MARK 1

1Uwɔng ulenɛ Kuttu-budoddo a Jesus Christ, Waan-Ɔlɔɔmɔlɔɔm. 2Kussi tɛ̀ttɛ̀ uppyee-kutolo Ɔlɔɔmɔlɔɔm wa ɔzzanganɛ Isaiah ɔkkpɔknɛ, ɔttɛ: “Ɔlɔɔmɔlɔɔm ɔttɛ, ‘Vvenɛ ntɔɔm ɔlɔɔt wa ule ɔlɔɔk kɔlɔɔk anaam, wa ule ɔkɔɔm ɔssɛ ɔkɔngɔwɔyɔng ɔkkɔɔnɛ ɔbama ɛtɔk ulokowɔ.’ 3Ɔlɔɔt ule baang ka kɛmat ka ɔgaganɛ ɔttɛ, ‘Alɔngɔlɔyɔng ɛtɔk alokoyɔng Uyini. Anaangyɔng ɛtɔk bit alokomɛyɔng ɔssɛ!’ ” 4Ɔzzánga John utuma ka kɛmat ɔnaang balɔɔt baptizim la bannyi. Ɔbwɔɔlɔbɛ bɔtɔɔm bwa Ɔlɔɔmɔlɔɔm ɔtɔɔmnɛ ɔttɛ, “Afanyɔng bubbi annyɔɔng isimi, banaangwɔyɔng baptizim. Ɔlɔɔmɔlɔɔm vvenɛ ɔsɔɔkwɔyɔng bubbi annyɔɔng.” 5Balɔɔt ggbadam ba bassinɛ Judea la ubeet a lɛffɛ ’zɔng baang za lɛzzanganɛ Jerusalem bamii bagɔpɔlɔ kɔlɔɔk kwa John ɔlɔɔknɛ. Bayila kamma bubbi abbɛ. Ammɛ ɔnaangbɛ baptizim ka lɔyɔngɔ a Jordan. 6John ɔdɔkɔ ɔwɔkɔlɔ iwɔkɔlɔ ya banaangnɛyɛ la issɔp-ɛsɛɛn. Ɔggbɔ ɛkkpa ya banaangnɛyɛ la ɛkkpa-ɛsɛɛn ka kɛsan. Kazzi ammɛ ulenɛ ogelese la itɔngɔtɔngɔ. 7Ɔyaam ɔbwɔɔlɔ balɔɔt ɔkkpɛlɛ ɔttɛ, “Ɔlɔɔt wa ule ka uffunɛ ukupnɛ ɔttanɛnɛ anaam liggbenge ka itɔk itɔk ɔkkpɛlɛ. Anaam gɔɔ ba nkkɔnɔ nakanaka wa nkkyaamɛnɛ ikkpabukkpɔ. 8Anaam nnaangwɔyɔng baptizim la bannyi, ɔzzànga ammɛ ule ɔnaangwɔyɔng baptizim la Kuyeeng-Ɔlɔɔmɔlɔɔm.” 9Usi lɛmmɛ, Jesus ussi Galilee ka lɛffɛ za lɛzzanganɛ Nazareth uffu. John ɔnaangmɛ baptizim baang ka lɔyɔngɔ a Jordan. 10Eseese Jesus ɔttanɛ ka bannyi, ɔyɛn libat ka liwongolonɛ la Kuyeeng-Ɔlɔɔmɔlɔɔm ka kusininɛ tɛ̀ttɛ̀ lekkpelekete kuvvoongmɛ. 11Lɛmmwɔɔl lissi ka libat lɛttɛ, “Annɔ alenɛ Waan a luppyam anaam, asaapnɛ gaang gaang.” 12Usi lɛmmɛ, Kuyeeng-Ɔlɔɔmɔlɔɔm kɔmanamɛ, umii ka kɛmat. 13Ɔtaa bakang ka lalɔp a bɛtɔm laffa. Satan ɔllɛmɛ. Isɛɛn a kɛmat idɔkɔ baang mgbaa. Keem bayilabɔtɔɔm Ɔlɔɔmɔlɔɔm baffu battelemɛ. 14Bassɛɛnnɛ John mgbakkɔpɔ, Jesus umii Galilee, ɔbwɔɔlɔ Kuttu-budoddo kwa kussinɛ ka Ɔlɔɔmɔlɔɔm. 