MARK 9

1Ɔbbal lɛlɔɔk ɔttɛ, “Nbwɔɔlɔwɔyɔng nttɛ, balɔɔt balɔk bale mung ba bale basi libbebong tɛ́ttɛ́ bayɛn Itutum-Ɔlɔɔmɔlɔɔm ka ile iffu la lakke.” 2Ɔggbanɛ ka bɛtɔm ning bwɔlaaning bilenɛ lɛsak, Jesus ɔlɛkɛ Peter la James, la John, ubbwulu libat ekpok bakang ka ɛfɛɛn a bassekenɛ kɛyɔɔng a kɛyɔɔng. Badɔkɔ baang ka kɛppyɛɛk, Jesus ufoolo eseese. 3Iwɔkɔlɔ ammɛ isseke ka inyanyanɛ ning, gɔɔ ɔlɔɔt wa ukkwoongnɛ ɔzzaa iwɔkɔlɔ illaat iffɔ ning baang ka vveeng mung ba ule. 4Balɔɔt a kɔssɛ ammɛ ba bakkyaat baang bayɛn Elijah, la Moses ka kutolo la Jesus. 5Peter ufeele ɔlɔɔk unnyi Jesus ɔttɛ, “Ukopolo-lukopolo, kɔyyɛɛp gaang gaang ka ilenɛyɔng mung! Vvenɛ inaang bwaan idda bɛkkyaat mung, vvɔn wa annɔ, vvɔn wa Moses, wa vvɔn wa Elijah.” 6Ɔbbwɔpɔbɛ gaang gaang Peter usi lɛbɛlɛ lɛsan bwa ɔlɔɔknɛ. 7Ìkkpála itta ka lukkpaaggbeede ivvoongbɛ kuyeeng. Lɛmmwɔɔl lɛtta ka tɔkɔlɔ ikkpála ’yɔng baang lɛttɛ, “Uwɔng ulenɛ Waan-a-luppyam anaam, agɔpɔlɔmɛyɔng!” 8Basesele ɔkkpɛlɛ baduda, ɔlɔɔt ɔlɔk basi lɛyɛn ɔgbaa la Jesus. 9Basininɛ ka libat ekpok ’yɔng baang, Jesus ɔkamalabɛ ɔttɛ, “Afɔngɔyɔng ɔlɔɔt ɔlɔk kɛbwɔɔlɔ kwa ayɛnnɛyɔng tɔttɔt ɔffɔ ka ɛkɛtɛ Waan-Ɔssɛbibbit-Ɔkkpɛlɛ ufungalanɛ ka lubbe.” 10Bappyee lɔkamala ’gwɔng baang, ɔzzánga batolo abbɛ abbɛ batum kɛssanga kɔlɔɔk ’sɔng baang battɛ, “Kifungala ka lubbe ’sɔng mung ɔbbwanɛ ’bɔng lile?” 11Babap Jesus battɛ, “Mbɔng tɛ́ttɛ́ bakopolo-Lafɔɔ battɛ Elijah ule utte liffu?” 12Jesus ɔppyɛlɛbɛ kamma ɔttɛ, “Elijah ule utte liffu baning ɔkkɔɔnɛ ɔlɔngɔlɔ bɛfɛɛn, uloko ɔkkpɛlɛ bbwak bbwak. Ngkka ’bɔng tɛ́ttɛ́ Luvva-Ɔlɔɔmɔlɔɔm lɔttɛ Waan-Ɔssɛbibbit-Ɔkkpɛlɛ vvenɛ ɔyɛn akama gaang gaang; balɔɔt ɔkkpɛlɛ bafimnɛ. 13Ppyɛɛk nbwɔɔlɔwɔyɔng, Elijah ɔggba liffu bakang, balɔɔt bakaamɛ bayɔɔ akama tɛ̀ttɛ̀ kɔsaapnɛbɛ bakup tɛ̀ttɛ̀ bakkpɔknɛ ka Luvva-Ɔlɔɔmɔlɔɔm batummɛ.” 14Jesus la balɔɔt a kɔssɛ ammɛ ba bakkyaat bappyɛlɛnɛ baffu bakup balɔɔt a kɔssɛ ammɛ ’bɔng kaang, bayɛn kibbi balɔɔt ka babbinɛ bakkpitbɛ. Bakopolo-Lafɔɔ balɔk badɔkɔ baang ka ikangala la abbɛ. 15Balɔɔt ’bɔng baang bayɛnnɛ Jesus, kɔkɛɛlɛbɛ gaang gaang, bamma bamii bawomomɛ. 16Jesus ɔbap balɔɔt a kɔssɛ ammɛ ɔttɛ, “Baang akangalayɔng ’bɔng?” 17Ɔlɔɔt vvɔn ka kibbi ’sɔng baang ɔppyɛlɛmɛ kamma ɔttɛ, “Ukopolo-lukopolo, nkɔɔm waan anaam nffu ka ɛfɛɛn annɔ ka ɔyanganɛ ipiliza, usi kɛlɔɔk likkwoong. 