MATTHEW 11

1Jesus uvvenɛ balɔɔt a kɔssɛ ammɛ ba zzɔɔppabaffa lɔttama ’gwɔng linnyi, ɔgbata ka ɛfɛɛn ’kwɔng baang umii ukopolo, ɔyaam kuttu Ɔlɔɔmɔlɔɔm ka laffɛ za lɛkkɛtɛnɛ baang ɔgbaa. 2John, Ɔnaang-a-baptizim, ɔtaanɛ ka igbakkɔpɔ, uppyee kɔlɔɔk a kɛnaang a Christ, ɔtɔɔm balɔɔt a kɔssɛ ammɛ balɔk ufeemɛ. 3Babap Jesus battɛ, “Abwɔɔlɔyɛlɛ, mung annɔ alenɛ ɔlɔɔt wa John ɔlɔɔknɛ ɔttɛ vvenɛ uffu ɔɔ? Faa ikat ɔlɔɔt ɔlɔk?” 4Jesus ɔppyɛlɛbɛ kamma ɔttɛ, “Appyɛlɛyɔng isimisimi amii abwɔɔlɔyɔng John bwa appyeenɛyɔng, ayɛnyɔng ka zzeen agbaayɔng. 5Bassi-ifim bakkwoong bayɛn; basi-kɔssɛ-likkwoong, bakkwoong bassɛ. Balɔɔt-ɔffaal ɔppwabɛ; bassi-latɔɔk bappyee. Babbu bafungala ka lubbe bataa ka kuddu, bayaam Kuttu-budoddo babwɔɔlɔ balɔɔt ba ɔbbɔlnɛbɛ. 6Ɔlɔɔt wa usinɛ bɛkangala ka luppyam lɛssɛɛn utumnɛ, vvenɛ ɔtaa ka laggele za lɛbaang.” 7Ka ɛkɛtɛ ya balɔɔt a kɔssɛ a John balenɛ ka kifula, Jesus ɔlɔɔk la kibbi ’sɔng baang utum John ɔttɛ, “Ka ɛkɛtɛ ya amiinɛ akupyɔng John ka kɛmat, adɔkɔ attina attɛ ale ayɛnyɔng bɔng? Ɛmma lɔfaat ya ɛtɛngɛnɛ ekup kɛffa ɔɔ? 8Adɔkɔ amii ayɛnyɔng bɔng? Ɔlɔɔt wa ɔwɔkɔlɔnɛ iwɔkɔlɔ ya iyyɛɛpnɛ gaang ɔɔ? Balɔɔt ba bawɔkɔlɔ ya ning baang ballu ka igala babeet. 9Bwɔɔlɔnɛyɔng! mung adɔkɔ attɛ atta amii ayɛnyɔng bɔng? Uppyee-kutolo Ɔlɔɔmɔlɔɔm ɔɔ? Iii nbwɔɔlɔwɔyɔng nttɛ, ayɛnyɔng ɔlɔɔt wa ɔttanɛ Uppyee-kutolo Ɔlɔɔmɔlɔɔm. 10John ulenɛ ɔlɔɔt wa luvva-Ɔlɔɔmɔlɔɔm lɔlɔɔknɛ lɔttɛ, ‘Uwɔng ulenɛ uyilabɔtɔɔm anaam wa nle ntɔɔmmɛ ka kɛkɔɔm ɛtɔk uffu ɔlɔngɔlɔ ɛtɔk ulokowɔ.’ 11Akkeyɔng ’kwɔng tɛ! John, Ɔnaang-a-baptizim, ulenɛ ɔlɔɔt wa ɔttanɛ ɔssɛbibit ɔkkpɛlɛ liggbenge. Ɔzzànga ɔlɔɔt wa ussupnɛ ka Itutum-Ɔlɔɔmɔlɔɔm ule ɔttamɛ liggbenge. 12Ka ussinɛ ka ɛkɛtɛ ya John ɔyaamnɛ kuttu ammɛ tɔttɔt uffu ɔffɔ ka kɛtɔm sa mmwɔɔn, Itutum-Ɔlɔɔmɔlɔɔm iyɛnbong akama kullu gaang gaang, bábbyap babumyɛ kɛnnaa. 13Bappyee-kutolo Ɔlɔɔmɔlɔɔm ɔkkpɛlɛ la Lafɔɔ-a-Moses tɔttɔt uffu ɔffɔ ka ɛkɛtɛ a John, balɔɔk batum kɔlɔɔk a Itutum-Ɔlɔɔmɔlɔɔm. 14Aggyannɛ kiyila kɔlɔɔk kwa balɔɔknɛ, John ulenɛ Elijah wa babwɔɔlɔnɛ ɛkɛtɛ kiffu ammɛ ka isimi ka isimi. 15Agɔpɔlɔyɔng, ayanganɛyɔng latɔɔk. 16“Gedegede mung nle nssa balɔɔt a bɛtɔm mbyɔng la bɔng ee? Bale tɛ̀ttɛ̀ bwɔɔntiti ba bakkyeetnɛ ka ogyila kappya, likup zzɔn libungu linnyi za zzɔn. 17‘Isoom ibin a libbeel ilokowɔyɔng, afimyɔng kɛtɔm. Ikkwa ittɔl layilili, ɔzzanga annyɔɔng afimyɔng kɛkkwa!’ 