MATTHEW 16

1Balɔɔt a Pharisees balɔk, la balɔɔt a Sadducees baffu ka ɛfɛɛn a Jesus, battɛ bassɛɛnmɛ ka kɔlɔɔk. Ɔzzanga babapmɛ battɛ ɔnaang bɛmaanga, ɔyɔɔbɛ, basan battɛ baang ɔnaang kɛnaang Ɔlɔɔmɔlɔɔm ka lɔkkwɔɔn. 2Jesus ɔppyɛlɛbɛ kamma ɔttɛ, “Livve lile ka lipitinɛ, attɛyɔng, ‘Kɛtɔm sa mmwɔɔn vvenɛ kile sa ssayii,’ ka ayɛnnɛyɔng libat ka likootnɛ. 3Ɔffɔnɛ lɔfɔmalɔfɔm, attɛyɔng, ‘Ule ka uteepnɛ ka iyɛnnɛyɔng libat ka lisulnɛ.’ Akkwoong mung abwɔɔlɔyɔng tɛ̀ttɛ̀ kɛtɔm sa mmwɔɔn kile kile ka appyɛɛknɛyɔng ka libat. Ɔzzànga ba akkwoong abwɔɔlɔyɔng linaang sa litumnɛ ɛkɛtɛ yɔng! 4Balɔɔt ba bɛtɔm mbyɔng, abbyapyɔngbong, asiyɔng kwa Ɔlɔɔmɔlɔɔm lɛsan! Abapnɛ attɛyɔng nyɔɔwɔyɔng bɛmaanga ɔɔ? Maaye! Bɛmaanga bya nle nyɔɔwɔyɔng ule bya Jonah kɛyɔɔng.” Ɔzzánga ɔgbata umii ussekebɛ. 5Balɔɔt a kɔssɛ a Jesus bakupmɛ bamii kukupa libbwe kwa kkwɔn, basumala brɛɛd kɛsam kɛkɔɔm kimii. 6Jesus ɔlɔɔk la abbɛ ɔttɛ, “Ppyɛɛkyɔng! akatwɔyɔng kɛyɔɔng assekeyɔng yeast a balɔɔt a Pharisees la balɔɔt a Sadducees tɛ.” 7Batte kɛlɔɔk abbɛ abbɛ battɛ, “Ɔlɔɔk ka isinɛ brɛɛd lɛkɔɔm.” 8Jesus ɔggba lɛsan bwa balɔɔknɛ abbɛ abbɛ: Ɔbapbɛ ɔttɛ, “Mbɔng tɛ́ttɛ́ alɔɔkyɔng annyɔɔng annyɔɔng atumyɔng kisi kazzi lɛkɔɔm? Kiyila kissupwɔyɔngbong kɛsak! 9Ba ataka asanyɔng ɔɔ? Ba akkeyɔng ka nsamnɛ igɔngɔ a brɛɛd kubbwɔɔk, nbbɔk, nnyi innɔ balɔɔt zzɔɔppiffa la lalɔp zzɔɔp bazzi ɔɔ? Isangala idɔkɔ ifang ka attɔngnɛyɔng izuku ya issekenɛ assɛɛnyɔng iyipi? 10Ɔzzánga kwa igɔngɔ ya innamikkyaat ya nnyinɛ innɔ zzɔɔp bazzi bɛɛ? Isangala ifang ka attɔngnɛyɔng iyipi? 11Mbɔng tɛ́ttɛ́ asiyɔng lɛsan attɛyɔng kwa brɛɛd lissi ka nlɔɔknɛ ntum? Akatwɔyɔng kɛyɔɔng assekeyɔng yeast a balɔɔt a Pharisees la balɔɔt a Sadducees.” 12Ɔzzànga balɔɔt a kɔssɛ ammɛ baggɔgɔ basan battɛ ba ɔbwɔɔlɔbɛ kwa yeast wa ɔnaangnɛ brɛɛd utum. Ɔbwɔɔlɔbɛ ɔttɛ bakatbɛ kɛyɔɔng basseke lukopolo balɔɔt a Pharisees la balɔɔt a Sadducees. 13Jesus ufeele umii ka ɛkpansi ya ɛkkɛtɛnɛ lɛffɛ a Ceasarea Philippi. Ɔffɔnɛ bakang ɔbap balɔɔt a kɔssɛ ammɛ ɔttɛ, “Mung balɔɔt battina battɛ Waan-Ɔssɛbibbit-Ɔkkpɛlɛ ulenɛ nnyinɔɔng?” 14Bappyɛlɛmɛ kamma battɛ, “Balɔɔt balɔk battɛ ammɛ ulenɛ John, Ɔnaang-a-baptizim. Balɔk battɛ Elijah. Balɔk battɛ Jeremiah ɔlɔk uppyee-kutolo Ɔlɔɔmɔlɔɔm ɔlɔk.” 15Ɔbapbɛ abbɛ ɔttɛ, “Ngkka annyɔɔng bɛɛ? Attina attɛyɔng anaam nlenɛ nnyinɔɔng?” 