MARK 2

1Bwaan a bɛtɔm biffu bɛsak, Jesus ɔppyɛlɛ umii Capernaum. Kuttu kwa ulenɛ ka ssala lile kumii eseese. 2Balɔɔt baffu babbi baang ka tɔkɔlɔ a ggwoon ɛfɛɛn ɛsɛlɛ, gɔɔ kufuk ka lusso lɛmma ggwoon kusi lɛbɛlɛ lile. Jesus ɔdɔkɔbɛ ka kɛbwɔɔlɔ Kuttu-budoddo Ɔlɔɔmɔlɔɔm, 3ka balɔɔt banna ba batɔkɔnɛ ɔnnɔk-a-kikkwu baffu ka ɛfɛɛn a Jesus baffɔnɛ. 4Ka kibbi kilenɛ lɛsak lɛttala, basi likkwoong basak la ɔnnɔk-a-kikkwu ’wɔng baang ssɔng baffɔ ka ɛfɛɛn a Jesus. Ɔzzánga battɔ lɛmma ka libat a ggwoon bbwak ka ɛfɛɛn a Jesus ulenɛ. Lɛmma lilenɛ liggbenge, bassɛ baang basinimɛ bawulu ka ewula bbwak ka ɛfɛɛn a Jesus. 5Jesus ɔyɛnnɛ tɛ̀ttɛ̀ kiyila kɛttalanɛbɛ, ɔlɔɔk la ɔnnɔk-a-kikkwu ɔttɛ, “Waan anaam, nsɔɔkwɔbong bubbi annɔ.” 6Bakopolo-Lafɔɔ ba bataanɛ baang battina ka tɔkɔlɔ abbɛ battɛ, “Ɔnaang nang tɛ́ttɛ́ ɔbbɔ lissa ning, ɔlɔɔk bbɔl bbɔl utum Ɔlɔɔmɔlɔɔm? 7Ɔlɔɔt wa ukkwoongnɛ ɔsɔɔk ɔlɔɔt bubbi ɔgbaa la Ɔlɔɔmɔlɔɔm ba ule.” 8Eseese, Jesus ɔsan bwa battinanɛ, ɔlɔɔk unnyibɛ ɔttɛ, “Mbɔng tɛ́ttɛ́ attinayɔng ning baang? 9Mung kɔtta bbwɛt lile kɛttɛ, ‘Ɔnnɔk-a-kikkwu, nsɔɔkwɔbong bubbi annɔ!’ faa kɛttɛ, ‘Afeele, asam ewula annɔ, assɛ!’? 10Vvenɛ nyɔɔwɔyɔng ka lɔkkwɔɔn nttɛ, Waan-Ɔssɛbibbit-Ɔkkpɛlɛ ɔyanga mung lakke ka ɛkpansi ’yɔng mung za kɛsɔɔk a bubbi.” Usikili ɔlɔɔk la ɔnnɔk-a-kikkwu ɔttɛ, 11“Nbwɔɔlɔwɔ nttɛ, afeele asam ewula annɔ afula!” 12Ɔkkpɛlɛ abbɛ basseke ka bappyɛɛkmɛnɛ ggbeggbe, ɔnnɔk-a-kikkwu ’wɔng baang ufeele ɔsam ewula ammɛ uzzuma ɔgbata. Kɔkɛɛlɛbɛ ɔkkpɛlɛ abbɛ gaang gaang babungu Ɔlɔɔmɔlɔɔm battɛ, “Kɛssanga kɔlɔɔk ’sɔng ba itaka iyɛn kkpal!” 13Jesus ɔppyɛlɛ isimisimi umii ka lufoom a libbwe a Galilee. Balɔɔt ggbadam baffu babbi baang, ammɛ uttebɛ kikopolo. 14Ɔssɛnɛ umii ka lusso, ɔyɛn ɔtɔkinnamba, waan Alphaeus wa ɔzzanganɛ Levi, ka ɔtaanɛ ka tɔkɔlɔ a ggwoon a kɛnaang ammɛ. Jesus ɔlɔɔk unnyimɛ, ɔttɛ, “Afeele akupnɛ!” Ammɛ Levi ufeele ukupmɛ. 15Jesus ɔdɔkɔ ka kazzi ka ssala Levi. Kɛkaan a batɔkinnamba la babɛpɛ-lafɔɔ kɛdɔkɔ baang ka kikupmɛnɛ. Balɔɔt a kɛkaan ’sɔng baang balɔk bamii batul kazzi la Jesus la balɔɔt a kɔssɛ ammɛ, bazzi. 16Bakopolo-Lafɔɔ balɔk ba bazzanganɛ Pharisees bayɛn tɛ̀ttɛ̀ Jesus la babɛpɛ-lafɔɔ la batɔkinnamba batulnɛ kazzi bazzi. Ɔzzánga babap balɔɔt a kɔssɛ ammɛ battɛ, “Mbɔng tɛ́ttɛ́ uzzi kazzi la kɛssanga balɔɔt ’bɔng baang?” 