛ za lɛzzanganɛ Bethlehem ka ɛkpansi a Judea. Ɛkɛtɛ ’yɔng baang Herod ɔdɔkɔnɛ ubeet. Usi lɛmmɛ, balɔɔt ba bakkoopnɛ bwaanittuma bassi ka lusso gwa livve-luwee lɔfɔm baffu Jerusalem. Babap battɛ 2“Waan wa ɔzzanganɛ ubeet-a-Jews bamaatmɛ ka ’yang ee? Iyɛnbong waanettuma ammɛ ka ussinɛ ka lusso gwa livve-luwee lɔfɔm uffu. Mung iffubong kɛzɔɔm innyimɛ.” 3Ubeet Herod uppyeenɛ ning baang, luppyam lɔbbɔlmɛ. Gɔɔ lɔbbɔl lutini ɔlɔɔt ɔkkpɛlɛ ka Jerusalem. 4Ɔkkwɔɔ bazzilɛttɔ bassɛɛn-a-luzɔɔm la bakopolo-Lafɔɔ uloko ɛfɛɛn kkwɔn ɔbapbɛ ɔttɛ, “Mung Ɔlɔɔt wa Ɔlɔɔmɔlɔɔm ɔsanganɛ bamaatmɛ ka ’yang ee?” 5Bappyɛlɛmɛ kamma battɛ, “Bamaatmɛ ka lɛffɛ za lɛzzanganɛ Bethlehem ka ɛkpansi Judea. Nkwɔng mung kulenɛ kwa uppyee-kutolo Ɔlɔɔmɔlɔɔm ɔkkpɔknɛ ɔttɛ, 6‘Annyɔɔng balɔɔt a Bethlehem ka ɛkpansi a Judah, annyɔɔng lissi attanɛyɔng lissup ka lɔkaan a Judah; Uzzilɛttɔ ule ussi ka annyɔɔng uffu, Ammɛ ule ɔat Israel, balɔɔt anaam’.” 7Ɔzzanga Herod ɔkkwɔɔ balɔɔt ’bɔng baang ba, bassinɛ ka lusso livve-luwee lɔfɔm, likup uloko ka wɛɛk, ɔbapbɛ ɛkɛtɛ ya bbwak ya waanettuma utumanɛ. 8Ɔzzánga ɔtɔɔmbɛ bamii Bethlehem la lɔttama ’gwɔng ɔttɛ, “Ammiiyɔng, anaangyɔng bɛtɛbɛtɛ, asanyɔng ka ɛfɛɛn a waantiti ulenɛ. Alemɛnɛyɔng lɛyɛn anaangnɛyɔng anaam nsan, nkwaaning nssɛ nmii nzɔɔm nnyimɛ.” 9Bafeele la lɔttama ’gwɔng baffɔ ka ɛtɔk waanettuma utuma. Ammɛ baang vvɔn wa bayɛnmɛnɛ ka lusso gwa livve-luwee lɔfɔm. Ɔzzanga ɔkɔɔm ɛtɔk uffu ɔkɔɔng baang ubee ka ɛfɛɛn waantiti ɔdɔkɔnɛ. 10Baggele gaang gaang, ka bayɛnnɛ waanettuma. 11Bamii ka tɔkɔlɔ a ggwoon bayɛn waantiti la abakka ammɛ, Mary. Bakun laddu bazɔɔm bannyimɛ. Ɔzzánga bawongolo issɔ abbɛ banaangmɛ lɛsɔɔk la gold, la frankincense (bɔfɛɛn bwa bafɔɔpnɛ buyyɛɛp kizoom ka ggwoon a luzɔɔm), la myrrh (wa appwɔɔngnɛ asi lɛddɔlɔ). 12Ɔlɔɔmɔlɔɔm ɔttamabɛ ka lɔlakala ɔttɛ, tɛ̀ttɛ́ bappyɛlɛ isimi-isimi bamii ka ɛfɛɛn a Herod. Ɔzzánga bappyɛɛ bassɛ ɛtɔk ɛlɔk bafula. 