1 Bɛtɔm bwɔlaaning bɛsaknɛ, Jesus ɔsam Peter la James la John, etele a James, bamii ka libat a lɛttaal za ggologgolo bataa bakang kɛyɔɔng. 2 Bale baang ka bappyɛɛknɛ, Jesus ufoolo kɛssanga kɛlɔk: Lusso luppwolomɛ tɛ̀ttɛ̀ livve-luwee, iwɔkɔlɔ ammɛ ilaat inyanya. 3 Balɔɔt a kɔssɛ ammɛ ba bakkyaat ’bɔng baang bayɛn Moses la Elijah ka kutolo la Jesus. 4 Ɔzzánga Peter ufeele ubee-ubee ɔlɔɔk la Jesus ɔttɛ, “Uyini, kɔyyɛɛp gaang ka ilenɛ mung; kɔsaapwɔnɛ, vvenɛ nnaang idda ikkyaat, vvɔn wa annɔ, vvɔn wa Moses, vvɔn wa Elijah.” 5 Utii baang ka kɛlɔɔk, ikkpálá ya illaatnɛ inyanya iffu ivvoongbɛ kuyeeng, lɛmmwɔɔl lɛtta ka tɔkɔlɔ ikkpálá ’yɔng lɛttɛ, “Uwɔng ulenɛ Waan a luppyam anaam wa ɔsaapnɛnɛ gaang; agɔpɔlɔmɛyɔng.” 6 Balɔɔt a kɔssɛ ammɛ, bappyeenɛ lɛmmwɔɔl ’zɔng baang, ɔbbwɔpɔbɛ gaang gaang, bakun laddu balli isso ka lisse. 7 Jesus uffu ka ɛfɛɛn abbɛ usingibɛ ɔttɛ, “Afeeleyɔng, tɛ̀ttɛ́ ɔbbwɔpɔwɔyɔng.” 8 Ɔzzánga bayeek bappyɛɛk ka libat; ɔlɔɔt ɔlɔk basi lɛbɛlɛ lɛyɛn ɔgbaa la Jesus. 9 Ka balenɛ baang ka kisini lɛttaal, Jesus ɔlɔɔk la abbɛ ɔttɛ, “Tɛ̀ttɛ́ abwɔɔlɔyɔng ɔlɔɔt ɔlɔk kɔlɔɔk kɔlɔk atumyɔng biyɛnɛ pya ayɛnnɛyɔng tɔttɔt Waan-Ɔssɛbibbit-Ɔkkpɛlɛ ufungala ka lubbe tɛ.” 10 Balɔɔt a kɔssɛ ammɛ babapmɛ battɛ, “Bɔng tɛ́ttɛ́ bakopolo-Lafɔɔ balɔɔk battɛ Elijah ule utte liffu?” 11 Jesus ɔppyɛlɛbɛ kamma ɔttɛ, “Elijah uttenɛ liffu ka lɔkkwɔɔn, ɔbama bɛfɛɛn ɔkkpɛlɛ uloko. 12 Ɔzzànga nbwɔɔlɔwɔyɔng nttɛ, Elijah ɔggba liffu ɔzzànga balɔɔt mɛ ba bakɔɔlɔ. Bakɔɔmmɛ gbɔɔ tɛ̀ttɛ̀ kɔsaapnɛbɛ. Bale bassɛ bakɔɔm Waan-Ɔssɛbibbit-Ɔkkpɛlɛ ning baang tɛ̀ttɛ̀ kɔsaapnɛbɛ.” 13 Balɔɔt a Kɔssɛ ammɛ basan battɛ ɔlɔɔk utum John, Ɔnaang-a-baptizim. 14 Bappyɛlɛnɛ bamii ka kibbi ’sɔng baang, ɔlɔɔt vvɔn uffu ukun Jesus laddu. 15 Ɔttɛ, “Uyini, waan anaam ubbewɔ lɛttɔ! Ɔyanga lɔbbaak, ɔssɔpmɛ gaang gaang, ɔtaa ɔttɔ ka lɔkɔɔn, ɛkɛtɛ elɔk ɔttɔ ka bannyi. 16 Nkɔɔmmɛbong nffu ka ɛfɛɛn a balɔɔt a kɔssɛ annɔ, ɔzzanga basi likkwoong battulamɛ.” 