18Ipiliza ’yɔng baang ifeelemɛnɛ, ɔttɔ ka lisse, iffuku ittamɛ ka kamma, ɔtɔɔp lasaal ɔkaka, ɔkkaam kkɔk. Nlɔɔkbong balɔɔt a kɔssɛ annɔ nttɛ baggba ipiliza ’yɔng baang, ɔzzànga basi lizzeme baggbayɛ.” 19Jesus ɔlɔɔk la abbɛ ɔttɛ, “Annyɔɔng mung asɛlɛyɔngbong kiyila! Mung nle ntaa ɔmmɛ ɔffɔ nang la annyɔɔng? Mung nle nbbe-luppyam nang la annyɔɔng? Kɔɔm waan ’wɔng baang affu!” 20Bakɔɔmmɛ baffu. Ipiliza iyɛnnɛ Jesus eseese, ifeelemɛ ɔttɔ ka lisse ɔssang, iffuku ikɔɔm ittamɛ ka kamma. 21Jesus ɔbap abbasɛ ɔttɛ, “Ɔmmɛbong ɔffɔ nang ka ussinɛ ɔffaakmɛ?” Abassɛ ɔppyɛlɛmɛ kamma ɔttɛ, “Ka bassinɛ bamaatmɛ! 22Utii bikkpit bikkpit ka ipiliza ’yɔng baang ibwummɛnɛ kɛwwɔɔl, ɛkɛtɛ ɛlɔk isammɛ ning itɔɔp ka tɔkɔlɔ lɔkɔɔn ɔlɔk issɛɛnmɛ ka tɔkɔlɔ bannyi. Bibbewɔ lɛttɔ baang, ayaamyɛlɛ ulenɛ ka akkwoongnɛ!” 23Jesus ɔppyɛlɛmɛ kamma ɔttɛ, “Iii tɛ, annyɔɔng biini akkwoongnɛyɔng! Ulenɛ ka ɔlɔɔt ɔyanganɛ kiyila nzang kɔlɔɔk ɔkkpɛlɛ ba kukoolo.” 24Abassɛ ubungu eseese ɔttɛ, “Nyanga mung kiyila, ɔzzanga kilenɛ ssup. Attelenɛ nyanga kiyila ngbaa!” 25Jesus ɔyɛnnɛ ka kibbi kilebɛ ligbep, ɔkkpa ipiliza ’yɔng baang kiwele ɔttɛ, “Ussi-latɔɔk, usi kɛlɔɔk likkwoong ipiliza ’yɔng, nbwɔɔlɔwɔbong tta asseke waan ɔlɔɔt afɔngɔmɛ kɛbɛlɛ lɛmal kkpong kkpong!” 26Ipiliza ’yɔng baang ibungu, ifeele waantiti tɛ́ttɛ́ itta issekemɛ. Waanwalam ’wɔng baang usseke tɛ̀ttɛ̀ ubbu mung, gɔɔ ɔlɔɔt ɔkkpɛlɛ uyila ka lɔkkwɔɔn ɔttɛ “Ubbebong!” 27Jesus ɔlɔmmɛ ka kɔbɔɔk ufeele, ubee lubee. 28Jesus ussekenɛ kɛyɔɔng la balɔɔt a kɔssɛ ammɛ ka ggwoon, abbɛ babapmɛ ka wɛɛk battɛ, “Mbɔng ayyɔɔt isinɛ likkwoong iggba ipiliza ’yɔng baang?” 29Jesus ɔppyɛlɛbɛ kamma ɔttɛ, “Bɔfɛɛn bulɔk bwa bukkwoongnɛ buggba kussanga ipiliza ’kwɔng ba bule, usinɛ luzɔɔm lile.” 30Jesus la balɔɔt a kɔssɛ ammɛ bagbata ka ɛfɛɛn ’yɔng baang basak ka lɔkaan gwa lɔzzanganɛ Galilee. Jesus usi lɛggyan ɔttɛ ɔlɔɔt ɔsan ka ɛfɛɛn ulenɛ, 31ka ulenɛ ka kikopolo balɔɔt a kɔssɛ ammɛ; “Vvenɛ basam Waan-Ɔssɛbibbit-Ɔkkpɛlɛ bannyi balɔɔt bawwɔɔl. Ɔzzànga mkkpa kɔnaang, ɔffɔnɛ bɛtɔm bɛkkyaat, ufungala ɔppyɛlɛ ɔtaa ka kuddu.” 32Ifɛɛt a lukopolo ’gwɔng baang basi lɛsan, ɔzzànga basimɛ lɛbbɔ babap ka ɔbbwɔpɔnɛbɛ. 33Baffu baffɔ ka Capernaum, balenɛ ka ggwoon lɛmal, Jesus ɔbap balɔɔt a kɔssɛ ammɛ ɔttɛ, “Mung adɔkɔ akangalayɔng ’bɔng ka ɛtɔk?” 34Basi lɛggyan battɛ bappyɛlɛmɛ kamma, ka bakangalanɛ ka ɛtɔk batum ɔlɔɔt wa ɔttanɛ liggbenge. 