LUKE 4

1Jesus ussi Jordan, ɔppyɛlɛ la Kuyeeng-Ɔlɔɔmɔlɔɔm ka luppyam. Ɔzzánga Kuyeeng-Ɔlɔɔmɔlɔɔm kɔmanamɛ umii ka kasɛkɛ kɛmat. 2Baang ulenɛ ka ɛfɛɛn a Ɔnaang-a-kɛsɛɛm-a-kuyeeng ɔllɛmɛnɛ ka lalɔp a bɛtɔm laffa. Ka ɛkɛtɛ ’yɔng baang ɔkkpɛlɛ, kazzi usi lizzi. Ulenɛ lɛsak lɛtaa, buwɔɔng busaapmɛ. 3Ɔnaang-a-kɛsɛɛm-a-kuyeeng ’wɔng baang ɔlɔɔk la Jesus ɔttɛ, “Alenɛ Waan-Ɔlɔɔmɔlɔɔm, anaang lattaal ’zɔng mung lasikiliwɔ kazzi.” 4Jesus ɔppyɛlɛmɛ kamma ɔttɛ, “Luvva-Ɔlɔɔmɔlɔɔm lɔttɛ, ‘Ɔlɔɔt kwa kazzi kɛyɔɔng ba uddu!’ ” 5Ɔzzánga Ɔnaang-a-kɛsɛɛm-a-kuyeeng ’wɔng baang ɔsammɛ, umii ɔyɔɔmɛ kibeet a vveengodde ka waan ɛkɛtɛ ssup. 6Ɔttɛ, “Vvenɛ nsɔɔkwɔ kibeet ’sɔng mung ɔkkpɛlɛ nnyiwɔ lakke ngbaa. Baggbanɛ bɛfɛɛn ’byɔng ɔkkpɛlɛ linnyi. Nkkwoong mung nsam nsɔɔk ɔlɔɔt ɔkkpɛlɛ wa ɔsaapnɛnɛ. 7Akunnɛnɛ laddu mung ka lusso, vvenɛ nsam bɛfɛɛn ’byɔng ɔkkpɛlɛ nsɔɔkwɔ.” 8Jesus ɔppyɛlɛmɛ kamma ɔttɛ, “Luvva-Ɔlɔɔmɔlɔɔm lɔttɛ, ‘Itele Ɔlɔɔmɔlɔɔm kɛyɔɔng. Ammɛ kɛyɔɔng ulenɛ wa kinnyi latele!’ ” 9Ɔzzánga Ɔnaang-a-kɛsɛɛm-a-kuyeeng ɔsammɛ umii ka Jerusalem, uttele ka ɛfɛɛn ya eggolonɛ gaang gaang ka Ggwoon-Ɔlɔɔmɔlɔɔm. Ɔttɛ, “Alenɛ Waan-Ɔlɔɔmɔlɔɔm, akut attɔ ka lisse ee. 10Luvva-Ɔlɔɔmɔlɔɔm lɔttɛ, ‘Vvenɛ Ɔlɔɔmɔlɔɔm ɔtɔɔm bayilabɔtɔɔm ammɛ baffu bakatwɔ.’ 11Lɔbbal lɛttɛ, ‘Vvenɛ bakimiwɔ la labɔɔk abbɛ nkwaaning asi lɛttɔ, alip bukkpɔ ka lattaal!’ ” 12Jesus ɔppyɛlɛmɛ kamma ɔttɛ, “Luvva-Ɔlɔɔmɔlɔɔm lɔttɛ, ‘Tɛ̀ttɛ́ allɛ Ebinukkpaapi, Ɔlɔɔmɔlɔɔm annɔ’.” 13Ɔnaang-a-kɛsɛɛm-a-kuyeeng ’wɔng baang uvvenɛ Jesus lɛllɛ, ɔgbata, ussekemɛ ka waan ɛkɛtɛ ssup. 14Jesus ɔppyɛlɛ, umii Galilee. Lakke Kuyeeng-Ɔlɔɔmɔlɔɔm ladɔkɔ baang la ammɛ. Kuttu a Jesus kɔwaala ɔkkpɛlɛ ɛkpansi a Galilee. 15Ukopolo ka idda-mitin abbɛ. Balɔɔt ɔkkpɛlɛ babungumɛ. 16Ɔzzánga Jesus ufeele umii Nazareth, ka ɛfɛɛn ya ɔtaanɛ uggbenge. Ka Kɛtɔm-a-Kɛfɛkɛlɛ, ufeele umii ka ggwoon a mitin tɛ̀ttɛ̀ ɛlɔmɛlɔm. Umii ɔkkwɔɔ Luvva-Ɔlɔɔmɔlɔɔm. 