15Ɔttɛ, “Ɛkɛtɛ ya bbwak ɛffɔbong! Itutum-Ɔlɔɔmɔlɔɔm itii kɛtɛkɛtɛ. akkyaa bubbi annyɔɔng afɔngɔyɔng, appyɛɛ ayilayɔng kwa Kuttu-budoddo Ɔlɔɔmɔlɔɔm.” 16Jesus ɔdɔkɔ baang ka ɔssɛnɛ ka lufoom a libbwe a Galilee, ɔyɛn balap a isɛɛnabannyi baffa, Simon la etele ammɛ Andrew, ka balenɛ ka kɛkaa isɛɛnabannyi la kuggbɔ. 17Jesus ɔlɔɔk unnyibɛ ɔttɛ, “Akupnɛyɔng. Vvenɛ nkopolowɔyɔng tɛ̀ttɛ̀ ale akaayɔng balɔɔt afeeyɔng Ɔlɔɔmɔlɔɔm.” 18Eseese, bakkyaa liggbɔ abbɛ bafɔngɔ, bakupmɛ. 19Umiinɛ ssup ka lusso, ɔyɛn etele la etele, balɔɔt baffa, James la John, bwaan a Zebedee. Badɔkɔ ka kɛbama kuggbɔ kɛkat ka tɔkɔlɔ akkpaat wa abbɛ biini. 20Jesus ɔyɛnbɛ ɛyɛn-ɛyɛn, ɔkkwɔɔbɛ. Bagbata bakɔngɔ abassɛ abbɛ, Zebedee, ka akkpaat la balɔɔt ammɛ, bamii bakup Jesus. 21Jesus la balɔɔt a kɔssɛ ammɛ baffu ka lɛffɛ za lɛzzanganɛ Capernaum. Ka Kɛtɔm-a-Kɛfɛkɛlɛ sa ibaala, Jesus umii ɔmal ka ggwoon a mitin, ubeebɛ kikopolo eseese. 22Balɔɔt ba bappyeenɛ lukopolo ’gwɔng baang, kɔkɛɛlɛbɛ gaang gaang ka ukopolonɛ gbɔɔ bbwak bbwak. Usi tɛ̀ttɛ̀ bakopolo-Lafɔɔ likopolo. Lutini ’gwɔng, ɔdɔkɔ ɔkɔɔm lakke kizzi-lɛttɔ ammɛ biini ukopolo. 23Ka ɛkɛtɛ ’yɔng baang, ɔlɔɔt ipiliza ɔmal ka ggwoon a mitin ’gwɔng baang. Ɔzzɔɔk kibungu ɔttɛ, 24“Jesus, Waan a Nazareth, attina kɛnaangyɛlɛ nang? Mung affuyɛlɛ kɛbɛpɛ ɔɔ? Anaam nsanwɔ lɔsan; Annɔ alenɛ ɔlɔɔt wa ɔsɛlɛnɛ bubbi wa Ɔlɔɔmɔlɔɔm ɔtɔɔmnɛ!” 25Jesus ɔkkpa apiliza ’wɔng baang kiwele ɔttɛ, “Ataa zzum, atta asseke ɔlɔɔt ’wɔng!” 26Apiliza ɔnaangmɛ uffula ɔkɔɔm ubungu gaang gaang tɛ́ttɛ́ ɔttamɛ ka kkwɔɔt. 27Kɔlɔɔk ’kwɔng baang kɔkɛɛlɛ balɔɔt gaang gaang. Bappyɛɛ basikili balɔɔk abbɛ abbɛ battɛ, “Uwɔng ulenɛ ’bɔng? Uwɔng ufaa lukopolo ɔɔ? Ɔlɔɔt ’wɔng mung ɔyanga lakke za ɔlɔɔknɛ unnyi ipiliza, ipiliza innyimɛ latele!” 28Ɔzzánga kuttu a Jesus kɔwaala ifɛɛn ifɛɛn ɔkkpɛlɛ ka ɛkpansi a Galilee. 29Jesus la balɔɔt a kɔssɛ ammɛ, ɔbɛtɛ la James la John, bagbata ka ggwoon a mitin bamii ssɔng ssala Simon la Andrew. 