MATTHEW 14

1Ɔdɔkɔ ka ɛkɛtɛ ’yɔng baang bbwak ya Herod, uzzilɛttɔ ɛkpansi a Galilee, uppyeenɛ kuttu a Jesus. 2Ɔbwɔɔlɔ ikkala ammɛ ɔttɛ, “Baang ka lɔkkwɔɔn John, Ɔnaang-a-baptizim, ufungalabong ka lubbe kwakkwɛ lakke lalenɛ baang ka kkwɔɔt ammɛ: ukkwoong ɔnaang kɛnaang ’sɔng mung tɛ.” 3- 4Ka ɛkɛtɛ ’yɔng bakang, John ɔbwɔɔlɔ Herod ɔttɛ, “Ba kɔyyɛɛp ka atɔknɛ Herodias, wanavva etele annɔ Philip tɛ.” Ɔzzánga Herod uppyeenɛ ning baang ɔkaa John ɔggbɔ izzi ɔsammɛ ɔssɛɛn ka igbakkɔpɔ. 5Herod ɔnaang luttina gwa kɛwwɔɔlmɛ, usi lɛbbɔ, ɔmma balɔɔt a Jews ka batɔknɛ John tɛ̀ttɛ̀ uppyee-kutolo Ɔlɔɔmɔlɔɔm. 6Uffu ɔffɔ ka kɛtɔm ekokomele Herod, waanawanavva wa Herodias ɔmaatnɛ ufeele ɔtɔm ka lusso kibbi ’sɔng baang ɔkkpɛlɛ. Ɔzzánga ɔwaa Herod gaang gaang. 7Ɔssɛɛn nsekele ɔttɛ, “Nyimbong nttɛ vvenɛ nnyiwɔ bɔfɛɛn duu bwa aggyannɛ.” 8Waantiti ɔbapnɛ abakka, Herodias, Herodias ɔttɛ ɔffaam lɛttɔ a John. Ɔzzánga waantiti ɔlɔɔk ɔttɛ, “Assɛɛnnɛ lɛttɔ a John, Ɔnaang-a-baptizim, ka kɛkkpala ’sɔng mung.” 9Ubeet livve lɛbbɔlmɛ, keem ka ulenɛ nsekele lɛffɔ ɔssɛɛn ka lusso balɔɔt ɔkkpɛlɛ, usi lɛbbɔ ufim. Ɔttɛ bwa waanawanavva ’wɔng baang ɔggyannɛ vvenɛ unnyimɛ. 10Ɔzzanga Herod ɔlɔɔkbɛ bazza lɛttɔ a John ka tɔkɔlɔ a igbakkɔpɔ, 11bassɛɛn ka tɔkɔlɔ kɛkkpala, bafee waanawanavva ’wɔng baang. Ammɛ ɔsam ufee abakka. 12Bayilabɔtɔɔm a John baffu basam kakkwu ammɛ bamii balli. Bafeele bamii babwɔɔlɔ Jesus. 13Jesus uppyeenɛ kuttu lubbe a John, ɔgbata ka ɛfɛɛn ’kwɔng baang la akkpaat umii ka ɛfɛɛn ya ulenɛ kɛyɔɔng. Balɔɔt bappyeenɛ ning baang bagbata ka laffɛ abbɛ bamii bakupmɛ. 14Jesus ɔtta ka tɔkɔlɔ akkpaat ka ɔyɛnnɛ kibbi balɔɔt ggbadam. Babbemɛ lɛttɔ gaang gaang, uttula balɔɔt iffaak. 15Kulele ’kwɔng baang, balɔɔt a kɔssɛ ammɛ baffu balɔɔkmɛ batte, “Mung usulbong, ɔlɔɔt mung ba ule ka ullunɛ. Abwɔɔlɔ balɔɔt ’bɔng mung bamii ka tɔkɔlɔ a ssala balɛɛp kazzi kɛyɔɔng bazzi.” 16Jesus ɔppyɛlɛbɛ kamma ɔttɛ, “Tɛ̀ttɛ́ bagbata, annyɔɔng annyiyɔngbɛ kazzi, bazzi.” 17Bappyɛlɛ Jesus kamma battɛ, “Bwa iyanganɛ mung ɔkkpɛlɛ ule igɔngɔ a brɛɛd kubbwɔɔk la isɛɛnabannyi iffa keem tɛ.” 18Jesus ɔttɛ, “Asamyɔngbyɛ ɔkkpɛlɛ afeenɛyɔng kaang.” 