16Simon Peter ɔppyɛlɛmɛ kamma ɔttɛ, “Annɔ alenɛ Ɔlɔɔt wa Ɔlɔɔmɔlɔɔm ɔsanganɛ, Waan-Ɔlɔɔmɔlɔɔm-a-kuddu.” 17Jesus ɔppyɛlɛmɛ kamma ɔttɛ, “Simon, waan a John, aggele gaang gaang. Lɔkkwɔɔn a kɔlɔɔk ’gwɔng mung ka ɔssɛbibbit ba lussi luffu ka annɔ, Dedde anaam ka libat unnyiwɔnɛgwɛ. 18Nbwɔɔlɔwɔ tɛ! Peter, annɔ alenɛ akpana. Vvenɛ nbɔɔk Ggwoon-a-Luzɔɔm anaam ka libat a akpana ’wɔng baang. Lubbe baala lukkwoong lɔbɛpɛ Ggwoon-a-Luzɔɔm anaam. 19Vvenɛ nnyiwɔ ɛkpɔkɔlɔ lɛmma ggwoon a Itutum-Ɔlɔɔmɔlɔɔm. Bwa bulenɛ bwa lafɔɔ ka ɛkpansi bussɛ bule bwa lafɔɔ ka libat. Bwa akkyaanɛ afɔngɔ ka ɛkpansi, vvenɛ nssɛ nkkyaabwɛ nfɔngɔ ka libat.” 20Jesus ɔlɔɔk la balɔɔt a kɔssɛ ammɛ ɔttɛ, “Tɛ̀ttɛ́ abwɔɔlɔyɔng ɔlɔɔt ɔlɔk attɛyɔng anaam nlenɛ Ɔlɔɔt wa Ɔlɔɔmɔlɔɔm ɔsanganɛ tɛ.” 21Ka ussinɛ ka ɛkɛtɛ ’yɔng baang, Jesus ɔlɔɔk ppwool ppwool ɔbwɔɔlɔ balɔɔt a kɔssɛ ammɛ ɔttɛ, “Vvenɛ nmii Jerusalem, nyɛn akama wa lɛbaang ka labɔɔk a bagɛlɛnya la bazzilɛttɔ-bassɛɛn-a-luzɔɔm la bakopolo-Lafɔɔ. Vvenɛ basamnɛ bamii bawwɔɔl, ɔzzanga ka bɛtɔm bɛkkyaat vvenɛ nfungala ka lubbe.” 22Peter ɔkkwɔɔmɛ uloko kufɛngɛ ɔttɛ, “Uyini anaam, Laggbo-laggbo, tɛ̀ttɛ́ Ɔlɔɔmɔlɔɔm ɔnaangwɔ ning baang. Nkwɔng annɔ wɔ baala kɔnaang tɛ.” 23Jesus usikili ɔlɔɔk la Peter ɔttɛ, “Agbata mung assekenɛ annɔ Satan ’wɔng! Ale tɛ̀ttɛ̀ bɔfɛɛn bwa bubeenɛ buzzanɛ ɛtɔk buttɛ tɛ̀ttɛ́ nsak. Luttina annɔ, luttina balɔɔt; gwa Ɔlɔɔmɔlɔɔm lissi.” 24Jesus ɔlɔɔk la balɔɔt a kɔssɛ ammɛ ɔttɛ, “Ɔlɔɔt duu wa ule ka uffunɛ ukupnɛ, usumalamɛ kɛyɔɔng, ɔsam cross anaam ukupnɛ. 25Ɔlɔɔt wa ɔggyannɛ ɔttɛ ɔkkala kuddu ammɛ biini, vvenɛ ɔtakakwɛ. Ɔzzanga ɔlɔɔt wa ɔtakanɛ kuddu ammɛ ka lɛttɔ anaam, vvenɛ ɔyangakwɛ. 26Ɔlɔɔt wa ɔggyannɛ ɔttɛ ɔyanga lutini bɔfɛɛn la duu ka vveeng ’wɔng mung ɔtaka lɛfal ammɛ isak ilemɛ ka ’bɔng? Ning baang ba kule; bɔfɛɛn bulɔk bwa ule ukkwoong ɔsam ussila lɛttɔ kuddu ammɛ ba bule. 27Waan-Ɔssɛbibbit-Ɔkkpɛlɛ ule ka uffunɛ la latele Abassɛ la bayilabɔtɔɔm ammɛ. Uffunɛ, vvenɛ ɔppyɛlɛ ɔlɔɔt duu bwa ɔnaangnɛ. 28Akkeyɔng ’kwɔng tɛ, balɔɔt balɔk bale mung ba basi libbe tɔttɔt bayɛn Waan-Ɔssɛbibbit-Ɔkkpɛlɛ ka ule uffu tɛ̀ttɛ̀ ubeet.”

will be added

X\