17Basam luvva gwa Isaiah ɔkkpɔknɛ kutolo Ɔlɔɔmɔlɔɔm, bannyimɛ. Ɔzzánga ɔkkyaa luvva ’gwɔng baang, ɔyɛn ka ɛfɛɛn ya bakkpɔknɛ battɛ, 18“Kuyeeng-Ɔlɔɔmɔlɔɔm kutii mung la anaam. Ɔlɔɔmɔlɔɔm unnyinɛnɛ lakke, ɔttɛ nyaam Kuttu-Budoddo ammɛ, nbwɔɔlɔ bakee-bwɔɔn. Ɔtɔɔmnɛbong ɔttɛ nmii nyaam nbwɔɔlɔ balɔɔt ɔkkpɛlɛ ba bakaanɛbɛ nttɛ battabong ka kɔlɔɔk; Nnaang bassi-ifim bayɛn. Nsanga balɔɔt ka akama, 19nyaam nbwɔɔlɔ kukkpa kwa Ɔlɔɔmɔlɔɔm ule ɔkkala balɔɔt ammɛ.” Ɔkkwɔɔ kutolo ’kwɔng mung ɔbwɔɔlɔbɛ. 20Uvvenɛ, ɔppyɛlɛ luvva ɔkkɔt, ɔsam unnyibɛ, ɔtaa-ɔtaa. Balɔɔt ɔkkpɛlɛ ba balenɛ ka ɔdda-mitin ’wɔng baang bagbep Jesus lɛppyɛɛk. 21Ammɛ ɔlɔɔk la abbɛ ɔttɛ, “Kɔlɔɔk ’kwɔng kwa Luvva-Ɔlɔɔmɔlɔɔm lɔlɔɔknɛ kɔnaangbong ka lɔkkwɔɔn tɛ̀ttɛ̀ appyeenɛyɔng.” 22Ɔkkpɛlɛ abbɛ baggele, kɔkɛɛlɛbɛ la bayyoyyo lammwɔɔl za ɔlɔɔknɛ. Babap battɛ, “Ɛtɛ! Mung waan a Joseph lissi ɔɔ?” 23Jesus ɔlɔɔk la abbɛ ɔttɛ, “Nsan lɔsan nttɛ, vvenɛ assanɛyɔng ifɛɛt ’yɔng, ‘Uttula-ittula, attulawɔ kɛyɔɔng.’ Vvenɛ assɛ alɔɔkyɔng la anaam attɛyɔng, ‘Anaang kɛssanga kɔlɔɔk sa babwɔɔlɔnɛyɛlɛ ka anaangnɛ ka Capernaum mung ka ɛkpansi annɔ biini.’ 24Nbwɔɔlɔwɔyɔng nttɛ, Uppyee-kutolo Ɔlɔɔmɔlɔɔm latele ba ɔyanga ka lɔkaan ammɛ biini. 25Gɔpɔlɔnɛyɔng! Kule ka lɔkkwɔɔn, bwanavva ba bwalam abbɛ babbenɛ bakɔngɔbɛ badɔkɔ ggbadam ka ɛkɛtɛ Elijah. Usi lɛbɛlɛ liteep ka likkpa likkyaat la kufaak; buwɔɔng buttɔ ka ɛkpansi ɔkkpɛlɛ. 26Gɔɔ Ɔlɔɔmɔlɔɔm Elijah usi lɛtɔɔm umii ka ɔlɔɔt vvɔn gbɔɔ ka Israel. Ɔtɔɔmmɛ umii ka wanavva ubbu vvɔn wa ussinɛ Zarephat ka ɛkpansi Sidon. 27Balɔɔt-ɔffaal badɔkɔ baang ggbadam ka Israel ka ɛkɛtɛ Elisha, uppyee-kutolo Ɔlɔɔmɔlɔɔm. Gɔɔ ɔlɔɔt vvɔn gbɔɔ ka Israel wa ɔppwamɛnɛ usi lile. Ɔdɔkɔ Naaman keem wa ussinɛ Syria ka ɔppwamɛnɛ.” 28Balɔɔt ɔkkpɛlɛ ba badɔkɔnɛ ka ɔdda-mitin ’wɔng baang kutunbɛ ka bappyeenɛ ning baang. 29Bafeele, battulu Jesus, batta ka lɛffɛ ’zɔng baang. Basammɛ bamii ka libat ekpok ka tɔkɔlɔ a ssala abbɛ, nkwaaning bassimɛ bassɛɛn ka ebutu, ɔttɔ ubbe. 30Jesus ufeele ɔfaka kibbi ’sɔng baang, ɔsak, umii ka ɛfɛɛn a kɔsaapmɛnɛ. 31Nkwɔng kɔsaknɛ, Jesus umii ka Capernaum ka Galilee ka ɛfɛɛn a ukopolonɛ balɔɔt ka Kɛtɔm-a-Kɛfɛkɛlɛ. 