19Ɔbwɔɔlɔ balɔɔt ’bɔng baang ɔttɛ bataa-ɔtaa ka lifaat. Balenɛ lɛtaa, ɔsam igɔngɔ a brɛɛd ’yɔng baang kubbwɔɔk la isɛɛnabannyi iffa uyeek, ɔppyɛɛk ka libat, uwomo Ɔlɔɔmɔlɔɔm kɛnaang. Ɔsamyɛ ɔbbɔk, unnyi balɔɔt a kɔssɛ ammɛ. Basam, babɛngɛlɛ balɔɔt ’bɔng baang. 20Ɔlɔɔt ɔlɔɔt uzzi tɛ̀ttɛ̀ kaddumɛnɛ. Balɔɔt a kɔssɛ ammɛ battɔng isangala kazzi zzɔɔppiffa ya issekenɛ. 21Balɔɔt ’bɔng baang ba bazzinɛ kazzi ’kwɔng baang badɔkɔ innɔ zzɔɔppiffa la lalɔp zzɔɔp. Bwanavva la bwɔɔntiti ka lukkwoon ba bale. 22Ɔzzánga Jesus ɔlɔɔk la balɔɔt a kɔssɛ ammɛ ɔttɛ bamal ka akkpaat bawaat bakɔɔm ɛtɔk bassɛ bamii kukupa libbwe za zzɔn. Ammɛ ɔkɔɔm ubee ɔbwɔɔlɔ kibbi ’sɔng baang ɔttɛ bakkyaap. 23Ulenɛ balɔɔt ’bɔng baang lɛbwɔɔlɔ bagbata, ufeele umii ka libat ekpok kɛyɔɔng ammɛ ɔssɛɛn luzɔɔm. Kulele kɔnaangnɛ, usseke kɛyɔɔng. 24Ɛkɛtɛ ’yɔng baang akkpaat utii fulufulu ka tɔkɔlɔ libbwe ɔkɔɔm uggbuku ka kɛffa kilenɛ baang ka kɛffanɛ. 25Bɛzzɔkɔ ikalangka ikkyaat la ikalangka bwɔlanning ɔdɔkɔnɛ ɛkɛtɛ ya Jesus ɔssɛnɛ ka ɛkkpa bannyi, umii ukupbɛ lɔfɔm a lɔfɔm. 26Balɔɔt a kɔssɛ ammɛ bayɛnmɛnɛ ka ɔssɛnɛ ka ɛkkpa-bannyi, kɔkɛɛlɛbɛ gaang gaang battɛ, “Baang ubbu-kɔwɔkɔlɔ tɛ.” Ɔbbwɔpɔbɛ baffula. 27Jesus ɔttɛ, “Kkaamyɔng luppyam! Anaam tɛ, tɛ̀ttɛ́ ɔbbwɔpɔwɔyɔng.” 28Peter ufeele ɔttɛ, “Uyini, ulewɔnɛ annɔ ka lɔkkwɔɔn anaangnɛ ntta ka akkpaat nssɛ ka bannyi nffu ka ɛfɛɛn annɔ.” 29Jesus ɔppyɛlɛmɛ kamma ɔttɛ, “Affu.” Ɔzzánga Peter ɔtta ka tɔkɔlɔ akkpaat, ɔssɛ ka ɛkkpa-bannyi umii ka ɛfɛɛn a Jesus. 30Uppyeenɛ kɛffa, ɔbbwɔpɔmɛ. Ɔbbwɔpɔmɛnɛ upiti ka tɔkɔlɔ bannyi. Ɔkkwa ɔttɛ, “Uyini akkalanɛ.” 31Eseese Jesus umii ɔffɔ ka ɛfɛɛn ammɛ ɔlɔmmɛ, ɔttɛ, “Bɔng waan a kiyila ussupwɔnɛ ning! Bɔng tɛ́ttɛ́ ayanga ndeeta ka luppyam?” 32Ɔkkpɛlɛ abbɛ bappyɛlɛ isimisimi bamii ka tɔkɔlɔ akkpaat. Kɛffa kizum eseese. 33Balɔɔt a kɔssɛ a Jesus ba balenɛ ka tɔkɔlɔ akkpaat bazɔɔm battɛ, “Isanbong ka lɔkkwɔɔn ittɛ annɔ alenɛ Waan-Ɔlɔɔmɔlɔɔm.” 34Bakum libbwe ’zɔng baang baffu ka ɛkpansi Gennesaret, 35ɛfɛɛn a balɔɔt ’bɔng baang bakɔɔlɔnɛ Jesus. Ɔzzánga batɔɔm ka balɔɔt iffaak ba ballunɛ bakkpit ɛkpansi ’yɔng baang ɔkkpɛlɛ baffu ka ɛfɛɛn a Jesus. 36Bakkpengemɛ battɛ ɔfɔngɔ balɔɔt iffaak basingi ligook ewuulu ammɛ. Ɔzzanga balɔɔt ɔkkpɛlɛ ba basinginɛzɛ ɔppwabɛ.

will be added

X\