17 Jesus ɔppyɛlɛmɛ kamma ɔttɛ, “Bɔng annyɔɔng balɔɔt ’bɔng asɛlɛnɛyɔng kiyila, anaangyɔng ubbu kɔlɔɔk ning! Nle ntaa ɔmmɛ ɔffɔ nang la annyɔɔng? Nle nlɔɔk nang la annyɔɔng tɛ́ttɛ́ appyeeyɔng? Akɔɔm waan ’wɔng baang affu mung.” 18 Jesus ɔlɔɔk la ipiliza, itta, isseke waanawalam ’wɔng baang, ɔppwamɛ lɔbbaak eseese. 19 Balɔɔt a kɔssɛ a Jesus baffu babapmɛ ka wɛɛk battɛ, “Mung ’bɔng tɛ́ttɛ́ ayyɔɔt isi lɔbbaak likkwoong ittula ee?” 20 Jesus ɔppyɛlɛbɛ kamma ɔttɛ, “Kussi ka asinɛyɔng kiyila doddo lɛyanga. Akke attɛyɔng bulenɛ ka ayanganɛyɔng kiyila kɛffɔwɔyɔng tɛ̀ttɛ̀ ɛfɔɔk-ɛsasa, nzang akkwoong mung alɔɔkyɔng la ekpok ’yɔng mung attɛyɔng, ‘Gbata mung, amii kang’ vvenɛ emii, nzang vvenɛ akkwoong anaangyɔng bɔfɛɛn ɔkkpɛlɛ! 21 [Ule kɛtaa-buwɔɔng la kɛssɛɛn a luzɔɔm kɛyɔɔng ka kikkwoongnɛ kɛggba kɛssanga bɛfɛɛn mbyɔng ɔkkpɛlɛ, bulɔk ba bule.]” 22 Balɔɔt a kɔssɛ a Jesus baffunɛ baggba ɛfɛɛn kkwɔn ka Galilee, Jesus ɔlɔɔk la abbɛ ɔttɛ, “Bale ka basamnɛ Waan-Ɔssɛbibbit-Ɔkkpɛlɛ bannyi balɔɔt 23 ba bale bawwɔɔlmɛ, ɔzzanga ka bɛtɔm bɛkkyaat, vvenɛ ufungala ka lubbe ɔtaa ka kuddu.” Balɔɔt a kɔssɛ bappyeenɛ ning baang, bukee bunaangbɛ gaang gaang. 24 Jesus la balɔɔt a kɔssɛ ammɛ baffunɛ ka Capernaum, batɔk-innamba Ggwoon-Ɔlɔɔmɔlɔɔm baffu ka ɛfɛɛn a Peter babapmɛ battɛ, “Ukopolo-ukopolo annyɔɔng unnyi mung innamba Ggwoon-Ɔlɔɔmɔlɔɔm ɔɔ?” 25 Peter ɔppyɛlɛmɛ kamma ɔttɛ, “Iii.” Peter umiinɛ ka tɔkɔlɔ a ggwoon, Jesus ɔkɔɔm ɛtɔk ɔlɔɔk ɔttɛ “Simon, annɔ attina nang? Nyinɔɔng ɔkkpɛɛnɛ innamba ka eddu babeet ɛkpansi ’yɔng? Bayini ɛkpansi faa bakekeen?” 26 Peter ɔttɛ, “Bakekeen bakkpɛɛnɛ.” Jesus ɔttɛ, “Kɔyyɛɛpɔyyɛɛp! ning ulenɛ kɛttɛ bayini ɛkpansi innamba ba bakkpɛɛ. 27 Ayyɔɔt ba iggyan ittɛ inaang kwa kutunnɛ balɔɔt ’bɔng mung. Amii assɛɛn ɔbaana ka libbwe. Appyɛɛk ɛsɛɛnabannyi ya ikeeng ya ale akaa ka kamma. Vvenɛ ayɛn sili wa ɔggbanɛ ka kikkpele innamba Ggwoon-Ɔlɔɔmɔlɔɔm anaam la annɔ. Asam sili ’wɔng baang amii akkpɛɛ inamba ayyɔɔt.”