30Abakka wanavva Simon ɔdɔkɔ ka kisi-ɛppwa. Jesus ɔffɔnɛ, ɛffɔ ɛffɔ, batɔk ’kwɔng baang babwɔɔlɔmɛ. 31Jesus umii ka ɛfɛɛn ammɛ, ɔlɔmmɛ ka kɔbɔɔk ufeele. Ɔppwamɛ eseese, ɔnaang kazzi unnyibɛ. 32Ɔffɔnɛ kulele ka livve lilenɛ lipiti, bakɔɔm balɔɔt iffaak ɔkkpɛlɛ la balɔɔt ba bayanganɛ ipiliza baffu ka ɛfɛɛn a Jesus. 33Balɔɔt a lɛffɛ ’zɔng baang baffu babbi ɔkkpɛlɛ ka lusso a ggwoon. 34Jesus uttula balɔɔt ba ɔffaaknɛbɛ bɛssanga iffaak ’byɔng baang ɔkkpɛlɛ, ɔggba ipiliza ɔfɔngɔ kang. Gɔɔ usi ipiliza lɛfɔngɔ izza lɛmmwɔɔl ka ilemɛnɛ lɛkɔɔlɔ. 35Libbessolo, kɛtɔm-a-kɛtɔm, Jesus ufeele ɔtta ka ggwoon. Ɔgbata ka lɛffɛ ’zɔng baang umii ɔssɛɛn luzɔɔm ka ɛfɛɛn ɔlɔɔt usinɛ lile. 36Ɔzzánga Simon la balɔɔt a kɔssɛ ammɛ bamiimɛ kɛggyan. 37Bayɛnmɛnɛ, battɛ, “Ɔlɔɔt la vvɔn ulewɔ ka kɛggyan.” 38Ɔzzánga Jesus ɔppyɛlɛbɛ kamma ɔttɛ, “Vvenɛ imiiyɔng lusso lusso ka laffɛ lalɔk za ballunɛ bakkpit mung. Nggyan kimii nkopolo ka laffɛ ’zɔng bakang ɔgbaa, mung nffu kwakkwɛ.” 39Ɔzzánga Jesus ɔssɛ ukkpit ɛkpansi Galilee. Ukopolo ka idda mitin, ɔkɔɔm ɔggba ipiliza ɔfɔngɔ kang. 40Ɔlɔɔt wa lassɔp za bbɔl bbɔl lanaangmɛnɛ uffu ka ɛfɛɛn a Jesus. Ukun laddu ukkpenge Jesus ɔttɛ uttelemɛ. Ɔttɛ, “Kɔsaapwɔnɛ, anaangnɛ ɔppwanɛ.” 41Bibbe Jesus lɛttɔ, ɔtɔnɔ kɔbɔɔk usingimɛ. Ɔppyɛlɛmɛ kamma ɔttɛ, “Kɔsaapnɛ mung, ɔppwawɔ.” 42Ɔffaal ɔsaal ɔlɔɔt ’wɔng baang, ɔppwamɛ eseese. 43Jesus ɔttamamɛ ɔkkpɛlɛ uvve tɛ́ttɛ́ ɔttɛmɛ ɔgbata ka ulemɛnɛ lɛbwɔɔlɔ ɔttɛ, 44“Gɔpɔlɔ, tɛ̀ttɛ́ abwɔɔlɔ ɔlɔɔt ɔlɔk atum kɔlɔɔk ’kwɔng tɛ. Ɔzzànga amii ssɔng ka ɛfɛɛn a ɔssɛɛn-a-luzɔɔm Ɔlɔɔmɔlɔɔm ɔkkɔɔnɛ ɔppyɛɛkwɔ; anaang lɛtɔm za Moses ɔttɛnɛ anaangyɔng nkwaaning ɔlɔɔt la vvɔn ɔsan ɔttɛ ɔppwawɔbong baning.” 45Ɔlɔɔt ’wɔng baang ɔgbatanɛ, ɔkɔɔm kuttu ’kwɔng baang umii ifɛɛn ifɛɛn. Ɔsak lɛbala, Jesus usi lɛbɛlɛ limii ka tɔkɔlɔ a ssala ka ɛfɛɛn a balɔɔt kkyaakkyaa. Lutini ’gwɔng ɔdɔkɔ ɔppyɛɛ ɔggyan ɛfɛɛn a kɛyɔɔng a kɛyɔɔng ɔtaa, balɔɔt bassi ifɛɛn ifɛɛn ɔkkpɛlɛ baffu bakupmɛ.

will be added

X\