MATTHEW 19

1Jesus ulenɛ bɛfɛɛn byɔng livve lɛlɔɔk, ɔgbata ka ɛkpansi a Galilee ɔssɛ ka lufoom a lɔyɔngɔ a Jordan gwa ggwɔn umii Judea. 2Bɛkaan a balɔɔt ggbadam bikupmɛ, uttulabɛ bakang. 3Balɔɔt a Pharisees bakɔɔm ibap, baffu ka ɛfɛɛn a Jesus nkwaaning bassɛɛnmɛ ka kɔlɔɔk. Babapmɛ battɛ, “Mung Lafɔɔ ayyɔɔt layila mung ɔlɔɔt ɔggba wanavva ammɛ ka ɔnaangnɛ kɔlɔɔk kwa kusimɛnɛ lɛsaap ɔɔ?” 4Jesus ɔppyɛlɛbɛ kamma ɔttɛ, “Ba ataka akkwɔɔyɔng luvva Ɔlɔɔmɔlɔɔm ɔɔ? Ka ussinɛ ka lutte, Ɔlɔɔmɔlɔɔm ɔnaangbɛ wanavva la waanwalam. 5Ɔlɔɔk ɔttɛ, ‘Waanwalam vvenɛ ɔgbata ɔkɔngɔ abassɛ la abakka, umii ullu ɛfɛɛn kkwɔn la wanavva ammɛ. Ɔkkpɛlɛ abbɛ baffa basseke ɔlɔɔt vvɔn.’ 6Balɔɔt baffa ba babɛlɛ lile, basseke ɔlɔɔt vvɔn. Ɔlɔɔt tɛ̀ttɛ́ ubbum bwa Ɔlɔɔmɔlɔɔm ulenɛ lɛsam utoolo ɛfɛɛn kkwɔn.” 7Balɔɔt a Pharisees babapmɛ battɛ, “Bɔng tɛ́ttɛ́ Moses unnyi lafɔɔ za kɛttɛ waanwalam ule ka ɔggbanɛ wanavva ammɛ, ɔkkpɔk luvva-luteele unnyi avva tɛ́ttɛ́ ɔggbamɛ?” 8Jesus ɔppyɛlɛbɛ kamma ɔttɛ, “Moses unnyiwɔyɔng lakke za kɛggba wanavva ka alenɛyɔng balɔɔt ba akoolonɛyɔng kikopolo kɔlɔɔk. Ɔzzànga ning baang kusi lile ka ussinɛ ka lutte a vveeng. 9Nbwɔɔlɔwɔyɔng nttɛ, ɔlɔɔt duu wa ɔggbanɛ wanavva ammɛ ka ɔtakanɛ la ɔlɔɔt ɔlɔk limini, ɔtɔknɛ wanavva ɔlɔk, ɔlɔɔt ’wɔng baang ɔnaangbong bubbi.” 10Balɔɔt a kɔssɛ ammɛ balɔɔk la ammɛ battɛ, “Killu a wanavva la waanwalam kilenɛ ning kɔtta lɛyyɛɛp kɛtaa buyya.” 11Jesus ɔppyɛlɛbɛ kamma ɔttɛ, “Lukopolo ’gwɔng mung gwa ɔlɔɔt ɔkkpɛlɛ lissi, lule gwa balɔɔt ba Ɔlɔɔmɔlɔɔm ulenɛbɛ gwɛ linnyi. 12Itɔk ile buu buu ya balɔɔt basinɛ bwanavva lɛtɔk. Balɔɔt balɔk ɔlɔɔmbɛ ning baang; balɔk babbɛ balɔɔt basanganɛbɛ idakɔp, balɔk bafim kɛtɔk a wanavva kwa Itutum-Ɔlɔɔmɔlɔɔm. Afɔngɔyɔng ɔlɔɔt wa ukkwoongnɛ ɔtɔk lukopolo ’gwɔng.” 13Balɔɔt balɔk bakɔɔm bwɔɔntiti bafee Jesus, battɛ utelebɛ labɔɔk ammɛ, ɔssɛɛn luzɔɔm unnyibɛ, ɔzzánga balɔɔt a kɔssɛ ammɛ baggba balɔɔt ’bɔng baang. 14Jesus ɔttɛ, “Afɔngɔyɔng bwɔɔntiti baffu ka ɛfɛɛn anaam, tɛ̀ttɛ́ atunuyɔngbɛ. Itutum-Ɔlɔɔmɔlɔɔm ile ya kɛssanga balɔɔt tɛ̀ttɛ̀ ’sɔng mung.” 15Jesus utelebɛ labɔɔk, ɔgbata. 16Ɛkɛtɛ ɛdɔkɔ baang ya ɔlɔɔt uffunɛ ka Jesus ɔbapmɛ ɔttɛ, “Ukopolo-lukopolo, mung nle nnaang bɔka budoddo tɛ́tt’t vvenɛ ntɔk kuddu kwa kɛfal a kɛfal?” 