18John ka uffunɛ ɔtaa buwɔɔng, batak usi lɛvva. Ɔzzànga balɔɔt ɔkkpɛlɛ battɛ, ‘John ɔyanga ipiliza’. 19Waan-Ɔssɛbibbit-Ɔkkpɛlɛ uffunɛ, uzzi kazzi, ɔvva kɛvva. Balɔɔt battɛ, ‘Ppyɛɛk ɔwɔnɔwɔnɔ ’wɔng! Ɔvva-batak-ɔlɔɔt, ɛnngwa batɔk-innamba la banaang a bubbi!’ Kɛsan-a-kɔlɔɔk Ɔlɔɔmɔlɔɔm kɛyɔɔ ka ɛkɛtɛ ya kɛttanɛ ka vveeng.” 20Jesus ɔwɔlɔ laffɛ ’zɔng baang za ulenɛ bɛmaanga ggbadam baang lɛnaang, ka batakanɛ bubbi abbɛ lɛkkyaa bafɔngɔ. 21“Vvenɛ ayɛnyɔng akama gaang gaang, annyɔɔng balɔɔt a Chorazin! Vvenɛ assɛ ayɛnyɔng akama gaang gaang, annyɔɔng Bethsaida! Bɛmaanga ’byɔng bya nnaangnɛ ka ɛfɛɛn annyɔɔng mmɛmmɛ bakang, bulenɛ ka nnaangnɛ ka Tyre la Sidon, nzang balɔɔt ’bɔng baang basseke ka bawɔkɔlɔnɛ bissaka issɔ bakook ibili baggbɔbɛ kɛyɔɔng, bayɔɔ battɛ bakkyaabong bubbi abbɛ bafɔngɔ. 22Akkeyɔng nkwɔng tɛ!, ka Kɛtɔm-a-kɛkaal vvenɛ Ɔlɔɔmɔlɔɔm ɔyɔɔ balɔɔt a Tyre la Sidon kibbe lɛttɔ gaang gaang ɔttawɔyɔng annyɔɔng. 23Kwa annyɔɔng balɔɔt a Capernaum, anaangyɔng nang tɛ́ttɛ́ aggyan attɛ ayeekwɔyɔng kɛyɔɔng amiiyɔng ka libat? Vvenɛ basamwɔyɔng bassɛɛn ka Hell! Bɛmaanga bya nnaangnɛ ka laffɛ annyɔɔng, bulenɛ ka nnaangnɛbyɛ ka Sodom, nzang Sodom utii baang ɔffɔ mmwɔɔn mung. 24Akkeyɔng tɛ!, ka Kɛtɔm-a-kɛkaal, Ɔlɔɔmɔlɔɔm vvenɛ ɔyɔɔ kibbe lɛttɔ ammɛ gaang gaang la balɔɔt a Sodom battawɔyɔng annyɔɔng. 25Ka ɛkɛtɛ ’yɔng baang, Jesus ɔlɔɔk ɔttɛ, “Dedde, Uyini libat la ɛkpansi, nwomowɔ kɛnaang ka ayɔɔnɛ balɔɔt ba batakanɛ likkoop bwa alupnɛ asseke basan-a-kɔlɔɔk la balɔɔt ba balenɛ likkoop. 26Iii, Dedde, anaang ’kwɔng mung ka luttina annɔ la kɛsaap. 27“Dedde anaam unnyinɛbong bɛfɛɛn ɔkkpɛlɛ, ɔlɔɔt wa ɔsannɛ Awaan ba ule, usinɛ Abassɛ lile. Ɔlɔɔt wa ɔsannɛ Abassɛ ba ule, usinɛ Awaan lile, la balɔɔt ba Awaan ɔggyannɛ ɔttɛ basan. 28“Affu akupnɛyɔng ɔkkpɛlɛ annyɔɔng ba atɔkɔnɛ latɔkɔ ɔkɔɔtwɔyɔng, vvenɛ nnyiwɔyɔng kɛfɛkɛlɛ. Asamyɔng ikpooka anaam awɔkɔlɔyɔng ka lukat. 29Akupnɛyɔng ka itɔk anaam ɔkkpɛlɛ akoopyɔng lilɔɔk anaam ɔkkpɛlɛ, ka nlenɛ ɔlɔɔt wa bɛɛm, nyánga kɛppwa luppyam ka tɔkɔlɔ, vvenɛ ayangayɔng kɛfɛkɛlɛ. 30Ikpooka ya nle nnyiwɔyɔng ba ikɔɔt. Latɔkɔ za nle nnyiwɔyɔng ba lalɔɔp.”

will be added

X\