17Ɔzzánga Jesus uppyeenɛ, ɔppyɛlɛbɛ kamma ɔttɛ, “Balɔɔt ba ɔppwanɛbɛ, uttula-ittula ba baggyan, ba usinɛbɛ lɛppwa baggyan mung. Mung balɔɔt a latele ba nffu nkkwɔɔ, nffu kɛkkwɔɔ babɛpɛ-lafɔɔ.” 18Ɛkɛtɛ ya nnyɔn ɛdɔkɔ baang, balɔɔt a kɔssɛ a John, Ɔnaang-a-baptizim, la balɔɔt a Pharisees bataanɛ buwɔɔng. Balɔɔt balɔk baffu babap Jesus battɛ, “Mbɔng tɛ́ttɛ́ balɔɔt a kɔssɛ a John, Ɔnaang-a-baptizim, la ba Pharisees bataa buwɔɔng, usseke balɔɔt a kɔssɛ annɔ basi buwɔɔng lɛtaa?” 19Jesus ɔppyɛlɛbɛ kamma ɔttɛ, “Kɔsaapwɔyɔng mung ka balɔɔt ba baffunɛ libbeel bafulanɛ la buwɔɔng ɔɔ? Maaye! Walam a wanavva ka ulenɛ baang la abbɛ, ning baang baala kule. 20Ɔzzànga ɛkɛtɛ ele ka ɛffɔnɛ ya bale basam walam a wanavva bagbata bassekebɛ. Ɛkɛtɛ ’yɔng baang ɛffɔnɛ, vvenɛ bataa buwɔɔng. 21“Ɔlɔɔt wa ɔsamnɛ kɛfaak ubba sa ufaa ɔsal lɛmma ɔtɔm uwɔkɔlɔ ba ule. Ɔzzànga ɔkaangnɛ ning baang tɔttɔt, ufaa kɛfaak ubba vvenɛ ɔnaang lɛmma za ɔtɔm uwɔkɔlɔ lɛggbam lɛgbaa. 22Gɔɔ ɔlɔɔt wa ɔssɛɛnnɛ ufaa batak ka ɔtɔm ɛssɔ ɛkkpa-ɛsɛɛn ba ule. Ɔssɛɛnnɛ ning baang, batak vvenɛ bafɔl bayaak ɛssɔ. Batak la ɛssɔ bɛbɛpɛ. Lutini ’gwɔng, ufaa batak bassɛɛn ka ufaa ɛssɔ ɛkkpa-ɛsɛɛn.” 23Jesus ɔdɔkɔ baang ka ɔssɛnɛ ka kibwoto-isasa ka Kɛtɔm-a-Kɛfɛkɛlɛ. Balɔɔt a kɔssɛ ammɛ badɔkɔ baang ka batɛngɛnɛ lasan-isasa bakkwɔlɔ ifɔɔk bassɛɛn ka eddu bazzi. 24Ɔzzánga balɔɔt a Pharisees balɔɔk la Jesus battɛ, “Ppyɛɛk! Baang balɔɔt a kɔssɛ annɔ babɛpɛbong lafɔɔ ayyɔɔt ka banaangnɛ ning baang ka Kɛtɔm-a-Kɛfɛkɛlɛ tɛ!” 25Jesus ɔppyɛlɛbɛ kamma ɔttɛ, “Ɔzzánga ba ataka akkwɔɔyɔng kɔlɔɔk kwa David ɔnaangnɛ ka ɛkɛtɛ ’yɔng baang ya buwɔɔng busaapmɛnɛ ɔɔ? David la balɔɔt ammɛ badɔkɔ la kɛmɛɛm, 26Ɔzzánga umii ɔmal ka Ggwoon-Ɔlɔɔmɔlɔɔm ɔsam brɛɛd wa balokonɛ Ɔlɔɔmɔlɔɔm uzzi. Nkwɔng kɔnaang ka ɛkɛtɛ Abiathar ɔdɔkɔnɛ Uzzilɛttɔ bassɛɛn-a-luzɔɔm Ɔlɔɔmɔlɔɔm wa lɛbaang. Ulenɛ tɛ̀ttɛ̀ Lafɔɔ ayyɔɔt lalɔɔknɛ, nzang bassɛɛn a luzɔɔm keem bazzinɛ brɛɛd ’wɔng baang kɔnaang bbwak. Ɔzzànga David uzzimɛ, gɔɔ ɔssɛ ɔbɛkɛ unnyi balɔɔt ammɛ.” 27Jesus utele lɛttɔ ɔttɛ, “Ɔlɔɔmɔlɔɔm ɔnaang Kɛtɔm-a-Kɛfɛkɛlɛ kwa budoddo ɔssɛbibit: Ɔssɛbibit kwa Kɛtɔm-a-Kɛfɛkɛlɛ ba ɔlɔɔm. 28Ning ulenɛ kɛttɛ Waan-Ɔssɛbibbit-Ɔkkpɛlɛ ulenɛ Uyini bɛfɛɛn ɔkkpɛlɛ gɔɔ gbaak la Kɛtɔm-a-Kɛfɛkɛlɛ.

will be added

X\