13Balenɛ lɛgbata, uyilabɔtɔɔm Ɔlɔɔmɔlɔɔm utuma ka ɛfɛɛn a Joseph ka lɔlakala, ɔbwɔɔlɔmɛ ɔttɛ, “Afeele asam waantiti la abakka agbata amii Egypt. Ataa bakang tɔttɔt ɔffɔ ka ɛkɛtɛ ya nle nbwɔɔlɔwɔ nttɛ appyɛlɛ. Herod ule ka kɛggyan ɛtɔk ya kɛwwɔɔl a waantiti ’wɔng baang.” 14Ɔzzanga Joseph ufeele ɔsam waantiti la abakka, bagbata ka kasɛkɛ kɛtɔm bamii Egypt. 15Ɔtaa bakang tɔttɔt Herod ubbe. Nkwɔng kɔdɔkɔ kɔnaang nkwaaning kɔlɔɔk kwa Ebinukkpaapi ɛtɔɔmnɛ uppyee-kutolo annyɛ uffu ɔyaam, kɔnaang ka lɔkkwɔɔn tɛ̀ttɜ ɔlɔɔknɛ ɔttɛ, “Nkkwɔɔ Waan anaam ka Egypt.” 16Herod ɔsannɛ ɔttɛ bakoolo-lukoolo ’bɔng baang ba bassinɛ ka lusso gwa livve-luwee lɔfɔm, banaangmɛbong lagban, kutunmɛ gaang gaang. Ɔzzánga ɔlɔɔk ɔttɛ bawwɔɔl bwaanabwalam ɔkkpɛlɛ ka Bethlehem, la billu bya ballunɛ bakkpit Bethlehem, ka ussinɛ ka bwɔɔn ba likkpa liffa ɔppyɛlɛ kuttɔɔk. Ɔnaang ning baang ukup kwa bakoolo-lukoolo babwɔɔlɔmɛnɛ batum ɛkɛtɛ ya waanettuma utumanɛ. 17Nkwɔng mung kɔnaangnɛ kɔlɔɔk kwa uppyee-kutolo Ɔlɔɔmɔlɔɔm wa ɔzzanganɛ Jeremiah ɔlɔɔknɛ kɔnaang ka lɔkkwɔɔn tɛ̀ttɛ̀ ɔlɔɔknɛ ɔttɛ, 18“Bappyee kibungu ka Ramah, Kibungu akama la kullu, Rachel ɔkkwanɛ bwaan ammɛ, Ɔkkwa usimɛ lɛbɛlɛ lɛkkyaa, Ka bwaan ammɛ ɔkkpɛlɛ balenɛ libbe.” 19Herod ulenɛ libbe, uyilabɔtɔɔm Ebinukkpappi utuma ka ɛfɛɛn a Joseph ka lɔlakala ka Egypt ɔttɛ, 20“Afeele asam waantiti la abakka appyɛlɛ isimi-isimi amii ɛkpansi a Israel, ka balɔɔt ba babumnɛ battɛ bawwɔɔlmɛ balenɛ libbe.” 21Ɔzzánga Joseph ufeele ɔsam waantiti la abakka, ɔppyɛlɛ isimi-isimi umii ka ɛkpansi a Israel. 22Uppyeenɛ ɔttɛ Archelaus ɔtɔkbong lɛttɔ kibeet abassɛ ka Judea, Joseph ɔbbwɔpɔmɛ killu baang. Ɔyanga lɔttama ɔgbaa ka lɔlakala ɔzzànga ufeele umii ka ɛkpansi a Galilee. 23Ɔnaang ssala ka lɛffɛ za bakkwɔɔnɛzɛ Nazareth. Nkwɔng baang kɔnaangnɛ kɔlɔɔk kwa bappyee-kutolo Ɔlɔɔmɔlɔɔm balɔɔknɛ kule ka lɔkkwɔɔn ka balɔɔknɛ battɛ, “Vvenɛ bakkwɔɔmɛ wa Nazareth.”

will be added

X\