32Ɔkkpɛlɛ kɔkɛɛlɛbɛ ka itɔk a lilɔɔk sa ukopolonɛbɛ. Lɛmmwɔɔl ammɛ lɛyanga lakke. 33Ɔlɔɔt ɔdɔkɔ baang ka ɔdda wa ɔyanganɛ ipiliza. Ɔlɔɔt ’wɔng baang ubungu ɔgaga. 34Ɔttɛ, “Kaang aggyanbɔng la ayyɔɔt, Jesus wa Nazareth, affuyɛlɛ kɛwwɔɔl ɔɔ? Nsan mung ɔlɔɔt wa alenɛ. Annɔ alenɛ ɔlɔɔt wa doddo wa Ɔlɔɔmɔlɔɔm ɔtɔɔmnɛ.” 35Jesus ɔkkpa ipiliza lɛmmwɔɔl ɔttɛ, “Taa zzum. Atta, assekemɛ!” Ipiliza izzɔɔk ɔlɔɔt ’wɔng baang ka lusso balɔɔt ’bɔng baang ɔkkpɛlɛ. Eseese igbata issekemɛ, bulɔk isimɛ lɛbɛlɛ lɛnaang. 36Utini ɔlɔɔt ɔkkpɛlɛ kɔkɛɛlɛmɛ, balɔɔk abbabbɛ battɛ, “Kɛssanga lɛmmwɔɔl ’zɔng lissi yang? Ɔlɔɔt ’wɔng ɔyanga lakke za ɔggbanɛ ipiliza, itta, isseke balɔɔt.” 37Kuttu a Jesus kɔwaala ka ɛkpansi ’yɔng baang ɔkkpɛlɛ. 38Jesus ɔtta ka ɔdda-mitin umii ka ssala Simon. Abakka wanavva Simon ɔdɔkɔ ka iffaak. Buyili bwa lɛbaang bunaangmɛnɛ. Ɔzzánga balɔɔk kɔlɔɔk a wanavva ’wɔng baang babwɔɔlɔ Jesus. 39Ammɛ Jesus ufeele, umii ubee wanavva ’wɔng baang ka lufoom. Ɔlɔɔk la iffaak ’yɔng baang, ɔttɛ, itta issekemɛ. Buyila busaalmɛ eseese, ufeele unnyibɛ kazzi. 40Kulele kɔnaangnɛ, balɔɔt ɔkkpɛlɛ ba bayanganɛ inngwa ya ɔffaaknɛbɛ bɛssanga iffaak ɔkkpɛlɛ bakɔɔmbɛ baffu ka ɛfɛɛn a Jesus. Jesus utelebɛ labɔɔk ka kkwɔɔt la ɔlɔɔt la ɔlɔɔt, ɔppwabɛ ɔkkpɛlɛ. 41Balɔɔt ggbadam ba bassɛnɛ bayanga ipiliza badɔkɔ baang. Issɛ isaalbɛ la kibungu la kibungu ittɛ, “Annɔ alenɛ Waan Ɔlɔɔmɔlɔɔm!” Jesus ɔkkpa ipiliza ’yɔng kiwele ɔttɛ tɛ̀ttɛ́ izza lɛmmwɔɔl ka isannɛ ittɛ ammɛ ulenɛ Ɔlɔɔt wa Ɔlɔɔmɔlɔɔm ɔsanganɛ. 42Ussolonɛ, Jesus ɔgbata ka lɛffɛ ’zɔng baang, umii ɔtaa ka ɛfɛɛn a balɔɔt basinɛ lile. Keem balɔɔt ɔkkpɛlɛ bassekemɛ ka kɛggyan. Bayɛnmɛnɛ, babum battɛ tɛ̀ttɛ́ ɔgbata ɔkɔngɔbɛ, ɔtaa ɛfɛɛn abbɛ. 43Ɔzzánga ɔlɔɔk la abbɛ ɔttɛ, “Mkkpa kɔnaang, vvenɛ nkopolo Kuttu-budoddo Itutum-Ɔlɔɔmɔlɔɔm ka lɛffɛ lɛlɔk ngbaa. Nkwɔng baang kulenɛ kwa Ɔlɔɔmɔlɔɔm ɔtɔɔmnɛnɛ ɔttɛ nnaang.” 44Jesus ukopolo ka tɔkɔlɔ idda-mitin ka ɛkpansi ’yɔng baang ɔkkpɛlɛ.

will be added

X\