35Jesus ɔtaanɛ lɔtaa, ɔkkwɔɔ balɔɔt a kɔssɛ ammɛ zzɔɔppabaffa utolo unnyibɛ ɔttɛ, “Ɔlɔɔt wa ɔggyannɛ ɔttɛ ammɛ ule ɔkɔɔm-ɛtɔk, ɔlɔɔt ’wɔng baang usseke isimi, ɔppyɛɛ ule bɔɔyi balɔɔt ’bɔng kang ɔkkpɛlɛ.” 36Ɔkkwɔɔ waantiti, ɔtta ubeebɛ ka lusso. Utelemɛ labɔɔk, ɔttɛ la balɔɔt a kɔssɛ ammɛ, 37“Ɔlɔɔt duu wa ɔtɔknɛ waantiti ning mung ka lɛkɔɔl anaam, nzang ɔtɔknɛbong anaam. Ɔlɔɔt wa ɔppyɛɛnɛ ɔtɔknɛ anaam ka laggele, nzang ɔssɛbong ɔtɔkmɛ Ammɛ wa ɔtɔɔmnɛnɛ.” 38John ɔlɔɔk unnyimɛ ɔttɛ, “Ukopolo-lukopolo, iyɛn ɔlɔɔt vvɔn ka ɔkɔɔmnɛ lɛkɔɔl annɔ ɔggba ipiliza. Ibwɔɔlɔmɛ ittɛ ɔfɔngɔ ka usinɛ ka kɛkaan ayyɔɔt lile.” 39Jesus ɔbwɔɔlɔbɛ ɔttɛ, “Afɔngɔmɛyɔng kitunu, ɔlɔɔt wa ɔkɔɔmnɛ lɛkɔɔl anaam ɔnaang bɛmaanga baala ukkwoong ɔlɔɔk bubbi utumnɛ keekeekee. 40Ɔlɔɔt duu wa isimɛnɛ litun, ule wa ayyɔɔt. 41Nbwɔɔlɔwɔyɔng kpelegedee appyeeyɔng, ɔlɔɔt duu wa unnyiwɔnɛyɔng ommonggo bannyi ka alenɛyɔng ba anaam, vvenɛ ɔyanga ikipili ka lɔkkwɔɔn. 42“Ɔlɔɔt wa ɔnaangnɛ waantiti vvɔn gbɔɔ wa uyilanɛ kɔlɔɔk anaam uttunmɛ, ɔlɔɔt ’wɔng baang kɔyyɛɛp ka basikinɛ kukook bakɔnmɛ ka lukat, basammɛ bassɛɛn ka ubili lɔyɔngɔ. 43Ulenɛ kɔbɔɔk annɔ kɔnaangwɔnɛ asɛlɛ kiyila, azzakwɛ azzɔɔk. Kɔyyɛɛp ka amalnɛ ka kuddu kwa kɛfal a kɛfal la kɔbɔɔk kkwɔn lutini amiinɛ ka lɔkɔɔn gwa kɛfal a kɛfal la labɔɔk laffa. 44[Ka ɛfɛɛn ’kwɔng baang, illɔɔng ya izzinɛbɛ ba ibbe, gɔɔ lɔkɔɔn gwa lɔfɔɔpnɛbɛ ba luzum ka nakanaka.] 45Kikkpɔ annɔ kɛnaangwɔnɛ asɛlɛ kiyila, azzasɛ azzɔɔk! Kɔtta lɛyyɛɛp ka amalnɛ ka kuddu kwa kɛfal a kɛfal la kikkpɔ ssɔn lutini gwa bale basamwɔ bassɛɛn ka lɔkɔɔn gwa kɛfal a kɛfal la bukkpɔ annɔ buffa. 46[Bakang ka ɛfɛɛn ’kwɔng baang, illɔɔng ya izzinɛbɛ ba ibbe, gɔɔ lɔkɔɔn gwa lɔfɔɔpnɛbɛ ba luzum ka nakanaka.] 47Zzeen annɔ lɛppyɛɛnɛ lɛnaangwɔ asɛlɛ kiyila, asangazɛ azzɔɔk! Kɔtta lɛyyɛɛp ka amalnɛ Itutum-Ɔlɔɔmɔlɔɔm la zzeen zzɔn lutini gwa bale basamwɔ bassɛɛn ka lɔkɔɔn gwa kɛfal a kɛfal la zzeen laffa. 48Bakang wa illɔɔng ya izzinɛbɛ isinɛ libbe, lɔkɔɔn gwa bakkɔmnɛ lusi lizum ka nakanaka. 49“Ɔlɔɔt ɔkkpɛlɛ vvenɛ ɔkkɔm ka lɔkɔɔn tɛ̀ttɛ̀ bunɔk bukoolonɛ ka ɛsɛɛn. 50Bunɔk buyyɛɛp gaang gaang; ɔzzanga buppyɛɛnɛ busi lɛbɛlɛ liggwoom, bule bunaang nang bubbal bunɔk lɛzzanga? “Annyɔɔng biini, ayangayɔng kɛsaap, ataayɔng ka bɔkaat ɔkkpɛlɛ annyɔɔng.

will be added

X\