MARK 5

1Jesus la balɔɔt a kɔssɛ ammɛ baffu ka lufoom a libbwe a Galilee kwa kkwɔn, ka ɛkpansi a Gerasa. 2Jesus ɔttanɛ ka akkpaat, eseese waanwalam vvɔn ussi ka lalli uffu ukupmɛ. Waanwalam ’wɔng baang ɔyanga apiliza ka kkwɔɔt. 3Ullu ka lalli. Ɔlɔɔt wa ɔbbalnɛ likkwoong ɔssɛɛnmɛ ikpɔkɔlɔ ba ɔbɛlɛ lile. 4Bassɛɛnnɛbong ikpɔkɔlɔ ka bukkpɔ la labɔɔk bikkpit bikkpit; ɔzzànga bassɛɛnmɛnɛ, ɔlɔm ikpɔkɔlɔ ɔbbɔk, ɔsam bɛfɔl using bukkpɔ ɔbɛpɛ. Ɔlɔɔt wa ukkwoongnɛ ɔbbwɔɔpmɛ uloko ba ɔbɛlɛ lile. 5Kikoon la kɛtɔm, ɔssɛ baang ukkpit ka lalli, ubbwulu ikpok la kibungu la kibungu, ɔkɔɔm bɛfaak a lattaal ɔkkwɛɛmɛ kɛyɔɔng. 6Ɔdɔkɔ utii fulufulu ka ɔyɛnnɛ Jesus, keem ɔmma umii ɔttɔ ukunmɛ laddu. 7Ɔzzɔɔk kibungu la ɔkkpɔlɔngkkpɔ lɛmmwɔɔl ɔttɛ, “Jesus, Waan-Ɔlɔɔmɔlɔɔm! mung aggyan ’bɔng la anaam? Nkkpengewɔ nttɛ attina kwa Ɔlɔɔmɔlɔɔm, afɔngɔnɛ akama kɛyɔɔ!” 8(Ɔlɔɔk ’kwɔng ka Jesus ulenɛ baang ka ɔttɛnɛ, “Ɔnaang-a-kɛsɛɛm a kuyeeng, tta asseke waanwalam ’wɔng!”) 9Jesus ɔbapmɛ ɔttɛ, “Azzanga nang?” Waanwalam ’wɔng baang ɔppyɛlɛmɛ kamma ɔttɛ, “Anaam nzzanga ‘Kɛkaan’, ile ggbadam ning!” 10Ubee bbwak ukkpenge Jesus ɔttɛ tɛ̀ttɛ́ ɔggba banaang-a-kɛsɛɛm a liyeeng ka ɛkpansi ’yɔng baang. 11Kɛkaan ikkumma sa lɛbaang kɛdɔkɔ baang ka kazzi kɛtɛkɛtɛ lufoom ekpok. 12Ɔzzánga liyeeng ’sɔng baang likkpenge Jesus littɛ, “Aggbayɛlɛ afɔngɔ lusso gwa kɛkaan ikkumma ’sɔng baang nkwaaning ifulayɛ ka tɔkɔlɔ.” 13Uyila ɔttɛ limii, ɔzzánga litta lisseke waanwalam ’wɔng baang limii limal ikkumma. Kɛkaan ikkumma ’sɔng baang ɔkkpɛlɛ, iggba-ɔggba innɔ ikkumma kubbwɔɔk, imma imii ka imakkpa libbwe, ifoto ittɔ ka tɔkɔlɔ, itaak kwɛɛnɛkwɛɛnɛ. 14Balɔɔt ba bakɔɔmnɛ ikkumma ’yɔng baang bamma bamii babwɔɔlɔ kɔlɔɔk ’kwɔng kwa kɔnaangnɛ ka tɔkɔlɔ a ssala basak batta ka lamma. Balɔɔt bamma bamii kɛyɛn kwa kulenɛ lɛnaang. 