17Jesus ɔppyɛlɛmɛ kamma ɔttɛ, “Bɔng tɛ́ttɛ́ abapnɛ lɔbap atum kɔlɔɔk kwa kɔyyɛɛpnɛ? Ule Ɔlɔɔt vvɔn kɛyɔɔng ka ɔyyɛɛpnɛ. Aloko lafɔɔ, aggyannɛ attɛ amal ka kuddu.” 18Ɔlɔɔt ’wɔng baang ɔbapmɛ ɔttɛ, “Lafɔɔ ’zɔzɔng?” Jesus Ɔppyɛlɛmɛ kamma ɔttɛ, “Tɛ̀ttɛ́ awwɔɔl ɔlɔɔt; tɛ̀ttɛ́ akup wanavva ɔlɔɔt; Tɛ̀ttɛ́ ayip; Tɛ̀ttɛ́ akkala lɛlaak. 19Atele ssakawɔ la ssaawɔ; Balɔɔt basaapwɔ tɛ̀ttɛ̀ asaapwɔnɛ kɛyɔɔng.” 20Okolobya ɔlɔɔt ’wɔng baang ɔppyɛlɛmɛ kamma ɔttɛ, “Nlokobong lafɔɔ ’zɔng baang ɔkkpɛlɛ, mung nbbal bɔka abbwɛ lɛnaang?” 21Jesus ɔttɛ, “Aggyannɛ attɛ anaang affata, amii ataan bɛfɛɛn bya ayanganɛ ɔkkpɛlɛ, asam ikkpoko annyi balɔɔt ba ɔbbɔlnɛbɛ. Vvenɛ ayanga kibeet ka libat. Avvenɛ ning baang lɛnaang, affu akupnɛ.” 22Okolobya ɔlɔɔt ’wɔng baang uppyeenɛ ning baang ɔgbata la kɛbbɔl a livve ka ulenɛ ɔlɔɔt iyyɛɛp. 23Ɔzzánga Jesus ɔlɔɔk la balɔɔt a kɔssɛ ammɛ ɔttɛ, “Nbwɔɔlɔwɔyɔng, kukoolo lukoolo kɔsak tɛ́ttɛ́ uggboggbo ɔlɔɔt ufula ka Itutum-Ɔlɔɔmɔlɔɔm. 24Nbbalwɔyɔng lɛbwɔɔlɔ nttɛ vvenɛ kukoolo uggboggbo ɔlɔɔt kifula ka Itutum-Ɔlɔɔmɔlɔɔm kɔtta ɔgɔdɔ kɛmal ka lɛmma-ɔnnya.” 25Balɔɔt a kɔssɛ ammɛ bappyeenɛ ning baang, kɔkɛɛlɛbɛ gaang gaang battɛ, “Nnyinɛ ule ukkwoong ɔsɛɛm ka ɛkɛtɛ yɔng baang?” 26Jesus uyeek ɔppyɛɛkbɛ zzip ka isso ɔttɛ, “Nkwɔng mung kukoolo balɔɔt lukoolo, ɔzzànga ka labɔɔk Ɔlɔɔmɔlɔɔm kɔlɔɔk ɔkkpɛlɛ kule kkpɛkɛlɛm.” 27Peter ufeele ɔlɔɔk ɔttɛ, “Ppyɛɛk igbatabong bɛfɛɛn ayyɔɔt ɔkkpɛlɛ ikɔngɔ, iffu ikupwɔ, mung ile ibbal ’bɔng lɛyanga?” 28Jesus ɔppyɛlɛbɛ kamma ɔttɛ, “Ppyɛɛk nbwɔɔlɔwɔyɔng, ɛkɛtɛ ya Waan-Ɔssɛbibbit-Ɔkkpɛlɛ ule ɔtaa ka ugbaal-a-kibeet ammɛ ka ufaa kɛkkpa, annyɔɔng balɔɔt ’bɔng ba zzɔɔppabaffa mung ba akupnɛnɛyɔng anaam, vvenɛ assɛ ataayɔng ka igbaal-a-kibeet akaalyɔng kɛkaal ifɔɔn a Israel ya zzɔɔppiffa. 29Ɔlɔɔt la vvɔn wa ɔgbatanɛ ssoon ammɛ ɔkɔngɔ, ɔlɔk etele ammɛ, ɔlɔk abassɛ, ɔlɔk abakka, ɔlɔk bwɔɔntiti ɔlɔk bɔtɔɔm ammɛ ka lɛttɔ anaam, vvenɛ ɔyanga bɛfɛɛn ’byɔng baang bikkpit lalɔp kubbwɔɔk ɔgbaa. Vvenɛ ɔbbal kuddu kwa kɛfal a kɛfal lɛyanga ɔgbaa. 30Balɔɔt ggbadam ba bale bakɔɔm ɛtɔk ka gedegede mung, vvenɛ basseke isimi. Ba bassekenɛ isimi ka gedegede mung, vvenɛ bakɔɔm ɛtɔk.”

will be added

X\