15Baffunɛ ka ɛfɛɛn a Jesus bayɛn ɔlɔɔt ’wɔng baang wa ɔtaanɛ ule la kɛkaan a banaang-a-kɛsɛɛm a liyeeng ka kkwɔɔt. Ɔdɔkɔ baang ka ɔtaanɛ kwetkwet la iwɔkɔlɔ ammɛ doddo; kɔbbwɔpɔbɛ ɔkkpɛlɛ. 16Balɔɔt ba balenɛ kkyɛk babwɔɔlɔ babbɛ kwa kɔnaangnɛ ɔlɔɔt ’wɔng baang wa ulenɛ la banaang-a-kɛsɛɛm a liyeeng ka kkwɔɔt la kwa ikkumma. 17Ɔzzánga battɛ Jesus ɔgbata usseke ɛkpansi abbɛ. 18Jesus ule ka akkpaat ning mung, waanwalam ’wɔng baang wa ɔdɔkɔnɛ la ipiliza ukkpengemɛ ɔttɛ, “Afɔngɔnɛ nkupwɔ bɛɛ!” 19Jesus usimɛ lɛfɔngɔ ukupmɛ. Lutini ’gwɔng ɔdɔkɔ ɔbwɔɔlɔmɛ ɔttɛ, “Appyɛlɛ isimisimi afula, amii abwɔɔlɔ itutum annɔ kɔlɔɔk kwa Ɔlɔɔmɔlɔɔm ulewɔnɛ lɛnaang, la kibbe-lɛttɔ sa abbemɛnɛ.” 20Waanwalam ’wɔng baang ɔgbata tɛ, ɔssɛ utuma ka Laffɛ-Zzɔɔp ɔkɔɔm kuttu kɔlɔɔk kwa Jesus ulemɛnɛ lɛnaang. Balɔɔt ɔkkpɛlɛ ba bappyeenɛkwɛ, kɔkɛɛlɛbɛ gaang gaang. 21Jesus ɔppyɛlɛ isimisimi ukum kukupa libbwe kwa kkwɔn. Kibbi balɔɔt baffu bataa bakkpitmɛ baang ka lufoom a libbwe. 22Akkala-mitin wa ɔzzanganɛ Jairus uffu ɔffɔ. Ɔyɛnnɛ Jesus, ɔsammɛ kɛyɔɔng ɔzzɔɔk-mɛ baang ka lataak, 23ukkpengemɛ kɔbɛtɛmɛ. Ɔttɛ, “Waan anaam wa utiti wa wanavva ɔffaakmɛ gaang gaang. Nkkpee, affu atelemɛ labɔɔk ɔkkɔɔnɛ ɔppwamɛ, uddu!” 24Jesus ufeele ukupmɛ bamii. Balɔɔt ggbadam bakup Jesus bamii. Basseke ka baggbepmɛnɛ ning lafoom laffa laffa. 25Wanavva vvɔn ɔdɔkɔ baang wa ulenɛ likkpa zzɔɔppaliffa lɛffɔ ka ussinɛ ullut lɔnnyɔ. 26Badibbya ggbadam battulamɛbong, ɔzzànga ntɔk a lɛttɔ ba ule. Ɔtakabong ikkobo gaang ka kɛssɛ, ɔzzànga lutini gwa buppwamɛnɛ, ɔppyɛɛ ɔkama-ɔkama ɔffaakmɛ. 27Uppyeenɛ utum Jesus, ɔmal ka kibbi balɔɔt sa kikupmɛnɛ baang ɔssɛ ukup Jesus ka isimi. 28Ɔkɔɔm utolo kɛyɔɔng kɛyɔɔng ɔttɛ, “Nkkpa nsingimɛ ka iwɔkɔlɔ baang keem, vvenɛ ɔppwanɛ.” 29Usingi Jesus ka uwɔkɔlɔ, linnyi lizzamɛ eseese. Wanavva ’wɔng baang ɔkɔɔlɔ kɛyɔɔng ɔttɛ iffaak ammɛ isaalmɛbong. 30Jesus ɔkɔɔlɔ ɔttɛ uttulabong ɔlɔɔt. Keem usikili ka tɔkɔlɔ kibbi baang ɔbapbɛ ɔttɛ, “Nyinɔɔng usinginɛnɛ ka iwɔkɔlɔ?” 31Balɔɔt a kɔssɛ ammɛ bappyɛlɛmɛ kamma battɛ, “Kɔttɛ ayɛnbong tɛ̀ttɛ̀ balɔɔt baggbepwɔnɛ baang, mbɔng tɛ́ttɛ́ abbal lɛbap attɛ nnyinɔɔng usingiwɔnɛ?” 32Jesus usesele tɔttɔt ɔggyan ɔttɛ ɔsan ɔlɔɔt ’wɔng baang. 33Wanavva wɔng baang ɔkɔɔlɔbong bwa bulemɛnɛ lɛnaang; ɔzzánga ɔtta uffu la bbwɔp la bbwɔp, ukun laddu ka lataak a Jesus ɔbwɔɔlɔmɛ lɔkkwɔɔn. 34Jesus utolo unnyimɛ ɔttɛ, “Waan anaam, kiyila annɔ kɛnaangwɔbong ɔppwawɔ. Ataa doddo, iffaak annɔ ɔkkpɛlɛ isaal.” 35Jesus ɔdɔkɔ utii baang ka kɛlɔɔk, ka balɔɔt ba bassinɛ ka ssala Jairus baffunɛ babwɔɔlɔ Jairus battɛ, “Waan annɔ ubbebong. Ukopolo-lukopolo akama abbalmɛ ’bɔng lɛyɔɔ?” 36Jesus usi kwa balɔɔknɛ baang lɛgɔpɔlɔ, ɔbwɔɔlɔmɛ ɔttɛ, “Tɛ̀ttɛ́ ɔbbwɔpɔwɔ, ɔzzànga ayila attɛ nkkwoong mung.” 37Ɔlɔɔt ɔlɔk usimɛ likup umii lusso lusso ɔgbaa la Peter la John, etele a James, la James biini. 38Baffu baffɔ ka ssala Jairus, Jesus ɔyɛn ɛfɛɛn ning baang butubutubutu uppyee lammwɔɔl a kullu baang ka bakkwanɛ, gɔɔ balɔɔt balɔk bakkwabong battɔl layilili. 39Ɔmal umii ka tɔkɔlɔ ɔbapbɛ ɔttɛ, “Abutubutubutu ’wɔng bɛɛ? akkwayɔng ’bɔng? Waantiti ba ɔtaka ubbe, ule ka bilaa!” 40Abbɛ basɛɛkmɛ. Ammɛ ɔttɛbɛ batta ɔkkpɛlɛ. Abassɛ la abakka la balɔɔt-a-kɔssɛ ammɛ bakkyaat bamal bamii ka tɔkɔlɔ lɛnɔk za waantiti umininɛ. 41Jesus ɔlɔmmɛ ka kɔbɔɔk ufeele, utolo unnyimɛ, ɔttɛ, “Talitha, koum.” Ning baang ulenɛ kɛttɛ, “Waanawanavva, nbwɔɔlɔwɔ nttɛ afeele, abee-lubee!” 42Ufeele eseese ɔssɛ baang ukkpit. (Utiimɛ likkpa zzɔɔppaliffa.) Kɔkɛɛlɛbɛ gaang gaang ka ’kwɔng kɔnaangnɛ. 43Jesus ɔttamabɛ ɔttɛ tɛ̀ttɛ́ babwɔɔlɔ ɔlɔɔt ɔlɔk, ɔbbal lɛttɛ, “Annyimɛyɔng bwakuzzi uzzi.

will be added

X\